Lakshminarayana Samhita [sanskrit]

by Shwetayan Vyas | 1,169,834 words | ISBN-10: 8170801818 | ISBN-13: 9788170801818

The Lakshminarayana Samhita Chapter 442 (Sanskrit text), including grammatical analysis, glossary and relevant print editions. The Lakshmi-narayana-samhita is an encyclopaedic work devoted to Narayana although it deals with various deities. The work is written in Puranic style and divided into four books according to the four Yugas. In total, the work consists of roughly 120,000 metrical verses.

śrīnārāyaṇa uvāca |
śṛṇu lakṣmi patikṛṣṇavrataṃ mokṣapradāyakam |
pāvanaṃ kṛṣṇabhaktaṃ tu suyajñaṃ vaiṣṇavaṃ param || 1 ||
[Analyze grammar]

brahmaṇastu sutaḥ svāyaṃbhuvo manurbabhūva ha |
uttānapādastatputrastatputro dhruvanāmakaḥ || 2 ||
[Analyze grammar]

dhruvaputra utkalo'bhūnnārāyaṇaparāyaṇaḥ |
sahasraṃ rājasūyānāṃ puṣkare sa cakāra ha || 3 ||
[Analyze grammar]

tasya nāma svayaṃ brahmā suyajñaṃ pracakāra ha |
sa cānnadātā ratnānāṃ dātā ca sarvasampadām || 4 ||
[Analyze grammar]

daśalakṣaṃ gavāṃ cāpi ratnaśṛṃgaparicchadam |
gavāṃ dvādaśalakṣaṇāṃ dadau nityaṃ mudānvitaḥ || 5 ||
[Analyze grammar]

ṣaṭkoṭīrbrāhmaṇānāṃ ca bhojayāmāsa nityaśaḥ |
coṣyaiścarvyairlehyapeyairatitṛptaṃ dine dine || 6 ||
[Analyze grammar]

vipralakṣaṃ sūpakāraṃ bhojayāmāsa tatparam |
dine suyajñayajñānte ṣaṭtriṃśallakṣakoṭayaḥ || 7 ||
[Analyze grammar]

cakruḥ subhojanaṃ viprāścātitṛptāśca sundari |
gṛhītāni tu ratnāni svagṛhaṃ voḍhumakṣamāḥ || 8 ||
[Analyze grammar]

yebhyaḥ kebhyo daduścāpi bahuśaḥ pathi tatyajuḥ |
viprānyebhyo'pi sarvebhyo bhojanāni daduśca te || 9 ||
[Analyze grammar]

tathāpyurvaritaṃ tatra tvannarāśisahasrakam |
evaṃ yajñaṃ śubhaṃ kṛtvā suyajño rājasaṃsadi || 10 ||
[Analyze grammar]

samuvāsa mahāratnaklṛpte siṃhāsane śubhe |
paṭṭavastraiḥ śobhite sucandanādisugandhite || 11 ||
[Analyze grammar]

śākhāyuktaiḥ pūrṇakuṃbhaiḥ ramāvṛkṣaiḥ suśobhite |
candanā'gurukasturīghanasindūrasaṃskṛte || 12 ||
[Analyze grammar]

vasuvāsavacandrendrarudrādityasamanvite |
munināradamanvādibrahmaviṣṇuharānvite || 13 ||
[Analyze grammar]

etasminnantare tatra vipra ekaḥ samāyayau |
rūkṣo malinavāsāśca cakre nṛpaṃ śubhāśiṣaḥ || 14 ||
[Analyze grammar]

rājā taṃ praṇanāmā'pi nottasthau svavarāsanāt |
sabhāsado'pi nottasthurmanāg jahasustaṃ prati || 15 ||
[Analyze grammar]

tena kruddho dvijastatra śaśāpa nṛpatiṃ yathā |
rājyabhraṣṭo galatkuṣṭhī buddhihīno bhavā'dhunā || 16 ||
[Analyze grammar]

tāvatsabhāsado nemuruttasthustena bhūsuraḥ |
tatyāja roṣaṃ rājā'pi pādayoḥ patitastataḥ || 17 ||
[Analyze grammar]

ṛṣayastatra taṃ vipraṃ daduḥ śreṣṭhaṃ śubhāsanam |
pulahaśca pulastyaśca pracetā bhṛguraṅgirāḥ || 18 ||
[Analyze grammar]

marīciḥ kaśyapaścāpi vaśiṣṭhaḥ kraturityapi |
śukro bṛhaspatiścāpi durvāsā lomaśastathā || 19 ||
[Analyze grammar]

gautamaśca kaṇādaśca kaṇvaḥ kātyāyanaḥ kaṭhaḥ |
pāṇinirjājaliścāpi ṛṣyaśṛṃgo vibhāṇḍakaḥ || 20 ||
[Analyze grammar]

taittiriścāpyāpiśalirmārkaṇḍeyo mahātapāḥ |
sanakaśca sanandaśca voḍhuḥ pailaḥ sanātanaḥ || 21 ||
[Analyze grammar]

sanatkumāro naro nārāyaṇaśca parāśaraḥ |
patnīvrato jaratkāruḥ saṃvarttaḥ karabhastathā || 22 ||
[Analyze grammar]

bharadvājaśca vālmīkiraurvaśca cyavanastathā |
agastyo'trirutathyaśca saṃkartā''stīka āsuriḥ || 23 ||
[Analyze grammar]

śilālirlāṃgaliścāpi śākalyaḥ śākaṭāyanaḥ |
gargo vatsaḥ pañcaśikho jamadagniśca devalaḥ || 24 ||
[Analyze grammar]

jaigiṣavyo vāmadevo vālakhilyāśca lakṣaśaḥ |
śaktirdakṣaḥ kardamaśca praskannaḥ kapilastathā || 25 ||
[Analyze grammar]

viśvāmitraśca kautsaścāpyṛcīko'pyaghamarṣaṇaḥ |
svayaṃprakāśo brahmiṣṭhaḥ śatānandaśca suvrataḥ || 26 ||
[Analyze grammar]

ete tvanye ca munayaḥ pitaro'gnihaviḥpriyāḥ |
dikpālā devatāḥ sarvāḥ samūcurbrāhmaṇaṃ kramāt || 27 ||
[Analyze grammar]

tava śāpena viprendra rājño lakṣmyā layo bhavet |
brāhmaṇānāṃ tu hṛdayaṃ komalaṃ tapasā sadā || 28 ||
[Analyze grammar]

kṣamasvā''śiṣamādhatsva tadgṛhaṃ pāvanaṃ kuru |
atithiryasya bhagnāśo gṛhātpratinivartate || 29 ||
[Analyze grammar]

pitarastasya devāśca vahniḥ prayāntyatoṣitāḥ |
paśyanti ye vakradṛṣṭyā tvatithiṃ gṛhamāgatam || 30 ||
[Analyze grammar]

datvā svapāpaṃ tasmai tatpuṇyamādāya gacchati |
rājā svagarvadoṣeṇa nottasthau tatkṣamāṃ kuru || 31 ||
[Analyze grammar]

rājyaśriyā vidyayā vā brāhmaṇaṃ yo'vamanyate |
śriyāhīno bhavet sadyo vratanaivedyavarjitaḥ || 32 ||
[Analyze grammar]

dīkṣā vyarthā bhavettasya dhanaputrādihīnatā |
bhāryāhīno bhaveccāpi kṣamasvā'syā'parādhakam || 33 ||
[Analyze grammar]

atithiṃ pitarau devaṃ vidvāṃsaṃ brāhmaṇaṃ gurum |
avamanyeta yaḥ so'tra bhaktibhraṣṭo bhaveddhruvam || 34 ||
[Analyze grammar]

atithiṃ brāhmaṇaṃ dṛṣṭvā nā'bhyutthānaṃ karoti yaḥ |
prāpnoti kauṃjarīṃ yonimaraṇye saptajanmasu || 35 ||
[Analyze grammar]

śīghraṃ dayāṃ vidhāyaiva rājñe dehyāśiṣaḥ śubhāḥ |
guruṃ vā brāhmaṇaṃ vāpi devatāpratimāmapi || 36 ||
[Analyze grammar]

dṛṣṭvā śīghraṃ na praṇamet sa bhavet sukaro bhuvi |
kṣamasva sarvamasmākaṃ cātithyagrahaṇaṃ kuru || 37 ||
[Analyze grammar]

strīghnagoghnakṛtaghnānāṃ gurustrīgāmināṃ tathā |
brahmaghnānāṃ pāpabhāk syādatitheravamānakṛt || 38 ||
[Analyze grammar]

ityārṣavācaḥ saṃśrutvā rājā papraccha tānmunīn |
strīghnādīnāṃ tu kiṃ pāpaṃ brūta māṃ yogināṃ varāḥ || 39 ||
[Analyze grammar]

vasiṣṭhaḥ prāha rājendra śṛṇu govadhajaṃ hi tat |
kāmato govadhe rājan varṣaṃ tīrthaṃ bhramennaraḥ || 40 ||
[Analyze grammar]

yavayāvakabhojī ca kareṇa tu jalaṃ pibet |
tato dhenuśataṃ divyaṃ brāhmaṇebhyaḥ sadakṣiṇam || 41 ||
[Analyze grammar]

datvā muñcati pāpāttu bhojayitvā śataṃ dvijān |
prāyaścitte tu vai cīrṇe sarvapāpānna mucyate || 42 ||
[Analyze grammar]

pāpāvaśeṣād bhavati duḥkhī cāṇḍāla eva saḥ |
gohatyādviguṇaṃ pāpaṃ strīhatyāyāṃ bhaveddhruvam || 43 ||
[Analyze grammar]

ṣaṣṭivarṣasahasrāṇi kālasūtre vaseddhi saḥ |
tato bhavet sūkaraśca sarpaśca saptajanmasu || 44 ||
[Analyze grammar]

strīhatyādviguṇaṃ pāpaṃ brahmahatyākṛto bhavet |
lakṣavarṣaṃ mahāghore kubhīpāke vaseddhi saḥ || 45 ||
[Analyze grammar]

viṣṭhākṛmiḥ śatābdaṃ ca sarpaśca saptajanmasu |
doṣaḥ kṛtaghne rājendra brahmahatyācaturguṇaḥ || 46 ||
[Analyze grammar]

niṣkṛtirnāsti rājendra kṛtaghnānāṃ vinirmitā |
kṛtaghnāḥ ṣoḍaśavidhāḥ santi rājendra niścitāḥ || 47 ||
[Analyze grammar]

kṛte satye ca puṇye ca svadharme tapasi sthite |
pratijñāyāṃ ca dāne ca svagoṣṭhīparipālane || 48 ||
[Analyze grammar]

gurukṛtye devakṛtye kāmyakṛtye dvijārcane |
nityakṛtye ca viśvāse paramadharmapradānayoḥ || 49 ||
[Analyze grammar]

etān yo hanti pāpiṣṭhaḥ sa kṛtaghna iti smṛtaḥ |
vividhānāṃ kṛtaghnānāṃ narakā vividhā api || 50 ||
[Analyze grammar]

kṛtvā śapatharūpaṃ ca satyaṃ hanti na pālayet |
saḥ kṛtaghnaḥ kālasūtre vasatyeva caturyugam || 51 ||
[Analyze grammar]

saptajanmasu kākaśca saptajanmasu pecakaḥ |
tataḥ śūdro mahāvyādhiḥ saptajanmasvataḥ śuciḥ || 52 ||
[Analyze grammar]

kṛtvā puṇyaṃ vadatyeva kīrtivardhanahetunā |
sa kṛtaghnastaptakuṇḍe vasatyeva yugatrayam || 53 ||
[Analyze grammar]

pañcajanmasu maṇḍūkastriṣu janmasu karkaṭaḥ |
tato mūko mahārugṇo daridro'pi tataḥ śuciḥ || 54 ||
[Analyze grammar]

kṛtvā svadharmaṃ yo hanti sandhyādharmavighātakaḥ |
viṣṇupūjāmantrajāpanaivedyavratanindakaḥ || 55 ||
[Analyze grammar]

devavratādihīnaśca pitṛkṛtyādivarjitaḥ |
kṛtaghnaḥ sa kuṃbhīpāke vasatyākalpameva yat || 56 ||
[Analyze grammar]

saptajanmasu cāṇḍālo gṛdhnaśca śatajanmasu |
sūkaraḥ śatajanmā ca tataścāṇḍālako bhavet || 57 ||
[Analyze grammar]

punaśca rauravaṃ gatvā gardabhaḥ pañcajanmasu |
mārjāro maṇḍūkaḥ pañcajanmasu ca tataḥ punaḥ || 58 ||
[Analyze grammar]

vṛṣāṇāṃ vāhako vipro bhūtvā duḥkhāni vindati |
bhṛtyadvārā svayaṃ vāpi yo vipro vṛṣavāhakaḥ || 59 ||
[Analyze grammar]

sa kṛtaghna iti bodhyaḥ puṇyahā sa yato mataḥ |
brahmahatyāsamaṃ pāpaṃ tannityaṃ vṛṣatāḍane || 60 ||
[Analyze grammar]

vṛṣapṛṣṭhe bhāradānātpāpaṃ taddviguṇaṃ bhavet |
sūryā''tape vāhayed yaḥ kṣudhitaṃ tṛṣitaṃ vṛṣam || 61 ||
[Analyze grammar]

brahmahatyāśataṃ pāpaṃ labhate nā'tra saṃśayaḥ |
lālākuṇḍe vasatyeva yāvaccandradivākarau || 62 ||
[Analyze grammar]

viṣṭhābhakṣyaṃ mutrajalaṃ tatra tasya bhavet sadā |
trisandhyaṃ tāḍayettaṃ tu śūlena yamakiṃkaraḥ || 63 ||
[Analyze grammar]

ulkāṃ dadāti mukhake sūcyā kṛntati santatam |
ṣaṣṭivarṣasahasrāṇi viṣṭhāyāṃ jāyate kṛmiḥ || 64 ||
[Analyze grammar]

tataḥ kākaḥ pañcajanmasvathaivaṃ baka ityapi |
pañcajanmasu gṛdhraśca śṛgālaḥ saptajanmasu || 65 ||
[Analyze grammar]

tato daridraḥ śūdraśca mahārugṇaḥ śucistataḥ |
satīnāryā dharmalopī kṛtaghnaḥ parikīrtitaḥ || 66 ||
[Analyze grammar]

vṛṣalīśaḥ puṃścalīśaḥ kṛtaghnaḥ sa mato dvijaḥ |
kṛmidaṃṣṭre vaset so'pi yāvadindrāścaturdaśa || 67 ||
[Analyze grammar]

pratimāṃ tāṃ taptalauhīmāśleṣayati nityaśaḥ |
tataḥ śūdro bhaved duḥkhī tathā varṣasahasrakam || 68 ||
[Analyze grammar]

kṛtvā tapāṃsi puṇyānāṃ hantā kṛtaghna ucyate |
anyācaritatapasāṃ hantā kṛtaghna ucyate || 69 ||
[Analyze grammar]

vrataghnasya kṛtaghnasya kuṃbhīpāko'yutābdikaḥ |
kṛtvā pratijñāṃ kāryasya datvā viśvāsamuttamam || 70 ||
[Analyze grammar]

karoti svapratijñāyā bhaṃgaṃ kṛtaghna eva saḥ |
lohatapte tu taṃ kuṇḍe prajvālayati kalpakam || 71 ||
[Analyze grammar]

dānaṃ bahuvidhaṃ yattad yo nāśayati śāṭhyataḥ |
vāgdānaṃ vastudānaṃ ca kanyājñānapradānakam || 72 ||
[Analyze grammar]

hanti yaḥ sa vaset kālasūtre'yutayugā dhruvam |
kṛtvā datvā svavacanaṃ goṣṭhīṃ vā hanti yo janaḥ || 73 ||
[Analyze grammar]

kāryahā goṣṭhīghna eva pāśakuṇḍe'yutābdikaḥ |
gurukāryavihantā vai gurutāḍayitā ca yaḥ || 74 ||
[Analyze grammar]

gurughnaḥ sa kṛtaghno vai vahnikuṇḍe'yutābdikaḥ |
devakṛtye devavṛttiharaḥ kṛtaghna ucyate || 75 ||
[Analyze grammar]

svadattāṃ paradattāṃ vā devādivṛttihārakaḥ |
romavarṣasahasraṃ sa śūlaprote pratiṣṭhati || 76 ||
[Analyze grammar]

taptāṃgāraṃ ca tadbhakṣyaṃ pānaṃ vai taptamūtrakam |
taptāṃgāreṣu śayanaṃ tāḍito yamakiṃkaraiḥ || 77 ||
[Analyze grammar]

tato viṣṭākṛmirbhūtvā varṣaṣaṣṭisahasrakam |
tato daridraḥ kṛpaṇo bhūmiprajāvihīnakaḥ || 78 ||
[Analyze grammar]

rugṇo nindyo bhavecchūdraḥ kālāntare tataḥ śuciḥ |
kāmyakṛtyavineṣṭā ca svaparasvarvināśakaḥ || 79 ||
[Analyze grammar]

hanti yaḥ parakīrtiṃ ca svakīrtiṃ ca narādhamaḥ |
sa kṛtaghnaḥ kāmyakeṣṭāpūrtādināśakaḥ sa ca || 80 ||
[Analyze grammar]

andhakūpe mahāghore vasedākalpameva hi |
nakulagṛdhrakīṭādyairbhakṣitastaptakṣārapaḥ || 81 ||
[Analyze grammar]

saptajanmasvataḥ sarpaḥ kākaḥ pañcasvataḥ śuciḥ |
dvijārcanasya yo hantā kṛtaghnaḥ sa mahānmataḥ || 82 ||
[Analyze grammar]

brahmasvaṃ vā gurusvaṃ vā devasvaṃ vā'pi yo haret |
avaṭode vasetso'pi kṛtaghnaḥ kalpameva yat || 83 ||
[Analyze grammar]

tato bhavet surāpaśca tataḥ śūdrastataḥ śuciḥ |
nityakṛtyasya yo hantā sa kṛtaghno mahattaraḥ || 84 ||
[Analyze grammar]

pitṛmātṛgurūṃścāpi bhaktihīno na pālayet |
na namecca sadā prātarvācāpi tāḍayenmuhuḥ || 85 ||
[Analyze grammar]

tathā svasvāminaṃ vācā tāḍayet kulaṭā tu yā |
pūjyapūjāviloptāraḥ kṛtaghnāste prakīrtitāḥ || 86 ||
[Analyze grammar]

vahnikuṇḍe vasantyeva yāvaccandradivākarau |
tato bhavejjalaukāśca saptajanmasvataḥ śuciḥ || 87 ||
[Analyze grammar]

viśvasya ghātanaṃ kuryāt kṛtaghnaḥ sa mahattamaḥ |
mithyāsākṣyaṃ yo dadāti kāmāt krodhād bhayāttathā || 88 ||
[Analyze grammar]

sabhāyāṃ pākṣikaṃ vakti puṇyahantā kṛtaghnakaḥ |
sarvatrāpi ca sarveṣāṃ kṛtasya sukṛtasya vai || 89 ||
[Analyze grammar]

bhogakṛtaṃ ca hantṛtvaṃ kṛtaghnatā prakīrtitā |
puṇyahāḥ kṛtahāḥ proktaḥ puṇyaṃ tu naśvaraṃ sadā || 90 ||
[Analyze grammar]

tasmāt kṛṣṇaprasādākhye śāśvate na kṛtaghnatā |
śāśvataṃ puṇyārthyaṃ vai naśvaraṃ nārthyameva tu || 91 ||
[Analyze grammar]

mithyāsākṣī pākṣikādirviśvāsahāśca puṇyahāḥ |
yāvadindrasahasraṃ sa sarpakuṇḍe vased dhruvam || 92 ||
[Analyze grammar]

sarpaistu bhakṣito bhuṃkte tadviṇmūtraṃ hi tāḍitaḥ |
maṇḍūkaḥ kṛkalāsaśca saptajanmasu jāyate || 93 ||
[Analyze grammar]

tato'raṇye śālmalidrurmūkaśūdrastataḥ śuciḥ |
paradāragamanādi paradharmāvamelanam || 94 ||
[Analyze grammar]

paradharmācaraṇaṃ vai kṛtaghnatve tu gaṇyate |
svayogyakarmaṇāṃ rodhaḥ parārhakarmasaṃśrayaḥ || 95 ||
[Analyze grammar]

kṛtaghnatā bhavatyeva tadvāṃścāṇḍālasadṛśaḥ |
kuṃbhīpāke vasetso'pi kalpaparyantameva yat || 96 ||
[Analyze grammar]

agamyāgamakaḥ paścād bhavennapuṃsakastataḥ |
galatkuṣṭhī saptajanmā śūdraḥ syācca tataḥ śuciḥ || 97 ||
[Analyze grammar]

lohasūrmyāṃ pateccāpi tato bhavennapuṃsakaḥ |
cāṇḍālastu tato bhūtvā śūdro bhūtvā tataḥ śuciḥ || 98 ||
[Analyze grammar]

prakṛṣṭadānaṃ kanyādidānaṃ svarṇādikā'rpaṇam |
kṛtvā taddhanti dānaṃ yaḥ kṛtaghnaḥ sa prakīrtitaḥ || 99 ||
[Analyze grammar]

kṛtakāryasya nāśaśca kṛtaṃ jānāti naiva ca |
kṛtaghnaḥ sa ṣoḍaśadhā kathito bhūpa sarvathā || 100 ||
[Analyze grammar]

atitheravamānena jāyate tu kṛtaghnatā |
taddoṣasya nivṛttyarthamatithiḥ pūjyatāṃ tvayā || 101 ||
[Analyze grammar]

gṛhe nītvā pūjyatāṃ ca tatpādābje prasevyatām |
gṛhyatāṃ tatprasādaśca pajjalaṃ saṃnipīyatām || 102 ||
[Analyze grammar]

arjyatāṃ cātitherāśīrdoṣaḥ pramārjyatāṃ tathā |
tato vanaṃ gamyatāṃ ca punaḥ śrīḥ prāpyatāṃ śubhā || 103 ||
[Analyze grammar]

smaryatāṃ śrīkṛṣṇanārāyaṇasvāmī śriyāḥ patiḥ |
dāsyati te punarbhadrāṃ sampattiṃ mokṣamacyutaḥ || 104 ||
[Analyze grammar]

ityuktvā munayaḥ sarve yayuḥ svasthānameva ca |
suyajñastaṃ nanāmādau gṛhaṃ saṃprā''payad dvijam || 105 ||
[Analyze grammar]

papraccha nāmagotrādi prasādya pūjayā muhuḥ |
ṛṣiḥ prāha svakaṃ nāma sutapā iti viśrutam || 106 ||
[Analyze grammar]

tatpitā virūpanāmā viśvarūpaśca tatpitā |
tvaṣṭā tasya pitā cāpi tasya pitā ca kaśyapaḥ || 107 ||
[Analyze grammar]

tatpitā ca marīcistatpitā tu viśvasṛṭ svayam |
brahmaṇaḥ saptamaścāhaṃ puruṣo'smi bhuvaḥ pate || 108 ||
[Analyze grammar]

mahādevo mama gururvidyādātā sumantradaḥ |
abhīṣṭadevaḥ śrīkṛṣṇanārāyaṇaḥ patiḥ prabhuḥ || 109 ||
[Analyze grammar]

taccintayāmi pādābjaṃ na me vāñcchā'sti sampadi |
sālokyasārṣṭisārūpyasāmīpyaṃ rādhikāpateḥ || 110 ||
[Analyze grammar]

tena dattaṃ na gṛhṇāmi vinā tatpādasevanam |
śrutvā suyajñayajñe te munīnāmāgamaṃ nṛpa || 111 ||
[Analyze grammar]

lālasāṃ viṣṇubhaktiṃ te samprāpayitumāgataḥ |
kevalānugṛhītastvaṃ nahi śapto mayā'dhunā || 112 ||
[Analyze grammar]

samuddhṛtaśca patito ghore nimne bhavārṇave |
na hyammayāni tīrthāni na devā mṛcchilāmayāḥ || 113 ||
[Analyze grammar]

te punantyurukālena kṛṣṇabhaktāstu darśanāt |
rājannirgamyatāṃ gehād dehi rājyaṃ sutāya tu || 114 ||
[Analyze grammar]

śrīkṛṣṇaṃ bhaja rādheśaṃ tadanyannaśvaraṃ tyaja |
macchāpena mahadrājyaṃ parityaja sadā'nagha || 115 ||
[Analyze grammar]

galaccharīraṃ tapasā kau kṣitau sthitimat kuru |
rājyā''ḍambaramāyāḍhyabuddhyā saṃvirato bhava || 116 ||
[Analyze grammar]

rājā viprājñayā śāntiṃ jagrāha viratiṃ tathā |
papraccha tīvrasaṃvegaṃ golokā''ptiprakāraṇam || 117 ||
[Analyze grammar]

iti śrīlakṣmīnārāyagīyasaṃhitāyāṃprathame kṛtayugasantāne suyajñarājño rājasūyānte'satkṛtasutapoviprakṛtaśāpaḥ punastatkṛtakṛṣṇapativratopadeśe'tithimahimā ṣoḍaśavidhakṛtaghnatā ṛṣikṛtopadeśaścetyādinirūpaṇanāmā dvicatvāriṃśadadhikacatuśśatatamo'dhyāyaḥ || 442 ||
[Analyze grammar]

Other print editions:

Also see the following print editions of the Sanskrit text or (alternative) English translations of the Lakshminarayana Samhita Chapter 442

Cover of edition (2011)

Shri Lakshmi Narayana Samhita
by Chowkhamba Sanskrit Series Office (2011)

शेतायनव्यास (Shwetayan Vyas)

Buy now!
Like what you read? Consider supporting this website: