Chapter 308

| śrīnārāyaṇa uvāca |
śṛṇu lakṣmi brahmaviṣṇumaheśajanakasya vai |
vairājapuruṣasyāpi vairājñyāptirvratādyathā || 1 ||
[Analyze grammar]

prākṛtapuruṣasyā'sti putraḥ pradhānapūruṣaḥ |
tasya hiraṇyagarbhākhyo mahāviṣṇuḥ suto'sti vai || 2 ||
[Analyze grammar]

tato virāḍajāyata vairājo vedhasaḥ pitā |
tasyāyuḥ śatavarṣaṃ vai tasyaiva varṣasaṃkhyayā || 3 ||
[Analyze grammar]

yadā pūrṇaṃ bhavatyeva tasyāsti nidhanaṃ tataḥ |
vairājo'nyaśca tatpaścād vairājyaṃ pratipadyate || 4 ||
[Analyze grammar]

evaṃ vai kramaśaḥ sṛṣṭau vairājānāmasaṃkhyatā |
pāramparyapravāheṇa mahāviṣṇordine dine || 5 ||
[Analyze grammar]

ekaikasya vināśo'sti vairājasyeśvarasya vai |
mahāviṣṇorvarṣamadhye pañcaṣaṣṭyadhitriṃśatam || 6 ||
[Analyze grammar]

vairājānāṃ bhavaṃtyeva krameṇa śatavarṣake |
ṣaṭatriṃśattu sahasrāṇi tathā pañcaśatāni vai || 7 ||
[Analyze grammar]

vairājānāṃ bhavantyeva tatsarvaṃ vedmyahaṃ priye |
asya vai vartamānasya vairājasya kathāṃ śṛṇu || 8 ||
[Analyze grammar]

mahāviṣṇostu sāmrājye aiśvarīsṛṣṭike stare |
aṣṭāvaraṇapāre vai tvasmātpūrvo virāṭ pumān || 9 ||
[Analyze grammar]

svasyā'ntimasya varṣasyā'ntimāhnastvantimakṣaṇe |
vartamāne'ntimavedhobrahmāṇḍe'stamanakṣaṇe || 10 ||
[Analyze grammar]

samrāḍāsītsahasrākṣā'bhidhaścakrapravartakaḥ |
bhaktimān sa sahasrākṣaḥ satye pātālake bhuvi || 11 ||
[Analyze grammar]

vimānena sadā yāti śṛṇoti vyomatantunā |
svacchadravyeṇa saṃcaṣṭe spṛśati kṣipravāyunā || 12 ||
[Analyze grammar]

kṣaṇena sarvalokānāṃ vyavahāraṃ karoti ca |
sarvasādhanayuktasya gantavyaṃ nā'vaśiṣyate || 13 ||
[Analyze grammar]

sthitvaikatra gṛhe tasya prajāścaturdiśāsthitāḥ |
vyavaharantīva nikaṣā vidanti karagaṃ yathā || 14 ||
[Analyze grammar]

sahasrākṣaḥ svayaṃsatyaloke saṃsadi vedhasaḥ |
yātyāyāti yathākālaṃ pūritāyāṃ mahājanaiḥ || 15 ||
[Analyze grammar]

dikpālairmanubhiścāpi sūryeṇa śaśinā tathā |
ṛṣibhiśca mahādevaiḥ sārvabhaumairnṛpaistathā || 16 ||
[Analyze grammar]

tatrāsanaṃ svakīyaṃ sa na lebhe prathame sthale |
iti vaiṣamyadoṣeṇa preritaḥ sa hṛdantare || 17 ||
[Analyze grammar]

āhūya brahmavijñānān papracchā'bhyudayaṃ prati |
pārameṣṭhyādadhikaṃ cottamaṃ sthānaṃ milet katham || 18 ||
[Analyze grammar]

viprā vijñāpayāmāsustamadhvaravarān kuru |
agniṣṭomaṃ vājapeyaṃ rājasūyaṃ ca vaiṣṇavam || 19 ||
[Analyze grammar]

mahāraudraṃ naramedhaṃ vājimedhaṃ vṛṣakratum |
sautrāmaṇiṃ suteṣṭiṃ ca vahnihotraṃ japādikam || 20 ||
[Analyze grammar]

etān yajñān mahāraṃbhān śatasaṃvatsarān kuru |
tena puṇyena te rājan pārameṣṭhyottaraṃ padam || 21 ||
[Analyze grammar]

bhaviṣyati dhruvaṃ rājyaṃ sthānaṃ kāraya tānmakhān |
śate pūrṇe tvindrapadaṃ sahasre tu raveḥ sthalam || 22 ||
[Analyze grammar]

dhruvarājyamayute tu lakṣe tu vedhasaḥ sthalam |
koṭiyajñeṣu pūrṇeṣu śatāsyabrahmaṇaḥ padam || 23 ||
[Analyze grammar]

yajñaparārdhe sampūrṇe vairājapadamāpyate |
na tathā''yuśca samayaḥ kasyā'pyatra tu golake || 24 ||
[Analyze grammar]

tasmād rājaṃstena dattaṃ bhuñjīthā bhava śāntimān |
tṛṣṇāyāstu piśācinyā anto bhogena nāpyate || 25 ||
[Analyze grammar]

atraivāptān prabhogāṃśca saṃprā'nubhūya sarvathā |
rāgadveṣau mahādoṣau kṣapayitvā hitaṃ kuru || 26 ||
[Analyze grammar]

śreyaṃ matto mahānasti lakṣmyā buddhyā janaiśca vā |
iti cintayiturnaiva sukhaprāptirbhavet kvacit || 27 ||
[Analyze grammar]

ahamasmi mahānātmā''nandena pūrito hareḥ |
iti manturna vai duḥkhaṃ tṛṣṇādoṣādijaṃ bhavet || 28 ||
[Analyze grammar]

anyeṣāmadhikaṃ dṛṣṭvā duḥkhaṃ mantavyameva na |
svopārjitena yatprāptaṃ tat sukhaṃ śāntidaṃ matam || 29 ||
[Analyze grammar]

yadṛcchayopapanne tu vastuni tūdyamārjite |
alaṃbuddhirbhavedyasya sa sadātra sukhī bhavet || 30 ||
[Analyze grammar]

trailokyā'hataśāstisāmrājyaṃ tavāsti vai dṛḍham |
yadi nāptā tataḥ śāntiradhikāt kā bhaviṣyati || 31 ||
[Analyze grammar]

ayaṃ mama paraśceti draṣṭurnāsti kvacit sukham |
tāratamyaṃ tu sarvatra māyāloke'sti sarvathā || 32 ||
[Analyze grammar]

prakṛtau vikṛtau kārye niratikramavarjite |
nahi kvāpi parā śāntirlabdhā kenāpi bhūpate || 33 ||
[Analyze grammar]

na kaścillapsyate śāntiṃ yadi syātprakṛteḥ patiḥ |
pradhānasya patirvāpi kā'nyasyātra kathā nṛpa || 34 ||
[Analyze grammar]

tasmācchāntiṃ labha rājan mā tṛṣṇāṃ vardhaya prabho |
viremuśceti sandiśya brāhmaṇāḥ pāradarśinaḥ || 35 ||
[Analyze grammar]

sahasrākṣastu karṇau tānadatvaiva makhān bahūn |
kārayāmāsa vidhivat pratyabdaṃ tu mahattamān || 36 ||
[Analyze grammar]

etaiḥ puṇyaṃ śatabrahmārjitaṃ prāptaṃ ca tena vai |
athā''yuṣo'ntime varṣe'dhimāse'parapakṣake || 37 ||
[Analyze grammar]

dine pratipadi prātarhareḥ śuśrāva dundubhim |
yajñeṣu vartamānasya sahasrākṣasya bhūpateḥ || 38 ||
[Analyze grammar]

puruṣottamamāsasya dundubhiḥ śravaṇaṃ gataḥ |
adhimāse dvitīye tu pakṣe vai pratipadgate || 39 ||
[Analyze grammar]

kṛṣṇanārāyaṇaḥ sarveśvaraḥ śrīpuruṣottamaḥ |
yadiṣṭaṃ yasya tad dāsye koṭikalpairalabhyakam || 40 ||
[Analyze grammar]

koṭiyajñaiḥ koṭidānairyadalabhyaṃ dadāmyaham |
atra vrate prakartavyaṃ rājñā dānaṃ yathābalam || 41 ||
[Analyze grammar]

pūjanaṃ me prakartavyaṃ yathālabdhopacārakaiḥ |
bhojanaṃ me ca dātavyaṃ yathāyogyānnasadrasaiḥ || 42 ||
[Analyze grammar]

dakṣiṇā me pradātavyā yathāśraddhā tathā dhanaiḥ |
paropakāraḥ kartavyaḥ puruṣottamatuṣṭaye || 43 ||
[Analyze grammar]

yadi samrāṭ sārvabhaumaścaturdaśabhuvāṃ patiḥ |
yathāvibhavaṃ kṛṣṇaṃ māṃ pūjayeduttamottamaiḥ || 44 ||
[Analyze grammar]

prātaḥ snānaṃ svayaṃ kṛtvā pañcaratnajalena mām |
sugandhasāravārbhiśca dantaśuddhiṃ prakārayet || 45 ||
[Analyze grammar]

sugandhaṃ mañjanaṃ dadyānnūtanaṃ dantadhāvanam |
sugandhajalagaṇḍūṣairjihvāśuddhyādi kārayet || 46 ||
[Analyze grammar]

puṣparasāgryasāraiśca sugandhibhirjalaiśca me |
śaucādi kārayed rājā hastaśuddhyādi kārayet || 47 ||
[Analyze grammar]

candanāktasumṛdbhiścā'vayavānāṃ pavitratām |
sugandhavāribhiścā'dbhiḥ kārayet snāpayettataḥ || 48 ||
[Analyze grammar]

dugdhena dadhnā cāpyekākṣareṇa madhunā tathā |
śarkarābhiścāmṛtaiśca snāpayed vāribhistataḥ || 49 ||
[Analyze grammar]

sugandhitailasāraiśca mardanaṃ kārayennṛpaḥ |
tīrthavārbhiḥ snāpayecca vastraiśca mārjayejjalam || 50 ||
[Analyze grammar]

atisūkṣmātimūlyaiḥ satsuvarṇatāracandrakaiḥ |
mṛducitraiścātisūkṣmavastrairmāṃ śobhayet tataḥ || 51 ||
[Analyze grammar]

rājyāsanārhasauvarṇairmukuṭaiḥ kaṭakādibhiḥ |
svarṇormikā śṛṃkhalādyaiḥ kuṇḍalairhāraśekharaiḥ || 52 ||
[Analyze grammar]

koṭyadhikairmaṇiratnairmauktikairnaddhabhūṣaṇaiḥ |
puṣparāgapravālaiśca vaidūryaiḥ sūryakāntakaiḥ || 53 ||
[Analyze grammar]

candrakāntairmārakatairmāṇikyaiḥ sphaṭikaistathā |
vajrairgārutmatairmuktābhiśca satpadmarāgakaiḥ || 54 ||
[Analyze grammar]

indranīlaiḥ puṣparājaiḥ karketanaiśca bhīṣmakaiḥ |
pulakaiḥ rudhiraiḥ svarṇai rājatairbhūṣaṇaistathā || 55 ||
[Analyze grammar]

sāmudrikaiḥ khanijaiśca vahnijaiḥ svarbhavaistathā |
ratnamālāvibhūṣābhiḥ pūjayetparameśvaram || 56 ||
[Analyze grammar]

ūrṇāvastrottamaiścānyaiḥ kārpāsakaiśca kauśukaiḥ |
vārkṣaiḥ suvarṇajaiścānyaiḥ rasajaistvakkṛtaiśca vai || 57 ||
[Analyze grammar]

vastraiḥ saṃśobhayet kṛṣṇaṃ tailaiḥ sugandhasārakaiḥ |
kajjalairnavanītaiśca mardyadravyaiḥ sugandhakaiḥ || 58 ||
[Analyze grammar]

sagandhaṃ kārayet kṛṣṇaṃ kastūrīcandanādibhiḥ |
karpūraiḥ kesarairmiśraiḥ pūjayet tilakādibhiḥ || 59 ||
[Analyze grammar]

kuṃkumā'kṣatapuṣpaiśca svarṇacampakakundakaiḥ |
pārijātasthalapadmaiḥ kamalaistulasīdalaiḥ || 60 ||
[Analyze grammar]

kalpapuṣpaiḥ svarṇavallīkusumaiḥ pūjayetprabhum |
svarṇākṣatairvardhayecca hāramālāḥ samarpayet || 61 ||
[Analyze grammar]

karapādatale gaṇḍau kapolau karṇasīmakau |
bhujau jaṃghe nakhānoṣṭhau raṃgaiḥ saṃraṃjayeddhareḥ || 62 ||
[Analyze grammar]

suvarṇamaṇiratnādinaddhopānadyutau padau |
naktakayaṣṭikāgucchaśṛṃkhalāsahitau karau || 63 ||
[Analyze grammar]

śobhayet tilakaṃ pītaṃ raktaṃ candraṃ prakārayet |
dhūpaṃ dīpaṃ kārayecca bhojanaṃ śatamaṣṭa ca || 64 ||
[Analyze grammar]

amblaṃ madhuraṃ lavaṇaṃ kaṭu tiktaṃ kaṣāyakam |
yathāruci yathāpekṣaṃ svādu sugandhi cārpayet || 65 ||
[Analyze grammar]

bhakṣyaṃ bhojyaṃ coṣyalehye peyaṃ cāsvādyamityapi |
annaṃ śākadvidalāścaudanāni suphalāni ca || 66 ||
[Analyze grammar]

pāyasānnaṃ suvarṇaiḥ saṃskṛtāni sadrasāni ca |
amṛtāḍhyāni miṣṭāni mṛṣṭāni dāpayennṛpaḥ || 67 ||
[Analyze grammar]

mukhavāsāni cūrṇāni tāmbūlaṃ cānyacarvaṇam |
uttejakāni cānyāni tvarpayeddharaye nṛpaḥ || 68 ||
[Analyze grammar]

śītalānyapi peyāni cūrṇitarasavanti ca |
mādakāni vividhāni tvarpayeddharaye nṛpaḥ || 69 ||
[Analyze grammar]

gāyanāni tu rājñībhistālavādyasvarānvitaiḥ |
nartanairhāvabhāvādyavyaṃgyarasaprapūritaiḥ || 70 ||
[Analyze grammar]

sakhībhiḥ kārayedrājā vardhayed bahubhāvanaiḥ |
lājābhiścandanakaṇairakṣataiḥ svarṇataṇḍulaiḥ || 71 ||
[Analyze grammar]

maṇiratnādibhirdevaṃ vardhayettu punaḥ punaḥ |
jayakārān kārayecca nīrājayetprage niśi || 72 ||
[Analyze grammar]

śataiḥ sahasrakairvartikarpūrādibhirādarāt |
ākaṭi sapta cāvartān sapta tvāmastakaṃ tathā || 73 ||
[Analyze grammar]

tataḥ saptā''vartakāṃśca pratyekasaptacakrakān |
tataśca saptalaharīrūrdhvā'dhaḥprasṛtāścaret || 74 ||
[Analyze grammar]

vyāvartānpādayoścaivā''vartayet kramaśo harim |
tato vastreṇa cāvartāṃstrīn hariṃ samavartayet || 75 ||
[Analyze grammar]

tataḥ śaṃkhajalenāpi vyāvartānavatārayet |
ārārtrikaṃ tajjalena trivāraṃ samavardhayet || 76 ||
[Analyze grammar]

dhūpaṃ tatastrivāraṃ cāvartayetparameśvaram |
ghaṇṭāvādanamanyeṣāṃ vādyānāṃ cāpi vādanam || 77 ||
[Analyze grammar]

dundubhijhallarīghaṇṭāpaṭahānativādayet |
tataḥ stutiṃ namaskāraṃ daṇḍavat prārthanāṃ caret || 78 ||
[Analyze grammar]

pradakṣiṇādikaṃ kṛtvā puṣpāñjalimathārpayet |
evaṃ prātaśca madhyāhne niśi samrāṭ prapūjayet || 79 ||
[Analyze grammar]

śṛṃgārayitvā satsainyaṃ vimāne ca gaje rathe |
sthāpayitvā rājadhānyudyānādau bhrāmayeddharim || 80 ||
[Analyze grammar]

janatā vardhayet kṛṣṇanārāyaṇaṃ pumuttamam |
punastvānīya ca rājasaudhaṃ jalādi cārpayet || 81 ||
[Analyze grammar]

viśrāmayet pādasaṃvāhanādyaṃ vartayennṛpaḥ |
bhagavattoṣaṇārthe ca bhūridānāni vai dadet || 82 ||
[Analyze grammar]

hastidānaṃ vājidānaṃ coṣṭraghoṭakadānakam |
vṛṣabhā'japradānaṃ ca gogaruḍapradānakam || 83 ||
[Analyze grammar]

śukadānaṃ sārikāyā menāyā dānamityapi |
narāṇāṃ dāsadāsīnāṃ kanyānāṃ dānamityapi || 84 ||
[Analyze grammar]

yānānāṃ vāhanānāṃ ca paśūnāṃ dānamityapi |
kambalāmbaraveṣādyutkṛṣṭavastūni dāpayet || 85 ||
[Analyze grammar]

bhavanāni nagarāṇi kṣetrāṇi parvatāṃstathā |
sarovarāṇi khanijān khanīṃścāraṇyakāni ca || 86 ||
[Analyze grammar]

dadyād dāne dvijātibhyo'nāthebhyo'nnāmbarāṇi ca |
vṛkṣān vallīḥ pradadyācca kṣetrāṇi vāṭikāstathā || 87 ||
[Analyze grammar]

dadyānnadīrnadāṃścaivā'khātān svargaṃ mahastapaḥ |
satyaṃ lokaṃ pradadyācca pātālāntatalāni ca || 88 ||
[Analyze grammar]

deśaṃ pradeśaṃ khaṇḍaṃ ca rājyaṃ dvīpaṃ ca dāpayet |
dātā brahmāṇḍanetā ced grahītā'pi tathā bhavet || 89 ||
[Analyze grammar]

milennaiva grahītā cet saṃkalpya haraye dadet |
viśvaṃbharo viśvapoṣṭā viśvarakṣākaraḥ prabhuḥ || 90 ||
[Analyze grammar]

gṛhṇātyeva na sandeho bhāvanākṣudhito hariḥ |
sāmrājyamukuṭaṃ dadyād dadyād rājñīṃ sutāstathā || 91 ||
[Analyze grammar]

sarve dadyāccharmadāya kṛṣṇāya paramātmane |
kośaṃ sainyāni rāṣṭrāṇi dadyācchrīkeśavāya vai || 92 ||
[Analyze grammar]

yathāśraddhaṃ pradadyācca sakāmāyā'dhikāriṇe |
satpātrāya pradadyācca nārībhyo'pi daded bahu || 93 ||
[Analyze grammar]

bālābhyo vidhavābhyaśca sādhvībhyo jīvikāṃ dadet |
satībhyo yoginībhyaśca raṃkābhyo bhojanaṃ dadet || 94 ||
[Analyze grammar]

santarpayed yajñabhāgaistrilokasuramānavān |
kāśyapān prāṇinaḥ sarvāṃstoṣayedannavāribhiḥ || 95 ||
[Analyze grammar]

etatsarvaṃ pradadyādvā dadyādekaṃ ca vā nṛpaḥ |
vittaśāṭhyaṃ na cet kuryād dadyācca śraddhayā yadi || 96 ||
[Analyze grammar]

kāṃsyapātrapuṭadānaṃ suvarṇapuṭadānakam |
aṣṭāvaraṇasaṃyuktaṃ caturdaśadalāntaram || 97 ||
[Analyze grammar]

suvarṇaratnasaṃvyāptaṃ puṭaṃ dadyātpuṭāni ca |
tatphalaṃ sarvathā kṛṣṇanārāyaṇo yatheṣṭakam || 98 ||
[Analyze grammar]

dadāti māsyadhike vai śāśvataṃ bahutṛptidam |
sakāmaṃ cāpi niṣkāmaṃ dāsyāmi puruṣottamaḥ || 99 ||
[Analyze grammar]

kurvantu dānaṃ vitarantu lakṣmīṃ kṣipantu pātre bhagavatprabuddhyā |
śrīkṛṣṇanārāyaṇa eva dātā vairājakaṃ cāpi dadāmi rājyam || 100 ||
[Analyze grammar]

ityevaṃ dundubhirvakti māsi śrīpuruṣottame |
sahasrākṣaḥ śṛṇotyeva śrīdaṃ taṃ pratipattithau || 101 ||
[Analyze grammar]

prātareva tu rājā'sau kṛṣṇanārāyaṇaṃ prabhum |
śrutvā taṃ dundubhiṃ natvā'pūjayacchuddhimānnṛpaḥ || 102 ||
[Analyze grammar]

dundubhinā yathāproktaṃ rājñaḥ śraddhā ca yādṛśī |
tathā rājñā kṛtaṃ sarvaṃ pūjanaṃ savisarjanam || 103 ||
[Analyze grammar]

atha dānaṃ dadau prātaḥ patnīvratadvijanmane |
āhūya brahmaṇaḥ satye loke saṃsadi taṃ dvijam || 104 ||
[Analyze grammar]

brāhmamūrte dvijaśreṣṭha tvameva puruṣottamaḥ |
adhimāsādhidaivātman phaladātā'si mūrtimān || 105 ||
[Analyze grammar]

ahaṃ vai dundubhiṃ śrutvā karomyadya dine vratam |
vairājapadalabdhyarthaṃ dānaṃ gṛhāṇa sārthakam || 106 ||
[Analyze grammar]

caturdaśabhuvanānāṃ rājā'smi ca dadāmyaham |
svarṇadījalasākṣye'tra vedhasaḥ saṃsadi dvija || 107 ||
[Analyze grammar]

caturdaśabhuvanāni dadāmi phalalabdhaye |
dattāni ca gṛhītāni pratyuvāca dvijottamaḥ || 108 ||
[Analyze grammar]

tāvatpatnīvratarūpe bhagavān puruṣottamaḥ |
prāvirbabhūva sahasā koṭibhāskarakāntimān || 109 ||
[Analyze grammar]

prahasaṃstaṃ sahasrākṣaṃ provāca puruṣottamaḥ |
dānaṃ prāptaṃ mayā rājan dvijarūpeṇa sarvathā || 110 ||
[Analyze grammar]

mayā dattaṃ phalaṃ tasya te vairājapadaṃ dhruvam |
āyuṣo'nte tu labdhā'si vairājaṃ padamaiśvaram || 111 ||
[Analyze grammar]

iti kṛtvā prasādaṃ taṃ nṛpaṃ pradarśya vigraham |
tirobabhūva sahasā spṛśan mūrdhni nṛpasya saḥ || 112 ||
[Analyze grammar]

rājñā vrataṃ tathā pūjāṃ sarvaṃ vai śraddhayā kṛtam |
dadau brahmāṇḍadānaṃ sa yatra kiñcinna śiṣyate || 113 ||
[Analyze grammar]

svayaṃ dāso'bhavattasya kiṃkaro brāhmaṇasya vai |
varṣāntaḥ pūrṇatāṃ prāptaḥ sahasrākṣaḥ samādhinā || 114 ||
[Analyze grammar]

paśyati svakṛte cāgre vairājaṃ padamasti yat |
pūrvavairājavigame naikaṭye dṛśyate hi tat || 115 ||
[Analyze grammar]

ityevaṃ vartamānena rājñā tena mahātmanā |
kramayogād daivayogāt tyaktaṃ dehaṃ nṛpātmakam || 116 ||
[Analyze grammar]

sahasrākṣaśarīraṃ ca vihāyemaṃ tu golakam |
divyamārge yayau ceśasṛṣṭau yatrāsti tatsthalam || 117 ||
[Analyze grammar]

prāptavān sa sahasrākṣo vairājaṃ padamaiśvaram |
yo'dyāsti nābhikamalaḥ pitā vai vedhasaḥ prabhuḥ || 118 ||
[Analyze grammar]

so'yaṃ vairājasāmrājyaṃ prāptavān pratipadvratāt |
bhūmnā hairaṇyagarbheṇa tathā'nyairīśvarairapi || 119 ||
[Analyze grammar]

tatrābhiṣikto rājā saḥ yo'sau nārāyaṇo'bhavat |
yatkamale'bhavad brahmā yallalāṭācchivāpatiḥ || 120 ||
[Analyze grammar]

yasya vai hṛdayādviṣṇuryasyodare tvidaṃ jagat |
so'yaṃ vrataprabhāveṇa sahasrākṣo nṛpaḥ khalu || 121 ||
[Analyze grammar]

puruṣottamasadbhaktyā jāto nārāyaṇo virāṭ |
evaṃ tvadhikamāsasya madhyo'rdhvapratipaddine || 122 ||
[Analyze grammar]

vratapūjanadānena phalaṃ te kathitaṃ priye |
prasannaḥ śrīharistatra kiṃ na dadāti padmaje || 123 ||
[Analyze grammar]

asya śrāvayitā cāpi pāṭhakartāpi tādṛśam |
phalaṃ saṃlapsyate lakṣmi vadāmi puruṣottamaḥ || 124 ||
[Analyze grammar]

nāstikaścā'śraddadhāno mṛṣāvādī pradūṣakaḥ |
na prasādaṃ phalaṃ vāpi labhate mama nindakaḥ || 125 ||
[Analyze grammar]

itiśrīlakṣmīnārāyaṇīyasaṃhitāyāṃ prathame kṛtayugasantāne puruṣottamamāsamāhātmye prāksṛṣṭau sārvabhaumena sahasrākṣanāmakarājñā sahasreṣu yajñeṣu kṛteṣu tato'dhikamāsottarapakṣīyapratipadvratadānādinā prāptaṃ vairājanārāyaṇapadamityādinirūpaṇanāmā'ṣṭādhikatriśatatamo'dhyāyaḥ || 1308 ||
[Analyze grammar]