Chapter 444

śrīlakṣmīruvāca |
suyajñaḥ sa kathaṃ japtvā stotraṃ patnīvrato nṛpaḥ |
kimātmakaṃ tapaḥ kṛtvā mokṣamavāpa tadvad || 1 ||
[Analyze grammar]

śrīnārāyaṇa uvāca |
patnīvrataḥ suyajñaḥ sa rādhikā mantramāpa yam |
jajāpa sa puṣkare gatvā patnīyuktastapaḥpriyaḥ || 2 ||
[Analyze grammar]

oṃ rādhāyai svāhā mantraṃ sadā jajāpa bhūpatiḥ |
dhyānaṃ cakāra rādhāyāḥ pūjāṃ cakre samādarāt || 3 ||
[Analyze grammar]

śvetacampakavarṇābhāṃ koṭicandrasamaprabhām |
śaratpārvaṇacandrāsyāṃ śaratpaṃkajalocanām || 4 ||
[Analyze grammar]

pakvabimbā'dharāṃ muktādantapaṃktivirājitām |
īṣaddhāsyaprasannāsyāṃ ratnamālādibhūṣitām || 5 ||
[Analyze grammar]

vahniśuklāṃśukādhānā bhaktānugrahamaṇḍitām |
ratnakeyūravalayāṃ ratnamañjīrarañjitām || 6 ||
[Analyze grammar]

ratnakuṇḍalasaṃśobhārājatkarṇasubhūṣaṇām |
sūryaprabhābhagaṇḍābhāṃ tejaḥparidhirājitām || 7 ||
[Analyze grammar]

ratnagraiveyakairyuktāṃ kirīṭamukuṭojjvalām |
ratnāṃgulīyakaśobhāṃ ratnapāśakaśobhitām || 8 ||
[Analyze grammar]

mālatīmālyagrathitakabarībhāraśobhitām |
rūpānurūpāvayavāṃ sarvottamāṃgarājitām || 9 ||
[Analyze grammar]

bindutilakabhālāṃ ca pūjitāṃ candanādibhiḥ |
kṛṣṇasaubhāgyasaṃśobhāṃ kṛṣṇaprāṇasvarūpiṇīm || 10 ||
[Analyze grammar]

kṛṣṇabhaktipradāṃ śāntāṃ vaiṣṇavīṃ kṛṣṇasnehitām |
ratnasiṃhāsane rāse sthitāṃ rāseśvarīṃ bhaje || 11 ||
[Analyze grammar]

iti dhyātvā dadau tāṃ vai copacārāṇi ṣoḍaśa |
āsanaṃ vasanaṃ pādyamarghyaṃ gandhānulepanam || 12 ||
[Analyze grammar]

dhūpaṃ dīpaṃ supuṣpaṃ ca snānīyaṃ ratnabhūṣaṇam |
ṣaṭpañcāśatsunaivedyaṃ tāmbūlaṃ vāsitaṃ jalam || 13 ||
[Analyze grammar]

madhuparkaṃ ratnatulyamupacārāṇi ṣoḍaśa |
tathā dadāvaṣṭottaraśataṃ bhāvena bhaktarāṭ || 14 ||
[Analyze grammar]

kṛṣṇabhaktiṃ kṛṣṇadāsyaṃ dehi me kṛṣṇapūjite |
evaṃ cakre parīhāraṃ nanāma parameśvarīm || 15 ||
[Analyze grammar]

kārtikīpūrṇimāyāṃ tu tāṃ sampūjya pareśvarīm |
acalāṃ śriyamāpnoti rājasūyaphalaṃ labhet || 16 ||
[Analyze grammar]

nārī tāṃ cintayed bhaktyā svāmisaubhāgyagā bhavet |
sā prayāti ca golokaṃ mucyeta bhavabandhanāt || 17 ||
[Analyze grammar]

evaṃ nityaṃ suyajño vai jajāpa ca pupūja ca |
tuṣṭāva dadhyau nāmāni tadarthāṃścintayanmuhuḥ || 18 ||
[Analyze grammar]

rāṃ tu smṛddhiṃ dadātyeva dhāṃ dhṛtiṃ pādayorvrajet |
bhuktimuktipradāṃ kṛṣṇāṃ namāmītyabhyacintayat || 19 ||
[Analyze grammar]

patraṃ puṣpaṃ phalaṃ bhuktvā tepe tapaḥ suduṣkaram |
sarvaṃ rādhāmayaṃ cakre śatavarṣaṃ narādhipaḥ || 20 ||
[Analyze grammar]

rādhā tuṣṭā nṛpateśca pratyakṣā saṃbabhūva ha |
prāha taṃ tu tadā rāseśvarīyuktaṃ suyajñakam || 21 ||
[Analyze grammar]

patnīvrataṃ tvayā rājan kṛṣṇavat pālitaṃ sadā |
mama sevā kṛtā nityaṃ bhaktyā cātīva toṣitā || 22 ||
[Analyze grammar]

pūjitā vanditā nityaṃ dhyātā rāseśvarī sadā |
patnīvratamakhaṇḍaṃ saṃpālitaṃ kṛṣṇavattvayā || 23 ||
[Analyze grammar]

saukumārye sadā puṣpasamāṃ matvā hyapālayaḥ |
vastrābhūṣaṇaśṛṃgāradravyādibhiḥ sutoṣitā || 24 ||
[Analyze grammar]

bhojyapeyasubhogyādidānaiḥ śaśvatprapoṣitā |
gurviṇyavasthāmālakṣya sveṣṭadānaiḥ prapālitā || 25 ||
[Analyze grammar]

sūtakādiṣvavasthāsu nirvighnena nibhālitā |
rājasādau tu bhāveṣu sarvabhāvaiḥ surañjitā || 26 ||
[Analyze grammar]

tamovṛttau kṣamāṃ dhṛtvā kroḍe kṛtvā prasāditā |
jvarādyavasthāsānnidhye kṣaṇaṃ naiva viyojitā || 27 ||
[Analyze grammar]

āpatsvapi tvayā rājan dūrīkṛtā na pārśvataḥ |
soḍhvā vai sarvamatyugraṃ na cāpadā suyojitā || 28 ||
[Analyze grammar]

āśaucādau tvayā dharmāccyāvitā na kadācana |
sagarbhāyāṃ tvayā naiva vyarthakāmena yojitā || 29 ||
[Analyze grammar]

sabālāyāṃ kadācinna vinā vastu tvayā kṛtā |
kṣudhite tṛṣite kānte na prayāse nipātitā || 30 ||
[Analyze grammar]

vibhrame bahucintāyāṃ na samudvejitā kvacit |
yathākālaṃ yathādravyaṃ sarvabhāvena pūjitā || 31 ||
[Analyze grammar]

vanditā toṣitā viśvak sukhadānaiḥ prasāditā |
mamaivaṃ sevayā rājan tuṣṭaḥ kṛṣṇanarāyaṇaḥ || 32 ||
[Analyze grammar]

tenaiva preṣitā cāhaṃ rādhā tvāṃ netumāgatā |
ahaṃ rāseśvarī rādhā pannīvrataphalapradā || 33 ||
[Analyze grammar]

madarthaṃ kāritaṃ yadyat kṛtaṃ vā tatphalapradā |
sattvena rajasā yadvā tamasā'pi madarpitam || 34 ||
[Analyze grammar]

sarvaṃ tannirguṇaṃ vidhāpayāmi kṛṣṇayogataḥ |
kāmo roṣastathā svādaḥ sneho lobho madādayaḥ || 35 ||
[Analyze grammar]

madarthaṃ tvarpitā jātāḥ kṛtā api tu nirguṇāḥ |
yato'haṃ nirguṇā patnī kṛṣṇanārāyaṇasya vai || 36 ||
[Analyze grammar]

tato madyogamāpannaṃ patnīvratasya nirguṇam |
kṛṣṇasya krīḍayā sarvaṃ jagat sakriyameva tu || 37 ||
[Analyze grammar]

yadi kṛṣṇo naiva kuryāt kriyāhīnaṃ jagadbhavet |
dampatyostu kriyāḥ sarvā rādhākṛṣṇodbhavā yataḥ || 38 ||
[Analyze grammar]

sadṛśyo'pi bhavantyeva nirguṇā bandhanāśikāḥ |
brahma brāhmyāyutaṃ pūrvaṃ karotyeva jagattathā || 39 ||
[Analyze grammar]

divā rātriṃ vinā nāsti cātmā buddhiṃ vinā na vai |
brahma brāhmīṃ vinā nāsti kṛṣṇaḥ kṛṣṇāṃ vinā na vai || 40 ||
[Analyze grammar]

śabdaḥ śaktiṃ vinā nāsti dharmāṃ bhaktiṃ vinā na vai |
kṛṣṇo rādhāṃ vinā nāsti sat cit nā''nandamantarā || 41 ||
[Analyze grammar]

mama vratena rājendra pūtastvaṃ sarvathā yataḥ |
āgaccha kṛṣṇagolokaṃ vimānena sabhāryakaḥ || 42 ||
[Analyze grammar]

tvayā prasāditā cāhaṃ sarvairvratairnṛpottama |
yadā rāseśvarī ceyaṃ jvareṇā'bhibhavaṃ gatā || 43 ||
[Analyze grammar]

purā māsaṃ jalaṃ cānnaṃ gṛhītaṃ na tayā tadā |
tvayā'pi māsamekaṃ tu jalānnaṃ bhuktameva na || 44 ||
[Analyze grammar]

svasthenāpi tvayā patnīvratena rakṣitaṃ vratam |
prasavādau yadā yadyat patnyā tyaktaṃ subhojanam || 45 ||
[Analyze grammar]

anyaccāpi subhogyādi tvayā'pi tyaktameva tat |
samāyāṃ viṣamāyāṃ vā sthitau kvāpi tvayā nṛpa || 46 ||
[Analyze grammar]

patnīṃ vihāyā'narpitvā kiṃcana nopayuktavān |
sādhuvad vartase rājan sarvaṃ patnyāṃ nidhāya ca || 47 ||
[Analyze grammar]

akṣayaṃ dānapuṇyādi patnīdvārā kṛtaṃ tvayā |
mayā tat śāśvataphalaṃ kṛtaṃ tvadarthameva hi || 48 ||
[Analyze grammar]

cāturmāsyavrataṃ patnyā rāseśvaryā kṛtaṃ yadā |
tadā tasyai na nivedya tvayā bhuktaṃ na vai kvacit || 49 ||
[Analyze grammar]

kārtike śrāvaṇe māghe vaiśākhe ca vratāni vai |
yāni yāni tava patnyā kṛtāni kṛcchrakāṇi vai || 50 ||
[Analyze grammar]

tatra tatra ca yat tyaktaṃ rāseśvaryā tvayā'pi tat |
kadācinna gṛhītaṃ vai patnīvratena sarvathā || 51 ||
[Analyze grammar]

yamāśca niyamā ye ye tava patnyā hyanuṣṭhitāḥ |
te te tvayā'pi tāvantastāvatkālamanuṣṭhitāḥ || 52 ||
[Analyze grammar]

snānadānajapahomāstayā kṛtāstvayā kṛtāḥ |
tayā saṃkalpitaṃ yadyat sarvaṃ tvayā'pi niścitam || 53 ||
[Analyze grammar]

nānyā nārī tvayā spṛṣṭā kāmato na vilokitā |
dāsyaśca karmacāriṇyaḥ putrīvad rakṣitāstvayā || 54 ||
[Analyze grammar]

prajāḥ kanyā yuvatyaśca śiṣyā iva vilokitāḥ |
snuṣā patnyo mātaraśca devya iva prapūjitāḥ || 55 ||
[Analyze grammar]

sādhvyaḥ satyo yogavatyaḥ śivāvad vanditāstvayā |
bhikṣukyo vidhavā nirāśrayāḥ pitreva pālitāḥ || 56 ||
[Analyze grammar]

nartakyo nāyikā bahurūpiṇyo dharmataḥ smṛtāḥ |
vaiṣṇavyaḥ sāṃkhyayoginyo gurupatnya ivā'rcitāḥ || 57 ||
[Analyze grammar]

vidyārthinyaḥ sadā sarasvatītulyā vilokitāḥ |
dṛṣṭā vai brahmacāriṇyo gaṃgāvat tīrthapāvitāḥ || 58 ||
[Analyze grammar]

evaṃ suyajña sarvāstā brahmātmabhāvabhāvitāḥ |
tvayā vilokitā rājan patnīvratena bhūbhṛtā || 19 ||
[Analyze grammar]

ṛṇamuktāḥ kṛtāścānyā āpattibhyaḥ sutāritāḥ |
kaṣṭād dūrīkṛtāścānyā nāryaśca vaiṣṇavīkṛtāḥ || 60 ||
[Analyze grammar]

dhanyo'si tvaṃ sadā rājan dhanyā rāseśvarī priyā |
dhanyaṃ cāṃśasvarūpaṃ me yatprāptyā muktatāṃ gatam || 61 ||
[Analyze grammar]

viśvāsaṃ varaṇaṃ nyāsaṃ kārpaṇyaṃ matisthiratām |
ānukūlyaṃ prātikulyavarjitaṃ kṛtavān mayi || 62 ||
[Analyze grammar]

naitādṛśaṃ paraḥ kaścinmadvrataṃ pālayiṣyati |
patnīvrataṃ vrataṃ me tanmokṣadaṃ pālitaṃ tvayā || 63 ||
[Analyze grammar]

pitarastāritā rājan prajāśca tāritāstvayā |
sarvaṃ vai tāritaṃ rājye'raṇye'pi jaḍacetanam || 64 ||
[Analyze grammar]

ityuktvā rādhikā devī rāseśvarīṃ suyajñakam |
vimāne divyadehau tau nītvā golokamāyayau || 65 ||
[Analyze grammar]

iti patnīvrataṃ lakṣmi kathitaṃ sphuṭameva te |
paṭhanācchravaṇāccāsya golokamāpnuyād vratī || 66 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne suyajñaṃ patnīvratadharmapālakaṃ rājānaṃ rāseśvarīṃ patnīṃ ca vimāne nītvā rādhā golokaṃ yayāvityādipatnīvratamāhātmyakathananāmā catuścatvāriṃśadadhikacatuśśatatamo'dhyāyaḥ || 444 ||
[Analyze grammar]