Chapter 443

śrīnārāyaṇa uvāca |
śṛṇu lakṣmi suyajñaḥ sutapasaṃ prāha yattadā |
he mune naśvaraṃ sarvaṃ kadā kathaṃ vadā'tra me || 1 ||
[Analyze grammar]

sādhanaṃ ca tathā tīvraṃ mokṣasya vad tatparam |
iti rājño vacaḥ śrutvā sutapāḥ prāha tattvavit || 2 ||
[Analyze grammar]

śṛṇu rājan prakṛtijaṃ sarvaṃ naśvarameva yat |
pātraṃ ṣaṭpalasaṃbhūtaṃ gabhīraṃ caturaṅgulam || 3 ||
[Analyze grammar]

svarṇamāṣakṛtacchidraṃ daṇḍaiśca caturaṃgulaiḥ |
yāvajjalaplutaṃ pātraṃ tatkālaṃ daṇḍa ityayam || 4 ||
[Analyze grammar]

daṇḍadvayaṃ muhūrtaṃ ca yāmastasya catuṣṭayam |
vāsarastvaṣṭabhiryāmaiḥ pakṣastairdaśapañcabhiḥ || 5 ||
[Analyze grammar]

māso dvābhyāṃ ca pakṣābhyāṃ varṣaṃ dvādaśamāsakaiḥ |
māsena vai narāṇāṃ tu pitṝṇāṃ tadaharniśam || 6 ||
[Analyze grammar]

kṛṣṇapakṣe dinaṃ proktaṃ śukle rātriḥ prakīrtitā |
vatsareṇa narāṇāṃ vai devānāṃ tu divāniśam || 7 ||
[Analyze grammar]

ayanamuttaramaho rātrirvai dakṣiṇāyanam |
yugakramānurūpaṃ ca narādīnāṃ vayo nṛpa || 8 ||
[Analyze grammar]

kṛtaṃ tretā dvāparaṃ ca kaliśceti caturyugam |
catvāri trīṇi dve caikaṃ sahasrāṇi kṛtādikam || 9 ||
[Analyze grammar]

aṣṭaṣaṭcaturdviśatānyeṣāṃ sandhyāṃśakāni vai |
varṣāṇi dve sahasre te dvādaśābdasahasrakam || 10 ||
[Analyze grammar]

caturyugaṃ tato manvantaraṃ yugaikasaptatiḥ |
divase brahmaṇaste tu manavaḥ syuścaturdaśa || 11 ||
[Analyze grammar]

yathā divā tathā rātrau samayo vyeti vedhasaḥ |
aṣṭāviṃśatimanavo'harniśaṃ brahmaṇo yataḥ || 12 ||
[Analyze grammar]

ādyo manurbrahmaputraḥ svāyaṃbhuvo'bhavannṛpa |
saṃprāpya śaṃkarād jñānaṃ kṛṣṇamantraṃ sudurlabham || 13 ||
[Analyze grammar]

samprāpya kṛṣṇadāsyaṃ ca golokaṃ vai jagāma saḥ |
svārociṣo manuścāpi dvitīyo vahninandanaḥ || 14 ||
[Analyze grammar]

priyavratasutau manū tau tṛtīyacaturthakau |
pañcamo raivato jātaścākṣuṣaḥ ṣaṣṭha īritaḥ || 15 ||
[Analyze grammar]

śrāddhadevaḥ sūryasuto vaiṣṇavaḥ saptamo manuḥ |
sāvarṇiḥ sūryatanayo vaiṣṇavo manuraṣṭamaḥ || 16 ||
[Analyze grammar]

navamo dakṣasāvarṇirviṣṇuvrataparāyaṇaḥ |
daśamo brahmasāvarṇirbrahmajñānaviśāradaḥ || 17 ||
[Analyze grammar]

tataśca dharmasāvarṇirmanurekādaśaḥ smṛtaḥ |
jñānī ca rudrasāvarṇirmanustu dvādaśaḥ smṛtaḥ || 18 ||
[Analyze grammar]

dharmātmā devasāvarṇirmanureṣastrayodaśaḥ |
caturdaśo mahājñānī candrasāvarṇirantimaḥ || 19 ||
[Analyze grammar]

yāvadāyurmanūnāṃ syādindrāṇāṃ tāvadeva tu |
caturdaśendrāvacchinnaṃ brahmaṇo dinamekakam || 20 ||
[Analyze grammar]

tāvatī brahmaṇo rātriḥ sā ca brāhmī niśā nṛpa |
tasyāṃ brahmaniśāyāṃ tu kṣudraḥ pralaya ucyate || 21 ||
[Analyze grammar]

devāśca manavaścātra lokā naśyanti vai daśa |
evaṃ triṃśaddivārātrairbrahmaṇo māsa eva tu || 22 ||
[Analyze grammar]

varṣaṃ kalpasahasraṃ tu brahmaṇo jāyate nṛpa |
evaṃ śatābdaparyaṃtaṃ paramāyuḥ prajāpateḥ || 23 ||
[Analyze grammar]

brahmaṇastu nipāte syād vairājakalpa ekakaḥ |
vairājasya śatavarṣamāyustato'sya nāśanam || 24 ||
[Analyze grammar]

dinaṃ tattu mahāviṣṇoḥ sopi varṣaśatasthitiḥ |
tato naśyati pradhānapuruṣasya dinaṃ tvidam || 25 ||
[Analyze grammar]

tasya varṣaśate yāte prakṛtipuruṣasya vai |
dinaṃ bhavati vāpi śatavarṣottaraṃ layaḥ || 26 ||
[Analyze grammar]

akṣare brahmaṇi līno jāyate māyayā saha |
prākṛtiko layaḥ so'yaṃ rādhā prakṛtirucyate || 27 ||
[Analyze grammar]

ātyantiko layo mokṣaḥ sa cātidurlabho nṛpa |
etacchrutvā suyajñaśca papraccha sādhanaṃ drutam || 28 ||
[Analyze grammar]

mokṣadaṃ kiṃ yena yāmi golokaṃ dhāma śāśvatam |
sutapāḥ prāha suyajña bhaja rādhāṃ haripriyām || 29 ||
[Analyze grammar]

kṛṣṇapremamayīṃ yasyā vacaḥ kṛṣṇo'pi manyate |
śīghraṃ yāsyasi golokaṃ tadanugrahasevayā || 30 ||
[Analyze grammar]

śrīkṛṣṇaṃ tu samārādhya cireṇa yānti godivam |
kṛpārādhāṃ tu saṃsevya bhaktā yāntyacireṇa vai || 31 ||
[Analyze grammar]

rādhāṃśā tava patnī ca nāmnā rāseśvarīti yā |
pativratā mahābhāgā gūḍhā rādhā'sti sā'tra te || 32 ||
[Analyze grammar]

patnīvrataṃ paraṃ kṛtvā pālayitvā tu tadvṛṣān |
vijeṣyasi mahāmṛtyuṃ rādhāṃśāyāḥ pratāpataḥ || 33 ||
[Analyze grammar]

rājan kathayituṃ caitat tvāgamo me viśeṣataḥ |
rāseśvarīṃ tava patnīṃ rādhāṃśāṃ dharmato bhaja || 34 ||
[Analyze grammar]

sā hyeṣā vartate sādhvī paśya divyena cakṣuṣā |
ityuktvā nṛpaternetre pasparśa tāvadeva saḥ || 35 ||
[Analyze grammar]

dadarśa rādhikārūpāṃ satīṃ patnīṃ pativratām |
āścaryacakito bhūtvā rādhāmantramavāpa saḥ || 36 ||
[Analyze grammar]

oṃ śrīṃ hrīṃ klīṃ rāseśvaryai rādhikāyai svāhā iti |
atha patnīvratadharmān śuśrāva sutapomukhāt || 37 ||
[Analyze grammar]

yathā kṛṣṇastathā rādhā rādhāṃśāḥ kṛṣṇamūrtayaḥ |
pātivratyaṃ yathā kṛṣṇe nārīdehasya sammatam || 38 ||
[Analyze grammar]

tathā patnīvratadharmaḥ kṛṣṇarādhāṃśasaṃbhave |
prātarutthāya sadbhaktaḥ saṃsmared rādhikāṃ muhuḥ || 39 ||
[Analyze grammar]

saṃsnāpayetpūjayecca śṛṃgārayet subhojayet |
sevayettoṣayediṣṭapradānaiḥ rañjayenmuhuḥ || 40 ||
[Analyze grammar]

nīrājayet saṃstuvīta svāpayet samavāhayet |
eva rādhāṃ sadā patnīvrataḥ kṛṣṇātmikāṃ bhajet || 41 ||
[Analyze grammar]

na gṛhaṃ gṛhamityuktaṃ gṛhiṇī gṛhamucyate |
rādhāṃśayā tayā smṛddhaṃ satejaskaṃ praśobhate || 42 ||
[Analyze grammar]

gṛhiṇī gṛhalakṣmīrvai tāṃ vinā gahvaraṃ gṛham |
gṛhiṇyā tu tamovyāptamapi prakāśate gṛham || 43 ||
[Analyze grammar]

api śvā gṛhiṇīyukto grāmasiṃhaḥ prajāyate |
api raṃkaḥ sabhāryastu kuṭumbitvena gaṇyate || 44 ||
[Analyze grammar]

api rājā priyāśūnyo nirvāsyate striyāḥ gṛhāt |
kiṃkaro'pi gṛhamadhye rakṣyate gṛhiṇīyutaḥ |
yasya nāsti satī bhāryā gṛheṣu priyavādinī |
araṇyaṃ tena gantavyaṃ yathā'raṇyaṃ tathā gṛham || 46 ||
[Analyze grammar]

suśīlā sundarī bhāryā nāsti yatra gṛhe hyaho |
araṇyaṃ tena gantavyaṃ yathā'raṇyaṃ tathā gṛham || 47 ||
[Analyze grammar]

yasya pativratā nāsti patisādhyā suśāsitā |
priyāhīnaṃ gṛhaṃ śuṣkaṃ pūrṇaṃ baṃdhudhanairapi || 48 ||
[Analyze grammar]

bhāryāśūnyā vanasamāḥ sabhāryāsti gṛhā gṛhāḥ |
gṛhiṇī tu gṛhe daive paitrye karmaṇi puṇyadā || 49 ||
[Analyze grammar]

bhāryāmūlaḥ kriyāḥ sarvā bhāryāmūlā gṛhāstathā |
bhāryāmūlaṃ sukhaṃ sarvaṃ gṛhasthānāṃ gṛhe nṛpa || 50 ||
[Analyze grammar]

bhāryāmūlāḥ sadā harṣo bhāryāmūlaṃ ca maṃgalam |
bhāryāmūla ca saṃsāro bhāryāmūlaṃ ca saurabham || 51 ||
[Analyze grammar]

sarvaratnapradhānaṃ tu strīratnaṃ gṛhamedhinām |
yathā jalaṃ vinā padmaṃ tathā bhāryā vinā gṛham || 52 ||
[Analyze grammar]

sā tu patnī tava saudhe rādhāṃśā vidyate nṛpa |
pativratā suśīlā ca satī bhogavatī priyā || 53 ||
[Analyze grammar]

patnīvratena dharmeṇa rādhā kṛṣṇena pūjitā |
stutā tathā bhavāṃścāpi pūjāṃ karotu sādaram || 54 ||
[Analyze grammar]

sā tuṣṭā hyacirāt svargaṃ mokṣaṃ dhāma pradāsyati |
suyajñaḥ prāha bahudhā śrutaḥ pativratāvṛṣaḥ || 55 ||
[Analyze grammar]

patnīvratavṛṣaḥ kīdṛk śrotumicchāmi me vada |
sutapāścāha rājendra patnīṃ vibhāvya caiśvarīm || 56 ||
[Analyze grammar]

prātaḥ patnīṃ smarennityaṃ dhyāyetpatnīṃ haripriyām |
prātaḥ patnīmukhaṃ paśyet paścādanyān vilokayet || 57 ||
[Analyze grammar]

patnyāḥ snānaṃ tviṣṭajalaiḥ kārayecca suveṣayet |
keśaprasādhanaṃ tasyāḥ kārayed dāsikādibhiḥ || 58 ||
[Analyze grammar]

yadvā patiḥ svayaṃ tasyāḥ keśādīn samprasādhayet |
śṛṃgārayet sugandhādyaiḥ saubhāgyarūpamarpayet || 59 ||
[Analyze grammar]

sandhārayed vibhūṣāśca binduṃ kajjalamarpayet |
bhojayejjalapānādi dadyāttāmbūlamarpayet || 60 ||
[Analyze grammar]

yadyadiṣṭaṃ tu tatsarvaṃ pradadyād rañjayet sadā |
śarīramardanaṃ kuryāt śramaṃ niḥsārayet striyāḥ || 61 ||
[Analyze grammar]

prakṣālayettu mālinyaṃ tathā gātrāṇi vāhayet |
miṣṭā''khyānakathāśrāvairjñānaṃ tasyai prakāśayet || 62 ||
[Analyze grammar]

kārayennavadhā bhaktiṃ śrīkṛṣṇasya parātmanaḥ |
śayyāṃ sukhakarīṃ dadyād ratyā saṃsukhayed satīm || 63 ||
[Analyze grammar]

anyayā na prabhāṣeta nānyāṃ kvacit samaspṛśet |
anyāmukhaṃ na vai paśyennānyāvārtāṃ samācaret || 64 ||
[Analyze grammar]

nānyāṃ saṃcintayet kvāpi nānyāsaktamanā bhavet |
gṛhṇīyānnā'parāgandhaṃ śṛṇuyānnā'parāsvaram || 65 ||
[Analyze grammar]

anyācaritanṛtyādi patnīvrato na lokayet |
anyādehastanādyaṃ tu na paśyedvai kadācana || 66 ||
[Analyze grammar]

anyādattaṃ jalānnādi gṛhṇīyānna kadācana |
anyāspṛṣṭasvavastrāditailādi naiva dhārayet || 67 ||
[Analyze grammar]

anyā'rpitaṃ supuṣpādi dugdhādyapi na saṃgraset |
anyayā saha yānādau niṣīdenna kadācana || 68 ||
[Analyze grammar]

anyayā saha mārgādau caletsārthatayā'pi na |
kṣetrodyānā''paṇādau tvanyayā sākaṃ na saṃviśet || 69 ||
[Analyze grammar]

kāryaṃ nā'pyanyayā sārdhaṃ kuryāt patnīvrato janaḥ |
samājotsavaśālādau parāyogaṃ na vai caret || 70 ||
[Analyze grammar]

parādattaṃ na vai kiñcidupabhuñjyāt kadācana |
pārakyānāṃ maṇḍaleṣu tiṣṭhennaiva kadācana || 71 ||
[Analyze grammar]

pārakyāsnānabhūmyādau snānādyarthaṃ na sañcaret |
pārakyārūpasaundaryaṃ na paśyenna vicintayet || 72 ||
[Analyze grammar]

parayā randhitaṃ bhojyaṃ na saṃgraset kadācana |
na ca rātrau bahirgacchennā'nyāgṛhagato bhavet || 73 ||
[Analyze grammar]

nārīmārgādiṣu rājanna tiṣṭheccatvarādiṣu |
vādyaṃ nākarṇayennāryā vāditaṃ parayotsave || 74 ||
[Analyze grammar]

nānyāṃ kaṭākṣayet kvāpi saṃketaṃ jñāpayenna ca |
nānyāṃ praśaṃsettasyāśca guṇagānaṃ na cācaret || 75 ||
[Analyze grammar]

evaṃ vai sarvathā tyāgaṃ svīyā'nyāyāḥ samācaret |
tadvai patnīvrataṃ puṣṭiprāptaṃ bhavati mokṣadam || 76 ||
[Analyze grammar]

svapatnīṃ krūrayennaiva tāḍayenna kadācana |
krūraṃ saṃśrāvayennaiva ruṣā'vamānaṃ nācaret || 77 ||
[Analyze grammar]

pariśrameṇa yatnena vyāpāreṇā'nyakarmaṇā |
kṛṣyā kaiṃkaryakāryeṇa dravyamutpādya naitikam || 78 ||
[Analyze grammar]

sampoṣayennijāṃ patnīṃ bhakṣye bhedaṃ na cācaret |
vilāse raṃjane dāsye krīḍāyāṃ tāṃ sutoṣayet || 79 ||
[Analyze grammar]

patnyā dattaṃ jalānnādi premṇā praśaṃsya bhakṣayet |
kṣārādhikyādidoṣāṃstu gaṇayenna kadācana || 80 ||
[Analyze grammar]

amṛtaṃ ceti matvaiva gṛhṇīyānnā'vamānayet |
akāmāṃ balayennaiva cārtavīṃ na parityajet || 81 ||
[Analyze grammar]

suptāṃ prabodhayennaiva sakāmāṃ na tiraścaret |
tṛṣṇayā vā prasahyāpi nodvejayetkadācana || 82 ||
[Analyze grammar]

yathā yathā prasannā syāttathā tathā samācaret |
gṛhavastu ca niḥśeṣaṃ patnyai samarpayed vratī || 83 ||
[Analyze grammar]

ātmānaṃ cārpayettasyai sadā sammānamācaret |
mānaṃ rakṣet suṣṭhu patnyāstvaṃkāreṇa na vai vadet || 84 ||
[Analyze grammar]

svabhāvaiḥ pīḍayennaiva nā'nyāyena hyadhikṣipet |
nā''krośellaṃghayennaiva patnīvacaḥ kadācana || 85 ||
[Analyze grammar]

nityaṃ patnīṃ mahādevīṃ matvā kuryānnamaḥkṛtim |
viṣayān sarvato dadyānnāstīti saṃvadenna vai || 86 ||
[Analyze grammar]

sevādharme cākramādau na nirmanaskatāṃ vrajet |
yathā nārāyaṇo lakṣmīṃ vinā bhuṃkte na vai kvacit || 87 ||
[Analyze grammar]

yathā kṛṣṇaḥ satīṃ rādhāṃ vinā bhuṃkte na vai kvacit |
tathā patnīṃ vinā kiñcit kvacid bhuṃjyānna vai vratī || 88 ||
[Analyze grammar]

svameḍhrādi vinā patnīṃ nānyayā''lokitaṃ bhavet |
anyayā cumbitaṃ na syāt svakapolā''nanādyapi || 89 ||
[Analyze grammar]

nā''kṛṣṭaṃ hṛd bhavet kvā'pyanyayā varteta vai tathā |
svapne'pi na spṛśedanyāṃ tathā'nyāṃ nā'valokayet || 90 ||
[Analyze grammar]

dharmakāryādikaṃ daivaṃ paitryaṃ patnyā sahā'caret |
na gopayed gṛhakāryaṃ patnyāṃ patnīvrataḥ kvacit || 91 ||
[Analyze grammar]

patnyai nivedya yāvadvai kāryaṃ kuryānna caikalaḥ |
patnyāstu sammatiṃ tyaktvā dharmavratādi nācaret || 92 ||
[Analyze grammar]

patnītantro bhavennityaṃ śreyo'rthaṃ narakāya na |
mokṣārthaṃ tadadhīnaḥ syānnarakārthaṃ tu na kvacit || 93 ||
[Analyze grammar]

saukhyārthaṃ mānayennityaṃ na kleśārthaṃ kadācana |
viśvāsapātrikāyāṃ viśvasenna kulaṭādiṣu || 94 ||
[Analyze grammar]

prāṇān dhanāni ratnādi kuryāt tatkarasāt patiḥ |
patnīṃ tvardhaṃ sadā patyuḥ patnyāstvardhaṃ tathā patiḥ || 95 ||
[Analyze grammar]

patistasyā darīkukṣau putrarūpaḥ prajāyate |
bhuktā patnī prasavitrī prasūḥ poṣṭrī tataśca mā || 96 ||
[Analyze grammar]

sadā pālyā sadā poṣyā sadā rakṣyā suvastubhiḥ |
patnyāṃ kāmasya santoṣaḥ śaucaṃ tasyāṃ nu mehataḥ || 97 ||
[Analyze grammar]

patnyāḥ sevā tapaḥ śreṣṭhaṃ tayā vārtā kathā'mṛtam |
īśvariṇyā rūpamātre praṇidhānaṃ priyasya vai || 98 ||
[Analyze grammar]

ahiṃsanaṃ tadadrohaḥ satyaṃ tasyāmagopanam |
patnyāmekahṛdayyatvamasteyaṃ naiva vañcanam || 99 ||
[Analyze grammar]

patnyāṃ yatheṣṭaṃ kāmārtho brahmacaryaṃ gṛhāśritam |
patnyarthaṃ sarvavastūnāmādānaṃ cā'parigrahaḥ || 100 ||
[Analyze grammar]

suptāyāṃ tu prasuptaḥ syājjāgṛtāyāṃ prabodhavān |
snātāyāṃ cāplave tuṣṭo bhuktāyāṃ bhojanapriyaḥ || 101 ||
[Analyze grammar]

pītāyāṃ pānaraktaśca krīḍitāyāṃ prakrīḍakaḥ |
śṛṃgāritāyāṃ śobhāḍhyo duḥkhitāyāṃ suduḥkhavān || 102 ||
[Analyze grammar]

asvacchāyāṃ nātiśubhraḥ sukhitāyāṃ sukhānvitaḥ |
rugṇāyāṃ tu manomāndyaḥ protphullāyā praphullitaḥ || 103 ||
[Analyze grammar]

sasmitāyāṃ susmitaśca tṛptāyāṃ tṛptimān patiḥ |
cintitāyāṃ bhagnamanā vratasthāyāṃ vratānvitaḥ || 104 ||
[Analyze grammar]

tapaḥsthāyāṃ tapoyuktaḥ sukṛtāyāṃ susukṛtī |
mṛtāyāṃ cānumaraṇaścitāyāṃ tvanusaṃjvalet || 105 ||
[Analyze grammar]

evaṃ patnīvratavyāptaḥ patiḥ santārayet kulam |
ekottaraṃ śataṃ svasya patnyāścoddharate tathā || 106 ||
[Analyze grammar]

bhaja rāseśvarīṃ patnīṃ rādhikāṃśāṃ sadā nṛpa |
oṃnamaḥ śrīkṛṣṇanārāyaṇyai patnyai namo'stu te || 107 ||
[Analyze grammar]

evaṃ naman mahāsārvabhaumapatnīvrataṃ caran |
jagaduddhārayan sarvaṃ yātyante brahma cākṣaram || 108 ||
[Analyze grammar]

patnīhastajalaṃ pītvā svargaloke mahīyate |
patnīpātragataṃ putraṃ prāpya pitṝṇavarjitaḥ || 109 ||
[Analyze grammar]

patnīyānaṃ paraṃ prāpya paraṃ padamavāpyate |
yāvanti jalatīrthāni bhūmyaraṇyādrijāni vai || 110 ||
[Analyze grammar]

tāni sarvāṇi patnyāṃ vai pativratāyāṃ śerate |
dharmo vrataṃ tapo homo japaḥ svādhyāya ānatiḥ || 111 ||
[Analyze grammar]

dānaṃ puṇyaṃ copakṛtiḥ sevā cāśiṣaḥ ityapi |
sarvaṃ patnīśarīre'sti sevitā bhāvato yadi || 112 ||
[Analyze grammar]

sā patyustārikā proktā patistasyāśca tārakaḥ |
dvau tau kulasya sarvasya tārakau bhavabandhanāt || 113 ||
[Analyze grammar]

tasmāt patnīvrataṃ pālyaṃ brahmacaryaṃ tadeva yat |
brahmaprāptikaraṃ śaśvatsukhadhāmapradaṃ yataḥ || 114 ||
[Analyze grammar]

sarve devāḥ samunayo devyaḥ sādhvyaḥ pativratāḥ |
patnīdehe vasantyeva brahma vasati tatra ca || 115 ||
[Analyze grammar]

patnīvrataśca puruṣo viṣṇurūpo na saṃśayaḥ |
yathā kṛṣṇo nirguṇaśca sarvajīvādhidevatā || 116 ||
[Analyze grammar]

sarveṣāṃ tārako nirlepaśca karmabhireva saḥ |
tathā patnīvratastvanyoddhārakaḥ parameśvaraḥ || 117 ||
[Analyze grammar]

agnayastaṃ vilokyaiva pratyuttiṣṭhanti bhāvataḥ |
siddhayo yogasāmarthyamaiśvaryāṇi hyaśeṣataḥ || 118 ||
[Analyze grammar]

tatsaṃkalpe saphalāni jāyante kṛṣṇavatsadā |
patnīvrataḥ svayaṃ kṛṣṇo vasatyeva satīvrate || 119 ||
[Analyze grammar]

rāseśvarīṃ satīṃ rājan bhaja rādhāṃśajāṃ priyām |
yathā'bhajad dharmadevaḥ patnīṃ mūrtiṃ priyāvrataḥ || 120 ||
[Analyze grammar]

śatarūpāṃ manuryadvat patnīvratastathā bhaja |
ityuktvā virarāmāsau sutapāḥ kamale priye || 121 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne suyajñasya nṛpateḥ sutapaḥṛṣikṛtapatnīvratadharmopadeśādi nirūpaṇanāmā tricatvāriṃśadadhikacatuśśatatamo'dhyāyaḥ || 443 ||
[Analyze grammar]