Chapter 353

śrīnārāyaṇa uvāca |
śṛṇu lakṣmi caritaṃ vai nārīṇāṃ cañcalaṃ sadā |
putraṃ rūpayutaṃ dṛṣṭvā pitaraṃ vā janāntaram || 1 ||
[Analyze grammar]

kṣaṇaṃ saṃkalpavaśagā kvacid bhavati bhāminī |
cañcalaṃ hi manastadvad rājasī kāmavedanā || 2 ||
[Analyze grammar]

parādhīnaṃ karotyeva yathā sāmbaṃ kariṣyati |
śṛṇu śrīkṛṣṇasya putraḥ sāmbanāmā bhaviṣyati || 3 ||
[Analyze grammar]

mātṝṇāṃ tatra mohena śāpapātraṃ bhaviṣyati |
sāmbasya varṣmaṇi kuṣṭharogo bhaviṣyati tadā || 4 ||
[Analyze grammar]

sa mathurāṃ samāgatyā''dityasyopāsanāṃ tathā |
kariṣyati pratiṣṭhāṃ ca snāsyati yāmune jale || 5 ||
[Analyze grammar]

tena kuṣṭhavināśo'sya bhaviṣyati na saṃśayaḥ |
etādṛśaṃ tu māthuraṃ tīrthaṃ rogavināśakam || 6 ||
[Analyze grammar]

śṛṇu vistarato lakṣmi bhaviṣyat kathayāmi tat |
dvārakāṃ vasamānasya putradārasutaiḥ saha || 7 ||
[Analyze grammar]

kṛṣṇasya bhavanaṃ tatra samāyānnārado muniḥ |
yathāyogyaṃ svāgataṃ śrīkṛṣṇastasyā'karonmudā || 8 ||
[Analyze grammar]

nāradastu tadaikānte bhijñaptimakaroddharim |
kṛṣṇa kiñcidvaktukāmaḥ śṛṇu svarge śrutaṃ mayā || 9 ||
[Analyze grammar]

sāmbanāmā kṛṣṇaputro yuvā rūpātiśobhanaḥ |
spṛhaṇīyaḥ strījanasya kānto nānyo hi tatsamaḥ || 135310 ||
[Analyze grammar]

api kṛṣṇasya patnyo'pi spṛhayanti vilokya tam |
devayonyaśca yāḥ santi sahasrāṇi ca ṣoḍaśa || 11 ||
[Analyze grammar]

sāmbaṃ dṛṣṭvā tu sarvāsāṃ kṣubhyanti mānasāni vai |
etat svargādilokeṣu gīyate daivataiḥ katham || 12 ||
[Analyze grammar]

yaśo vai svargavāso'sti narakastadviparyayaḥ |
tvatpriyārthaṃ samāyātaḥ kathayituṃ mahāprabho || 13 ||
[Analyze grammar]

puṇyaṃ saṃśrūyate yāvat tāvatpuruṣa ucyate |
apuṇyaśravaṇe tasya nirayo vai prakīrtyate || 14 ||
[Analyze grammar]

tasmātsatyamasatyaṃ vā lakṣayiṣyāmyahaṃ hi tat |
tasmāt sāmbaṃ tathā devīgaṇaṃ saṃsadi cā''hvaya || 15 ||
[Analyze grammar]

itiproktastathā kṛṣṇo devīrāhūya sarvaśaḥ |
niṣādya sāmbamāhūya svapārśve'pi nyaṣādayat || 16 ||
[Analyze grammar]

dṛṣṭvā rūpamatīvā'sya sāmbasyātra varastriyaḥ |
cukṣubhuḥ sakalā devyaḥ kṛṣṇasyaiva tu paśyataḥ || 17 ||
[Analyze grammar]

nāradaṃ tā namaskṛtya jagmuḥ svaṃ svaṃ niketanam |
sāmbastasthau tatra kṛṣṇo lajjayā''vāṅmukho'bhavat || 18 ||
[Analyze grammar]

kṣaṇo nāsti raho nāsti nāstikṛtye vicāraṇā |
surūpaṃ puruṣaṃ dṛṣṭvā kṣaranti pramadāḥ sadāḥ || 19 ||
[Analyze grammar]

svabhāva eṣa nārīṇāṃ tatra kā parivedanā |
yathā tvekena cakreṇa rathasya na gatirbhavet || 135320 ||
[Analyze grammar]

vinā naraṃ tvagatatyaḥ kṣaranti nṛrasāḥ striyaḥ |
puṃsvādadṛṣṭipātena manyante kṛtakṛtyatām || 21 ||
[Analyze grammar]

pradyumnaṃ vīkṣya tāḥ sarvā lajjāmāpuḥ supuṣkalām |
sāmbaṃ dṛṣṭvā tu tāḥ sarvā anaṅgena prapīḍitāḥ || 22 ||
[Analyze grammar]

uddīpanavibhāvo'yaṃ sāmbastvatstrīvimohakaḥ |
satyaloke pravādo yastava jāto duratyayaḥ || 23 ||
[Analyze grammar]

mayā śrutastu lokebhyo brahmarṣibhyo muhurmuhuḥ |
sāmbaṃ tyaktvā'yaśastatsammārṣṭumarhasi keśava || 24 ||
[Analyze grammar]

ityuktvā nārado maunamāsthito'tha haristataḥ |
taṃ tu śaśāpa sāmbaṃ vai virūpo bhava putraka || 25 ||
[Analyze grammar]

tāvatsāmbaḥ kuṣṭhayukto'bhavad virūpa eva ha |
atha sāmbaṃ tathā dṛṣṭvā saśokaṃ prāha nāradaḥ || 26 ||
[Analyze grammar]

sāmba sāmba kṛṣṇaputra śṛṇu jāmbavatīsuta |
sūryamudyantameva tvaṃ namaskuru sadā'nagha || 27 ||
[Analyze grammar]

kuṣṭharogo ravistuṣṭo nāśayiṣyati putraka |
mathurāyāṃ ca tvaṃ gatvā ṣaṭsūryaṃ prāpsyase phalam || 28 ||
[Analyze grammar]

prātarārādhaya sūryaṃ ṣaṭsūryatīrthake'nagha |
madhyāhnepi tathā sāyaṃ sadyaḥ phalamavāpnuhi || 29 ||
[Analyze grammar]

kṛṣṇagaṃgodbhave snātvā sūryamārādhya yatnataḥ |
sarvapāpavinirmuktaḥ kuṣṭhādibhyo vimucyate || 135330 ||
[Analyze grammar]

ityuktastu mahālakṣmi sāmbaḥ kṛṣṇājñayā yayau |
mathurāṃ doṣaharaṇīṃ muktidāṃ sa dadarśa ha || 31 ||
[Analyze grammar]

ṣaṭsūryānpūjayāmāsa niyatasnānatarpaṇaḥ |
brāhmaṃ tathodayanta ca hyūrdhvaṃ yāntaṃ ca madhyagam || 32 ||
[Analyze grammar]

namantaṃ cāpyastagataṃ nityaṃ sāmbaḥ samārcayat |
sūryastuṣṭaḥ svalpakāle sāmbasyā'gre samāgamat || 33 ||
[Analyze grammar]

varaṃ vṛṇīṣva bhadraṃ te gataṃ kuṣṭhādikaṃ tava |
ityuktvā sāmbasarvāṃge'spṛśat sāmbo'pi tatkṣaṇam || 34 ||
[Analyze grammar]

kuṣṭhahīno'bhavatsūryasamakāntirvyarājata |
sūryo dvitīyarūpeṇa sāmbena saha vartate || 35 ||
[Analyze grammar]

brāhme sūryaṃ virāḍākhyaṃ sāmbaścakre pratiṣṭhitam |
udayākhyaraviṃ yamyāṃ dakṣiṇe sampratiṣṭhitam || 36 ||
[Analyze grammar]

ūrdhvayāntaṃ kālapriyaraviṃ cakre pratiṣṭhitam |
vaikuṇṭhapaścime cakre raviṃ mādhyandinīyakam || 37 ||
[Analyze grammar]

avataranta sāmbārkaṃ mathurāyāṃ pratiṣṭhitam |
astamantaṃ kṛṣṇagaṃgādakṣiṇe'rka pratiṣṭhitam || 38 ||
[Analyze grammar]

cakre sāmbastatpūjādividhiṃ sāmbapure sthitaḥ |
mathurāyāṃ tvabhavat tat sāmbapuraṃ kuleśvaram || 39 ||
[Analyze grammar]

māghamāsasya saptamyāṃ divyaṃ sāmbapuraṃ prati |
rathayātrāṃ sāmbasūryāṃ kariṣyanti tu ye janāḥ || 135340 ||
[Analyze grammar]

gaccheyustatpadaṃ śāntaṃ sūryamaṇḍalabhedakam |
kṛṣṇagaṃgāṃ janāḥ snātvā dṛṣṭvā ṣaṭasūryamaṇḍalam || 41 ||
[Analyze grammar]

pāparogādimuktāśca yāsyanti paramaṃ padam |
iti te kathitaṃ lakṣmi manaḥpāpādināśakam || 42 ||
[Analyze grammar]

agamyāgamanasyāpi cāgamyagamanasya ca |
pāpaṃ prajvālayatyāśu tvādityaṣaṭkatīrthakam || 43 ||
[Analyze grammar]

kāmena yanmanodauṣṭyaṃ vidhunoti tu tad drutam |
aparādhānapi sarvān mathurāyāṃ hariḥ svayam || 44 ||
[Analyze grammar]

na vai gaṇayati kṛṣṇo gopījanakṛtādaraḥ |
sāmbo'bhavaddhūtapāpastatraivā'ntaradhīyata || 45 ||
[Analyze grammar]

sūryarathe sadā tiṣṭhan bhaviṣyaṃ paripṛcchati |
tatsarvaṃ tu navaṃ kṛtvā jñātavān kṛṣṇaputrakaḥ || 46 ||
[Analyze grammar]

sāmbapuraṃ mathurāyāṃ kṛtvā yāto nijaṃ gṛham |
paṭhanācchravaṇāttvasya ṣaḍādityārhaṇāphalam || 47 ||
[Analyze grammar]

labhate sūryalokaṃ ca prāṇānte kṛṣṇadhāma ca |
śṛṇu lakṣmi bhaktakṛtānaparādhānapi priye || 48 ||
[Analyze grammar]

ajñātaḥ sarvathā śuddho vaiṣamye deśakālayoḥ |
vinā'parādho manujaḥ sāparādho vijāyate || 49 ||
[Analyze grammar]

karmaṇā manasā vācātvaparādhā bhavanti vai |
snānahīnatvamevātha hiṃsanaṃ mithunakriyā || 135350 ||
[Analyze grammar]

malamūtraparityāgo bālajanmādikaṃ tathā |
śavasparśādikaṃ devapūjane hyaparādhanam || 51 ||
[Analyze grammar]

mandirasya tathā mūrteḥ sānnidhye patprasāraṇam |
pṛṣṭhadānaṃ mehanaṃ ca yatheṣṭabhakṣaṇādikam || 52 ||
[Analyze grammar]

malinā'śuddhabhakṣitvaṃ niṣiddhakusumārcanam |
anuttārya tu nirmālyaṃ pūjākṣīṇe'ndhakāriṇi || 53 ||
[Analyze grammar]

kleśanaṃ devatāgāre sopānatko'pasarpaṇam |
surāmāṃsāśanaṃ devasyāndhakāre prabodhanam || 54 ||
[Analyze grammar]

anamaskaraṇaṃ tadvad grāmyajalpavitaṇḍikāḥ |
dhūmrapānaṃ ṣṭhīvanaṃ cetyādyāḥ karmāparādhakāḥ || 55 ||
[Analyze grammar]

adhyāna cā'smaraṇaṃ cā'dhāraṇaṃ śrīharestathā |
anyasakalpakaraṇaṃ viṣayādivicintanam || 56 ||
[Analyze grammar]

rāgo dveṣastathā tṛṣṇā vāsanā cā'nyanindanam |
kutarkahetusandehā bhrāntirviparyayastathā || 57 ||
[Analyze grammar]

ālasyaṃ cā'nanusandhānakaṃ garvo'bhimānitā |
kāmaḥ krodhastathā lobho mado mātsaryamityapi || 58 ||
[Analyze grammar]

īrṣyā'niṣṭavicārādyā mānasā hyaparādhakāḥ |
mātṛpitṛsuhṛnmitragurudvijasurādayaḥ || 59 ||
[Analyze grammar]

satīsādhvīpriyāpatnībālābālagavādayaḥ |
tṛṇājantucetanādyāḥ sarve nārāyaṇāntarāḥ || 135360 ||
[Analyze grammar]

patibhṛtyāśritā naivā'parāddhavyāḥ kadācana |
asatpralāpo'sadvārtā vyarthabhāṣitvamityapi || 61 ||
[Analyze grammar]

abhajanaṃ doṣadānaṃ duṣṭaśabdaprayojanam |
kalahaścākrośanaṃ ca kolāhalaśca pardanam || 62 ||
[Analyze grammar]

atiśabdadhvanidhvānaṃ gālīvācanamityapi |
aślīlavāk samuddhoṣaḥ sakthisphoṭādikaṃ tathā || 63 ||
[Analyze grammar]

anargalaprahāyasyādyā vāṇī kṛtāparādhakāḥ |
na kartavyā vicāryaiva svāniṣṭaphaladāstu te || 64 ||
[Analyze grammar]

devatīrthaguruviprasādhusādhvīpativratāḥ |
sarve ye tārakāsteṣāmaparādhān na cā''caret || 65 ||
[Analyze grammar]

sāparādhastu puruṣo viṣṇuṃ naiva prapaśyati |
rākṣasīṃ tāmasīṃ pūjāṃ naiva kuryāt kadācana || 66 ||
[Analyze grammar]

māṃsamadyārpiṇī pūjā rākṣasī procyate priye |
hiṃsādikṛtyayuktā yā pūjā sā tāmasī matā || 67 ||
[Analyze grammar]

pāradāryaṃ paradravyaharaṇaṃ ca parārdanam |
paranāśakaraṃ karma rākṣasaṃ karma kīrtitam || 68 ||
[Analyze grammar]

karmakṛtāparādhānāṃ śuddhiḥ snānādinā bhavet |
tīrthasnānena pañcagavyānāṃ saṃprāśanena ca || 69 ||
[Analyze grammar]

upoṣaṇena yajñena dīrghakālagatena ca |
pañcāmṛtena ca tathā brahmakūrcavratena ca || 135370 ||
[Analyze grammar]

devānāṃ sevayā satāṃ sevayā śuddhiriṣyate |
manaḥkṛtāparādhānāṃ śuddhirdhyānādinā bhavet || 71 ||
[Analyze grammar]

cittavṛttinirodhena tathendriyanirodhataḥ |
jñānena doṣatyāgena tapasā puṇyabhāvataḥ || 72 ||
[Analyze grammar]

kathāyāḥ śravaṇenāpi mananena ca nirṇayāt |
ātmanastu vicāreṇa cidacitorvivekataḥ || 73 ||
[Analyze grammar]

puṃprakṛtyordharmabodhānmānasī śuddhiriṣyate |
vācā kṛtāparādhānāṃ śuddhiḥ syāttu japādibhiḥ || 74 ||
[Analyze grammar]

kṛṣṇanārāyaṇa viṣṇo hare mādhava keśava |
lakṣmīpate ramānātha śrīpate pārvatīpate || 75 ||
[Analyze grammar]

gopīpate prabho māṇikīpate ca prabhāpate |
satpate cākṣarapate muktapate pumuttama || 76 ||
[Analyze grammar]

golokādipate brahmapara śrīpuruṣottama |
ityevaṃ nāmajapanādoṃkārādijapāttathā || 77 ||
[Analyze grammar]

kṣamāyā yācanāccāpi kathāyā vācanāttathā |
kṛṣṇakīrtanakaraṇāt kṛṣṇamālā''dhivartanāt || 78 ||
[Analyze grammar]

satyavratapratiṣṭhānād vācikī śuddhiriṣyate |
mucyate tvaparādhaistu jano viṣṇoḥ stavaṃ paṭhan || 79 ||
[Analyze grammar]

samvatsarasya mapye vai tīrthasnānena śuddhyati |
kāśyāṃ tathā mathurāyāṃ dvārakāyāṃ ca puṣkare || 135380 ||
[Analyze grammar]

badaryāṃ ca jagannāthapuryāṃ sāketapattane |
haridvāre ca gaṇḍakyāṃ godāvaryāṃ janārdane || 81 ||
[Analyze grammar]

kāveryāṃ setubandhe ca padmāvatyāṃ ca raivate |
svarṇarekhājale cā'śvapaṭṭasarasi mānase || 82 ||
[Analyze grammar]

nārāyaṇe cendradyumne kāveryāṃ padmanābhake |
kāñcyāṃ ca narmadāyāṃ cā'vabhṛthe paṭṭakotsave || 83 ||
[Analyze grammar]

snānātpānāttathā dhyānāt kīrtanād dhāraṇāttathā |
śravaṇānmananāccāpi darśanāt pātakakṣayaḥ || 84 ||
[Analyze grammar]

aṭitvā sarvatīrthāni prāyānmāthuramaṇḍalam |
ātyantikī tu viśrāntirviśrāntighaṭṭake bhavet || 85 ||
[Analyze grammar]

phalaṃ parārdhaguṇitaṃ mathurāyāṃ prajāyate |
gateranveṣakāṇāṃ tu mathurā paramā gatiḥ || 86 ||
[Analyze grammar]

yā gatiryogayuktasya sāṃkhyajñānavatastathā |
sā gatistyajataḥ prāṇān mathurāyāṃ na saṃśayaḥ || 87 ||
[Analyze grammar]

na tīrthaṃ mathurātulyaṃ na devaḥ kṛṣṇasadṛśaḥ |
na brahmadhāmabhā muktirna paraḥ puruṣottamāt || 88 ||
[Analyze grammar]

yadāśraye kṛte sarvapāpānāṃ vilayo bhavet |
ātmani yaddhṛte svasyā''tyantikī muktirāmilet || 89 ||
[Analyze grammar]

iti te kathitaṃ lakṣmi jñānānāṃ jñānamuttamam |
śravaṇātpaṭhanāccāpi janastatphalabhāg bhavet || 135390 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne māthuratīrthamāhātmye dvārikāyāṃ sāmbarūpadarśanena kṛṣṇapatnīnāṃ manaḥkṣobhāt kṛṣṇadattaśāpena jātakuṣṭhasāmbasya mathurāyāmādityopāsanayā kuṣṭhanivṛttiḥ ṣaḍādityasthāpanā kāyikavācikamānasikāparādhāstannivāraṇaṃ cetyādinirūpaṇanāmā tripaṃcāśadadhikatriśatamo'dhyāyaḥ || 353 ||
[Analyze grammar]