Chapter 464

śrīnārāyaṇa uvāca |
purā kadrūśca vinatā dakṣaputryau tu yoṣitau |
kaśyapasya dharmapatnyau krīḍantyā vekadā śubhe || 1 ||
[Analyze grammar]

uccaiḥśravāṃsaḥ sūryāśvāḥ śabalā dhavalā nu vā |
kiṃrūpāḥ syuritivādaṃ cakrāte kaśyapagṛhe || 2 ||
[Analyze grammar]

kadrūruvāca vinate gatiste vyomnyakhaṇḍitā |
tataḥ sarvaṃ vijānāsi vada rūpaṃ nu kīdṛśam || 3 ||
[Analyze grammar]

paṇaṃ ca kuru kalyāṇi tubhyaṃ yo rocate'naghe |
vinatovāca kalyāṇi kiṃ paṇenātra dakṣaje || 4 ||
[Analyze grammar]

paṇe tu nāvayoḥ saukhyaṃ paṇo'nyataraduḥkhakṛt |
iti jñātvā paṇo naiva kartavyaḥ snehahānikṛt || 5 ||
[Analyze grammar]

tvajjaye kā ca me hānirme jaye kā ca te kṣatiḥ |
dhruvamekasyā vijaye'nyasyāstvavanatirbhavet || 6 ||
[Analyze grammar]

evameva kathayāmi vinā paṇena tat svasaḥ |
kadrūḥ prāha sadā khelavyavahāre paṇaṃ vinā || 7 ||
[Analyze grammar]

āsvādo mānaso naiva raso nāpi prajāyate |
tasmāt paṇaṃ puraskṛtya ramante khelakāriṇaḥ || 8 ||
[Analyze grammar]

bālā api mṛṣā paṇaṃ kurvanti ca hasanti ca |
ramante kālayānārthaṃ paṇaṃ kuru tato vada || 9 ||
[Analyze grammar]

vinatā''ha yathā prītistavā'tra vai |
atha kadrūḥ śaṭhā dhūrtā paṇarūpaṃ jagāda ha || 10 ||
[Analyze grammar]

tasyāstu sā bhaved dāsī parājīyet yā yayā |
asminpaṇe tvimāḥ sarvāḥ sakhyaḥ sākṣiṇya eva nau || 11 ||
[Analyze grammar]

paṇīkṛtya tathā kadrūḥ karburaṃ prāha vājinam |
vinatā dhavalaṃ prāha tato yayatuḥ svālayam || 12 ||
[Analyze grammar]

kadrūḥ kṛṣṇasutān sarpānāhūya prāṇa tatpaṇam |
uvāca yāta satputrā drutaṃ mama nideśataḥ || 13 ||
[Analyze grammar]

śvetaṃ taṃ vājinaṃ putrā valgata pratiromakam |
kṛṣṇavarṇaḥ pradṛśyeta kalmaṣayeta sarvataḥ || 14 ||
[Analyze grammar]

iti śrutvā vaco mātuḥ kecanā''huḥ svamātaram |
vayaṃ naiva gamiṣyāmo mṛṣā doṣabhayānvitāḥ || 15 ||
[Analyze grammar]

anye'pi tu tathā prāhurdoṣo viśvāsanāśanam |
anṛtaṃ narakadvāraṃ doṣaṃ kurmo na tad vayam || 16 ||
[Analyze grammar]

apare'pi svabandhūnāṃ snehaṃ mātṛsvasustathā |
puraskṛtya niṣedhaṃ tatkāryaṃ'kurvan nayānvitāḥ || 17 ||
[Analyze grammar]

tānsarvānuragī kadrūḥ śaśāpa krodhaśevadhiḥ |
tārkṣyabhakṣyāḥ sadā santu ye madvacovirodhinaḥ || 18 ||
[Analyze grammar]

iti śāpapradagdhāste yayuḥ pātālamāśrayam |
athānye bālakāstvāsan mātṛsnehasamākulāḥ || 19 ||
[Analyze grammar]

te matvā mātṛvacanaṃ yayuḥ sūryāśvamambare |
vavalgire parito'śvaṃ cakrurnīlaṃ sukarburam || 20 ||
[Analyze grammar]

atha sūryasya tāpena dagdhāste tvāyayurgṛham |
mātaraṃ prāha tatsarvaṃ tadā kadrūstu rāhukam || 21 ||
[Analyze grammar]

samāhūya samarcyā'pi sūryatāpavināśakam |
suyojanaṃ samādiśya parvaṇi rāhuṇā''vṛtam || 22 ||
[Analyze grammar]

gatvā sarpā arkavāhaṃ vavalgire samantataḥ |
vinatāpṛṣṭhamāruhya kadrūryayau divaṃ yadā || 23 ||
[Analyze grammar]

tābhyāṃ turaṃgamo'darśi karburo nīlavarṇakaḥ |
vinatā prāha dhavalo mayā vyaloki vai muhuḥ || 24 ||
[Analyze grammar]

tava bhāgyodayādaśvaḥ karburo'dya vilokyate |
astu yathā tathā bhāvi bhāgyaṃ kena nivāryate || 25 ||
[Analyze grammar]

vidhirbalīyān sarvatra śvetaṃ nīlāyate'pi yat |
adṛṣṭaṃ yādṛśaṃ yatra bhogyatvenopatiṣṭhati || 26 ||
[Analyze grammar]

pratikūlaṃ prajāyet sānukūlamapi drutam |
iti dṛṣṭvā nīlamaśvaṃ parābhūtā hi pakṣiṇī || 27 ||
[Analyze grammar]

kadrūgṛhasthitā nityaṃ tasyā dāsyaṃ sadā'karot |
garuḍastāṃ tathābhūtāṃ dṛṣṭvā dāsīṃ svamātaram || 28 ||
[Analyze grammar]

prāha mātaḥ kathaṃ tvetaddāsyaṃ vai prohyate tvayā |
dhik tānsutānbaliṣṭhāṃstu yanmātā tvanyakiṃkarī || 29 ||
[Analyze grammar]

putrotpattistadarthā vai yā pitroḥ paripoṣikā |
putrairapoṣitā mātā gardabhyā tulanāyate || 30 ||
[Analyze grammar]

satsu saptasu putreṣu gardabhī bhāravāhinī |
dhik tān putrāṃstu yanmātā teṣu jīvatsu duḥkhinī || 31 ||
[Analyze grammar]

varaṃ vandhyātvamevā'syā yatsutā vandhyakarmiṇaḥ |
kleśitaṃ jananījaṭharaṃ yena mātā na modate || 32 ||
[Analyze grammar]

mātā lakṣmīrjanmadātrī nijasvatvapradāyinī |
sā duḥkhāt tāritā yairna teṣāṃ janma nirarthakam || 33 ||
[Analyze grammar]

mayi sattve baliṣṭhe ca yadi mātā'tiduḥkhinī |
kiṃ balaṃ me praśastaṃ vai nārakaṃ tat smṛtaṃ valam || 34 ||
[Analyze grammar]

api pāpakṛtaḥ putrā yadi rakṣanti mātaram |
taranti mātṛtīrthena sevayā toṣitena te || 35 ||
[Analyze grammar]

na yajñā na vrataṃ jāpyaṃ dānaṃ na cāpi dakṣiṇā |
mātṛsevāśatāṃśatvaṃ prāpnuvanti kadācana || 36 ||
[Analyze grammar]

api vighnasahasrāṇi yamadūtā'yutāni ca |
viyanti dūrato mātuḥ sevayā''śīrbhireva hi || 37 ||
[Analyze grammar]

itiputravacaḥ śrutvā vinatā bhaktabālakam |
provācā'haṃ purā dāsyaṃ kadrvāḥ prāptā'smi vai paṇe || 38 ||
[Analyze grammar]

aśvaḥ sūryasya dhavalo mayoktaśca tayā tataḥ |
karbura ityabhihitastatastatputrakaiḥ khalu || 39 ||
[Analyze grammar]

gatvā'śvaścitritaḥ kṛṣṇaścāhaṃ dāsītvamāgatā |
yasmin kāle hyabhīṣṭaṃ ca tasyā dravyaṃ dadāmi cet || 40 ||
[Analyze grammar]

tadā dāsītvavigamaṃ prāpsye pṛccha tu sarpiṇīm |
garuḍo vinatāṃ natvā kadrūṃ natvā punaḥ punaḥ || 41 ||
[Analyze grammar]

papraccha mātṛdāsītvamokṣadaṃ kadrukāṃ hi saḥ |
kadrūḥ prāha sudhāṃ dehi bhaved dāsītvamokṣaṇam || 42 ||
[Analyze grammar]

garuḍastatsamākarṇya samāpṛcchya tu mātaram |
saṃsmṛtya śrīkṛṣṇanārāyaṇaṃ yayau sa kaśyapam || 43 ||
[Analyze grammar]

taṃ jagāda sudhārthaṃ svayātrāṃ taṃ prāha kaśyapaḥ |
svargalokasya vai cordhvaṃ nidhānaṃ devabhojanam || 44 ||
[Analyze grammar]

amṛtaṃ vartate devabhṛtyaiścakreṇa rakṣitam |
gaccha śīghraṃ kṛṣṇanārāyaṇaṃ smṛtvā jayo bhavet || 45 ||
[Analyze grammar]

jagāmākāśamāviśya garuḍaḥ pitṛvākyataḥ |
yatrā'mṛtanidhānaṃ taddṛṣṭvā mumoda bhaktarāṭ || 46 ||
[Analyze grammar]

kṛṣṇanārāyaṇaṃ smṛtvā kośādhyakṣān dadarśa saḥ |
pakṣavātena tānsarvān vidhūya sarvaśo balī || 47 ||
[Analyze grammar]

dadarśa kartarīyantramamṛtopari saṃsthitam |
bhramamāṇaṃ bahuvegāt sudarśanasamaṃ mahat || 48 ||
[Analyze grammar]

api spṛśantaṃ kamapi bhedayatyeva khaṇḍaśaḥ |
kṣaṇaṃ vicārya garuḍaḥ sūkṣmāṇutvamupāgataḥ || 49 ||
[Analyze grammar]

yadyahaṃ mātṛbhakto'smi kṛṣṇanārāyaṇā'nugaḥ |
tadā me rakṣaṇaṃ tvatra karotu bhagavān svayam || 50 ||
[Analyze grammar]

jaritau pitarau yasya bālāpatyaśca nirdhanaḥ |
sādhvī bhāryā ca tatpuṣṭyai doṣo'kṛtye'pi tasya na || 51 ||
[Analyze grammar]

māturviprasya bālasya goḥ patnyāśca gurorapi |
jīvadānasya hetvarthe tvakṛtye nāsti dūṣaṇam || 52 ||
[Analyze grammar]

evaṃ kṛtvā tu cakrasya hyadhobhāgasthitāṃ sudhām |
vilokya kalaśe bhṛtvā pītvā'pi mṛtyunāśinīm || 53 ||
[Analyze grammar]

tataścakraṃ yogabalāt picchenotpāṭya kīlakāt |
bhramihīnaṃ mandavegaṃ sthiraṃ kṛtvā tu yāvatā || 54 ||
[Analyze grammar]

sudhākuṃbhena sahitaḥ samudgacchati tāvatā |
rakṣakāstaṃ vilokyaiva dudruvuḥ pāśahastakāḥ || 55 ||
[Analyze grammar]

pakṣavātena tān sarvān mūrchayitvā'tivegataḥ |
bahiryāto nidhestasmāt tāvatsureśvarādayaḥ || 56 ||
[Analyze grammar]

dūtasmṛtāstatra tūrṇaṃ yuddhāya tvāyayūḥ ruṣā |
mahendrastaṃ sahetirvai prāha kastvaṃ sudhāharaḥ || 17 ||
[Analyze grammar]

tiṣṭha tiṣṭha mahābāho vajreṇa sūdayāmi vai |
śrutvā vākyaṃ harestatra cukopa garuḍastadā || 58 ||
[Analyze grammar]

parākramaṃ darśayasva nayāmi garuḍo'mṛtam |
ityuktaścendra evainaṃ vajreṇa prajaghāna ha || 59 ||
[Analyze grammar]

kuliśasyā'tipātepi na vai kṣubdho mahābalaḥ |
svaṃ moghaṃ kuliśaṃ dṛṣṭvā bhītaścendrastamāha yat || 60 ||
[Analyze grammar]

yadi dāsyasi pīyūṣamidānīṃ nāgamātari |
bhujaṃgāstvamarāḥ sarve kriyante tu tvayā khaga || 61 ||
[Analyze grammar]

pratijñā te bhavennaṣṭā bhojanaṃ te na vai bhavet |
tasmānmā tāṃ sudhāṃ dehi kadrūṃ kuru na cāmṛtām || 62 ||
[Analyze grammar]

itiśrutvā''ha garuḍo nayāmi surarāṭ sudhām |
dāsye kadrūṃ ca mātā me syādadāsī tataḥ param || 63 ||
[Analyze grammar]

śīghraṃ tvayā prahartavyā sudhā na pānatāṃ vajret |
tathāstviti hariḥ prāha yayau kadrūṃ ca pakṣirāṭ || 64 ||
[Analyze grammar]

datvā dāsyaṃ vinirdhūya mātuḥ sa nirṛṇo'bhavat |
atha sarpāṃśca kadrūṃ ca prāha vai pakṣirāṭ svayam || 65 ||
[Analyze grammar]

aśuddhau nahi pātavyā sudhā tvaśuddhatāṃ vrajet |
rasasāmarthyahīnā syāt snātvā'taśca pibantu tām || 66 ||
[Analyze grammar]

ityuktāste yayuḥ snātuṃ śakro jahāra tāṃ sudhām |
āgatya bhujagairnaiva dṛṣṭaṃ tvamṛtabhājanam || 67 ||
[Analyze grammar]

kuśastambe yatra pātraṃ sthāpitaṃ tvāsīdeva tat |
paryalihaṃstatasteṣāṃ jihvāḥ kuśairdvidhā'bhavan || 68 ||
[Analyze grammar]

tadā tu cukruśuḥ sarpāstvamṛtārthaṃ samulbaṇāḥ |
indreṇa tu tadā tvanyaḥ kalaśaḥ kṛtrimaḥ kṛtaḥ || 69 ||
[Analyze grammar]

yatra viṣaṃ sudhāraṃgaṃ pracchannaṃ nihitaṃ kṛtam |
tadādāya papuḥ sarve bindumātraṃ vibhāgaśaḥ || 70 ||
[Analyze grammar]

tānuvāca prasūḥ putrān yuṣmanmukhe sadā sutāḥ |
bindavaḥ khalu tiṣṭhantu no lopaḥ syāt kadācana || 71 ||
[Analyze grammar]

ityāśīrvādamāptāste sarpā yayunijaṃ gṛham |
hṛṣṭāstvamṛtabhrāntyā te nāgāḥ pramuditāstvatha || 72 ||
[Analyze grammar]

tāṃstān garuḍaḥ kṣudhitaścakhāda balavāṃstataḥ |
palāyitāstu te nāgā parvatādiṣvavasthitāḥ || 73 ||
[Analyze grammar]

evaṃ sa garuḍaḥ svasya mātaraṃ kiṃkarīpadāt |
mocayitvā gṛhītvā ca pitrorāśīrvacāṃsi saḥ || 74 ||
[Analyze grammar]

yayau vaikuṇṭhalokaṃ saṃvāhātmako harerabhūt |
harerdāsyaṃ sadā prāpto viṣṇuvatpūjyatāṃ gataḥ || 75 ||
[Analyze grammar]

yanmātā vinatā cāpi bhaktaputraprasūryataḥ |
kaśyapasya sadā mānyā hyabhavat satyasaṃsthitā || 76 ||
[Analyze grammar]

amṛtādāḥ sutāścāsan vinatāyāḥ satīstriyāḥ |
śaṭhāyā viṣavaktrāyāḥ kadrvāstvāsan sutāḥ śaṭhāḥ || 77 ||
[Analyze grammar]

tasmāllakṣmi sadā pālyaṃ pātivratyaṃ harau mayi |
svapratāpena teṣāṃ vai dūrayāmi durantakam || 78 ||
[Analyze grammar]

pitṛbhaktirmātṛbhaktirgurorbhaktiśca tāriṇī |
patibhaktiḥ putrabhaktiḥ satībhaktiḥ sutāriṇī || 79 ||
[Analyze grammar]

bhṛtyabhaktirdevabhaktirbhāryābhaktiśca tāriṇī |
sādhubhaktiḥ kṛṣṇabhaktirmokṣadā mama dhāmani || 80 ||
[Analyze grammar]

sarvadehiṣvahaṃ tvasmi tvayā śaktyā saha dhruvaḥ |
iti matvā mama bhaktiṃ kuryād dehiṣu dehibhiḥ || 81 ||
[Analyze grammar]

samarpayet kṛtaṃ sarvaṃ mayyeva tvāntarasthite |
matprasādātmakaṃ matvā bhakto bhuñjīta nā'nyathā || 82 ||
[Analyze grammar]

nāryāṃ nare paśau vṛkṣe vallyā jaḍe ca cetane |
kṛṣṇanārāyaṇo bhoktā bhogyaṃ ca sarvameva saḥ || 83 ||
[Analyze grammar]

iti matvā tu yo dehī bhuṃkte yat taddhi nirguṇam |
pātivratyamidaṃ proktaṃ mayi sarvātmanā mayā || 84 ||
[Analyze grammar]

evaṃ kṛtvā vrataṃ dehi mucyate nātra saṃśayaḥ |
paṭhanācchravaṇāt tvasya pātivratyaphalaṃ labhet || 85 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne kadrūvinatayoḥ sūryāśvasya karburatvaṃ śvaityaṃ veti paṇe kadrūśāṭhyena vinatāyā dāsītvasya garuḍena pramārjanaṃ kṛtamityādinirūpaṇanāmā catuḥṣaṣṭyadhikacatuśśatatamo'dhyāyaḥ || 464 ||
[Analyze grammar]