Chapter 399

śrīnārāyaṇa uvāca |
śṛṇu lakṣmi kathāṃ divyāṃ ramyāṃ pūrvabhavāṃ śubhām |
ahaṃ tamaśvamārūḍho gatvā śrīveṃkaṭācalam || 1 ||
[Analyze grammar]

hayāttasmādavatīrya viveśa mama maṇḍapam |
śrīnivāsābhidhaścāhaṃ pañca kakṣā atītya ca || 2 ||
[Analyze grammar]

muktāgṛhaṃ samāsādya mañce viveśa tāṃ smaran |
ahaṃ sa vivaśo bhūtvā śrīnivāso muhurmuhuḥ || 2 ||
[Analyze grammar]

sasmāra padminīṃ patnīṃ pūrvāṃ madarthanirmitām |
śrīnivāsaḥ prabhustatra nidrāṃ lebhe manāṅ na vai || 4 ||
[Analyze grammar]

madhyāhnasamaye jāte sakhī bakulamālikā |
bhojyaṃ bhakṣyaṃ pāyasānnaṃ miṣṭaṃ sugandhamodanam || 5 ||
[Analyze grammar]

vyañjanāni sūpatakre pūrikā vaṭikā rasān |
apūpān vaṭakān pūrṇapolikā dadhi sarpiṣā || 6 ||
[Analyze grammar]

miśritaṃ śarkarābhiśca kadalādirasānakam |
mahatpātre nidhāyaiva devaṃ iṣṭaṃ samāgatā || 7 ||
[Analyze grammar]

anyāḥ sakhyaścitrarekhā navaraṃgā ca mālatī |
kamalā kiṃśukī kalpalatā cānyā jalādikam || 8 ||
[Analyze grammar]

tāmbūlaṃ vyajanaṃ naktakottamaṃ candanaṃ phalam |
gṛhītvā cāyayuryatra śrīnivāso virājate || 9 ||
[Analyze grammar]

bakulamālikā kṛṣṇaṃ vavande bhaktibhāvataḥ |
dhyāyantaṃ cā'pūrvarūpaṃ vyājahāra hariṃ sakhī || 10 ||
[Analyze grammar]

uttiṣṭha devadeveśa bhoktumāgaccha mādhava |
kathaṃ vā dṛśyase tvārto yāvadārtiharo hariḥ || 11 ||
[Analyze grammar]

vane mṛgayāvyājena dṛṣṭavānasi kiṃ navam |
avasthā cintayānasya sphuṭaṃ vadati hṛdgatam || 12 ||
[Analyze grammar]

kā dṛṣṭā devakanyā vā mānuṣī vā'hiputrikā |
brūhi no bhagavaṃścittasthitāṃ tāṃ cittahāriṇīm || 13 ||
[Analyze grammar]

ityākarṇya śrīnivāso niḥśvāsaṃ samarecayat |
uvāca tāṃ sakhīṃ tatra vihasya puruṣottamaḥ || 14 ||
[Analyze grammar]

purāyuge mahāduṣṭaṃ rāvaṇaṃ hatavānaham |
tadā vedavatī dāsī sītāsāhāyyadā'bhavat || 15 ||
[Analyze grammar]

sītārūpā'bhavallakṣmīrjanakasya mahītalāt |
mayā rāmeṇa labdhā sā tataḥ pañcavaṭīvane || 16 ||
[Analyze grammar]

rākṣaso rāvaṇastāṃ tu hartuṃ samāyayau yadā |
tadā'gnideva evaināṃ svāhāyāṃ sannivi śya ca || 17 ||
[Analyze grammar]

tasyāḥ sthāne tatsvarūpāṃ kanyāṃ vedavatīṃ nyadhāt |
ninye vedavatīṃ rakṣo rāmastaṃ nijaghāna ca || 18 ||
[Analyze grammar]

agnau vedavatīṃ kṣiptvā prāpya satyāṃ tu jānakīm |
kṛtakṛtyo'bhavaṃstatra tadā vahniruvāca mām || 19 ||
[Analyze grammar]

iyaṃ vedavatī kanyā sītāyāḥ priyakāriṇī |
sītārthaṃ rākṣasahaste gatā duḥkhamahārṇave || 20 ||
[Analyze grammar]

tasmādenaṃ vareṇaiva prīṇaya sītayā saha |
iti vahnivacaḥ śrutvā sītā'pi māṃ jagāda ha || 21 ||
[Analyze grammar]

madarthaṃ duḥkhamāpteyaṃ sakhī vedavatī mama |
tasmātparāṃ bhāgavatīṃ devaināṃ varaya prabho || 22 ||
[Analyze grammar]

tadā mayā pratijñātaṃ variṣye tava vākyataḥ |
ākāśabhūpakanyāṃ vai padminīṃ śrīsvarūpiṇīm || 23 ||
[Analyze grammar]

tāvadeṣā śriyo dāsī sakhīrūpā hi vartatām |
yadā ceyaṃ bhūmiputrī viyatputrī bhaviṣyati ||re || 4 ||
[Analyze grammar]

padminīti ca vā nāmnā loke khyātiṃ gamiṣyati |
mama patnī tu sā tarhi padminyeva bhaviṣyati || 25 ||
[Analyze grammar]

iti dattavarā pūrvaṃ mayā lakṣmyā ca mālike |
adya nārāyaṇapure saṃbhūtā dharaṇītalāt || 26 ||
[Analyze grammar]

lakṣmīsamā padmanetrī vane puṣpāṇi cinvatī |
mayā vane tu sā dṛṣṭā rūpānurūpasundarī || 27 ||
[Analyze grammar]

cittaṃ tatra ca me lagnaṃ tasyā yogaṃ hi kāraya |
gaccha tatra vilokyaiva yogyāṃ madarthamāvaha || 28 ||
[Analyze grammar]

ityuktā bakulā prāha gacchāmi yatra sāsti hi |
mārgaṃ vada ramānātha kariṣye tava vāñchitam || 29 ||
[Analyze grammar]

nārāyaṇastadā prāha śrīnṛsiṃhaguhā yataḥ |
tanmārgeṇā'vatīryā'smānnārāyaṇagirestataḥ || 30 ||
[Analyze grammar]

agastyāśramamāsādya suvarṇamukharītaṭe |
agastyeśaṃ prapūjyaiva gaccha kīravanaṃ tataḥ || 31 ||
[Analyze grammar]

agre padmasaro nāma padmaśobhitatattaṭe |
natvā śukaṃ tapantaṃ ca kṛṣṇaṃ balaṃ prapūjya ca || 32 ||
[Analyze grammar]

ādāya svarṇakamalaṃ saraso'smāttataḥ sakhi |
tīrttvā suvarṇamukharīṃ taṭasthāni vanāni ca || 33 ||
[Analyze grammar]

araṇitīramāsādya viśramya vai kṣaṇaṃ tataḥ |
nārāyaṇapurīṃ dṛṣṭvā vismayaṃ saṃprayāsyasi || 34 ||
[Analyze grammar]

gatvā pūrvottare mārge'raṇinadītaṭasthitām |
ākāśarājanagarīṃ gatvā tatrocitaṃ kuru || 35 ||
[Analyze grammar]

ityādiśya tāṃ visṛjya sa śiṣye śrīsamanvitaḥ |
vakulā śrīhariṃ natvā raktāśvamadhiruhya ca || 36 ||
[Analyze grammar]

yayau yathoktamārgeṇa nārāyaṇapurīṃ prati |
mārge'gastyasamudyāne nadītīre'vatīrya ca || 37 ||
[Analyze grammar]

snātvā pītvā viśaśrāma dadarśa padminīsakhīḥ |
kāmārthaṃ devapūjārthamagastyeśo samāgatāḥ || 38 ||
[Analyze grammar]

tāśca papraccha bakulamālikā padminīsakhīḥ |
kā yūyaṃ yoṣito brūta kiṃkāryārthaṃ samāgatāḥ || 39 ||
[Analyze grammar]

tāstu śrutvā samūcustāṃ vayamākāśabhūbhṛtaḥ |
duhituḥ padminīnāmnyāḥ sakhyo bhavāma eva hi || 40 ||
[Analyze grammar]

kimarthaṃ tvaṃ samāyātā kva ca gacchasi no vada |
ityuktā bakulā prāha kathamāste nu padminī || 41 ||
[Analyze grammar]

tāstu prāhuḥ puṇyavane dṛṣṭvā sā puruṣottamam |
aśvatthaṃ mandahāsaṃ satpītāmbaraṃ vibhūṣitam || 42 ||
[Analyze grammar]

drutahemanibhā sā tu paśya paśyeti sā'bravīt |
paśyantīnāṃ tadā'smākaṃ gato'ntardhānamāśu saḥ || 43 ||
[Analyze grammar]

sā sakhī mohitā cāste nṛpo dṛṣṭvedṛśīṃ sthitim |
papraccha daivayogajñaṃ brāhmaṇaṃ so'pyuvāca tam || 44 ||
[Analyze grammar]

uttamaḥ puruṣaḥ kaścidāgataḥ kanyakāṃ prati |
taṃ dṛṣṭvā mohiteyaṃ vai tena yogaṃ sameṣyati || 45 ||
[Analyze grammar]

tenaiva preṣitā kācidāgamiṣyati kanyakā |
sā tu vakṣyati yadvākyaṃ tadyathārthaṃ bhaviṣyati || 46 ||
[Analyze grammar]

kārayā'gastyeśapūjāṃ sarvaṃ bhadraṃ bhaviṣyati |
ityuktaḥ sa nṛpaścāsmān preṣayāmāsa mandiram || 47 ||
[Analyze grammar]

mahāpūjādisaṃbhārānpuṣpādīn cinumo'tra vai |
vad tvaṃ kā kathamatrāyātā kimicchasi priyam || 48 ||
[Analyze grammar]

bakulā prāha tāstatra veṃkaṭādreḥ samāgatā |
dharaṇīṃ draṣṭukāmā'haṃ draṣṭuṃ śakyā bhavenna vā || 49 ||
[Analyze grammar]

sakhyaḥ prāhuḥ sahā''gacchāsmābhirvilokayiṣyase |
bakulā ca yayau tābhinṛpadurgāntaraṃ tataḥ || 50 ||
[Analyze grammar]

samākrośaṃ śanaiścakre jyotirvettrī yathā vadet |
vadāmi satyaṃ śṛṇuta bhūtaṃ bhavan bhaviṣyakam || 51 ||
[Analyze grammar]

dharaṇī tāṃ tathā śrutvā pṛcchecchukī puraḥsthitā |
vada rāśiphalaṃ me kiṃ dhanarāśiṃ dadāmi te || 52 ||
[Analyze grammar]

bakulā satyamavadad duhiturdehaśoṣaṇam |
puruṣadarśanājjātaṃ kāmatāpaprapīḍitam || 53 ||
[Analyze grammar]

sa tu devādhidevo vai vaikuṇṭhādāgataḥ svayam |
adya sa śrīveṃkaṭādrau vartate śrīprasevitaḥ || 54 ||
[Analyze grammar]

kāmarūpī viharati bhaktābhīṣṭapradaḥ prabhuḥ |
turaṃgastho vane rājñi tava kanyāṃ sa dṛṣṭavān || 55 ||
[Analyze grammar]

sītāchāyātmikāṃ vedavatīṃ te putrīpadminīm |
patnīṃ kartumicchayā sa preṣayiṣyati te'ntikam || 56 ||
[Analyze grammar]

lalitāṃ sā ca vai sarvaṃ kathayiṣyati tatsphuṭam |
rameva taṃ sametyaiṣā ramiṣyati sukhaṃ ciram || 57 ||
[Analyze grammar]

ityuktvā bakulā maunamāsthitā dharaṇistataḥ |
gṛhāntare sutāṃ gatvā dadarśā'naṃgamohitām || 58 ||
[Analyze grammar]

uvāca putri kiṃ te'sti priyaṃ karomi yadvad |
ityuktā sā jātismarā samuvāca tu mātaram || 59 ||
[Analyze grammar]

netrābhirāmaṃ yalloke satāmapi manaḥpriyam |
tejasāmapi tejasvi devānāmapi daivatam || 60 ||
[Analyze grammar]

bhaktaiḥ sadbhiriha prāpyamabhaktairna kadācana |
tatra kṛṣṇe mano mātarmama śaśvat pravartate || 61 ||
[Analyze grammar]

mātā prāha sute bhaktalakṣaṇaṃ brahi vedmi yat |
padminī prāha jalajacakrapadmagadāṃkitaḥ || 62 ||
[Analyze grammar]

bhujayugme tathā bhāle tūrdhvapuṇḍrakacandrakaḥ |
gale tulasikākaṇṭhī kare tu japamālikā || 63 ||
[Analyze grammar]

jihvāyāṃ śrīharernāma hṛdaye pratimā hareḥ |
pūjāpāṭhaparā ye ca satyavāco'nasūyakāḥ || 64 ||
[Analyze grammar]

anindakā brahmacaryaparāḥ śaucaparāḥ sadā |
hareḥ prasādabhoktāraḥ sarvabhūtahitaṃkarāḥ || 65 ||
[Analyze grammar]

dayālavaḥ śravaṇādibhaktiprakārakāriṇaḥ |
yadṛcchālābhasantuṣṭā harerdhyānaparāyaṇāḥ || 66 ||
[Analyze grammar]

satsaṃginaḥ sadā śāntā vaiṣṇavāste prakīrtitāḥ |
taireva labhyaṃ tadbrahma tatra me prītirasti vai || 67 ||
[Analyze grammar]

janmata eva mātarme tatprāptiṃ kāṃkṣate manaḥ |
mātaḥ kṛṣṇaṃ vinā'nyatra manaṃ me naiva dhāvati || 68 ||
[Analyze grammar]

taṃ śrīkṛṣṇaṃ smarāmyeva vadāmi cintaye'pi tam |
tenaiva mātarjīvāmi tadyoge cintyatāṃ vidhiḥ || 69 ||
[Analyze grammar]

śrutvā mātā'cintayacca viṣṇuyogārthameva yat |
bahudhā kalpayāmāsa viṣṇuḥ prītaḥ kathaṃ bhavet || 70 ||
[Analyze grammar]

evaṃ vicāryamāṇāyāṃ dharaṇyāṃ tatra dāsikāḥ |
sarvā eva samājagmuścintāṃ papracchurutsukāḥ || 71 ||
[Analyze grammar]

kathaṃ cintāmayī cāste vad kurmo hitaṃ sukham |
dharaṇyā kathitaṃ sarvaṃ putryāścintādikaṃ tadā || 72 ||
[Analyze grammar]

prāhuḥ sā bakulā'smabhyo militā vāṭikāsthale |
prāha no'pi samāyātā veṃkaṭādrerhareḥ sakhī || 73 ||
[Analyze grammar]

bakulamālikānāmnī nārāyaṇahitaṃkarī |
svāmī nārāyaṇo'smākamāste śrīveṃkaṭācale || 74 ||
[Analyze grammar]

kadāciddhayamāruhya haṃsaśuklaṃ manojavam |
mṛgayārthaṃ yayau veṃkaṭādrervane samīpataḥ || 75 ||
[Analyze grammar]

vane kaṃcidgajaṃ dṛṣṭvā'patat pṛṣṭhe tadā gajaḥ |
kareṇuyūthago'raṇye dudrāva sa tamanvagāt || 76 ||
[Analyze grammar]

tatra vane tapasyantaṃ pūjayantaṃ janārdanam |
śrībhūmisahitaṃ kṛṣṇanārāyaṇaṃ tu bhaktitaḥ || 77 ||
[Analyze grammar]

dadarśa śaṃkhaṃ rājānaṃ śaṃkhanāgasarastaṭe |
turaṃgādavatīryaiva nṛparūpo narāyaṇaḥ || 78 ||
[Analyze grammar]

papraccha kiṃ kriyate'tra veṃkaṭādrivane vada |
śaṃkhaḥ prāha tadā viṣṇumahaṃ haihayadeśajaḥ || 79 ||
[Analyze grammar]

rājā'smi śvetanṛpatermahāviṣṇupratuṣṭaye |
kṛtavānakhilān yajñān darśanārthaṃ harermuhuḥ || 80 ||
[Analyze grammar]

kintu nārāyaṇaḥ svāmī darśanaṃ na dadau mama |
nirviṇṇo'haṃ tato jātastadā vyomasarasvatī || 81 ||
[Analyze grammar]

uvāca śāntidā rājannātra me darśanaṃ tava |
gaccha nārāyaṇagiriṃ tapaḥ kuru japaṃ kuru || 82 ||
[Analyze grammar]

mamā''rādhanayā tatra darśanaṃ me bhaviṣyati |
tatra kaściddhayārūḍho rājā tvāṃ sammiliṣyati || 83 ||
[Analyze grammar]

taduktarītyā kṛtvaiva paraṃ mokṣamavāpsyasi |
ityukto'haṃ parityajya deśamāgatya vaiṃkaṭe || 84 ||
[Analyze grammar]

vane nārāyaṇaṃ kṛṣṇamārādhayāmi sarvadā |
śrībhūmisahitaṃ kṛṣṇanārāyaṇaṃ bhajāmi vai || 85 ||
[Analyze grammar]

iti rājño vacaḥ śrutvā nārāyaṇo nṛpaṃ jagau |
svasti te'stu gaccha nārāyaṇādrau śrīharergṛhe || 86 ||
[Analyze grammar]

kuru cārādhanāṃ tatra paścime śikhare sthitaḥ |
nyagrodhamūle tvāsīnaṃ viśvaksenaṃ praṇamya ca || 87 ||
[Analyze grammar]

svāmipuṣkariṇīṃ gatvā snātvā tīre tu paścime |
aśvatthaṃ drakṣyasi tatra valmīkaṃ drakṣyasi tvapi || 88 ||
[Analyze grammar]

tayormadhye sthiro bhūtvā haryārādhanamācara |
tatra śvetavarāhākhyo harirbhramati tatsthale || 89 ||
[Analyze grammar]

valmīke tvaṃ kvacid draṣṭāsyenaṃ puṇyapratāpataḥ |
iti śvetaṃ samādiśya samāsādyā'raṇīṃ nadīm || 90 ||
[Analyze grammar]

avaruhya hayāttīre vicacāra yadā hariḥ |
siṣeve pavanaḥ śītasugandhaḥ śramanodanaḥ || 91 ||
[Analyze grammar]

siṣevire taṃ taravaḥ puṣpaiḥ surasasatphalaiḥ |
sa ca nāthastadā hastinaṃ sakhīśca vyalokayat || 92 ||
[Analyze grammar]

adṛśyo'bhūd vane hastī cāyayau vaḥ pratīśvaraḥ |
tanvīṃ lakṣmīsamāṃ hemavarṇāṃ vo madhyavartinīm || 93 ||
[Analyze grammar]

dṛṣṭvā saktamanāstatra padminyāṃ samabhūddhariḥ |
tāṃ gṛdhnurāha keyaṃ me karagrāhyā bhavenna vā || 94 ||
[Analyze grammar]

yuṣmābhiradhikṣiptaḥ sa viyadrājo balena vai |
śrutvā drāk hayamāruhya yayau veṃkaṭabhūbhṛtam || 95 ||
[Analyze grammar]

tenaiva preṣitā cāsmi dāsī bakulamālikā |
padminyā haraye prāptyai dharaṇīṃ yāmi sukanyakāḥ || 96 ||
[Analyze grammar]

ityuktvā sā purataste tvāyātā kṛṣṇadāsikā |
ayācata tu te kanyāṃ kṛṣṇanārāyaṇāya vai || 97 ||
[Analyze grammar]

yathocitaṃ kuru mātarvicārya viyadādibhiḥ |
asti yogyaṃ pradānaṃ tu yogyāyaṃ paramātmane || 98 ||
[Analyze grammar]

ramā rāmāya dātavyā padminī padmacakṣuṣe |
kanyā kāntāya dātavyā kāminī kāmukāya vai || 99 ||
[Analyze grammar]

divyā divyāya dātavyā bhaktā bhagavate dhruvam |
iti tāsāṃ vacaḥ śrutvā papraccha nṛpameva sā || 100 ||
[Analyze grammar]

padminīṃ cāpi papraccha punareva kṛpāvaśā |
rājā prāha mama kanyā tvayonijā'sti devatā || 101 ||
[Analyze grammar]

arthitā śrīkṛṣṇanārāyaṇenā'nugrāhaḥ kṛtaḥ |
pūrṇo manorathaścā'dya me te'nyeṣāmapi dhruvam || 102 ||
[Analyze grammar]

sarvaṃ śrutvā jahṛṣuśca procuḥ kulakṛtārthatām |
bhavatkanyeyamatulā śriyā saha ramiṣyati || 103 ||
[Analyze grammar]

dīyatāṃ parameśāya veṃkaṭādrinivāsine |
ayaṃ vasantaḥ śrījuṣṭaḥ śubhaṃ śīghraṃ vidhīyatām || 104 ||
[Analyze grammar]

āhūya dyuguru lagnaṃ vivāhārthaṃ vidhīyatām |
tathāstviti nṛpaḥ prāhā''hvayāmāsa bṛhaspatim || 105 ||
[Analyze grammar]

mṛgaśīrṣaṃ tu kanyāyā devasya śravaṇaṃ tu bham |
janmanastadvicāyaiva gururlagnaṃ samabravīt || 106 ||
[Analyze grammar]

sammatā sukhavṛddhyarthaṃ tayoruttaraphālgunī |
tasyāṃ vivāho vidhivad vaiśākhe kriyatāmiti || 107 ||
[Analyze grammar]

ityuktvā rājakṛtpūjāmādāya svargururyayau |
rājā tu preṣayāmāsa dūtīṃ deveśvaraṃ prati || 108 ||
[Analyze grammar]

śukena sahitāṃ kanyāvāgdānavidhaye tadā |
śuko dūtaḥ śāradā ca dūtī ca bakulā tathā || 109 ||
[Analyze grammar]

tasminneva dine ramye yayuḥ śrīveṃkaṭācalam |
kṛṣṇanārāyaṇaṃ devaṃ śrīnivāsaṃ jagatpatim || 110 ||
[Analyze grammar]

praṇamya tvavadan prītāḥ kṛtyaṃ jātaṃ tava prabho |
māṃgalyavārtā saṃraktaṃ vayamatra samāgatāḥ || 111 ||
[Analyze grammar]

tvāṃ pratyāha sutā bhūmermāmaṃgīkuru mādhava |
japāmi tava nāmāni smarāmi pratimāṃ tava || 112 ||
[Analyze grammar]

dhyāye tava sucihnāni hṛdayādau janārdana |
tvāmavismṛtya kāryāṇi sarvāṇi prakaromi ca || 113 ||
[Analyze grammar]

tvayā'rthitā tavaivā'smi pitroranumate mama |
kuru prasādaṃ lakṣmīśa māmaṃgīkuru mādhava || 114 ||
[Analyze grammar]

viyacca dharaṇī caiva pratyāhatuḥ pareśvaram |
dānapātraṃ svato labdhaṃ śāśvataphaladāyakam || 115 ||
[Analyze grammar]

harṣo māti na hṛdaye gṛhṇātu kanyakāṃ hare |
pradattā vākpradānena śuko nivedayiṣyati || 116 ||
[Analyze grammar]

tavā'deśaṃ punaḥ prāpya syāmaścotsāhino vayam |
bakulā prāha sandeśaṃ prapāṭhaya jagadguro || 117 ||
[Analyze grammar]

kuru prasādaṃ me nātha padminyāścāpi keśava |
tathāstviti hariḥ prāha gṛhītvā vākpradānakam || 118 ||
[Analyze grammar]

kartuṃ kalyāṇamudvāhamāgamiṣyāmi cāmaraiḥ |
śuka gaccha vadaivaṃ tānitthaṃ devo'bravīditi || 119 ||
[Analyze grammar]

gṛhāṇemāṃ vanamālāṃ svarṇaratnādiśobhitām |
śukaśca śāradā mālāṃ gṛhītvā yayaturgṛham || 120 ||
[Analyze grammar]

praṇamyā'vadatāṃ sarvān jātaṃ kāryaṃ sutārthitam |
dadaturmālikāṃ kaṇṭhe padminyā bhāvagarbhitām || 121 ||
[Analyze grammar]

nṛpo vai niścite jāte'preṣayallagnapatrikām |
kuṃkumapatrikāścāpi lekhayitvā'nilaṃ sutam || 122 ||
[Analyze grammar]

dadāvindrādyānayane'sṛjat trilokamaṇḍale |
āhūya viśvakarmāṇaṃ purālaṃkārayojanāḥ || 123 ||
[Analyze grammar]

racayāmāsa bhagavān so'pi kṣaṇād vinirmame |
indro'sṛjatpuṣpavṛṣṭiṃ nanṛtuścāpsarogaṇāḥ || 124 ||
[Analyze grammar]

avādyanta ca vādyāni mahotsavaśca yoṣitām |
dhanado dhanadhānyādyaiḥ pūrayāmāsa veśma tat || 125 ||
[Analyze grammar]

yamastu rogarahitān cakāra manujān bhuvi |
varuṇo ratnajālāni mauktikādīnyapūrayat || 126 ||
[Analyze grammar]

sūryaḥ suvarṇaratnānāṃ bhūṣādīni samārpayat |
samudraśca tathā śailā ratnavastūni cārpayan || 127 ||
[Analyze grammar]

kāmagāvaḥ kāmavṛkṣāḥ kāmavallyaḥ svakaṃ svakam |
kāmaṃ cintāmaṇayaśca vastūnyapūrayaiṃstadā || 128 ||
[Analyze grammar]

nadā nadyaḥ samudrāśca dyauḥ rasātalabhūmayaḥ |
svasvaratnāni peyāni bhojyāni lehyakāni ca || 129 ||
[Analyze grammar]

racayāmāsurīśasya śāsanād veṃkaṭācale |
atha pṛṣvī jalaṃ tejo vāyuścākāśa īśvarāḥ || 130 ||
[Analyze grammar]

viyadrājasya bhavane cakrurvai maṇḍapaṃ śubham |
daśayojanavistāraṃ yojanocchrāyameva ca || 131 ||
[Analyze grammar]

mahīmānanivāsārthaṃ kārayāmāsa pattanam |
śatayojanavistāraṃ sāmudre dvīpake varam || 123 ||
[Analyze grammar]

mohamayaṃ mahatpuṇyaṃ dvitīyaṃ vai divaḥ sthalam |
yānavāhanaśobhāḍhyaṃ svarṇaśikharalakṣakam || 133 ||
[Analyze grammar]

rasaśālāsnānaśālāśṛṃgāraśālikāyutam |
nṛtyagāyanaśṛṃgārakathā''khyānādimaṇḍalam || 134 ||
[Analyze grammar]

dūraṃ śrūyet dṛśyeta vācayeta vimarśayet |
tathā divyaṃ bhūtasāraṃ gṛhaṃ vidyudvikāsitam || 135 ||
[Analyze grammar]

kārayāmāsa rājā'sau candramāhūya bhakṣyakam |
annaṃ bahuvidhaṃ miṣṭamamṛtaṃ rasasaṃyutam || 136 ||
[Analyze grammar]

viṣṇornaivedyayogyaṃ ca paramānnaṃ tathaudanam |
devānāṃ ca ṛṣīṇāṃ ca narāṇāmapi sammatam || 137 ||
[Analyze grammar]

muktānāṃ ca satāṃ cāpi sādhvīnāṃ sammataṃ tathā |
caturvidhaṃ sugandhāḍhyamamṛtāṃśaiḥ prapūritam || 138 ||
[Analyze grammar]

rasāyanaṃ naikavidhaṃ peyaṃ khādyaṃ navaṃ navam |
kārayitvā saṃvidhānaṃ dharaṇīsahito nṛpaḥ || 139 ||
[Analyze grammar]

vādyānāṃ kārayāmāsa nirghoṣaṃ maṃgalāvaham |
padminyalaṃkṛtiṃ cakre devāgamanakāṃkṣiṇī || 140 ||
[Analyze grammar]

sarvānalaṃkṛtān kṛtvā dharaṇīsahito nṛpaḥ |
sabhāyāṃ mantrisahitaḥ samāste prītamānasaḥ || 141 ||
[Analyze grammar]

iti lakṣmi tavacchāyā padminyā bhāgyamuttamam |
phalitaṃ bhagavān kṛṣṇaḥ pāṇigrahaṃ kariṣyati || 142 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne pativratāmāhātmye śrīnivāsabhagavatā bakulamālikā padminīṃ prati preṣitā sītāyāśchāyā vedavatī padminī jātā |
dharaṇīgṛhe bakulamālikā yayau śrīkṛṣṇapatnītvaṃ padminyāścihnairuktam nārāyaṇāya dātavyeti nirṇayaḥ lagnapatrikāpreṣaṇam vivāhopakaraṇāraṃbhaścetyādinirūpaṇanāmā navanavatyadhikatriśatatamo'dhyāyaḥ || 399 ||
[Analyze grammar]