Chapter 352

śrīnārāyaṇa uvāca |
śṛṇu lakṣmi kṛṣṇagaṃgātīrthaṃ yāmunavārigam |
yatra vyāsaḥ svayaṃ kṛṣṇo bhagavān sṛṣṭibodhavān || 1 ||
[Analyze grammar]

ādye kṛte yuge snātvā vedānadhyāpayat sadā |
yāvattu yamunābhūmau sthāsyati tāvadeva saḥ || 2 ||
[Analyze grammar]

snāsyati tatsthale nityaṃ kṛṣṇagaṃgājale hariḥ |
somavaikuṇṭhayormadhye kṛṣṇagaṃgā tu sā matā || 3 ||
[Analyze grammar]

tatrāśramapade divye munayo divyavigrahāḥ |
adṛśyāstu samāyānti cāturmāsyavratārthinaḥ || 4 ||
[Analyze grammar]

yeṣāmupari teṣāṃ vai dayālūnāṃ kṛpā bhavet |
teṣāṃ te ṛṣayo dṛṣṭipathamāyānti nānyathā || 5 ||
[Analyze grammar]

cāturmāsye kṛṣṇagaṃgātīrthe vipreṇa vīkṣitam |
dayāpātreṇa vasunā pāñcālyakulatantunā || 6 ||
[Analyze grammar]

śṛṇu lakṣmi kathayāmi pāpyuddhārakarīṃ kathām |
pāñcālyo'tha dvijaḥ kaścinnāmnā vasuritiśrutaḥ || 7 ||
[Analyze grammar]

durbhikṣapīḍito'tyantaṃ sabhāryo varapattanam |
yayau bhadrātaṭe bhikṣāvṛttyā vāsaṃ samācarat || 8 ||
[Analyze grammar]

tatrasthasya tadā putraḥ kanyā cetyabhavad dvayam |
kanyā viprāya saṃdattā dhanadhānyasamṛddhaye || 9 ||
[Analyze grammar]

kanyāpatistato vipro yauvane rogapīḍitaḥ |
mamāra bandhuvidhuraḥ kuṭumbarahitastathā || 10 ||
[Analyze grammar]

kanyā'sthīni tu saṃgṛhya mathurāmājagāma ha |
lakṣmīnārāyaṇasaṃhitoktaṃ tvasthiprapātanam || 11 ||
[Analyze grammar]

ardhacandrasthale tatra māthure maṇḍale kṛtam |
yasya bhavet sa vai dehī muktiṃ yātīti vātrcchayā || 12 ||
[Analyze grammar]

kanyayā'sthīni yamunāsrotasi vidhinā tadā |
kṣiptāni viprahastena patyurmuktistadā'bhavat || 13 ||
[Analyze grammar]

bālaraṇḍā tu sā ramyā nīlakuñcitamūrdhajā |
surūpā sukumārāṃgī nirādhārā'tiduḥkhitā || 14 ||
[Analyze grammar]

kadalīkāṇḍasaṃkāśe tasyā ūrū sumāṃsale |
suśliṣṭāॆgulikāpādau nakhāstāmrojjvalāḥ śubhāḥ || 15 ||
[Analyze grammar]

gaṃbhīrā dakṣiṇāvarttā nābhistrivalimaṇḍitā |
āmodarī samakukṣiḥ pīnonnatapayodharā || 16 ||
[Analyze grammar]

kambugrīvā saṃvṛtāsyā sudatī svadharāhanuḥ |
sunakhī svakṣiṇī subhrūḥ supramāṇā subhāṣiṇī || 17 ||
[Analyze grammar]

sukaṭiḥ svalpamadhyā ca candrānanā'bjalocanā |
tena tenaiva sampūrṇarūpeṇa ca tilottamā || 18 ||
[Analyze grammar]

nāmā tilottamā svarṇavarṇā yuvatī sundarī |
evaṃvidhā tatra tatra tīrthasnānaparāyaṇā || 19 ||
[Analyze grammar]

yaṃ yaṃ paśyati cārvaṃgī yastāṃ cāpi prapaśyati |
sa sa citra iva nyasto vicetā jāyate kṣaṇam || 20 ||
[Analyze grammar]

tathāvidhā mathurāyāṃ svakaṃ vāsamarocayat |
tadaivā'vasare kānyakubjadeśādhipo nṛpaḥ || 21 ||
[Analyze grammar]

mathurāyāṃ devamarteśvare'nnasatramākarot |
tatra vai brāhmaṇāḥ satyaḥ sādhvyo brāhmaṇya ityapi || 21 ||
[Analyze grammar]

sādhavo bhikṣukā dīnā anāthā bhuṃjate śatam |
tatreyaṃ susadā bhuṃkte suśīlā tu tilottamā || 23 ||
[Analyze grammar]

bhojanasya samaye tu saṃgītaṃ supravartate |
vāditrāṇi ca gītāni śakrasya bhavane yathā || 24 ||
[Analyze grammar]

rājñastasya tu yā nṛtyakāriṇyo gāyikāstathā |
dūtyaśca gaṇikāścāpi tābhiḥ sā pratilobhitā || 25 ||
[Analyze grammar]

gītanṛtyādiṣu snigdhā tāsāṃ dharmamupāgatā |
alpaistu divasaiḥ sādhvī hyasādhvībhiḥ parivṛtā || 26 ||
[Analyze grammar]

rājñaḥ samāgamaṃ prāptā bhogabhogyabhṛtā'bhavat |
yuvatī kāmadāhena navaṃ navaṃ samicchati || 27 ||
[Analyze grammar]

evaṃ sā kāmadharmeṣu vyavāyapathagā'bhavat |
athatasyāstu yo bhrātā pāñcālo brāhmaṇātmajaḥ || 28 ||
[Analyze grammar]

gṛhe sa nirdhano bhūtvā vyavasāyaṃ vicārya ca |
mathurāyāṃ gate kāle samāyāto nirāśrayaḥ || 29 ||
[Analyze grammar]

kasyacicchreṣṭhivaryasya karmacārī tadā'bhavat |
vyāpārabuddhyā varṣānte so'pi vyāpāralābhavān || 30 ||
[Analyze grammar]

dhanavān vai bhāgyayogāt saṃjāto vidhuro'pi ca |
yamunāyāṃ sadā yāti snānārthaṃ snāti yatra sā || 31 ||
[Analyze grammar]

nityaṃ paśyati cārvaṃgīṃ dṛṣṭvā mohavaśaṃ gataḥ |
tatra tīrthavare snātvā vastrālaṃkārabhūṣitaḥ || 32 ||
[Analyze grammar]

devādidarśanaṃ kṛtvā garteśvaraṃ samarcya ca |
tilottamāyā mārgaṃ vai dhṛtvā paścād yayau śanaiḥ || 33 ||
[Analyze grammar]

yatra tadbhavanaṃ tatra dhātreyikāṃ vyalokayat |
tayā cāpi yuvā mugdha iti tvākārito gṛhe || 34 ||
[Analyze grammar]

dhātreyikāyāstasyāśca bahumānapuraḥsaram |
yayau prasannamanasā yuvatyā bhavanāntaram || 35 ||
[Analyze grammar]

vastrāṇi baddharūpāṇi sauvarṇakaṭakāni ca |
hārān ratnamayān dravyaṃ dadau tasyai vimohitaḥ || 36 ||
[Analyze grammar]

dadāvagurusāraṃ ca sakarpūraṃ sacandanam |
tasyā gṛhavare tatra vasati sma dine dine || 37 ||
[Analyze grammar]

praharārdhe dine jāte yāti svaśibiraṃ tataḥ |
snātvā tīrthe samīpe ca kṛṣṇagaṃgodbhave sadā || 38 ||
[Analyze grammar]

evaṃ nityaṃ tadāsaktaḥ karoti vartanaṃ svakam |
sumantumunināṃ nityaṃ gacchan sa cā'valokyate || 39 ||
[Analyze grammar]

athaikadā pragacchan vai snātuṃ vipraḥ sumantunā |
svāśramasthena divyena dṛṣṭaḥ sa kṛmikīṭavān || 40 ||
[Analyze grammar]

kṛmayo romakūpebhyaḥ patamānā anekaśaḥ |
dṛśyante kurute yāvatsnānaṃ tāvatpatanti vai || 41 ||
[Analyze grammar]

snāne kṛte na dṛśyante surūpaścābhijāyate |
evaṃ sumantunā dṛṣṭamāścaryaṃ bahuvāsaram || 42 ||
[Analyze grammar]

sumantustvāhvayāmāsa papraccha nāma karma ca |
pāñcālastaṃ tadā prāha tvahaṃ paṃcāladeśajaḥ || 43 ||
[Analyze grammar]

vipro vāṇijyamāśritya vasāmyatra nu caikalaḥ |
niśāmuṣitvā śibire tilottamāsurakṣite || 44 ||
[Analyze grammar]

prātaḥ snātvā trigarteśaṃ pūjayitvā tamanvaham |
divā karomi vyāpāraṃ vasāmi śibire niśi || 45 ||
[Analyze grammar]

sumantuśca tadā prāha śṛṇu vipra yathātatham |
āścaryaṃ tava dehe'smin nityaṃ paśyāmi niḥsṛtam || 46 ||
[Analyze grammar]

asnāte kṛmisaṃpūrṇaṃ snāte nirmalavarcasam |
asti kiñcinmahatpāpaṃ tava pracchannasaṃbhavam || 47 ||
[Analyze grammar]

asyāṃ tīrthaprabhāveṇa snānād gacchati dūrataḥ |
trigarteśvarasaṃsparśāt śuddhaṃ dehaṃ tu dṛśyate || 48 ||
[Analyze grammar]

nirūpya kathayā'smān vai yatte pracchannakilbiṣam |
iti muneḥ sumantoḥ sa śrutvā trikālavedinaḥ || 49 ||
[Analyze grammar]

svaśibire'ṅganāsaṃgaṃ karomīti nyavedayat |
gatvā tathā tadaikānte tāṃ tu papraccha mūlataḥ || 50 ||
[Analyze grammar]

kā tvaṃ kasya sutā kaśca deśastvatrāgamaḥ kutaḥ |
tyākṣyāmi hi priyānprāṇān yadi satyaṃ na vakṣyati || 51 ||
[Analyze grammar]

nirbandhaṃ tasya taṃ jñātvā duḥkhenovāca sā svakam |
pañcālo brāhmaṇo deśe pañcāle varapattane || 52 ||
[Analyze grammar]

vartate vasunāmā'khyastatsutā'haṃ tilottamā |
vivāhitā patirnaṣṭo'sthīni tvādāya māthuram || 53 ||
[Analyze grammar]

āgatā rāgayogena kānyakubjanṛpā'rthitā |
vyavāyadharmamāpannā vartāni kāmadharmiṇī || 54 ||
[Analyze grammar]

mama bhrātā tu pāñcālo vartate pitṛmandire |
bhadrānadītaṭe tatra gṛhaṃ me hyabhavatpurā || 55 ||
[Analyze grammar]

atra vasāmyanāthā'haṃ kulaṭādharmamāśritā |
vada tvaṃ svīyavṛttāntaṃ yadi māṃ vetsi pātrakam || 56 ||
[Analyze grammar]

etacchrutvā sa pāṃcālyaḥ sāśrunetro'bhavattadā |
labdhasaṃjñaṃ kulaṃ tasya papraccha taṃ tilottamā || 57 ||
[Analyze grammar]

tatastena svavṛttāntaṃ kathitaṃ kulanāmakam |
atyativimanā jāto hyagamyāgamanena vai || 58 ||
[Analyze grammar]

prāyaścitte matirabhūnnirviṇṇasya dvijanmanaḥ |
mātaraṃ gurupatnīṃ ca svasāraṃ putrikāṃ vadhūm || 59 ||
[Analyze grammar]

gatvā tu praviśedagniṃ nānyā śuddhirvidhīyate |
patyātmakaṃ tu pāñcālī jñātvā svabhrātaraṃ tu tam || 60 ||
[Analyze grammar]

dvijebhyaḥ pradadau sarvaṃ ratnavastradhanādikam |
kāliṃjaratrigarteśaṃ datvā bhūṣādhanādikam || 61 ||
[Analyze grammar]

kṛṣṇagaṃgodbhave tīrthe citāṃ kṛtvā vidhānataḥ |
ātmanaḥ sā viśuddhyarthaṃ prajajvāla hutāśanam || 62 ||
[Analyze grammar]

pāñcālo'pi svakaṃ dravyaṃ datvā dāne'vaśeṣitam |
aurdhvadaihikabhāgārthaṃ kalpayitvā yathāvidhi || 63 ||
[Analyze grammar]

snātvā devāṃstathā natvā brāhmaṇāṃśca sumantukam |
ṛṣiṃ gatvā samuvācā'gamyāgamanapātakam || 64 ||
[Analyze grammar]

tatpāpasya viśuddhyarthaṃ dehatyāgaṃ karomi vai |
ityuktvā ca citāṃ kṛtvā samuddīpya ghṛtokṣitām || 65 ||
[Analyze grammar]

yāvatpraveṣṭuṃ yātyenaṃ vāguvācā'śarīriṇī |
bhaginīṃ ca praveṣṭuṃ vai tatparāṃ tāvadeva ha || 66 ||
[Analyze grammar]

maivaṃ kārṣīḥ sāhasaṃ ca vipāpmānau yato hi vām |
yatra kṛṣṇasya sañcāraḥ krīḍā jātā yathāsukham || 67 ||
[Analyze grammar]

cakrāṃkitapadanyāsāstatthalaṃ divyameva yat |
brahmarūpaṃ dhāmarūpaṃ yatra pāpakṣayo bhavet || 68 ||
[Analyze grammar]

anyatra hi kṛtaṃ pāpaṃ tīrthamāsādya naśyati |
tīrthasthāne kṛtaṃ pāpaṃ vajralepaṃ bhavedapi || 69 ||
[Analyze grammar]

tadubhayavināśastu gaṃgāsāgarasaṃgame |
gomatīsāgarayoge yamunāpaṃcatīrthake || 70 ||
[Analyze grammar]

pṛthivyāṃ sarvatīrtheṣu snānajaṃ yatphalaṃ matam |
yamunāyāḥ pañcatīrthasnānena tulyameva na || 71 ||
[Analyze grammar]

ekādaśyāṃ hi viśrāntau dvādaśyāṃ saukare tathā |
trayodaśyāṃ naimiṣe ca caturdaśyāṃ prayāgake || 72 ||
[Analyze grammar]

pūrṇāyāṃ puṣkare snānāt kārtikyāṃ ca vrate vrate |
tīrthe tīrthe janaḥ snātvā sarvapāpāt pramucyate || 73 ||
[Analyze grammar]

mathurāyāṃ sarvatīrthe viśrāntau pañcatīrthake |
asikuṇḍe sarasvatīyoge garteśvare tathā || 74 ||
[Analyze grammar]

snānajāttu phalād daśaguṇaṃ puṇyaṃ sakṛdapi |
kṛṣṇagaṃgāsnānato vai jāyate nā'tra saṃśayaḥ || 75 ||
[Analyze grammar]

jñānato'jñānato vāpi duṣkṛtaṃ samupārjitam |
kṛṣṇagaṃgājalasparśe vajrākhyamapi naśyati || 76 ||
[Analyze grammar]

mathurā hi kṛṣṇarūpā nadī kṛṣṇamayī tathā |
narā nāryaḥ kṛṣṇarūpāstatra pāpaṃ na vidyate || 77 ||
[Analyze grammar]

yasya śrotraikadeśe tu hyākāśo leśamātrakaḥ |
yasya nayanayoḥ prānte tejo līnaṃbhavatyapi || 78 ||
[Analyze grammar]

yasya śvāse'nilo līno jalaṃ svede vilīyate |
pṛthvī yasyodare tvaṇvī bhūtvā tiṣṭhati sarvadā || 79 ||
[Analyze grammar]

yatkukṣau vārdhayaḥ sarve līnā bhavanti sarvadā |
yasmād bhavanti satataṃ brahmāṇḍāni svaromataḥ || 80 ||
[Analyze grammar]

avatārā varāhādyā bhavanti yasya vāñcchayā |
tasmin kṛṣṇe sthite cātra pāpaleśo na vidyate || 81 ||
[Analyze grammar]

pṛthvīrakṣākaro devo varāho yatra vidyate |
tasya sandarśanāttvatra mahāpātakanāśanam || 82 ||
[Analyze grammar]

tatkṣaṇādeva viprendra nātra kāryā vicāraṇā |
navamyāṃ jyeṣṭhaśuklasya kṛṣṇagaṃgodakā''plavāt || 83 ||
[Analyze grammar]

sūkare tu trirātraṃ vai mānavo dīpadānataḥ |
tilottame mahāvajrāpyatipāpaiḥ pramucyate || 84 ||
[Analyze grammar]

kāliṃjare tu dvādaśyāṃ snātvā sampūjya devatām |
divyacaturbhujo bhūtvā viṣṇuloke mahīyate || 85 ||
[Analyze grammar]

evaṃ lakṣmi devavāṇyā pāñcālaśca tilottamā |
bodhitau tau gatau divyasumantorāśrame tadā || 86 ||
[Analyze grammar]

pādayoḥ patitau tasyocatuśca tvaṃ pitā guruḥ |
brūhi divyadṛśā brahmannatra kiṃ karavāvahai || 87 ||
[Analyze grammar]

muniḥ prāha vyomavāṇīṃ yathārthā nā'nṛtā kvacit |
mayā pratyakṣato dṛṣṭaṃ bhavadgātreṣu pātakam || 88 ||
[Analyze grammar]

snānātprāgeva no paścāttato nāstyeva pātakam |
pañcatīrthe trigarteśe snānaṃ saṃkuruta sadā || 89 ||
[Analyze grammar]

āśrame mama nityaṃ ca tiṣṭhataṃ kurutaṃ japam |
pāpāduparamitau ca yāvatkālaṃ prajīvathaḥ || 90 ||
[Analyze grammar]

mamā''śīrvādataścāpi bhrātā ca bhaginī hyubhau |
vipāpmānau tu saṃbhūtau brahmalokaṃ gamiṣyathaḥ || 91 ||
[Analyze grammar]

evaṃ tatrāśrame lakṣmi suyantvādyā maharṣayaḥ |
divyadehāḥ pravasanti tatastīrthottamaṃ smṛtam || 92 ||
[Analyze grammar]

saṃprāptau divyadehau tau bhrātā ca bhaginī hyubhau |
ārṣau tatrāśrame jātau darśanādapi muktidau || 93 ||
[Analyze grammar]

tato vimānamāruhya kṛṣṇanārāyaṇasya tau |
śrīkṛṣṇena samaṃ yātau golokaṃ dhāma śāśvatam || 94 ||
[Analyze grammar]

evaṃ prabhāvastīrthasya mathurāyāṃ yamījale |
kṛṣṇagaṃgāsthalasyāpi tathā kāliñjarasya ca || 95 ||
[Analyze grammar]

sūkarasyāpi tīrthasya mahālakṣmi vadāmi kim |
pāpaṃ na pāparūpaṃ tad yadi kṛṣṇāya cārpitam || 96 ||
[Analyze grammar]

apāpaṃ pāparūpaṃ syād yadi kṛṣṇāya nā'rpitam |
tasmāt puṇyaṃ mahādānaṃ kāryaṃ yatkiñcideva tat || 97 ||
[Analyze grammar]

mahyaṃ kṛṣṇāya dātavyaṃ nirdoṣaṃ doṣavattu yat |
kāmaḥ krodho mahān lobho mānaḥ svādaśca mohitā || 98 ||
[Analyze grammar]

sarve kṛṣṇārpitā divyā nirbandhāya bhavanti vai |
yaḥ śṛṇoti mahālakṣmi śraddhayā paṭhati dhruvam || 99 ||
[Analyze grammar]

saptajanmakṛtaṃ pāpaṃ tasya sarvaṃ vyapohati |
prātarasyaikavāraṃ vai cāturmāsye tu vācanam || 100 ||
[Analyze grammar]

kariṣyati janastasya phalaṃ gośatadānajam |
pāpaleśo na vai tasyā'mṛtatvaṃ jāyate dṛḍham || 101 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne mathurātīrthamāhātmyaṃ saurāṣṭrīyasya varapattanavāsinaḥ pāṃcālaviprasya tilottamākhyabhaginyā saha mathurāyāmajānatorjātasyavyavāyabhāvasya vyomavāṇyā sumantunā ṛṣiṇā ca niṣpāpatā pañcatīrthakṛṣṇagaṃgātīrthaprabhāveṇa darśiteti nirūṇanāmā |
dvipañcāśadadhikatriśatatamo'dhyāyaḥ || 352 ||
[Analyze grammar]