Chapter 354

śrīnārāyaṇa uvāca |
śṛṇu lakṣmi mathurāyāṃ dhruvatīrthaṃ sumuktidam |
tarpaṇādannadānācca pitṝṇāṃ tṛptikārakam || 1 ||
[Analyze grammar]

mathurāyāṃ candraseno rājāsīd dharmakāryakṛt |
tasya patnī candraprabhā vīrasūrvīraputrakā || 2 ||
[Analyze grammar]

tasyā dāsīśatasyaikā dāsī tvāsīt prabhāvatī |
prabhāvatyāḥ pūrvajā vai pitaraḥ śatasaṃkhyayā || 3 ||
[Analyze grammar]

svadoṣaiḥ patitāḥ sarve narakaṃ prati bhāmini |
karoti tarpaṇaṃ nāpi kārayati prabhāvatī || 4 ||
[Analyze grammar]

śrāddhaṃ dānaṃ ca vā kiñcit pitṝṇāṃ tṛptihetave |
tasyāḥ kuṭumbinaścāpi kurvantyeva na tarpaṇam || 5 ||
[Analyze grammar]

tasyāḥ pitṛgaṇo bhraṣṭaḥ kadācid yamunātaṭe |
sūkṣmaḥ prāṇisamūho vai dhruvatīrthe samāpatan || 6 ||
[Analyze grammar]

kṛṣṇavarṇāścaṃkramanto maśakākārasannibhāḥ |
pitaraḥ ṛṣiṇā dṛṣṭāstrikālajñā'bhidhāyinā || 7 ||
[Analyze grammar]

trikalajñaḥ sadā yamyāṃ pitṝn datvā jalāñjalīn |
tarpayatyeva pitarastṛptā yānti mahaḥsthalam || 8 ||
[Analyze grammar]

sa ṛṣiḥ ṣaṣṭhakālāśī payovratī sadāsti vai |
sūryakiraṇapānāśī sūryagatyā gatisthitaḥ || 9 ||
[Analyze grammar]

āgataṃ pitṛsamūhaṃ dṛṣṭvā dṛṣṭvaiva mohitaḥ |
kṛpayā tānnirīkṣaiśca na cakre vratajāpanam || 10 ||
[Analyze grammar]

caturthāṃśāvaśeṣaśca divasaḥ paryavartata |
eke tatra samāyānti pitaro nabhaso'vanim || 11 ||
[Analyze grammar]

anye pūrvāduttarācca dakṣiṇātpaścimāttathā |
lakṣaśaḥ pitarastatra dhruvatīrthe samāgatāḥ || 12 ||
[Analyze grammar]

āyānti pratiyānti ye tānpaśyan vismayaṃ gataḥ |
tatraikaḥ samūho dṛṣṭo hṛṣṭapuṣṭāṃgatuṣṭimān || 13 ||
[Analyze grammar]

putraiḥ kṛtasvadhāprāpto jalaṃ pītvā divaṃ yayau |
anyaḥ samūho dṛṣṭopi tapasvī kṣāmadehavān || 14 ||
[Analyze grammar]

rūkṣaḥ snānarato pītvā jalaṃ bhuvaryayau sa ca |
atha saṃgho'paro dṛṣṭo vastrālaṃkāraśobhitaḥ || 15 ||
[Analyze grammar]

hṛṣṭapuṣṭāṃga evā'sau jalaṃ pītvā divaṃ yayau |
athetaraḥ samudāyo dṛṣṭo nagnaśarīrakaḥ || 16 ||
[Analyze grammar]

supuṣṭaḥ sukhasampanno jalaṃ pītvā'mbaraṃ yayau |
athā'nte bahavo dṛṣṭā vimānavaramāsthitāḥ || 17 ||
[Analyze grammar]

bahubhojanapūrṇāni yānānyuccāvacāni ca |
gṛhītvā vyomamārgeṇa gacchanti maharādikam || 18 ||
[Analyze grammar]

atha pare lokitāśca tvīrayantaḥ śubhāśiṣaḥ |
tṛptā haṃsagaruḍādipṛṣṭhasthā gajavājigāḥ || 19 ||
[Analyze grammar]

tadanye vikṛtā dṛṣṭāḥ kruddhāḥ kṣudhātipīḍitāḥ |
pṛṣṭhalagnodarā mānahīnāḥ śāpapradāyinaḥ || 20 ||
[Analyze grammar]

tato'nye ca tathā dṛṣṭāḥ puṣpahārā'bhipūjitāḥ |
śrāddhe bhuṃktvā mahotsāhā yathā devāstathojjvalāḥ || 21 ||
[Analyze grammar]

kecit piṇḍān kare dhṛtvā kecidattvā phalāni ca |
kecit ṣoḍaśavastvādyairyuktā yānti janādikam || 22 ||
[Analyze grammar]

kecicchayyāsamāyuktā bhogabhogyasamanvitāḥ |
tuṣṭāḥ prasannamanaso dṛṣṭāstapo'bhiyāyinaḥ || 23 ||
[Analyze grammar]

kecit samukuṭā rājyacchatracāmaravījitāḥ |
dṛṣṭā mānayutā yātāḥ satyalokaṃ vimānakaiḥ || 24 ||
[Analyze grammar]

yamunāyāṃ navavastrairyutā bhūṣādiśobhitāḥ |
paribhramanti pitaraścānye dṛṣṭāstathāvidhāḥ || 25 ||
[Analyze grammar]

kālindyāṃ dhruvatīrthe vai madhyāhnottarameva ha |
āsāyaṃ pitaraścaivaṃ trikālajñarṣiṇekṣitāḥ || 26 ||
[Analyze grammar]

gate pitṛgaṇe putrāḥ sakalatrāḥ kuṭumbinaḥ |
śrāddhakartāra evaite sāyaṃ svasvagṛhān yayuḥ || 27 ||
[Analyze grammar]

nirjanaṃ dhruvatīrthaṃ ca janahīnaṃ tadā'bhavat |
trikālajño'pi munirāḍ vismitastata utthitaḥ || 28 ||
[Analyze grammar]

dadarśaikaṃ kṛśāṃgaṃ ca kṣutkṣāmaṃ gativihvalam |
pratīkṣantaṃ kampamānaṃ pṛṣṭhalagnalaghūdaram || 29 ||
[Analyze grammar]

ūrucarmāsthiruktrastaṃ jṛmbhamāṇaṃ punaḥ punaḥ |
koṭarākṣaṃ mlānavaktraṃ kṣudrasvalparavaṃ kṛśam || 30 ||
[Analyze grammar]

dayāluḥ sa munistaṃ vai papraccha ko bhavānatha |
duḥkhito vikṛtākāro veṣṭito maśakairbahu || 31 ||
[Analyze grammar]

na gacchasi na te sthānaṃ nirāśrito'si kiṃ vad |
mayā'dya bahavo dṛṣṭāḥ koṭiśaḥ pitaro'tra vai || 32 ||
[Analyze grammar]

teṣāmālokane kālo gato'dya mama sarvathā |
na mamādya naityakaṃ vai karmajātaṃ vilokane || 33 ||
[Analyze grammar]

atha tvaṃ ca mayā dṛṣṭaḥ kriyā me naśyate khalu |
paścāt karma kariṣye me naityakaṃ vada me ṛtam || 34 ||
[Analyze grammar]

yathāśakti kariṣye vai śaktaṃ syācceddhitaṃ tava |
śrutvā janturuvācainaṃ muniṃ sarvaṃ yathātatham || 35 ||
[Analyze grammar]

bṛhannimittamadyaiva pitṝṇāṃ tṛptikārakam |
dhruvatīrthe kṛtaṃ śrāddhaṃ dattaṃ tilodakādikam || 36 ||
[Analyze grammar]

annaṃ vastraṃ phalaṃ puṣpaṃ jalaṃ śayyādikaṃ tathā |
upānahau gṛhaṃ chatraṃ bhūṣā dugdhaṃ tathetarat || 37 ||
[Analyze grammar]

adya dattaṃ sutadāraputrīpatnīkuṭumbibhiḥ |
sarvaṃ lakṣaguṇaṃ tṛptipradaṃ pitṛpratarpaṇam || 38 ||
[Analyze grammar]

dhruvatīrthe dhruvaṃ sarvaṃ dattaṃ bhavati bhūsura |
yānaṃ ca vāhanaṃ gauśca vāṭikā kṣetramityapi || 39 ||
[Analyze grammar]

dattaṃ nītvā saha yānti svarṇaṃ dravyaṃ tathetarat |
tilatṛptāḥ sarvatṛptāḥ pitaro'dyā'titoṣitāḥ || 40 ||
[Analyze grammar]

sarve tṛptā divaṃ yānti pitaraścādya putriṇāḥ |
santānaiḥ puṣṭavapuṣo dattaśrāddhaiḥ kṛtodakaiḥ || 41 ||
[Analyze grammar]

yeṣāṃ santatirakṣayyā tiṣṭhatyevaṃ prajāvatī |
te svadhāpūjitaiḥ putrairgacchanti paramāṃ gatim || 42 ||
[Analyze grammar]

adya rājñastu pitaraścandrasenasya pūjitāḥ |
dṛṣṭāstvayā tathā cānye divyadṛṣṭyā divaṃgatāḥ || 43 ||
[Analyze grammar]

brāhmaṇānāṃ kṣatriyāṇāṃ vaiśyānāṃ śūdrakarmaṇām |
pratilomānulomānāṃ sarveṣāṃ śrāddhakarmiṇām || 44 ||
[Analyze grammar]

pitarastu tvayā dṛṣṭā yeṣāṃ santatiravyayā |
ahantu saṃpratīkṣanvai śrāddhaṃ tvatra vyavasthitaḥ || 45 ||
[Analyze grammar]

āśāpāśaśatairbaddhastṛptyarthaśca bubhukṣitaḥ |
yonisaṃkaradoṣeṇa pūrvaṃ vai narakaṃ gataḥ || 46 ||
[Analyze grammar]

nāstikairmama vaṃśyaiśca śrāddhaṃ dattaṃ na me'dya vai |
pratyabdaṃ tvāgatasyātra prāptiḥ śrāddhasya me nahi || 47 ||
[Analyze grammar]

anyapitṛdāsyavṛttiṃ kṛtvā jīvāmi bhūsura |
adya śrāddhasamārohe śatavarṣairmanāgapi || 48 ||
[Analyze grammar]

kuṭumbito mayā naiva labdhaṃ tṛptirna me'dya vai |
agatirgamane jātā tritāpaiśca suduḥkhitaḥ || 49 ||
[Analyze grammar]

balayuktā yayuḥ sarve nirbalasya kuto gatiḥ |
āgamiṣyanti vai kecit sarvapitṛpratarpakāḥ || 50 ||
[Analyze grammar]

tadā hyavāpya kiñcidvai yāsye'raṇyaṃ samīpagam |
ime ye mama dehe tu bhavanti maśakāḥ kṛśāḥ || 51 ||
[Analyze grammar]

santānaprakṣayādete mama dehaṃ samāśritāḥ |
ahaṃ vai pūrvajasteṣāṃ hyete me vaṃśajā janāḥ || 52 ||
[Analyze grammar]

māṃ khādanti kṣudhākāle tantuvicchedaduḥkhitāḥ |
ekā tantumayī putrī mama vaṃśe'tra vidyate || 53 ||
[Analyze grammar]

mathurāyāṃ candrasenanṛpateḥ karmacāriṇī |
mahiṣyāḥ sevane saktā dāsī nāmnā prabhāvatī || 54 ||
[Analyze grammar]

tasyāḥ putraḥ karmacārī virūpanidhisaṃjñakaḥ |
asmākaṃ santatestantustasya śrāddhakṛte vayam || 55 ||
[Analyze grammar]

āśayā baddhahṛdayā śrāddhatarpaṇakāmanāḥ |
sthitā etāvadeva tu tato yāsyāmahe vanam || 56 ||
[Analyze grammar]

narake tvapratiṣṭhe vā vārdhau vā bhagnamānasāḥ |
yadi tantuḥ sa ced dadyājjalaṃ śrāddhaṃ tilāñjalīn || 57 ||
[Analyze grammar]

tadā puṣṭā vayaṃ bhūtvā yāmo divaṃ kaniṣṭhakam |
śṛṇu nikṛṣṭayonyā'pi dattaṃ vai prāpyate haviḥ || 58 ||
[Analyze grammar]

tayā dattena santuṣṭā vayaṃ syāmaḥ suputriṇaḥ |
pūrvakarmavipākena yāṃ yāṃ gatimadhomukhīm || 59 ||
[Analyze grammar]

ūrdhvāṃ ca prāptāḥ pitaraḥ putriṇaḥ putrikāśritāḥ |
śrāddhaṃ piṇḍodakaṃ dānaṃ putrīkṛtaṃ tvavāpyate || 60 ||
[Analyze grammar]

nānyā gatiḥ pitṝṇāṃ syāt putryā pitaraḥ putriṇaḥ |
api syātsa kule'smākaṃ yo no dadyājjalāṃjalim || 61 ||
[Analyze grammar]

nadīṣu bahutoyāsu śītalāsu viśeṣataḥ |
tīrthamadhye tilamiśraṃ phalayuktaṃ jalāṃjalim || 62 ||
[Analyze grammar]

raupyajuṣṭajalenāpi nābhidaghne jale sthitaḥ |
darbhapāṇiḥ pradadyācca tena tṛptā vayaṃ sadā || 63 ||
[Analyze grammar]

darbhapāṇistristrigotre pitṛnāma samuccaran |
tṛpyatāṃ hyamukanāmne svadhā ceti vadan sutaḥ || 64 ||
[Analyze grammar]

devebhyaścāṃjaliṃ dadyād ṛṣibhyastvaṃjalidvayam |
pitṛbhyastryañjalīn dadyāt tṛpyantāṃ samudāharan || 65 ||
[Analyze grammar]

pitre prathamato dadyāt mātre dadyāttataḥ param |
mātāmahāya ca dadyād dadyāt pitāmahāya ca || 66 ||
[Analyze grammar]

tatparebhyaśca pitṛbhyaḥ pradadyāt trīn jalāṃjalīn |
pitāmahyai tathā dadyād dadyācca prapitāmahīm || 67 ||
[Analyze grammar]

anena piṇḍadānena te'sūryānnāśayāmyaham |
idaṃ jalaṃ mayā dattamakṣayyā tṛptirastu te || 68 ||
[Analyze grammar]

vāryapi śraddhayā dattaṃ tadānantyāya kalpate |
gṛhṇānāḥ pitaraḥ kecid bhavantyudvignarūpiṇaḥ || 69 ||
[Analyze grammar]

śṛṇu tatkāraṇaṃ vipra śrāddhaṃ syādviphalaṃ yathā |
adeśakāle yaddattaṃ vidhihīnamadakṣiṇam || 70 ||
[Analyze grammar]

apātre malinaṃ dravyaṃ tṛptaye naiva jāyate |
aśraddheyamapāṃkteyaṃ duṣṭaprekṣitamīkṣitam || 71 ||
[Analyze grammar]

tilamantrakuśairhīnamāsuraṃ tadbhavediti |
aśucīni gṛhāṇyevā'śuciśrāddhahavīṃṣi ca || 72 ||
[Analyze grammar]

krodhāviṣṭāni dānāni vidhipātrā'kṛtāni ca |
adakṣiṇāni śrāddhāni rākṣasebhyo milanti vai || 73 ||
[Analyze grammar]

dakṣiṇāhīnayajñasya phalaṃ rakṣo bhunakti hi |
devabrāhmaṇagurvagre vṛthāśapathakāriṇām || 74 ||
[Analyze grammar]

kṛtaṃ sarvaṃ hi pātālavāsino lakṣmi bhuṃjate |
aśrotriyāṇi śrāddhāni hutaṃ dattamamantrakam || 75 ||
[Analyze grammar]

gurvabhaktasya śiṣyasya kīrtanaṃ puṇyakarmaṇaḥ |
kariṣyataśca dharmasya prāgeva tu prakāśanam || 76 ||
[Analyze grammar]

sarvaṃ pātālavāsānāṃ tṛptyarthaṃ parikalpitam |
alīkaṃ tu vṛthā''ḍambareṇa yadvai kṛtaṃ vratam || 77 ||
[Analyze grammar]

dānaṃ śrāddhaṃ tapo homo rakṣasāṃ tadbhavet kila |
nopatiṣṭhanti pitṛṇāṃ nagnāḥ pitṛgaṇāstataḥ || 78 ||
[Analyze grammar]

muṣitā rākṣasādyairvai dānādiphalabhoktṛbhiḥ |
aphalāste yathā''hūtāstathā gacchantyabhojanāḥ || 79 ||
[Analyze grammar]

maunamāsthāya te sarve kṣudhitāstṛṣitāstathā |
āyānti ca viyanti ca na vaite puṇyabhāginaḥ || 80 ||
[Analyze grammar]

etat sarvaṃ kathitaṃ te pitṛvairupyakāraṇam |
navīnaṃ bahumūlyaṃ ca śreṣṭhaṃ sāraṃ dadāti yaḥ || 81 ||
[Analyze grammar]

tatpitaraḥ smṛddhimanto yānasthā yānti vai divam |
jīrṇaṃ kṣudraṃ kaniṣṭhaṃ cā'sāraṃ śrāddhe dadāti cet || 82 ||
[Analyze grammar]

tatpitaro daridrā vai padbhyāṃ bhramanti yānti ca |
daridrāṇāṃ daridrāste smṛddhānāṃ smṛddhisaṃjuṣaḥ || 83 ||
[Analyze grammar]

ityuktvā virarāmā'sau vṛddhaḥ pitṛgaṇastataḥ |
trikālajño dayāklinnaḥ samuvāca hitāya tam || 84 ||
[Analyze grammar]

yāvat tṛptirna te bhūyānna bhokṣye'haṃ sthiro bhava |
pratīkṣasvā''gamanaṃ me tāmānayāmi putrikām || 85 ||
[Analyze grammar]

tadā śrāddhaṃ kārayiṣyāmītyuktvā saṃyayau nṛpam |
rājā tamāgataṃ dṛṣṭvā nanāma pādayoḥ ṛṣeḥ || 86 ||
[Analyze grammar]

dhanyo'smyanugṛhīto'smi madgṛhaṃ pāvanaṃ kṛtam |
adya me saphalaṃ janma pādyamarghyaṃ gṛhāṇa gām || 87 ||
[Analyze grammar]

iti saṃvadato rājñaḥ satkāraṃ prāpya cābravīt |
rājan śṛṇu kuru tacca yenā'haṃ toṣito'bhavam || 88 ||
[Analyze grammar]

ānaya rājamahiṣīṃ prabhāvatīsamanvitām |
rājñā''nītā ṛṣiṃ natvā''sanasthāṃ munirabravīt || 89 ||
[Analyze grammar]

dhruvatīrthe mayā''ścaryaṃ yaddṛṣṭaṃ kathayāmi vaḥ |
koṭiśaḥ pitaraḥ sarve yayuḥ putrārcitā divam || 90 ||
[Analyze grammar]

eko vṛddhaḥ śuṣkadehaḥ kṣutkṣāmaḥ śuṣkamāṃsakaḥ |
nirāśo niraye gantukāmo'sau dhruvatīrthake || 91 ||
[Analyze grammar]

mayā pṛṣṭhaḥ sukāruṇyāt kastvaṃ kimicchasīti ca |
sa prāha māṃ mama vaṃśe dāsī prabhāvatī tathā || 92 ||
[Analyze grammar]

tantuḥ putro virūpakanidhirnāmnā hi vartate |
sa kuryād yadi me śrāddhaṃ tṛptiḥ syāditi bhūsura || 93 ||
[Analyze grammar]

prabhāvatyā sutadvārā kāraṇīyaṃ hi tarpaṇam |
pitṝṇāṃ tu kṛte dattaṃ dānaṃ vāri phalādikam || 94 ||
[Analyze grammar]

svadhā ca pāyasaṃ śrāddhaṃ tṛptidaṃ muktidaṃ bhavet |
ityuktvā pratyayārthaṃ tāṃ prāharṣirmadavihvalām || 95 ||
[Analyze grammar]

kiṃ tvayā pitṛtṛptyarthaṃ kṛtaṃ dattaṃ jalaṃ na vā |
sā naivamityuvācā'tha na jānāmi ca tān pitṝn || 96 ||
[Analyze grammar]

kriyāṃ karma na jānāmi na karomi kadāpi ca |
ṛṣiḥ prāha samāyāntu drakṣyathā'dya camatkṛtim || 97 ||
[Analyze grammar]

iti kṛtvā yayuḥ sarve dhruvatīrthaṃ tu nāgarāḥ |
brāhmaṇāśca tathā rājā lokāśca bahavastadā || 98 ||
[Analyze grammar]

muninā darśitastebhyo vṛddho vicetanaḥ kṛṣaḥ |
maśakairveṣṭitaḥ kṣudraiḥ kṣudhayā cātipīḍitaḥ || 99 ||
[Analyze grammar]

munistaṃ prāha bho janto tava santānajā sutā |
saputrā tvatra cāyātā puṣṭyarthaṃ vad vāñchitam || 100 ||
[Analyze grammar]

agatiśca tadovāca snātvā'tra vidhinā mama |
karotu tarpaṇaṃ nāmnā tataḥ śrāddhaṃ karotu ca || 101 ||
[Analyze grammar]

saraupyavastraṃ satilaṃ piṇḍadānaṃ karotu ca |
tathā'nyadvai yathāśakti dānaṃ karotu cātra vai || 102 ||
[Analyze grammar]

yenātraiva bhavanto hi māmīkṣatha sukhānvitam |
kārayantu yathāśakti śrāddhaṃ dānaṃ hi tantunā || 103 ||
[Analyze grammar]

itiśrutvā rājapatnī śrāddhaṃ subahudakṣiṇam |
dāsyā vai kārayāmāsa tatputreṇa ca sarvathā || 104 ||
[Analyze grammar]

paṭṭavastraṃ phalaṃ dhūpaḥ karpūrāgurucandanam |
tilottaraṃ pāyasānnaṃ miṣṭānnaṃ ca sapiṇḍakam || 105 ||
[Analyze grammar]

jalaṃ tilodakaṃ sarvaṃ yaddattaṃ tena tṛptimān |
sukṛtī ca sutejasvī devavad dīptimān babhau || 106 ||
[Analyze grammar]

tatsadṛśāstu maśakā api tṛptāḥ surūpiṇaḥ |
devā iva vyajāyanta śuśubhire'tipuṣṭikāḥ || 107 ||
[Analyze grammar]

svargāgatairvimānaiśca chāditaṃ tatra vai nabhaḥ |
te tu devā iva sarve pitarastuṣṭamānasāḥ || 108 ||
[Analyze grammar]

procurasmatkulatanturvṛddhiṃ yātu suvaṃśajaiḥ |
ye śrāddhairvividhairasmān tārayiṣyanti sarvadā || 109 ||
[Analyze grammar]

śṛṇvantu vacanaṃ sarve'smadīyaṃ pitṛtuṣṭidam |
tīrthāni saritaḥ kūpāḥ parvatāśca sarāṃsi ca || 110 ||
[Analyze grammar]

kurukṣetraṃ gayā gaṃgā sthānānyāyatanāni ca |
pitṝṇāṃ muktidaṃ tvanyanna bhūtaṃ na bhaviṣyati || 111 ||
[Analyze grammar]

bhādre proṣṭhapadīṃ snātvā pratipatprabhṛti tvatha |
śuklapratipadantaṃ ca tīrthaṃ prāpya sasatvarāḥ || 112 ||
[Analyze grammar]

pitaraḥ śrāddhapiṇḍā'dāḥ āśvine dhruvamāsthitāḥ |
kṛtvā pretapurīṃ śūnyāṃ svargaṃ pātālamityatha || 113 ||
[Analyze grammar]

īhamānāḥ svakānputrān gotratantūn tathā'nujān |
tiṣṭhāmastvatra sahitāḥ svasvavaṃśajapitṛbhiḥ || 114 ||
[Analyze grammar]

kanyāṃ gate savitari yaḥ śrāddhaṃ sampradāsyati |
tarpaṇaṃ dhruvatīrthe te pitṝṇāṃ ṣoḍaśāhake || 115 ||
[Analyze grammar]

sutṛptāḥ smo vayaṃ śaśvad yāsyāmaḥ paramāṃ gatim |
dṛṣṭo bhavadbhiḥ pitṝṇāṃ tārako vai vidhiryathā || 116 ||
[Analyze grammar]

dustaraṃ tāritaṃ pāpaṃ trikālajñaprasādataḥ |
iti saṃśrāvya te sarve rājānaṃ ca janānṛṣim || 117 ||
[Analyze grammar]

rājñīṃ dāsīṃ ca tatputraṃ saṃbhāṣya śivamastu vaḥ |
āruhya varayānāni gatāḥ svargaṃ vṛtāḥ suraiḥ || 118 ||
[Analyze grammar]

rājā rājñī suto dāsī prajā nāryo narāstataḥ |
mahadāścaryapūrvāste yayurnijagṛhānprati || 119 ||
[Analyze grammar]

cakruśca sarvadā yogye samaye śrāddhatarpaṇam |
uddhṛtāḥ pitarastaistu dhruvatīrthaprabhāvataḥ || 120 ||
[Analyze grammar]

etatte kathitaṃ lakṣmi māhātmyaṃ mathurābhavam |
yatsmaraṇād vinaśyanti pāpāni pūrvūjanmanām || 121 ||
[Analyze grammar]

paṭhed yaḥ śṛṇuyāccaiva sa dhruvatīrthapuṇyabhāk |
mathurāyāṃ yamunāyā jalasnānasya puṇyabhāk || 122 ||
[Analyze grammar]

yatra kvāpi jalapārśve sthitvā piṇḍaṃ dadāti vai |
yamunādhruvasattīrthaṃ smṛtvā tvāvāhya pitṛkān || 123 ||
[Analyze grammar]

tatra yāmunajalavat pitṛtṛptiḥ prajāyate |
vaṃśavṛddhistathā''rogyaṃ smṛddhistasya sujāyate || 124 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne mathurātīrthamāhātmye dhruvatīrthe samāgatakoṭipitṛtṛptyuttaraṃ trikālajñābhidharṣiṇā kṣudhite ekasmin pitari dṛṣṭe tadvaṃśe candrasenanṛpatidāsīrūpāṃ putrīṃ vijñāya |
taddvārā śrāddhaṃ kārayitvā pitṛmuktidānaṃ śrāddhavidhirmahimā cetyādinirūpaṇanāmā catuḥpaṃcāśadadhikatriśatatamo'dhyāyaḥ || 354 ||
[Analyze grammar]