Chapter 356

śrīlakṣmīruvāca |
śrutaṃ śrāddhaṃ pretabhojyaṃ kṛpayā tava keśava |
nanu viprāḥ pretabhāgaṃ dānaṃ gṛhṇanti bhojanam || 1 ||
[Analyze grammar]

aniṣṭaṃ garhitaṃ cāpi pretā''veśena bhojanam |
bhuktvā pretasya viprastu mucyate kena karmaṇā || 2 ||
[Analyze grammar]

kathaṃ sa tārayed garhyo dātāraṃ puruṣottama |
iti me saṃśayaṃ chindhi kṛṣṇanārāyaṇa prabho || 3 ||
[Analyze grammar]

śrīnārāyaṇa uvāca |
samyak pṛṣṭaṃ tvayā lakṣmi saṃśayaṃ nāśayāmi te |
yastu yatirbhaved vipro mahābhāgavatastu yaḥ || 4 ||
[Analyze grammar]

mahāyogī mahājñānī siddhyaiśvaryādibhūṣitaḥ |
mahattapodhano yaśca vedaśāstraviśāradaḥ || 5 ||
[Analyze grammar]

dhyānaṃ ca dhāraṇā yasya samādhiścāpi vidyate |
trikālajño yamaniyamādisadgumaṇḍitaḥ || 6 ||
[Analyze grammar]

ṣaṭkarmanirato nityaṃ haryārādhanatatparaḥ |
preto yatpadrajaḥsparśād divi devo'bhijāyate || 7 ||
[Analyze grammar]

sādhuśīlaḥ sadā śuddho vahnivacchodhako bhavet |
sa vai pretānnamābhuktvā gṛhītvā dānamityapi || 8 ||
[Analyze grammar]

kṛtvā karmāṇi pretasya na taddoṣeṇa lipyate |
puṃprakṛtyorvivekajño brahmātmaikyaparāyaṇaḥ || 9 ||
[Analyze grammar]

pāpakṣālanasāmarthyo na taddoṣeṇa lipyate |
na śarvarīkṛtaṃ dhvāntaṃ sūryaṃ kvacid vilumpati || 10 ||
[Analyze grammar]

dhvāntaṃ prakāśatāṃ yāti sūryakiraṇasannidhau |
pretasya pretatā tādṛgyogena devatā bhavet || 11 ||
[Analyze grammar]

pretatvaṃ brahmayogena devatve parivartate |
pāpaṃ puṇyatamaṃ syācca samarthe nāsti dūṣaṇam || 12 ||
[Analyze grammar]

yastu nātmabalāḍhyo vā nāpi brahmaparāyaṇaḥ |
nāpi brahmavrataṃ puṣṭo na ṣaṭkarmādiyogavān || 13 ||
[Analyze grammar]

nā''tmajño na vivekajñaḥ sa vipro lipyate hyaghaiḥ |
pretabhojī preta eva malino jāyate bhujeḥ || 14 ||
[Analyze grammar]

sa svadehasya śuddhyarthaṃ kuryādekamupoṣaṇam |
sandhyāṃ prātaḥ sa nirvartya kṛtvā caivāgnitarpaṇam || 15 ||
[Analyze grammar]

tilahomaṃ prakurvīta śāntimantrān paṭhan dvijaḥ |
prāksrotasaṃ nadaṃ gatvā snātvā ca pañcagavyakam || 16 ||
[Analyze grammar]

madhuparkayutaṃ pītvā gṛhaṃ sammārjya prokṣayet |
agnimukhān surāṃstarpayitvā bhūtabaliṃ caret || 17 ||
[Analyze grammar]

viprebhyo bhojanaṃ dadyād godānaṃ prasamācaret |
evaṃ yaḥ kurute vipraḥ sa śuddho jāyate dhruvam || 18 ||
[Analyze grammar]

evaṃ kṛte tato mṛtyau sa yāti paramāṃ gatim |
anyathā kāladharmaṃ tu yāte pretānnakodare || 19 ||
[Analyze grammar]

preta eva bhavet so'pi niraye vāsamāpnuyāt |
prāpnuyādrākṣasabhāvaṃ tato mucyeta kilbiṣāt || 20 ||
[Analyze grammar]

prāyaścittamanaḥ kāryaṃ dātṛbhoktṛsukhāvaham |
gohastyaśvadhanaratnakṣetradāsīvibhūṣaṇam || 21 ||
[Analyze grammar]

pratigṛhṇan samantraṃ ca prāyaścittaṃ carettu yaḥ |
sa śuddhottārayeccāpi dātāraṃ nātra saṃśayaḥ || 22 ||
[Analyze grammar]

daive ca janmanakṣatre śrāddhakāle praparvasu |
pretakāryeṣu sarvatra vipraṃ ṣaṭkarmaśālinam || 23 ||
[Analyze grammar]

vedavidyāvratasnātaṃ dharmiṣṭhaṃ ca tapasvinam |
śīlasantoṣasatyādiguṇayuktaṃ kṣamāyutam || 24 ||
[Analyze grammar]

ahiṃsādiyamayuktaṃ bhagavatsuparāyaṇam |
pātraṃ prāpya prakuryādvai śrāddhaṃ dānaṃ prapūjanam || 25 ||
[Analyze grammar]

sa śuddhastārayet sarvānātmānaṃ cāpi tārayet |
na hi śilā śilā kvāpi tārayet tārakaṃ vinā || 26 ||
[Analyze grammar]

na hyaśuddhaḥ kvacittvanyān tārayetpāpasaṃbhṛtaḥ |
śuddho vai tārayeccānyāṃstasmāt pātre prayojayet || 27 ||
[Analyze grammar]

śṛṇu lakṣmi nṛpaḥ pūrvaṃ medhātithirabhūnmahān |
avantyāṃ tvabhavaccandraśarmā tasya purohitaḥ || 28 ||
[Analyze grammar]

rājā gavāṃ śataṃ dānaṃ datvā bhuṃkte dine dine |
rājñaḥ piturdinaṃ prāptaṃ vaiśākhe śrāddhakarmaṇaḥ || 29 ||
[Analyze grammar]

āhūtān brāhmaṇānnatvā śrāddhaṃ kṛtvā vidhānataḥ |
piṇḍānnirvāpya ca śrāddhe kalpitānnaṃ dadau bahu || 30 ||
[Analyze grammar]

dānaṃ vastravibhūṣāṇāṃ brāhmaṇebhyo dadau tathā |
tanmadhye brāhmaṇaḥ kaścidbalahīno'tipāpavān || 31 ||
[Analyze grammar]

vyabhicārasamutpannaḥ śūdrabījādimiśritaḥ |
śrāddhānnaṃ jagṛhe tatra tena doṣeṇa bhūbhṛtaḥ || 32 ||
[Analyze grammar]

pitaraḥ patitāḥ svargād bhraṣṭā vane sakaṇṭake |
kṣutpipāsārditā nityaṃ krandanti vai punaḥ punaḥ || 33 ||
[Analyze grammar]

medhātithirdaivayogād bhramaṇārthaṃ vanaṃ gataḥ |
tānbhramataḥ sa papraccha ke bhavantaḥ suduḥkhitāḥ || 34 ||
[Analyze grammar]

pitarastaṃ tadā prāhurasmadvaṃśe hi vidyate |
nṛpo medhātithistasya vayaṃ smaḥ pitaro vane || 35 ||
[Analyze grammar]

patitāḥ sma divo bhraṣṭāḥ śrāddhadoṣeṇa bhūbhṛtaḥ |
śrāddhānnaṃ tvarthitaṃ tena pāpiṣṭhabrahmabandhave || 36 ||
[Analyze grammar]

karmabhraṣṭavyavāyotthanāmamātradvijāya vai |
tenaiva karmadoṣeṇa narakaṃ gantumipsavaḥ || 37 ||
[Analyze grammar]

tatra duḥkhaṃ mahadbhukttā punargacchāmahe divam |
viprebhyastu gavāṃ dānāt tatpuṇyena punardivam || 38 ||
[Analyze grammar]

gamiṣyāmaḥ kintu tatra nāstyanna tṛptidāyakam |
iti śrutvā nṛpaḥ prāha medhātithirahaṃ hi saḥ || 39 ||
[Analyze grammar]

bhavatāṃ tāraṇārthaṃ kiṃ punaḥ kāryaṃ vadantu me |
pitaraḥ prāhurenaṃ te yathā tṛptirbhaveddhi naḥ || 40 ||
[Analyze grammar]

tathā śrāddhaṃ punaḥ kāryaṃ bhojanīyā dvijottamāḥ |
teṣāṃ tadvacanaṃ śrutvā medhātithiragād gṛham || 41 ||
[Analyze grammar]

āhūtavān dvijān sādhūn vedapāṭhakṛtaśramān |
puṇyān dharmaparān kṣāntān suśīlān sutapasvinaḥ || 42 ||
[Analyze grammar]

yamaiśca niyamairyuktānmahābhāgavatānsataḥ |
rājā śrāddhaṃ cakārātha piṇḍānnirvāpya sarvathā || 43 ||
[Analyze grammar]

brāhmaṇān bhojayāmāsa dakṣiṇābhiḥ prapūjya ca |
natvā visarjayāmāsa tataḥ sa bubhuje nṛpaḥ || 44 ||
[Analyze grammar]

tato vanaṃ svayaṃ yāto dṛṣṭavāṃśca svakān pitṝn |
hṛṣṭānpuṣṭān balairyuktān divaṃ gantuṃ samudyatān || 45 ||
[Analyze grammar]

dṛṣṭvā'timumude bhūbhṛt prāhuśca pitaro nṛpam |
svasti te'stu gamiṣyāmaḥ svargalokaṃ prati nṛpa || 46 ||
[Analyze grammar]

kadāpi naiva pradātavyaṃ kupātrāyā'tipāpine |
daivaṃ pitryaṃ ca vā tatra dattaṃ niṣphalameva yat || 47 ||
[Analyze grammar]

daive pitrye supātraṃ ced brāhmaṇo naiva labhyate |
saṃkalpitaṃ tadannaṃ tu gobhyo deyaṃ yathāvidhi || 48 ||
[Analyze grammar]

gavāmabhāve nadyāṃ vā kṣipedanna prayatnataḥ |
apātrāya na dātavyaṃ nāstikāya gurudruhe || 49 ||
[Analyze grammar]

golakāya na dātavyaṃ kuṇḍāya saṃkarāya ca |
ityuktvā pitaraḥ sarve gatāḥ svargaṃ vimānakaiḥ || 50 ||
[Analyze grammar]

medhātithirgṛhaṃ prāyād jñātvā pātrabalābale |
tasmāllakṣmi dharmaniṣṭhe eko'pi brāhmaṇottamaḥ || 51 ||
[Analyze grammar]

santārayati durgebhyo viṣayebhyo na saṃśayaḥ |
tasmācchrāddhe bhojanīyāḥ santo bhāgavatā dvijāḥ || 52 ||
[Analyze grammar]

māse māse'thavā pitṛpakṣe pātratapodhanāḥ |
devāsuramanuṣyāṇāṃ gandharvoragarakṣasām || 53 ||
[Analyze grammar]

tārakā bhojanīyā vai brahmabodhaparā janāḥ |
sādhvyaḥ satyo bhojanīyā brahmacaryaparāstathā || 54 ||
[Analyze grammar]

iti te kathitaṃ lakṣmi satpātraṃ tārayet pitṝn |
asatpātra bhraṃśayedvai prāyaścittaṃ tataścaret || 55 ||
[Analyze grammar]

śrīlakṣmīḥ prāha tacchrutvā kṛṣṇanārāyaṇaṃ harim |
pretāḥ svakarmabhiryānti yonyantaraṃ śarīriṇaḥ || 56 ||
[Analyze grammar]

paśupakṣimanuṣyādyāḥ kathamāgatya bhuṃjate |
ka ete pitaraḥ kṛṣṇa śrāddhaṃ bhokṣyantyupasthitāḥ || 57 ||
[Analyze grammar]

mṛtāḥ kecittu narake yamapāśavaśaṃgatāḥ |
kecittu devavarge vai kuṭumbisuvaśaṃgatāḥ || 58 ||
[Analyze grammar]

kecit karmavaśālloke caturaśītiyoniṣu |
dehino vaśagāstatra bandhane patitāḥ sadāḥ || 59 ||
[Analyze grammar]

śrāddhe śaktā na cā''gantuṃ kathaṃ śrāddhaṃ prabhuṃjate |
iti me saṃśayaṃ nātha sammārjaya virodhinam || 60 ||
[Analyze grammar]

vaṃśaparamparāṃ śrāddhaṃ kartavyaṃ yena rakṣyate |
yuge yugāntare cāpi kartavyaṃ yena rakṣyate || 61 ||
[Analyze grammar]

iti śrutvā mahālakṣmīvākyaṃ kṛṣṇanarāyaṇaḥ |
saṃśayaṃ mārjayan lakṣmyāḥ provāca parameśvaraḥ || 62 ||
[Analyze grammar]

śṛṇu lakṣmi prabhoktāraḥ pitṛyajñeṣu sarvadā |
pitā pitāmahaścaiva tathaiva prapitāmahaḥ || 63 ||
[Analyze grammar]

traya ete bhavantyeva śrāddhabhoktāra īśvarāḥ |
pitā tu brahmadaivatyo vedhogātrādvinirmitaḥ || 64 ||
[Analyze grammar]

pitāmaho viṣṇudevo viṣṇugātrādvinirmitaḥ |
prapitāmaho rudreśo rudragātrādvinirmitaḥ || 65 ||
[Analyze grammar]

śrāddhe niyojitāste'tra brahmaviṣṇumaheśvarāḥ |
prathamaṃ brahmaṇoṃ'śāya dadyācchrāddhaṃ sapiṇḍakam || 66 ||
[Analyze grammar]

dvitīyaṃ viṣṇoraṃśāya dadyācchrāddhaṃ sapiṇḍakam |
tṛtīyaṃ rudrasyāṃśāya dadecchrāddhaṃ sapiṇḍakam || 67 ||
[Analyze grammar]

pitre pitāmahāyā'tha hi prapitāmahāya ca |
tridevarūpatāpannaḥ svayaṃ nārāyaṇo vibhuḥ || 68 ||
[Analyze grammar]

yatra mṛtā januṃ prāptāstatrāntaryāmibhāvataḥ |
vyāpakaḥ saṃsthitaḥ kṛṣṇastṛptiṃ tānprāpayatyapi || 69 ||
[Analyze grammar]

evaṃ vipreṣu sa kṛṣṇo'ntaryāmī satsu vartate |
śrāddhakāle yaduddeśastadrūpo bhavati prabhuḥ || 70 ||
[Analyze grammar]

śrāddhaṃ piṇḍaṃ gṛhītvā ca preto yatra gato bhavet |
tatra prāpayati tasmai kṛṣnārāyaṇo hariḥ || 71 ||
[Analyze grammar]

iti viddhi mahālakṣmi yonyantaragatārthadaḥ |
ahameva bhavāmyatra śrāddhe pitrādirūpakaḥ || 72 ||
[Analyze grammar]

athānyacca śṛṇu lakṣmi vistarātpravadāmi te |
kecid yajanti vai brahmayajñaṃ mūrtau satāṃ mukhe || 73 ||
[Analyze grammar]

kecid yajanti vai devayajñaṃ kuṇḍe hutāśane |
kecid yajanti vai bhūtayajñaṃ paśau gavāṃ mukhe || 74 ||
[Analyze grammar]

kecid yajanti manujakratu nare dvijānane |
kecid yajanti vai pitṝn jale'gnau bhvāṃ dvijānane || 75 ||
[Analyze grammar]

sarve te mayi vartante satyametad bravīmi te |
kiñca sarvavidhe yāge vahnirmukhyo mukhātmakaḥ || 76 ||
[Analyze grammar]

vahnimukhena cāśnanti pretapitṝṣidevatāḥ |
ahaṃ ca bhagavān kṛṣṇaścādmi vahnimukhena vai || 77 ||
[Analyze grammar]

kuṇḍasthā'gnirahaṃ cāsmi dakṣiṇāgnirahaṃ tathā |
ahaṃ cāhavanīyāgniḥ pāvanaḥ pāvakastathā || 78 ||
[Analyze grammar]

vaiśvadevāgnirahaṃ vai gārhapatyo'pyahaṃ tathā |
bārhaspatyo'pyahaṃ caivā''vasathyo'pyahameva ca || 79 ||
[Analyze grammar]

tanmukho'haṃ tridevātmā bhuje sarvakratuṣvapi |
pitṛyajñe brahmamukhe bhuṃje'haṃ tattrayātmakaḥ || 80 ||
[Analyze grammar]

śrotriyaṃ dharmaśīlaṃ ca mahābhāgavataṃ dvijam |
śrāddhe saṃbhojayejjītendriyaṃ santuṣṭameva ca || 81 ||
[Analyze grammar]

datvā hutāśanāyā''dau devatīrthasvarūpiṇe |
paścād vipramukhe dadyāt pitre pitāmahāya ca || 82 ||
[Analyze grammar]

vai prapitāmahāyāpi smṛtvā dadyātpunaḥ punaḥ |
pracchannaṃ bhojayed vipraṃ tatra pitṝn samāhvayet || 83 ||
[Analyze grammar]

piṇḍāstrayaḥ pradātavyāḥ saha vyañjanasaṃyutāḥ |
apasavyena dātavyaṃ māsi māsi tilodakam || 84 ||
[Analyze grammar]

paramātmā śarīrastho devatānāṃ vahāmyaham |
evaṃ dattena prīyante pitaraśca na saṃśayaḥ || 85 ||
[Analyze grammar]

trayo devāstraya eva pitaro hariniḥsṛtāḥ |
pitṛdevā bhaviṣyanti bhoktāraśca yuge yuge || 86 ||
[Analyze grammar]

āyuḥ kīrtiṃ bala tejo dhanaṃ putrān paśūn striyaḥ |
dadate pitarastasya tvārogyaṃ piṇḍadāyinaḥ || 87 ||
[Analyze grammar]

vipre saṃbhojite tṛpte tiryaṅnārakamānuṣāḥ |
yatra kvāpi sthitāścānye tṛpyanti śrāddhatarpitāḥ || 88 ||
[Analyze grammar]

te sāttvikaṃ śuklamārgaṃ tṛptā yānti divaṃ param |
punaranyat pravakṣyāmi śṛṇu tattvena sundari || 89 ||
[Analyze grammar]

ajñānatamasā vyāptāḥ pāpā bhraṣṭā mṛtā janāḥ |
snehapāśaśatairbaddhāḥ pacyante narake'śucau || 90 ||
[Analyze grammar]

teṣāṃ putrāśca pautrāśca kadācidapi vaṃśajāḥ |
muñcanti jalabindūṃśca amāṃ prāpya jalāśaye || 91 ||
[Analyze grammar]

tenaiva bhāvitā tṛptisteṣāṃ nirayagāminām |
tarpaṇaṃ śrāddhamevāpi piṇḍān tilodakaṃ tathā || 92 ||
[Analyze grammar]

samarpyaṃ tārayet pitṝn dvijātirbhaktibhāvataḥ |
deyo nīlo vṛṣaścāpi narakārtivināśanaḥ || 93 ||
[Analyze grammar]

nīlaṣaṇḍasya lāṃgūle toyamapyuddhared yadi |
ṣaṣṭivarṣasahasrāṇi pitarastena tarpitāḥ || 94 ||
[Analyze grammar]

uddhṛto yadi paṃkasya piṇḍaḥ śṛṃgeṇa tena vai |
uddhṛtāḥ pitarastena somalokaṃ samāpitāḥ || 95 ||
[Analyze grammar]

ṣaṣṭivarṣasahasrāṇi ṣaṣṭivarṣaśatāni ca |
somalokeṣu modante kṣuttṛḍbhyāṃ tu vivarjitāḥ || 96 ||
[Analyze grammar]

evaṃ gṛhasthadharmo'yaṃ putrapautrādibhiḥ kṛtaḥ |
śrāddhātmakaḥ satṛṣṇānāmuddhārāya vinirmitaḥ || 97 ||
[Analyze grammar]

pipīlikādibhūtāni jaṃgamāśca vihaṃgamāḥ |
sthāvarāścopajīvanti gṛhastheṣu na saṃśayaḥ || 98 ||
[Analyze grammar]

māsi māsi tu ye śrāddhaṃ prakurvanti gṛhāśrame |
tithau parvaṇi sadvāre svapitṝṃstārayanti te || 99 ||
[Analyze grammar]

pitaro nirgatāste vai brahmaviṣṇuśarīragāḥ |
pitā pitāmahaścaiva tathaiva prapitāmahaḥ || 100 ||
[Analyze grammar]

evaṃ krameṇa te paścāt kāśyapā devatā iti |
samabhavaṃstataste vai śrāddheṣu viniyojitāḥ || 101 ||
[Analyze grammar]

pitṛyajñe vipramukhe dattaṃ vai kevalaṃ tadā |
tadā tvajīrṇatāṃ prāptāḥ pitaro'jīrṇapīḍitāḥ || 102 ||
[Analyze grammar]

somena sahitā jagmuḥ praṇamya ca pitāmaham |
procurvayaṃ hyajīrṇena pīḍitā vāraṇaṃ kuru || 103 ||
[Analyze grammar]

yena naśyatyajīrṇaṃ ca pitṝṇāṃ ca sukhaṃ bhavet |
brahmā prāha tadā yo'sti śāṇḍilyasya suputrakaḥ || 104 ||
[Analyze grammar]

dhūmraketurvibhāvasustejasvī jīrṇatākaraḥ |
śrāddhe tu prathamaṃ tasya dātavyaṃ mānuṣeṣu vā || 105 ||
[Analyze grammar]

saha tenaiva bhoktavyaṃ pitṛpiṇḍavisarjitam |
tāvatsmṛto havyavāhaḥ sarvabhakṣo hutāśanaḥ || 106 ||
[Analyze grammar]

yojitaḥ pañcayajñeṣu brahmaṇā sarvakarmasu |
bhoktavyaṃ prathamaṃ vahne pitṛpiṇḍavisarjitam || 107 ||
[Analyze grammar]

tvayā bhuṃkte prabhokṣyanti devatāḥ pitarastvime |
śrāddhaṃ dvitīyaṃ bhoktavyaṃ sahaiva vahnipitṛbhiḥ || 108 ||
[Analyze grammar]

tṛtīyaṃ piṇḍadānaṃ tu somapitṛhutāśanaiḥ |
militvaiva prabhoktavyaṃ hyajīrṇaṃ na bhaviṣyati || 109 ||
[Analyze grammar]

ityuktāḥ pitṛyajñe te bhuṃjate sahitā sadā |
vahniḥ pitā pitāmahaḥ prapitāmaha eva ca || 110 ||
[Analyze grammar]

somaśceti bhuṃjate vai pitṛdevahutāśanāḥ |
apāṃkteyāstadā viprā bhojanīyā na vai kvacit || 111 ||
[Analyze grammar]

apāṃkteyān pravakṣyāmi karmato hīnatāṃ gatān |
napuṃsakāścitrakārāḥ paśupālā vinindakāḥ || 112 ||
[Analyze grammar]

svarṇacaurāstathā kāṇāḥ kuṣṭhino nāstikāstathā |
nartakā gāyakāścāpi tathā nāṭakajīvinaḥ || 113 ||
[Analyze grammar]

vedavikrayiṇaścāpi sarvayājakayājakāḥ |
bhṛtyakarmakarā rājyakiṃkarāḥ sakarāstathā || 114 ||
[Analyze grammar]

saṃskārahīnāḥ patitā śūdrakarmopajīvinaḥ |
gaṇakā grāmyayājino lekhakā dāṃbhikāstathā || 115 ||
[Analyze grammar]

sarvakarmakarā bhraṣṭā madyamāṃsavyavāyinaḥ |
anye ye dūṣitāste vai dvijarūpaistu rākṣasāḥ || 116 ||
[Analyze grammar]

tān bhuṃjataḥ prapaśyantaḥ pitaro duḥkhamāpnuyuḥ |
prāyaścittaṃ tataḥ śīghraṃ kuryācchrāddhaṃ punaścaret || 117 ||
[Analyze grammar]

ghṛtaṃ tu juhuyādagnāvādityaṃ tvavalokayet |
punarāvapanaṃ kṛtvā pitaraṃ ca pitāmahān || 118 ||
[Analyze grammar]

dadyād gandhaṃ tathā dhūpaṃ dīpamarghyaṃ tilodakam |
viprāya bhojayeccāpi tena pitṛpratoṣaṇam || 119 ||
[Analyze grammar]

yastu vipro mṛtānnaṃ na bhunakti śuddhimān sadā |
tasmai dānaṃ pradātavyaṃ vaiśvadeveṣu taṇḍulāḥ || 120 ||
[Analyze grammar]

godhūmā ghṛtamityādi śarkarā śākamityapi |
dugdhaṃ dadhi tathā vastraṃ śrāddheṣu taṃ na yojayet || 121 ||
[Analyze grammar]

pretānnaṃ bhuṃjamānānāṃ prāyaścittaṃ vidhīyate |
māghamāse dvādaśyāṃ tu sarpiyuktaṃ supāyasam || 122 ||
[Analyze grammar]

lihedvai madhunā sārdhaṃ dehaśuddhyarthamityatha |
savatsāṃ kapilāṃ dadyādātmanaḥ śuddhaye tathā || 123 ||
[Analyze grammar]

tīrthe snāyācca gāyatrīsahasraṃ prajapettathā |
yadvā dehātmanoḥ śuddhikāmaḥ sa śrāddhamācaret || 124 ||
[Analyze grammar]

snātvā bhūmiṃ pravilipya mantrayed brāhmaṇottamam |
amāyāṃ vai mahālakṣmi dantakāṣṭhaṃ na gharṣayet || 125 ||
[Analyze grammar]

hiṃsito yadbhavet somo devatāḥ pitarastathā |
prabhāte tena vipreṇa śmaśrunakhādichedanam || 126 ||
[Analyze grammar]

kāraṇīyaṃ snānamabhyañjanaṃ pakvānnamityapi |
madhyāhne samaye prāpte viprāya pādyamarpayet || 127 ||
[Analyze grammar]

gṛhāntaraṃ nayed dadyādāsanaṃ cārghyamuttamam |
gandhamālyairdhūpadīpaiḥ sampūjya salilaṃ tilān || 128 ||
[Analyze grammar]

datvā pātraṃ bhojanārthaṃ viprāgre sthāpayecchubham |
bhasmanā maṇḍalaṃ kuryāt paṃktidoṣanivārakam || 129 ||
[Analyze grammar]

agnau hutvā brāhmaṇāya miṣṭānnaṃ pariveṣayet |
yathāsukhena bhoktavyamiti brūyād dvijaṃ prati || 130 ||
[Analyze grammar]

tṛptaṃ brāhmaṇaṃ kṛtvā dadyādvai vikiraṃ tataḥ |
uttarīyāsanaṃ datvā piṇḍapraśnaṃ tu kārayet || 131 ||
[Analyze grammar]

ṭakṣiṇābhimukho bhūtvā darbhānāstīrya bhūtale |
piṇḍadānaṃ prakurvīta pitrāditritaye tathā || 132 ||
[Analyze grammar]

piṇḍānāṃ pūjanaṃ kuryāt tantuvṛddhyai yathāvidhi |
brāhmaṇasya ca haste tu dadyādakṣayamātmavān || 133 ||
[Analyze grammar]

dakṣiṇābhiḥ pratuṣyāpi svastivācyaṃ visarjayet |
piṇḍāstrayastu tatraiva yāvattiṣṭhanti bhūtale || 134 ||
[Analyze grammar]

āpyāyamānāḥ pitarastāvat tiṣṭhanti vai gṛhe |
upaspṛśya śucirbhūtvā dadyācchāntyudakāni ca || 135 ||
[Analyze grammar]

praṇamya vaiṣṇavīṃ bhūmiṃ kāśyapīmakṣayāṃ tataḥ |
bhakṣayetprathamaṃ piṇḍaṃ patnyai deyaṃ tu madhyamam || 136 ||
[Analyze grammar]

tṛtīyamudake dadyād visṛjet pitṛdevatāḥ |
praṇamedevaṃ vidhinā tuṣyanti pitṛdevatāḥ || 137 ||
[Analyze grammar]

dīrghāyuṣyaṃ prayacchanti putrapautradhanāni ca |
śṛṇu lakṣmi madhuparkaṃ dadyātprāṇaprayāṇake || 138 ||
[Analyze grammar]

madhuparkaḥ puruṣo vai me dakṣāṃgād viniḥsṛtaḥ |
mayā sa sarvakāryeṣu bhavamokṣāya yojitaḥ || 139 ||
[Analyze grammar]

madhuparko bhavedyatra yasya vā tatra mokṣaṇam |
yatra nāsti madhuparkastatra muktirna vidyate || 140 ||
[Analyze grammar]

madhvevaṃ dadhi sarpiśca kuryāttvevaṃ samaṃ trikam |
dadyād viprāya puṇyārthaṃ śavāya mokṣaṇāya ca || 141 ||
[Analyze grammar]

śrāddhādeḥ karmaṇaścānte śāntipāṭhaṃ prakārayet |
rādheśāya rameśāya lakṣmīśāya ca te namaḥ || 142 ||
[Analyze grammar]

māṇikīśāya pārvatīśvarāya vyāpine namaḥ |
prabheśāyā'nādikṛṣṇanārāyaṇāya te namaḥ || 143 ||
[Analyze grammar]

diśaḥ paśya tvadhaḥ paśya vyādhibhyo rakṣa nityaśaḥ |
prasīda svasya rāṣṭrasya rājñaḥ sarvabalasya ca || 144 ||
[Analyze grammar]

garbhiṇīnāṃ ca vṛddhānāṃ vrīhīṇāṃ ca gavāṃ tathā |
brāhmaṇānāṃ ca sādhūnāṃ śāntiṃ kuru śubhaṃ kuru || 141 ||
[Analyze grammar]

annaṃ kuru suvṛṣṭiṃ ca subhikṣamabhayaṃ kuru |
vibho pravardhatāṃ rāṣṭraṃ śāntirbhavatu nityaśaḥ || 146 ||
[Analyze grammar]

devānāṃ manujānāṃ ca bhaktānāṃ kanyakāsu ca |
paśūnāṃ sarvabhūtānāṃ śāntirbhavatu nityaśaḥ || 147 ||
[Analyze grammar]

evaṃ śāntiṃ paṭhitvā tu madhuparkaṃ prayojayet |
sarpirmadhudadhīnyeva same pātre hyudumbare || 148 ||
[Analyze grammar]

alābhe madhunaścātra guḍena saha miśrayet |
ghṛtā'lābhe mahālakṣmi lājaiḥ saha vimiśrayet || 149 ||
[Analyze grammar]

alābhe cāpi dadhnastu kṣīreṇa saha miśrayet |
dadhiṃ kṣaudraṃ ghṛtaṃ caiva kārayet tatsamaṃ ca vā || 150 ||
[Analyze grammar]

samarpayāmi deveśa kṛṣṇa sarpirghṛtaṃ madhu |
sarveṣāmapyalābhe tu jalameva dadenmukhe || 151 ||
[Analyze grammar]

yo vai prāṇānpramuñcettu madhuparkaṃ dadenmukhe |
ayaṃ pavitro vimalaḥ sarvakāmaprapūrakaḥ || 152 ||
[Analyze grammar]

śṛṇoti madhuparkāderākhyānametaduttamam |
yāti divyāṃ parāṃ muktiṃ mamānugrahakāraṇāt || 153 ||
[Analyze grammar]

rājadvāre śmaśāne vā bhaye ca vyasane tathā |
ye paṭhanti tvimāṃ śāntiṃ śīghraṃ sveṣṭaṃ bhaviṣyati || 154 ||
[Analyze grammar]

aputro labhate putramabhāryastu priyāṃ labhet |
labhetā'patikā kāntaṃ baddho nirbandhano bhavet || 155 ||
[Analyze grammar]

asya saṃsmaraṇāccāpi śrāddhādiphalabhāg bhavet |
iti te kathitaṃ lakṣmi śrāddhādihārdamuttamam || 156 ||
[Analyze grammar]

itiśrīlakṣmīnārāyaṇīyasaṃhitāyāṃ prathame kṛtayugasantāne mathurātīrthamāhātmye śrāddhabhoktuḥ prāyaścittena pāvitryam avantīnagaryā medhātithirājñaḥ kupātrabrāhmaṇabhojane pitṝṇāṃ pātityaṃ supātre śrāddhakaraṇe punaḥ pitṝṇāṃ svargāmitvam pituḥ pitāmahasya prapitāmahasya brahmaviṣṇumaheśagātrotpannatā somapitṛhutāśanāḥ sādhau vipre ca sahabhojinaḥ nīlavṛṣadānam madhuparkadānam śāntipāṭhaścetyādinirūpaṇanāmā ṣaṭpaṃcāśadadhikatriśatatamo'dhyāyaḥ || 356 ||
[Analyze grammar]