Chapter 355

śrīlakṣmīruvāca |
śrutametanmayā kṛṣṇanārāyaṇa jagatprabho |
māthurakṣetramāhātmyaṃ saphalaṃ svargamokṣadam || 1 ||
[Analyze grammar]

śrāddhaṃ śrāddhaphalaṃ cāpi śrutaṃ te kṛpayā hare |
kena tūtpāditaṃ śrāddhaṃ vistareṇa vadasva me || 2 ||
[Analyze grammar]

śrīnārāyaṇa uvāca |
śṛṇu priye kathayāmi śrāddhotpattiviniścayam |
sṛṣṭyāraṃbhe mama nābhipadmād brahmā vyajāyata || 3 ||
[Analyze grammar]

sa ca putrātmakānutpādayāmāsa surādikān |
ādityāṃśca vasūn rudrānaśvinau ca marudgaṇān || 4 ||
[Analyze grammar]

tāraṇārthaṃ tu sarveṣāṃ brāhmaṇān bhuvi sarvaśaḥ |
kṣatriyān vaiśyavarṇāṃśca śūdravarṇāṃstathā paśūn || 5 ||
[Analyze grammar]

pakṣiṇaḥ sthāvarāṃstiryakkīṭādyān samapekṣitān |
ditidvārā tathā daityāndanūdvārā tu dānavān || 6 ||
[Analyze grammar]

evaṃ vaidikavijñānānṛṣīṃścāpi tapodhanān |
teṣāṃ putrāstathā pautrā jātā yaiḥ pūritaṃ jagat || 7 ||
[Analyze grammar]

vedhaso netrato jāto nimimtu mānaso nṛpaḥ |
tasyāpi mānasaḥ putraḥ śrīmānnāmā hyajāyata || 8 ||
[Analyze grammar]

jātimātro yuvā jātismaro vedasmarastathā |
tapaścacāra paramaṃ samādhāya mano harau || 9 ||
[Analyze grammar]

paṃcāgnirvāyubhakṣaśca hyekapādordhvabāhukaḥ |
śīrṇaparṇāmbubhakṣaśca śiśire tu jaleśayaḥ || 10 ||
[Analyze grammar]

kṛcchraṃ cāndrāyaṇaṃ kurvan varṣāṇāmayutottaram |
mṛtyukālamanuprāptaḥ pañcatvaṃ samupāgamat || 11 ||
[Analyze grammar]

nimiḥ śokaṃ paraṃ prāptaścintayāmāsa tatkṛte |
māghaśukladvādaśyāṃ sa sṛṣṭvā viṣayaṃ mānasam || 12 ||
[Analyze grammar]

śraddhayā kalpayāmāsa putrārthe kiṃ karomi vai |
tāvatputro divyadeho divo vimānamārgataḥ || 13 ||
[Analyze grammar]

nimimāgatya sa prāha dehi dānāni matkṛte |
jalaṃ dehi phalaṃ dehi miṣṭānnaṃ cāmbarāṇi ca || 14 ||
[Analyze grammar]

bhūṣā yānāni pātrāṇi pāyasānnāni dehi me |
yāni me syātprabhojyāni mūlāni ca rasāstathā || 15 ||
[Analyze grammar]

yāni me'tīva preṣṭhāni dehi me śākabhājikāḥ |
iti kṛtvoṣitastatra devadhūnītaṭe hime || 16 ||
[Analyze grammar]

nimirāmantrya saptarṣīn śucirbhūtvā samāhitaḥ |
dakṣiṇāvartataḥ sarvamakurvan ṛṣisattamāḥ || 17 ||
[Analyze grammar]

saptakṛtvastatra tatra yugapat samupāviśan |
dadustvannāni śākāni mūlāni ca phalāni ca || 18 ||
[Analyze grammar]

nimirviprān prasaṃpūjya saptakṛtvaśca sundari |
kṛtvā tu dakṣiṇāgrāṃśca kuśāṃśca prayatastadā || 19 ||
[Analyze grammar]

pradadau śrīmate piṇḍānnāmagotramudāharan |
jalaṃ phalaṃ dalaṃ cānnaṃ pāyasaṃ cāmbarādikam || 20 ||
[Analyze grammar]

dadau putrāya divyāya jagrāha sa ca sarvathā |
pratyakṣaṃ nītavānsarvaṃ pratyakṣaṃ bubhuje papau || 21 ||
[Analyze grammar]

tathā saptarṣiṣu punaḥ praviśya bubhuje muhuḥ |
tṛpto'smi cātitṛpto'smītyuccāryā''sādya vastukam || 22 ||
[Analyze grammar]

divaṃ vimānamāruhya jagāma śrāddhatoṣitaḥ |
arke tvastaṃ gate rājā bhāvasandhyāmasevata || 23 ||
[Analyze grammar]

rātrau cintayituṃ rabdhaḥ putrārthaṃ yatsamācarat |
kṛtvā sa piṇḍadānādi paścāttāpaṃ cakāra saḥ || 24 ||
[Analyze grammar]

akṛtaṃ munibhiḥ pūrvaṃ kiṃ mayā tadanuṣṭhitam |
nivāpakarma tvaśuci putrārthe viniyojitam || 25 ||
[Analyze grammar]

aho snehaprabhāveṇa mayā mṛtyuttaraṃ kṛtam |
naitatkarma śavakarma garhyaṃ karma kṛtaṃ mayā || 26 ||
[Analyze grammar]

kiṃ vakṣyanti ca māṃ sarve ye vai pitṛpade sthitāḥ |
sadevāsuragandharvapiśācoragarākṣasāḥ || 27 ||
[Analyze grammar]

ityevaṃ cintayānasya brāhma prātarabhūttataḥ |
sandhyā cakāra hutvā'gnīn punaścintāṃ samācarat || 28 ||
[Analyze grammar]

aho me jīvitaṃ vyarthaṃ putro yatra na dṛśyate |
narakaṃ pūtikākhyaṃ vai hṛdi duḥkhaṃ samucyate || 29 ||
[Analyze grammar]

putre sati na vai duḥkhaṃ svargaṃ bhavati sarvathā |
putreṇa labhate svargaṃ pautreṇa tu pitāmahāḥ || 30 ||
[Analyze grammar]

atha putrasya pautreṇa modante prapitāmahāḥ |
putreṇa śrīmatā hīnaṃ nā'haṃ jīvitumutsahe || 31 ||
[Analyze grammar]

etasminnantare lakṣmi nāradastvājagāma ha |
tejasābhrājamānaṃ taṃ dṛṣṭvā pupūja vai nṛpaḥ || 32 ||
[Analyze grammar]

satkṛtaścāsane tūpaviṣṭo nārada āha tam |
nime śṛṇu mahāprājña śokaṃ mā kuru śokahan || 33 ||
[Analyze grammar]

anityaṃ gatvaraṃ dehaṃ kathaṃ prājña viśocasi |
mṛtaṃ naṣṭaṃ gataṃ yāntaṃ nānuśocanti saddhiyaḥ || 34 ||
[Analyze grammar]

gato nivartate naiva hasanti śokinaṃ janāḥ |
amaratvaṃ martyaloke paśyāmi na carācare || 35 ||
[Analyze grammar]

satyātpātālaparyantāḥ sarve kālavaśā janāḥ |
jātasya sarvabhūtasya mṛtyurnirṇīta eva ha || 36 ||
[Analyze grammar]

avaśyameva gantavyaṃ tvayā mayā ca vedhasā |
tava putro mahātmā'bhūcchrīmānnāma śriyo nidhiḥ || 37 ||
[Analyze grammar]

pūrṇaṃ tapo mahat kṛtvā yayau sa paramāṃ gatim |
evaṃ muktasya tu kṛte naiva śocitumarhasi || 38 ||
[Analyze grammar]

ityuktaḥ sa nimiḥ pādau praṇamya śirasā muneḥ |
savrīḍo niḥśvasan bhīto dīnavatprāha nāradam || 39 ||
[Analyze grammar]

sānvito'smi tvayā vipra kintu vakṣyāmi tacchṛṇu |
gataḥ sa tu gata eva na cā''yāti gataḥ punaḥ || 40 ||
[Analyze grammar]

paraṃ mayā śavapaścāt kalpayitvā ca yat kṛtam |
na tu śrutaṃ mayā pūrvaṃ na devaiḥ pūrvajaiḥ kṛtam || 41 ||
[Analyze grammar]

śokasyaiva prabhāveṇa śavamuddiśya yatkṛtam |
tarpayitvā dvijān sapta tvannādyaiśca phalairapi || 42 ||
[Analyze grammar]

paścād visarjitaṃ piṇḍaṃ darbhānāstīrya bhūtale |
udakānayanaṃ caiva hyapasavyena vāsitam || 43 ||
[Analyze grammar]

etadvai nūtanaṃ sarvaṃ kṛtaṃ bibhemi tena vai |
śrutvā tannāradaḥ prāha na bhetavyaṃ tvayā nṛpa || 44 ||
[Analyze grammar]

adharmaṃ nātra paśyāmi pitaraṃ śaraṇaṃ vraja |
ityuktaḥ sa nimirdhyātvā pitaraṃ śaraṇaṃ gataḥ || 45 ||
[Analyze grammar]

tāvatputrastapodhanaḥ śrīmānnāmā samāgataḥ |
uvāca nime tvatkṛtaṃ kalpitaṃ pitṛyajñakam || 46 ||
[Analyze grammar]

pitṛyajñātmako dharmo brahmaṇā kalpito'sti vai |
sa ca karmātmakastvayā manmiṣeṇa prakāśitaḥ || 47 ||
[Analyze grammar]

śrāddhadharmaḥ pitṛyajñaḥ kratustvayā pratiṣṭhitaḥ |
pūrvapūrvasṛṣṭidharmaḥ śrāddhadharmaścirantanaḥ || 48 ||
[Analyze grammar]

kṛtaḥ svayaṃbhuvā pūrvaṃ śrāddhātmā vidhireva saḥ |
pretakarma śrāddhadharmaḥ kartavyaḥ sarvathā janaiḥ || 49 ||
[Analyze grammar]

jātasya vai mṛteḥ paścādavaśyaṃ kvāpi saṃsthitiḥ |
tatra prāptyarthamaivātra kartavyaṃ śraddhayā'rpaṇam || 50 ||
[Analyze grammar]

amokṣasya bhavet tṛptirmuktau tṛptistu śāśvatī |
mokṣaḥ karmaviśeṣeṇa prāyaścittena ca dhruvam || 51 ||
[Analyze grammar]

dīrghāyuṣo hyapi yānti kiṃ punaḥ svalpakā''yuṣaḥ |
alpāyuṣo janāḥ paścād bhaviṣyanti yugāntare || 52 ||
[Analyze grammar]

tāmasā rājasāścāpi bhaviṣyanti viśeṣataḥ |
teṣāṃ tu kugatau śrāddhaṃ gatidaṃ saṃbhaviṣyati || 53 ||
[Analyze grammar]

tāmasaṃ narakaṃ vidyāt tiryagyoniṃ ca rākṣasīm |
krauryaṃ bhayaṃ viṣādaśca hiṃsā nirlajjatā tamaḥ || 54 ||
[Analyze grammar]

ajñānitvaṃ ca paiśācaṃ tāmasānāṃ svabhāvajāḥ |
tāmasaṃ taṃ vijānīyāducyamāno na buddhyati || 55 ||
[Analyze grammar]

durmadā'śraddhadhānaṃ ca parā'pakaraṇodyatam |
rājasaḥ prabalo vāṇyāṃ svadhṛtā'tmajanaḥ sadā || 56 ||
[Analyze grammar]

śūraḥ sarvatra vyaktaśca viṣayehāprapūritaḥ |
eteṣāṃ paraloke vai tṛptyarthaṃ śrāddhamarthitam || 57 ||
[Analyze grammar]

sāttviko mokṣabhāgī syāt kṣānto dānto viśuddhahṛt |
śraddhālustapasā yukto svādhyāyādisamanvitaḥ || 58 ||
[Analyze grammar]

eteṣvapi yadi putreṣaṇā lokeṣaṇā tathā |
dhaneṣaṇā tathā dāreṣaṇā kāmeṣaṇā ca vā || 59 ||
[Analyze grammar]

bhavettena pravāheṇa paratra pretatāṃ vrajet |
tasya tṛptikṛteśrāddhadānahavanakarmaṇām || 60 ||
[Analyze grammar]

kalpanā vedhasā pūrvaṃ kṛtā tvayā prasāritā |
evaṃ saṃcintayānastu na śokaṃ kartumarhasi || 61 ||
[Analyze grammar]

tyaja śokaṃ mahāprājña śokaḥ sarvavināśanaḥ |
śoko dahati gātrāṇi buddhiḥ śokena naśyati || 62 ||
[Analyze grammar]

lajjā dhṛtiśca dharmaśca śrīḥ kīrtiśca smṛtirnayaḥ |
tyajanti sarvadharmāśca śokenopahataṃ naram || 63 ||
[Analyze grammar]

evaṃ śokaṃ parityajya viśoko bhava bhūpate |
mūḍhaḥ snehaprabhāveṇa yāti saṃsārabandhanam || 64 ||
[Analyze grammar]

tasmāt snehaṃ prasaṃyamya buddhiṃ dharme niyojayet |
dharmo lokahitārthāya sa śrāddhaṃ dānamarcanam || 65 ||
[Analyze grammar]

satkāro havanaṃ ceti pañcadhā prāyaśo mataḥ |
mṛtānāṃ tṛptidaṃ śrāddhaṃ dānaṃ tu jīvatāṃ sukham || 66 ||
[Analyze grammar]

pratimāyā arcanaṃ śaṃ satkāraḥ prāṇināṃ sukham |
havanaṃ dyugatānā śaṃ dātā'pi phalabhāg bhavet || 67 ||
[Analyze grammar]

mṛtyukāle yadicchā syāt pūraṇīyā viśeṣataḥ |
mriyamāṇasya santoṣaḥ paralokagatipradaḥ || 68 ||
[Analyze grammar]

kaṇṭhasthānaṃ gate jīve śīghraṃ niḥsārayed gṛhāt |
kuśāstaraṇaśayyāsthaṃ snehabhāvena vācayet || 69 ||
[Analyze grammar]

suvarṇaṃ tanmukhe dadyājjalaṃ dadyād vratādikam |
puṇyaṃ dadyācca gāṃ dadyātparalokahitāvahām || 70 ||
[Analyze grammar]

dogdhrīṇāṃ tu gavāṃ dānācchīghraṃ mucyeta kilbiṣāt |
tasya karṇe harernāma śrāvayenmuktisādhanam || 71 ||
[Analyze grammar]

madhuparkaṃ madhu sarpirdadhi dadyāttadoṣṭhayoḥ |
evaṃ viniḥsṛte prāṇe saṃsāraṃ nādhigacchati || 72 ||
[Analyze grammar]

tato'stha ghṛtagandhādyaiḥ kṛtvā vai dehaśodhanam |
dakṣiṇāyāṃ śiraḥ kṛtvā tīrthasnānaṃ prakārayet || 73 ||
[Analyze grammar]

śreṣṭhavanaspatikāṣṭhaiścitāṃ kṛtvā vidhānataḥ |
dakṣiṇaśirasā sthāpya kṛtvā haste hutāśanam || 74 ||
[Analyze grammar]

daha tvetasya gātrāṇītyuktvā kṛtvā pradakṣiṇam |
pradāpayecchiraḥsthāne bhasmībhāvottaraṃ tataḥ || 75 ||
[Analyze grammar]

gātrāṇi vāsasī caiva prakṣālya vinivartayet |
mṛtaṃ nāma tadoddiśya dadyāt piṇḍaṃ mahītale || 76 ||
[Analyze grammar]

gatāyuṣastṛtīye'hni snānaṃ kuryānnadījale |
piṇḍaṃ sacūraṇaṃ dadyāt trīṃśca dadyājjalāṃjalīn || 77 ||
[Analyze grammar]

caturthe pañcame ṣaṣṭhe piṇḍamekaṃ jalāṃjalim |
saptame'ṣṭamanavamadaśameṣu tathaiva ha || 78 ||
[Analyze grammar]

daśame vastrasaṃśuddhirgātraśuddhiśca sarvathā |
kartavyā gotrajaistilā''malakasnehatastataḥ || 79 ||
[Analyze grammar]

piṇḍadānaṃ vinirvartya kṣaurakarma tu kārayet |
snānaṃ kṛtvā jñātibhiśca tata ekādaśe dine || 80 ||
[Analyze grammar]

snātvā pretaṃ brāhmaṇeṣu yojayetkārayettathā |
ekoddiṣṭaṃ vipramekaṃ sudravyeṇa hi bhojayet || 81 ||
[Analyze grammar]

punaḥ snātvā ca taṃ pretaṃ preteṣu saṃniyojayet |
ekoddiṣṭaṃ trivarṇeṣu kartavyaṃ pākabhojanam || 82 ||
[Analyze grammar]

apākadravyaṃ saṃgrāhyaṃ caturthavarṇakasya tu |
trayodaśe dine pakvairbhojayed brāhmaṇān sataḥ || 83 ||
[Analyze grammar]

manasā vāyubhūtastvaṃ viprān sādhūn samāśraya |
viprasatāṃ kṛtā sevā pretāya sukhadā bhavet || 84 ||
[Analyze grammar]

pretabhogaśarīraṃ vai viprasatoḥ prakalpitam |
prabhātāyāṃ tu śarvaryāmudite tu divākare || 85 ||
[Analyze grammar]

śmaśrukarma prakartavyaṃ viprasya tu yathāvidhi |
snāpanā'bhyaṃjane kārye pretasantoṣadāyake || 86 ||
[Analyze grammar]

sthaṇḍilaṃ kārayed bhūmau pretakāryaṃ samācaret |
yaṃ deśaṃ tu na paśyanti kukkuṭaśvānasūkarāḥ || 87 ||
[Analyze grammar]

śvā cāpohati rāveṇa garjitena tu sūkaraḥ |
kukkuṭaḥ pakṣavātena cāṇḍālo darśanena ca || 88 ||
[Analyze grammar]

tatra kurvanti yacchrāddhaṃ pitṝṇāṃ bandhanapradam |
sthaṇḍile pretabhāgaṃ tu dadyāt pūrvāhṇikaṃ tu tat || 89 ||
[Analyze grammar]

kuryācca piṇḍasaṃkalpaṃ nāmagotramudāharan |
tataścāśnanti gotrāṇi kulajāścaikabhojanāḥ || 90 ||
[Analyze grammar]

evaṃ dattena prīyante pretalokagatā janāḥ |
chatraṃ dadyādagnibhasmaśilāvṛṣṭyādivāraṇam || 91 ||
[Analyze grammar]

dadyāccopānahau mārgakaṇṭakādinivārakau |
dhūpaṃ dadyāt pradīpaṃ ca vastrāṇyābharaṇāni ca || 92 ||
[Analyze grammar]

phalānyapi supakvāni pretabhogyāni vai dadet |
evaṃ sarvaṃ vinirvartya pakvānnaṃ bhojayed dvijam || 93 ||
[Analyze grammar]

prathamaṃ brāhmaṇastatra pretabhāgaṃ prakalpayet |
hastaśaucaṃ tataḥ kṛtvā vipro miṣṭaṃ hi bhakṣayet || 94 ||
[Analyze grammar]

jñātibāndhavamitraiśca brāhmaṇāya punaḥ punaḥ |
pretabhāgaḥ pradātavyo vāraṇīyo na kenacit || 95 ||
[Analyze grammar]

nivāraṇe kṛte tatra gṛhṇanti pitaro na vai |
evaṃ vilupyate dharmaḥ pretastatra na tuṣyati || 96 ||
[Analyze grammar]

tṛpte vipre salilaṃ ca dātavyaṃ śītalaṃ śubham |
ucchiṣṭaṃ tu saridādau matsyebhyo deyameva hi || 97 ||
[Analyze grammar]

dadyācchayyāsanaṃ cāpi tathaivā'ñjanakaṃkaṇam |
nivāpasthānamāgatya dadyāttilodakaṃ tataḥ || 98 ||
[Analyze grammar]

gavāṃ lāṃgūlamuddhṛtya dadyād brāhmaṇahastake |
pātreṇodumbarasthena kṛtvā kṛṣṇatilodakam || 99 ||
[Analyze grammar]

mantrapūtaṃ jalaṃ dadyāt toyenā'bhyukṣya vai tataḥ |
pretaṃ visarjayed viprād dadyād dānaṃ dvijātaye || 100 ||
[Analyze grammar]

pipīlikādibhūtebhyaḥ pretabhāgaṃ prakalpayet |
dīnānātheṣu bhakteṣu preto bhavati tṛptimān || 101 ||
[Analyze grammar]

evaṃ śrāddhātmakaḥ sarvaiḥ pretabhāvaviśodhanaḥ |
karttavya eva saṃskāro nime tvayā tu sa kṛtaḥ || 102 ||
[Analyze grammar]

ayaṃ śrāddhakriyākalpaḥ kraturekaḥ prakīrtitaḥ |
ita āramya lokeṣu pitṛyajño bhaviṣyati || 103 ||
[Analyze grammar]

yajñakartā bhavān nime brahmalokaṃ gamiṣyati |
evaṃ sarvaiḥ pradātavyaḥ pretabhāgastṛtīyake || 104 ||
[Analyze grammar]

māse tu saptame navame cāpyekādaśe tathā |
tataḥ sāṃvatsarīṃ kuryāt kriyāṃ pretasya muktaye || 105 ||
[Analyze grammar]

pūrṇe samvatsare yāte pretakāryaṃ kṛte tataḥ |
prayānti jantavo muktiṃ kecid bhramanti cā'mbare || 106 ||
[Analyze grammar]

pitāmahaḥ snuṣā bhāryā jñātisambandhibāndhavāḥ |
evamete bahavo'tra santi svapnopamāstu te || 107 ||
[Analyze grammar]

ruditvā tu kṣaṇaṃ sarve yānti parāṅmukhā hi te |
snehapāśena baddhāste mucyante ca kṣaṇāntare || 108 ||
[Analyze grammar]

kasya mātā pitā kasya kasya bhāryā sutāstathā |
dine dine vivartante mohapāśaprabandhanāḥ || 109 ||
[Analyze grammar]

mātāpitṛsahasrāṇi putradāraśatāni ca |
saṃsāreṣvanubhūyante kasya te kasya vā vayam || 110 ||
[Analyze grammar]

svayaṃ bhuvā vidhiḥ proktaḥ pretasaṃskāralakṣaṇaḥ |
snehabhāvena karttavyaḥ saṃskāro'yaṃ mṛtasya vai || 111 ||
[Analyze grammar]

pretakārye nivṛtte tu pitṛtvamupajāyate |
māsi māsi hyamāyāṃ vai karttavyaṃ pitṛtarpaṇam || 112 ||
[Analyze grammar]

pitā pitāmahaścaiva tathaiva prapitāmahaḥ |
brāhmaṇasya mukhe homāt tṛpyanti sādhubhojanāt || 113 ||
[Analyze grammar]

evamuktvā muniśreṣṭho nāradastu divaṃ yayau |
ityevaṃ niminā rājñā kṛtaṃ śrāddhaṃ purā yuge || 114 ||
[Analyze grammar]

tataḥ prabhṛti śrāddhaṃ ca piṇḍaṃ kurvanti bhūsurāḥ |
iti te kathitaṃ lakṣmi śrāddhapiṇḍodbhavādikam || 115 ||
[Analyze grammar]

iti śrīlakṣmīnārāyaṇīyasahitāyāṃ prathame kṛtayugasantāne māthurakṣetramāhātmye niminṛpatinā śrīmānnāmno mṛtaputrasyārthe śrāddhaṃ kṛtam paścāt kalpitakarmā'pratiṣṭhitamiti jñātvā śokaṃ kurvate nimaye nāradena śrāddhaṃ purātano dharma ityupadiṣṭam śrāddhakriyākramaścokta ityādi nirūpaṇanāmā pañcapañcāśadadhikatriśatatamo'dhyāyaḥ || 355 ||
[Analyze grammar]