Chapter 461

śrīlakṣmīruvāca |
pātivratyaṃ paro dharmaḥ śruto jñātaśca te mukhāt |
nārīdehasya pāvitryaṃ śāśvataṃ kṛtrimaṃ ca vā || 1 ||
[Analyze grammar]

yadvā saṃskārasamprāpyaṃ yadvā vaivāhikaṃ matam |
yathārthaṃ vada me kānta dharmakāryādipuṣṭikṛt || 2 ||
[Analyze grammar]

śrīnārāyaṇa uvāca |
striyaḥ pavitrāḥ satataṃ naitā duṣyanti kenacit |
māsi māsi rajastāsāṃ duṣkṛtānyapakarṣati || 3 ||
[Analyze grammar]

pūrvaṃ striyaḥ surairbhuktāḥ somagandharvavahnibhiḥ |
bhuṃjate mānuṣāḥ paścānnaitā duṣyanti kenacit || 4 ||
[Analyze grammar]

strīṇāṃ śaucaṃ dadau somaḥ pāvakaḥ sarvamedhyatām |
kalyāṇavāṇīṃ gandharvāstena medhyāḥ sadā striyaḥ || 5 ||
[Analyze grammar]

kanyāṃ bhuṃkte rajaḥkāle'gniḥ śaśī lomadarśane |
stanodbhedeṣu gandharvāstatprāgeva pradīyate || 6 ||
[Analyze grammar]

kanyāmabhuktāṃ somādyairdadaddānaphalaṃ bahu |
kanyādānaphalaprepsustasmāddadyādayauvanām || 7 ||
[Analyze grammar]

rajoromastanodbhedā yauvanasya pradarśakāḥ |
aṣṭavarṣā bhaved gaurī navavarṣā tu rohiṇī || 8 ||
[Analyze grammar]

daśavarṣā bhavet kanyā hyata ūrdhvaṃ rajo'nvitā |
kanyādānaṃ śubhaṃ proktaṃ caturdaśasamāya vai || 9 ||
[Analyze grammar]

śayanāsanayānāni kuṇapaṃ strīmukhaṃ kuśāḥ |
yajñapātrāṇi sarvāṇi na praduṣyanti vai kvacit || 10 ||
[Analyze grammar]

vatsaḥ prasravaṇe medhyaḥ śakuniḥ phalapātane |
nāryo ratiprayogeṣu śvā mṛgagrahaṇe śuciḥ || 11 ||
[Analyze grammar]

ajā'śvayormukhaṃ medhyaṃ gāvo medhyāstu pṛṣṭhataḥ |
brahmajñāḥ pādato medhyāḥ striyo medhyāstu sarvataḥ || 12 ||
[Analyze grammar]

balātkāropabhuktā vā corahastagatā'pi vā |
na tyājyā dayitā nārī medhyā'jena vinirmitā || 13 ||
[Analyze grammar]

sādhavo gairikāpūtā rajaḥpūtāśca yoṣitaḥ |
kṛṣṇapūtaṃ jagatsarvaṃ dampatyudvāhapāvanau || 14 ||
[Analyze grammar]

garbhapūtaṃ sadā vīryaṃ janmapūtaṃ tu bālakam |
mantrapūtāḥ sadā śiṣyā dīkṣāpūtāḥ śarīriṇaḥ || 19 ||
[Analyze grammar]

vratapūtāḥ sadā santaḥ patipūto vadhūjanaḥ |
jīvapūtaṃ sadā dugdhaṃ sthānapūtā radādayaḥ || 16 ||
[Analyze grammar]

bhāvapūtā sadā kanyā yuvatī jaraṭhā'thavā |
āpaḥ svabhāvato medhyā medhyo vahniḥ svabhāvataḥ || 17 ||
[Analyze grammar]

vahnirāpo'nilo nārī medhyā vaṃśodbhavāḥ sadā |
tadabhyarcyāḥ suvāsinyo bhūṣaṇācchādanā'śanaiḥ || 18 ||
[Analyze grammar]

bhūtikāmairnarairnityaṃ satkāryeṣūtsaveṣu ca |
ramante devatāstatra syustatra saphalāḥ kriyāḥ || 19 ||
[Analyze grammar]

yatra tuṣyati bhartrā strī striyā bhartā ca tuṣyati |
tatra veśmani kalyāṇaṃ sampadyeta pade pade || 20 ||
[Analyze grammar]

prātikūlye kalatraṃ cennarakeṇāpi kiṃ tataḥ |
dakṣā prajāvatī sādhvī priyavāṇī vaśaṃvadā || 21 ||
[Analyze grammar]

patiprāṇā bhāgavatī sā śrīḥ strīrūpadhāriṇī |
sadā gṛhī sukhaṃ bhuṃkte strī lakṣaṇavatī yadi || 22 ||
[Analyze grammar]

vapurāvartagandhāśca chāyā sattvaṃ svaro gatiḥ |
varṇaścetyaṣṭadhā bodhyā nārīlakṣaṇabhūmayaḥ || 23 ||
[Analyze grammar]

ṣaṣṭiḥ ṣaḍuttarā yoṣidaṃgalakṣaṇasatkhaniḥ |
ādau pādatalaṃ rekhāstato'ṅguṣṭhāṃ'gulīnakhāḥ || 24 ||
[Analyze grammar]

pṛṣṭhaṃ gulmadvayaṃ pārṣṇī jaṃghe romāṇi jānunī |
ūrū kaṭirnitambasphigbhago jaghanabastike || 25 ||
[Analyze grammar]

nābhiḥ kukṣidvayaṃ pārśvodaramadhyavalitrayam |
romālī hṛdyaṃ vakṣo vakṣojadvayacūcukam || 26 ||
[Analyze grammar]

jatruskandhāṃ'sakakṣādormaṇibandhakaradvayam |
pāṇipṛṣṭhaṃ pāṇitalaṃ rekhā'ṅguṣṭhāṃ'gulīnakhāḥ || 27 ||
[Analyze grammar]

pṛṣṭhiḥ kṛkāṭikā kaṇṭhe cibukaṃ ca hanudvayam |
kapolo vaktramadharottarauṣṭhau dvijajihvikāḥ || 28 ||
[Analyze grammar]

ghaṇṭikātāluhasitaṃ nāsikā kṣutamakṣiṇī |
pakṣmabhrūkarṇabhālāni maulisīmantamaulijāḥ || 29 ||
[Analyze grammar]

eteṣvaṃgeṣu nāryo vai parīkṣyante śṛṇu priye |
strīṇāṃ pādatalaṃ snigdhaṃ māṃsalaṃ mṛdulaṃ samam || 30 ||
[Analyze grammar]

asvedamuṣṇamaruṇaṃ bahubhogocitaṃ smṛtam |
rūkṣaṃ vivarṇaṃ paruṣaṃ khaṇḍitapratibimbakam || 31 ||
[Analyze grammar]

śūrpākāraṃ viśuṣkaṃ ca duḥkhadaurbhāgyasūcakam |
cakrasvastikaśaṃkhābjadhvajamīnā''tapatravat || 32 ||
[Analyze grammar]

yasyāḥ pādatale rekhāḥ sā bhavedvai nṛpāṃganā |
madhyāṃgulīgatācordhvarekhā bhogātibhogadā || 33 ||
[Analyze grammar]

sarpamūṣakarekhāstu dāridryaduḥkhadāyikāḥ |
puṣṭonnataḥ śubho'ṅguṣṭho vartulo bahubhogadaḥ || 34 ||
[Analyze grammar]

hrasvavakracipiṭastvaṃguṣṭhaḥ saubhāgyanāśakaḥ |
vidhavā vipulāṃguṣṭhā dīrghāṃguṣṭhā tu durbhagā || 35 ||
[Analyze grammar]

mṛdūnnataghanavṛttāṃgulayaḥ sampadāṃ pradāḥ |
dīrghāṃgulayaḥ kulaṭā kṛśāṃgulayo nirdhanāḥ || 36 ||
[Analyze grammar]

hrasvāṃgulyo hasvajīvā bhugnāṃgulyaḥ śaṭhā matāḥ |
cipiṭāṃ'gulayo dāsyo daridrā viralāṃguliḥ || 37 ||
[Analyze grammar]

parasparasamārūḍhapādāṃgulyastu yoṣitaḥ |
anekavāraṃ vidhavāḥ paranāryaśca tā matāḥ || 38 ||
[Analyze grammar]

yasyāḥ pathi calantyāstu pṛṣṭhe dhūlī samucchalet |
sā pitrośca tathā patyuḥ kulanāśakarī bhavet || 39 ||
[Analyze grammar]

yasyāḥ kaniṣṭhikā bhūmiṃ gacchantyā na parispṛśet |
sā nihatya patiṃ yoṣā dvitīyaṃ kurute patim || 40 ||
[Analyze grammar]

anāmikā tu gacchantyā yasyā bhūmiṃ tu na spṛśet |
patidvayaṃ nihatyaiva tṛtīyaṃ kurute patim || 41 ||
[Analyze grammar]

madhyamāṃgulikā yasyā yāntyā bhūmiṃ na vai spṛśet |
patitrayaṃ nihatyaiva caturthaṃ kurute patim || 40 ||
[Analyze grammar]

anāmikā madhyamā'tihrasvā pativiyoginī |
pradeśinī sadāṃguṣṭhasaṃyuktā kulaṭākarī || 43 ||
[Analyze grammar]

snigdhāḥ samunnatāstāmrā vṛttāḥ pādanakhāḥ śubhāḥ |
unnataṃ cet pādapṛṣṭhaṃ masṛṇaṃ mṛdu māṃsalam || 44 ||
[Analyze grammar]

asvedamaśirāḍhyaṃ ca rājñī bhavenna saṃśayaḥ |
madhyanamraṃ pādapṛṣṭhaṃ sadā dāridryasūcakam || 45 ||
[Analyze grammar]

śirālaṃ tvadhvagatidaṃ romāḍhyaṃ kiṃkarīkaram |
nirmāṃsaṃ cet sudurbhāgyapradaṃ bodhyaṃ hi yoṣitaḥ || 46 ||
[Analyze grammar]

gūḍhau gulphau tu sukhadau vartulau cā'śirālakau |
nīcaiḥsthau śithilau bāhyo durbhāgyadau hi yoṣitaḥ || 47 ||
[Analyze grammar]

samaḥ pārṣṇiḥ suśubhadaḥ pṛthuḥ pārṣṇistu durbhagaḥ |
unnataḥ kulaṭāpārṣṇiḥ pārṣṇirdīrghaḥ suduḥkhadaḥ || 48 ||
[Analyze grammar]

nīrome viśire jaṃghe snigdhe ca kramavartule |
manohare suraktake rājapatnyā mate śubhe || 49 ||
[Analyze grammar]

rājñī bhavedekaromā dviromā sukhabhāginī |
triromā romakūpeṣu vidhavā syānna saṃśayaḥ || 50 ||
[Analyze grammar]

vṛtte sumāṃsale puṣṭe jānunī dharmayoṣitaḥ |
nirmāṃse svairacāriṇyā daridrāyāstu viślathe || 51 ||
[Analyze grammar]

kadalīkarabhākārau masṛṇau dhavalau ghanau |
ūrū vṛttau mṛdū romarahitau viśirau śubhau || 52 ||
[Analyze grammar]

bhūpastrī sudhanāḍhyastrī viduṣī syāt pativratā |
saromoruyutā syādvai vidhavā paragā tathā || 53 ||
[Analyze grammar]

durbhāgyā syāccipiṭorumatī duḥkhamayī sadā |
sachidroruyutā duḥkhabhāginī saśirorukā || 54 ||
[Analyze grammar]

kaṭhinatvagūrumatī dāridryavyāpinī sadā |
caturviṃśatyaṃgulā yā kaṭirvartulamānagā || 55 ||
[Analyze grammar]

samunnatanitambā ca caturasrā kaṭiḥ śubhā |
nimnā natā cipiṭā ca śuṣkā dīrghā tu duḥkhadā || 56 ||
[Analyze grammar]

kaṭiḥ saromā hrasvā tu vidhavātvaprasaṃjikā |
nitambau tūnnatau puṣṭau pṛthū kaṭhinamāṃsalau || 57 ||
[Analyze grammar]

kapitthaphalavadvṛttau ratibhogavivardhanau |
yoniḥ kacchapavistārā gajakuṃbhonnatā śubhā || 58 ||
[Analyze grammar]

vāmonnatā tu kanyādā dakṣonnatā tu putradā |
ākhuromanibharomā guptamadhyā ca vistṛtā || 59 ||
[Analyze grammar]

dṛḍhabandhā dṛḍhataṭonnatā plakṣadalā''yatā |
padmavarṇā svalpaśuṣkā śreṣṭhā saubhāgyavardhinī || 60 ||
[Analyze grammar]

mṛgādikhurarūpāyā vartulā cullikāsamā |
saromā vivṛtāsyā ca lambaśukā'dhamā matā || 61 ||
[Analyze grammar]

śaṃkhāvartasamā garbhadhṛtiyogyā na jāyate |
cipiṭā kharparākārā kiṃkarīkāriṇī sadā || 62 ||
[Analyze grammar]

vaṃśavetasapatrābhā dīrghocchraromasaṃyutā |
atyunnataśukāḍhyā tu yonirnaiva śubhapradā || 63 ||
[Analyze grammar]

dṛḍhonnatataṭā svaccharaktābhā svalpamadhyikā |
antarvalayayuktā tu yoniḥ saukhyapradā sadā || 64 ||
[Analyze grammar]

māṃsacchannordhvā'sthiguptā nimajjadasthirakṣitā |
parito'ntarmāṃsalā tu yoniḥ saukhyapradā sadā || 65 ||
[Analyze grammar]

vikaṭā kuṭilā lambā viśālā śithilāṃ guhā |
kandarā muktamāṃsārdrā sukhadā na kadācana || 66 ||
[Analyze grammar]

bhagabhālaṃ jaghanaṃ tu viśālaṃ tuṃgamāṃsalam |
mṛdulaṃ mṛduromāḍhyaṃ dakṣiṇāvartamuttamam || 67 ||
[Analyze grammar]

vāmāvartaṃ ca nirmāṃsaṃ vakraṃ vaidhavyasūcakam |
jaghanaṃ garbhiṇītulyaṃ lambodaraṃ na śāntidam || 68 ||
[Analyze grammar]

śuṣkaṃ saṃkucitaṃ nimnaṃ jaghanaṃ sāsthi duḥkhadam |
jaghanapārśvagā bastirmṛdvī vipulakomalā || 69 ||
[Analyze grammar]

kiñcicca pronnatā śreṣṭhā yānavāhanadāyinī |
romaśā ca śirālā sā rekhāṃkā naiva śasyate || 70 ||
[Analyze grammar]

gambhīrā dakṣiṇāvartā nābhiḥ syāt sukhasampradā |
vāmāvarttā samuttānā vyaktagranthirna śasyate || 71 ||
[Analyze grammar]

vistṛtakukṣikā sūte sutān bahūn hi bhāminī |
maṇḍukodaravat kukṣiḥ sūtre putraṃ nṛpaṃ satī || 72 ||
[Analyze grammar]

ūrdhvakukṣirbhaved vandhyā valikukṣiḥ satī bhavet |
sāvartakukṣikā dāsī bhavedājanmakiṃkarī || 73 ||
[Analyze grammar]

samamāṃsalamṛdulamagnāsthipārśvaśālinī |
saubhāgyā''nandasuguṇaiśvaryasaukhyavatī bhavet || 74 ||
[Analyze grammar]

saromonnatasaṃdṛśyanāḍikākṛśapārśvalā |
duḥśīlā nirapatyā ca sā bhaved duḥkhasāgarā || 75 ||
[Analyze grammar]

svalpaṃ viśiraṃ mṛdutvagudaraṃ bhogabodhakam |
kuṃbhamṛdaṃgakūṣmāṇḍodaraṃ duṣpūrameva hi || 76 ||
[Analyze grammar]

lambodarī śvaśuraghnī nirapatyā pṛthūdarī |
tanumadhyā tu subhagā valitrayā ratipradā || 77 ||
[Analyze grammar]

ṛjvī tanvī ca romālī yasyāḥ sā śarmanarmadā |
piṃgā vakrā sthūlachinnā romālī dhavavarjitā || 78 ||
[Analyze grammar]

nirlomonnatahṛdayā patisnehapradā sadā |
viśālahṛdayā nārī puṃścalī nirdayā bhavet || 79 ||
[Analyze grammar]

udbhinnaromahṛdayā patihā bhavati ghruvam |
aṣṭādaśāṃgulatatamuro yasyāstu pīvaram || 80 ||
[Analyze grammar]

unnataṃ sukhadaṃ proktaṃ māṃsalaṃ śobhanaṃ varam |
duḥkhadaṃ tu bhavet tadvai romaśaṃ viṣamaṃ pṛthu || 81 ||
[Analyze grammar]

ghanau vṛttau dṛḍhau pīnau samau śastau payodharau |
sthūlāgrau viralau śuṣkau komalau nahi śarmadau || 82 ||
[Analyze grammar]

dakṣinonnatadārḍhyāḍhyakucā putravatī bhavet |
vāmonnatakucā kanyāṃ sūte saubhāgyasundarīm || 83 ||
[Analyze grammar]

araghaṭṭaghaṭītulyau kucau dauḥśīlyasūcakau |
pīvarāsyau sāntarālau pṛthūpāntau na śobhanau || 84 ||
[Analyze grammar]

mūle sthūlau kramakṛśau tīkṣṇāgrau yau payodharau |
prathamaṃ sukhadau paścācchokadau duḥkhakāriṇau || 85 ||
[Analyze grammar]

sundare kaṭhine śyāme vartule cūcuke śubhe |
antarmagne ca vā dīrghe kṛśe kleśasya sūcake || 86 ||
[Analyze grammar]

pīvarābhyāṃ tu jatrubhyāṃ tu dhanadhānyavatī vadhūḥ |
ślathā'sthibhyāṃ tu nimnābhyāṃ viṣamābhyāṃ daridriṇī || 87 ||
[Analyze grammar]

abaddhāvanatau skandhāvadīrghāvakṛśau śubhau |
vakrau sthūlau ca romāḍhyau preṣyavaidhavyasūcakau || 88 ||
[Analyze grammar]

nigūḍhasandhī srastāgrau śubhāvaṃsau susaṃhatau |
vaidhavyadau samuccāgrau nirmāṃsāvatiduḥkhadau || 89 ||
[Analyze grammar]

kakṣe śaste sūkṣmarome tuṃge snigdhe sumāṃsale |
na praśaste svedayukte gambhīre ca śirālake || 90 ||
[Analyze grammar]

hastau raktau māṃsalau niśśirau gūḍhāsthikomalau |
viromāṇau śubhratāmrau saralau satyayoṣitām || 91 ||
[Analyze grammar]

vaidhavyaṃ sthūlaromāṇau hrasvau daurbhāgyakārakau |
dṛśyaśirau tathā rūkṣau kṛṣṇau kleśapradau matau || 92 ||
[Analyze grammar]

abhbhojamukulākāramaṃguṣṭhāṃgulisammukham |
hastadvayaṃ satīnāṃ tu bahubhogaprasūcakam || 93 ||
[Analyze grammar]

mṛdu madhyonnataṃ raktaṃ talaṃ pāṇyorarandhrakam |
śastarekhānvitaṃ śastaṃ svalparekhaṃ śubhaśriyam || 94 ||
[Analyze grammar]

vidhavā bahurekhābhiścā'rekhā tu daridraṇī |
saśire bhikṣukī pāṇyostale vairāgyabodhake || 95 ||
[Analyze grammar]

virome viśire pāṇyoḥ pṛṣṭhe śaste samunnate |
sarome māṃsarahite saśire vidhavāstriyaḥ || 96 ||
[Analyze grammar]

raktā vyaktā gabhīrā ca snigdhā pūrṇā ca vartulā |
kararekhā bhāgyarekhā praśastā yoṣitāṃ matā || 97 ||
[Analyze grammar]

matsyena subhagā sādhvī svastikena dhanapradā |
padmena bhūpateḥ patnī nṛpamātā bhavettu sā || 98 ||
[Analyze grammar]

cakravartistriyāḥ pāṇīौ dakṣiṇāvartasvastikaḥ |
śaṃkhātapatrakamaṭhadhvajacchatrāṇi vāmake || 99 ||
[Analyze grammar]

tulārekhā vaṇikpatnī baddhakośā vaṇikpriyā |
gajavājivṛṣā vāme prāsādaśakaṭe tathā || 100 ||
[Analyze grammar]

yugacihnaṃ tu vāme ced vaiśyapatnī hi sā bhavet |
cāmarāṃ'kuśakodaṇḍaiḥ rājapatnī samīritā || 101 ||
[Analyze grammar]

aṃguṣṭhamūlānnirgatya rekhā yāti kaniṣṭhikām |
sā syānnārī patihantrī ghātinī duḥkhakāriṇī || 102 ||
[Analyze grammar]

triśūlā'sigadāśaktidundubhyākṛtirekhayā |
dānakartrī bhavet sā strī kīrtimatī pativratā || 103 ||
[Analyze grammar]

kaṃkajambūkamaṇḍūkavṛkavṛścikabhoginaḥ |
rāsabhoṣṭrabiḍālāḥ syuḥ karasthā duḥkhadāḥ striyāḥ || 104 ||
[Analyze grammar]

kṛṣṇā danteṣu dīrghā yā miñjarīmukhatastu yā |
rorūyamāṇavadanā khañjāgamanatiryagā || 105 ||
[Analyze grammar]

kṛṣṇacāmpalacaraṇā hanulambamukhī ca yā |
pṛṣṭhabhagnodaraghaṭā kīrtisthānavināśinī || 106 ||
[Analyze grammar]

śubhakṛt saralo'ṅguṣṭho vṛtto vṛttanakho mṛduḥ |
aṃgulyaśca suparvāṇyo dīrghā vṛttāḥ kṛśāḥ śubhāḥ || 107 ||
[Analyze grammar]

tāścipiṭā rūkṣaśuṣkāḥ pṛṣṭharomayujo'śubhāḥ |
atihrasvāḥ kṛśā vakrā viralā raugahetukāḥ || 108 ||
[Analyze grammar]

bahuparvasametāṃgulayo duḥkhapradā sadā |
aruṇāḥ saśikhāstuṃgā vartulāśca nakhāḥ śubhāḥ || 109 ||
[Analyze grammar]

nimnā vivarṇāḥ śuktyābhāḥ pītā dāridryasūcakāḥ |
nakheṣu bindavaḥ śvetāḥ svairiṇītvaprasaṃjakāḥ || 110 ||
[Analyze grammar]

antarnimagnapṛṣṭhāsthiḥ pṛṣṭhiśca māṃsalā śubhā |
romayuktā yadi pṛṣṭhirvaidhavyabodhikā tu sā || 111 ||
[Analyze grammar]

bhugnā natā suśirā ca pṛṣṭhirduḥkhapradāyinī |
ṛjvī kṛkāṭikonnatā samāṃsā śobhanā sadā || 112 ||
[Analyze grammar]

śuṣkāśirālā romāḍhyā viśālā kuṭilā'śubhā |
māṃsalo vartulaḥ kaṇṭhaḥ praśastaścaturaṃgulaḥ || 113 ||
[Analyze grammar]

śastā grīvā trirekhāṅkā cā'vyaktāsthiḥ susaṃhatā |
nirmāṃsā cipiṭā dīrghā śuṣkā nāsti śubhapradā || 114 ||
[Analyze grammar]

sthūlagrīvā tu vidhavā vakragrīvā tu kiṃkarī |
vandhyā syāccipiṭagrīvā hasvagrīvā tu niḥsutā || 115 ||
[Analyze grammar]

cibukaṃ dvyaṃgulaṃ śastaṃ vṛttaṃ pīnaṃ sukomalam |
sthūlaṃ dvidhā vibhaktaṃ saromā''yataṃ na śobhanam || 116 ||
[Analyze grammar]

hanuścibukasaṃlagnā nirlomā sughanā śubhā |
vakrā sthūlā kṛśā hrasvā romaśā na śubhapradā || 117 ||
[Analyze grammar]

pīnau vṛttāvunnatau śastau kapolau supūritau |
nimnau paruṣau romāḍhyau nirmāṃsau sukhadau nahi || 118 ||
[Analyze grammar]

janetṛvadanacchāyaṃ svāmodaṃ vartulaṃ samam |
snigdhaṃ ramyaṃ sumāṃsaṃ prapūrṇaṃ mukhaṃ satīstriyāḥ || 119 ||
[Analyze grammar]

surakto vartulaḥ snigdho madhye rekhāvibhūṣitaḥ |
adharo rājyado madhyādāprāntaṃ kramaśastanuḥ || 120 ||
[Analyze grammar]

kṛśaḥ pralambaḥ sphuṭito rūkṣo daurbhāgyabodhakaḥ |
sthūlaḥ kapiśo vaidhavyakleśadaścā'dharauṣṭhakaḥ || 121 ||
[Analyze grammar]

kiñcinmadhyonnato'romā cikkaṇo bhogado'dharaḥ |
kodaṇḍākārarekhaśca lakṣmīdaścottarādharaḥ || 122 ||
[Analyze grammar]

śuklā dāḍimabījābhāḥ snigdhāścobhayataḥ samāḥ |
stokaṃ samunnatā dantāḥ satīnāṃ dharmayoṣitām || 123 ||
[Analyze grammar]

pītāḥ syāvāḥ sthūladīrghāḥ śuktyābhā viralā radāḥ |
mūlarūkṣā asamā dvipaṃktayo bhāgyavarjitāḥ || 124 ||
[Analyze grammar]

adho'dhikaradā nārī mātṛnāśakarī matā |
vikaṭadantā vidhavā kulaṭā ca pṛthakdatī || 125 ||
[Analyze grammar]

śoṇā mṛdvī sitā jihvā miṣṭeṣṭabhojanā bhavet |
madhye saṃkucitā cāgre vistṛtā duḥkhadā bhavet || 126 ||
[Analyze grammar]

sitā jalamṛtidātrī śyāmā kalahakāriṇī |
māṃsalā dāridryadā ca lambā tvabhakṣyabhakṣiṇī || 127 ||
[Analyze grammar]

viśālā rasanā nityapramādabodhinī matā |
susnigdhaṃ bhūpadmaraṃgaṃ tālu mṛdu praśasyate || 128 ||
[Analyze grammar]

site tāluni vaidhavyaṃ pītaṃ saṃnyāsināṃ bhavet |
kṛṣṇe'patyavihīnā ca rūkṣe bahukuṭumbinī || 129 ||
[Analyze grammar]

kaṇṭhāntarvartinī ghaṇṭī tīkṣṇā raktā ca vartulā |
apralambā śubhā'sthūlā sthūlakṛṣṇā tu duḥkhadā || 130 ||
[Analyze grammar]

hāsya cā'dṛśyadanta ca kiñcitphullakapālakam |
animīlitanetraṃ ca smitaṃ nāryāḥ praśasyate || 131 ||
[Analyze grammar]

samavṛttapuṭā nāsā laghucchidrā śubhāvahā |
sthūlāgrā madhyanimnā connatā nāpi praśasyate || 132 ||
[Analyze grammar]

śukacañcusamavakraprāntā nāsā tu cottamā |
hrasvāgrā raktavarṇāntā nāsā vaidhavyakāriṇī || 133 ||
[Analyze grammar]

cipiṭā kiṃkarīnāsā hrasvā dīrghāṃ kalipriyā |
lalanālocane śastaṃ raktānta kṛṣṇatārake || 134 ||
[Analyze grammar]

dhavale dalavaddīrghe susnigdhe kṛṣṇapakṣmaṇī |
ucchrayākṣirna dīrghāyurvṛttākṣī kulaṭā matā || 135 ||
[Analyze grammar]

meṣākṣī mahiṣākṣī ca cipiṭākṣī na śasyate |
gopiṃgākṣī kāmavegā bahubhogāśrayā bhavet || 136 ||
[Analyze grammar]

pārāvatākṣī duḥśīlā raktākṣī bhartṛghātinī |
duṣṭā gahvaranayanā gajanetrā na śasyate || 137 ||
[Analyze grammar]

puṃścalī vāmakāṇākṣī vandhyā dakṣiṇakarṇikā |
ramaṇī madhupiṃgākṣī dhanadhānyasamṛddhibhāg || 138 ||
[Analyze grammar]

pakṣmabhiḥ sughanaiḥ sūkṣmaiḥ snigdhaiḥ kṛṣṇaiḥ subhāgyabhāk |
kapilairviralaiḥ sthūlainindyakāryakarī matā || 139 ||
[Analyze grammar]

bhruvau suvartule snigdhe kṛṣṇakaṭe pṛthaksthite |
praśaste mṛduromāṇau sutīkṣṇe kārmukākṛtī || 140 ||
[Analyze grammar]

khararomā vistṛtā ca dīrgharomā ca piṃgalā |
saṃhatā ca vikīrṇā ca bhrūrna śastā varastriyāḥ || 141 ||
[Analyze grammar]

karṇau lambau śubhāvartau komalau sukhadau striyāḥ |
śaṣkulīrahitau nindyau śirālau kuṭilau kṛśau || 142 ||
[Analyze grammar]

bhālaḥ śirāvirahito nirlomā'rdhendusannibhaḥ |
animnastryaṃgulo nāryāḥ saubhāgyārogyasaukhyadaḥ || 143 ||
[Analyze grammar]

spaṣṭasvastikarekhaṃ tu lalāṭaṃ rājyadṃ bhavet |
pralambamastakā nārī bhaved devaraghātinī || 144 ||
[Analyze grammar]

śirālocconnamaṇimastakā rogiṇī matā |
sīmantaḥ saralaḥ śreṣṭhaḥ śreṣṭho mauliḥ samunnataḥ || 145 ||
[Analyze grammar]

gajakuṃbhanibhau vṛttaḥ saubhāgyaiśvaryasūcakaḥ |
ghaṭamūrdhā tu vidhavā lambaśīrṣā tu puṃścalī || 146 ||
[Analyze grammar]

viśālamūrdhā dvimūrdhā durbhāgyā bhavatīha vai |
keśāḥ kṛṣṇā mṛdusūkṣmāḥ snigdhā''kuṃcitasāgrakāḥ || 147 ||
[Analyze grammar]

dīrghāḥ saralā bhāsvarāḥ pātivratyasya sūcakāḥ |
paruṣāḥ sphuṭitāgrāśca piśaṃgā laghurūkṣakāḥ || 948 ||
[Analyze grammar]

viralāḥ sthūlakaṭhinā duḥkhadāridryadāyakāḥ |
bhruvorantarlalāṭe vā maśako rājyado mataḥ || 149 ||
[Analyze grammar]

vāme kapole maśakaḥ śoṇo miṣṭānnapānadaḥ |
tilakaṃ dakṣiṇāvarto mālā vā bhramaro'pi vā || 150 ||
[Analyze grammar]

tilaścandro maśako vā lakṣaṇaṃ rājyabhāgyadāḥ |
dakṣakuce raktabindustilo vā sā prasūrbhavet || 15 || || 1 ||
[Analyze grammar]

kanyācatuṣṭayasyāpi putratrayasya vai satī |
vāme kuce tilaḥ śoṇaḥ putraikajananī tu sā || 152 ||
[Analyze grammar]

tato vaidhavyamāpnoti dharmavatī tu sā satī |
guhyadakṣe tilavatī rājamātā bhavet satī || 153 ||
[Analyze grammar]

nāsāgre maśakaḥ śoṇo yasyāḥ sā nṛpabhāminī |
sa cet kṛṣṇaḥ sā patighnī puṃścalī ca bhavet khalu || 154 ||
[Analyze grammar]

nābhyadho maśakaścihnaṃ tilaḥ pativratāstriyāḥ |
gulphadeśe tilaścihnaṃ maśakaśca daridrakṛt || 155 ||
[Analyze grammar]

savye kaṇṭhe kare karme kapole vā tilo'thavā |
maśako vā bhaveccihnaṃ prathamaṃ putradaṃ bhavet || 156 ||
[Analyze grammar]

bhāle triśūlarekhā cedācāryāṇī bhavennṛpī |
suptā jalpati dantāṃśca kaṭāyate kulakṣaṇā || 157 ||
[Analyze grammar]

kare romṇāṃ dakṣiṇāvartastu dharmakaraḥ sadā |
vāmāvarto duḥkhadaḥ syāt kare romṇāṃ striyā api || 158 ||
[Analyze grammar]

nābhau karṇe hṛdi dakṣāvartaḥ praśasta eva saḥ |
pṛṣṭhasya dakṣiṇe dakṣovarto mahāsukhapradaḥ || 159 ||
[Analyze grammar]

pṛṣṭhadaṇḍe nimnadakṣāvartaścāyusutapradaḥ |
yonestu mastake dakṣāvarto rājñītvasūcakaḥ || 160 ||
[Analyze grammar]

sa cet syācchakaṭākāro bahvapatyādisaukhyadaḥ |
bhagārabdhaḥ kaṭiśrāntaścet putrapatināśakaḥ || 161 ||
[Analyze grammar]

udarapucchakau pṛṣṭhāvartau lambau na śāntidau |
ekaḥ sa patihantā syādanyaḥ sa puṃścalīkaraḥ || 162 ||
[Analyze grammar]

kaṇṭhastho dakṣiṇāvarto mato vaidhavyaduḥkhadaḥ |
keśāraṃbhe lalāṭe saḥ kabaryāṃ vā'tikaṣṭadaḥ || 163 ||
[Analyze grammar]

kṛkāṭikāyāṃ kūpe vā yasyā romabhramo bhavet |
savyāvarto'thavā dakṣāvartaḥ sā vidhavā bhavet || 164 ||
[Analyze grammar]

mastake vāmabhāge syādeko dvau vā tadā tu sā |
ādaśāhaṃ patighnī syāt kaṭyāvartā tu puṃścalī || 165 ||
[Analyze grammar]

pṛṣṭhāvartā tu bhartṛghnī nābhyāvartā pativratā |
kulakṣaṇā'pi sadbhaktā devabhaktā satī matā || 166 ||
[Analyze grammar]

tīrthavratatapohomajapadānaparāyaṇāḥ |
satāṃ hareśca kṛpayā pativratāḥ sulakṣaṇāḥ || 167 ||
[Analyze grammar]

sulakṣaṇāḥ satīnāryaḥ svalpāyuṣkamapi priyam |
dīrghāyuṣaṃ prakurvanti tārayanti kulāni ca || 168 ||
[Analyze grammar]

sarvalakṣaṇamūrdhanyaṃ pātivratyaṃ paro vṛṣaḥ |
tadbhaveccellakṣaṇāni sarvāṇi sukhadāni vai || 169 ||
[Analyze grammar]

lakṣaṇāni mayoktāni sukhāya gṛhiṇāṃ priye |
paṭhanācchravaṇāccāsya svajñānaṃ sukhadaṃ bhavet || 170 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne strīpāvitryastrītanusthaśubhā'śubhādisūcakacihnarekhā'ṅgapratyaṃgādiphalanirūpaṇanāmaikaṣaṣṭyadhika |
catuśśatatamo'dhyāyaḥ || 461 ||
[Analyze grammar]