Chapter 307

śrīnārāyaṇa uvāca |
śṛṇu lakṣmi dharmapatnyā bhakteḥ putryo kathāṃ śubhām |
adhimāse madhyatithau jātāṃ vai pāvanottamām || 1 ||
[Analyze grammar]

ādau kṛte yuge bhaktermānasyau dve kumārike |
prāvirbhūte sute nāmnā preyasī śreyasī hyubhe || 2 ||
[Analyze grammar]

sevete pitarau nityaṃ yatra tau tatra te hyubhau |
pitarau te parityajya prāṇān dhartuṃ na śekatuḥ || 3 ||
[Analyze grammar]

pitṛsevāpare nityaṃ svakartavyaparāyaṇe |
prātaḥ snātvā ca te pitroḥ pādayornematuḥ sadā || 4 ||
[Analyze grammar]

pitroḥ snānādividhyarthaṃ dadatuśca jalādikam |
snāpayitvā ca vastrāṇi dadaturdhāraṇāya te || 5 ||
[Analyze grammar]

candanā'kṣatasumanaḥ kuṃkumādyaiḥ pupūjatuḥ |
sumiṣṭamṛṣṭanaivedyaṃ phalaṃ tāmbūlakaṃ jalam || 6 ||
[Analyze grammar]

samarpya cakratuścobhe varṣmasaṃvāhanādikam |
mātāpitroryadiṣṭaṃ cakratuścānyadvihāya te || 7 ||
[Analyze grammar]

śayanāstaraṇādyaṃ ca pātrāṇāṃ maṃjanaṃ tathā |
gṛhasya mārjanaṃ vastrakṣālanaṃ tvannapācanam || 8 ||
[Analyze grammar]

jalasyā''haraṇaṃ kāmadhenūnāṃ dohanādikam |
annānāṃ śodhanaṃ pūjāpuṣpādyānayanaṃ tathā || 9 ||
[Analyze grammar]

kṛṣṇanārāyaṇamantrajapanaṃ devapūjanam |
pitṛsantarpaṇaṃ bhūtayajñaṃ cātithipūjanam || 10 ||
[Analyze grammar]

dānaṃ jñānaṃ cātmabodhaṃ vijñānaṃ brāhmamityapi |
evaṃ sarve gṛhakārye pitroḥ sevāṃ muhustathā || 11 ||
[Analyze grammar]

yathāpekṣaṃ tathā'nyacca cakratuśca divāniśam |
tenā''śīrvādapātre te babhūvaturbahupriye || 12 ||
[Analyze grammar]

yathā nāma tathā tatra guṇā vāsaṃ pracakrire |
yathābalaṃ yathāśakti sarvabhāvena sundarī || 13 ||
[Analyze grammar]

anādṛtyaiva dehaṃ svaṃ kaṣṭaṃ yatra divāniśam |
sarvasvabhogadānena sevayā preyasī sadā || 14 ||
[Analyze grammar]

atipriyā hyatipremapātraṃ pitrorbabhūva sā |
preyasī tena sā bhuktiriti khyātiṃ jagāma sā || 15 ||
[Analyze grammar]

pitroḥ śreyaḥ pareṣāṃ ca śreyaḥkartrī sadā'parā |
kanyakā''rtijanānāṃ ca vidhūyā''rtīn muhurmuhuḥ || 16 ||
[Analyze grammar]

sukhaṃ mokṣasamaṃ samyak karotīti sukarmabhiḥ |
śreyasī tena sā muktiriti khyātiṃ yayāvapi || 17 ||
[Analyze grammar]

preyasīśreyasīputryau dharmabhaktyoḥ kṛpākaṇāt |
bhuktirmuktiśceti divye nāmnī dadhyaturarthavat || 18 ||
[Analyze grammar]

yayoḥ pitā svayaṃ dharmo jananī bhaktiraiśvarī |
nidhānaṃ paramaṃ divyaṃ kimāścaryaṃ tayorguṇe || 19 ||
[Analyze grammar]

pitroḥ pavitrayoḥ sevā kaṃ na dhatte guṇottamam |
pitarau toṣitau yena toṣitastena mādhavaḥ || 20 ||
[Analyze grammar]

toṣitāśca surāḥ sarve toṣitaṃ sakalaṃ jagat |
athā'putravatoḥ pitrostoṣadā syāt sutā yadi || 21 ||
[Analyze grammar]

sā vai putrasamā proktā pitarau tāritau tayā |
yayā tvatra svakau vṛddhau pitarau toṣitau dhiyā || 22 ||
[Analyze grammar]

sāsti putranibhā putrī dāyabhāgādhikāriṇī |
dehe yadyapi kanyā sā hṛdaye suta ātmani || 23 ||
[Analyze grammar]

sutavat sā sadā rakṣyā tayā svarge tayordhruvam |
tayā dattaṃ jalaṃ cānnaṃ dānaṃ pitroḥ prayāti hi || 24 ||
[Analyze grammar]

yasya santi na vai putrāḥ putrī tasya kriyāścaret |
yaśaṃ dānaṃ japaṃ homaṃ svādhyāyaṃ pitṛtarpaṇam || 25 ||
[Analyze grammar]

sarvaṃ kuryād vidhiṃ putrī dhārayedupavītakam |
tiṣṭhecca brahmacarye sā yāvat pitroḥ prasevanam || 26 ||
[Analyze grammar]

jāte putre'thavā''datte paścāt pitrājñayā'pi sā |
brahmacaryaṃ prasamāpya vidhinā syād vivāhitā || 27 ||
[Analyze grammar]

brahmacaryasthitau jāte rājasvalyādyaśuddhike |
brahmacaryasya tapasaḥ prābalyena na dūṣaṇam || 28 ||
[Analyze grammar]

aśuddhiḥ pālanīyā syād yāvaddinacatuṣṭayam |
vārṣalyaṃ vānyadoṣo vā pāpaṃ vā nāsti tatkṛte || 29 ||
[Analyze grammar]

brahmacaryāgninā sarvaṃ daihyaṃ saṃyāti bhasmatām |
brahmacaryasamo dharmo na bhūto na bhaviṣyati || 30 ||
[Analyze grammar]

kanyāṃ vā lagnayuktāṃ vā hyadhavāṃ vā dhavānvitām |
ayogāṃ vā sayogāṃ vā pāvayed brahmacaryakam || 31 ||
[Analyze grammar]

brahmacarye brahmabhaktirbrahmavrataṃ ca yatra vai |
tatra brahmātiriktaṃ vai bhasmasād yāti vaiśasam || 32 ||
[Analyze grammar]

bījaghnatvaṃ rajoghnatvaṃ ṛtughnatvādi dūṣaṇam |
brahmacarye bhūṣaṇaṃ tad bījādi mokṣakṛddhi tat || 33 ||
[Analyze grammar]

evaṃ te kanyake pitroḥ sevāṃ cakraturādarāt |
brahmacaryasthite nityaṃ dharmabhaktigṛhe śubhe || 34 ||
[Analyze grammar]

prātaste satyaloke vai svarṇadyāṃ snātumāgate |
tābhyāṃ tu dundubhiḥ kṛṣṇanārāyaṇasya saṃśrutaḥ || 35 ||
[Analyze grammar]

dhāmnāṃ dhāmnyavatārāṇāmavatārī pumuttamaḥ |
atrādhike mahāmāse dadāmi puruṣottamaḥ || 36 ||
[Analyze grammar]

madhyatithervratakartre'kṣaraṃ dhāma ca sampadaḥ |
matsānnidhyaṃ mama rūpaṃ madaiśvaryaṃ dadāmi ca || 37 ||
[Analyze grammar]

mama sāmyaṃ mama rājyaṃ mama lokaṃ dadāmi ca |
mama yogaṃ mama śaktiṃ divyatāṃ me dadāmi ca || 38 ||
[Analyze grammar]

madaṃkaṃ mama mūrtiṃ ca matsamakhyātimityapi |
matsamā pūjyatāṃ caiva śreṣṭhatāṃ ca dadāmi vai || 39 ||
[Analyze grammar]

madbhāvaṃ mama divyatvaṃ mama tejo dadāmi ca |
mama siṃhāsanaṃ divyaṃ madvad vyāpakatāṃ tathā || 40 ||
[Analyze grammar]

madātmakatvaṃ tādātmyaṃ madhyāvrate dadāmi ca |
ahaṃ pūrṇo'rdhamāse'tra vrataṃ puṣṭaphalapradam || 41 ||
[Analyze grammar]

śāśvataṃ satphalaṃ dāsye gṛhṇantu cārjayantu ca |
puruṣottamamāso'yaṃ mama māso'sti cottamaḥ || 42 ||
[Analyze grammar]

tadekadinajaṃ puṇyaṃ sarvebhyo'pyatiricyate |
aśāśvatāni cānyāni hyetatpuṇyaṃ tu śāśvatam || 43 ||
[Analyze grammar]

ahaṃ vai śāśvato devo māso'pi mama śāśvataḥ |
vrataṃ ca śāśvataṃ me'sti puṇyaṃ gṛhṇantu śāśvatam || 44 ||
[Analyze grammar]

mātā santoṣitā yena bhaktyā saṃtoṣitaḥ pitā |
mātāpitṛprasādena phalaṃ gṛhṇantu śāśvatam || 45 ||
[Analyze grammar]

yatheṣṭaṃ kalpayitvaiva kurvantu madhyamāvratam |
pūrayiṣyāmi saṃkalpān yogyān yogyetarānapi || 46 ||
[Analyze grammar]

dundubhiḥ śrāvayitvaivaṃ kṣaṇaṃ maunaṃ dadhāra ca |
kanyādattaṃ patrapuṣpaphalaṃ tvādāya niryayau || 47 ||
[Analyze grammar]

kanyake kṛtasaṃkalpe madhyātithervratāya vai |
gatvā gṛhaṃ ca vidhivat pūjayāmāsatuḥ prabhum || 48 ||
[Analyze grammar]

sauvarṇī pratimāṃ kṛṣṇanārāyaṇasya śobhanām |
kārayitvā''vāhanaṃ cakratuḥ ṣoḍaśavastubhiḥ || 49 ||
[Analyze grammar]

krameṇa pūjanaṃ yogyaṃ prathamaṃ payaādinā |
pañcāmṛtena saṃsnāpya kārayāmāsatustataḥ || 50 ||
[Analyze grammar]

tīrthodakena saṃsnānaṃ mārjayāmāsatustataḥ |
vastreṇā'ṅgaṃ ca dhautrādi dhārayāmāsatustataḥ || 51 ||
[Analyze grammar]

bhūṣayāmāsaturābhūṣaṇaiścandanakajjalaiḥ |
śṛṃgārayāmāsatuśca puṣpahārādibhistataḥ || 52 ||
[Analyze grammar]

śobhayāmāsatuḥ kṛṣṇanārāyaṇaṃ dravottamaiḥ |
nugandhayāmāsatuśca gandhasārādibhiśca te || 53 ||
[Analyze grammar]

kuṃkumā'kṣatatulasīpatrādi śekharādikam |
arpayāmāsatustasmai puruṣottamarūpiṇe || 54 ||
[Analyze grammar]

dhūpaṃ dīpaṃ sunaivedyaṃ miṣṭānnaṃ pāyasādikam |
nivedayāmāsatuśca phalaṃ tāmbūlacūrṇakam || 55 ||
[Analyze grammar]

pradakṣiṇāṃ daṇḍavacca namaskāraṃ kṣamāpanam |
ārārtrikaṃ stutiṃ puṣpāñjaliṃ dadaturādarāt || 56 ||
[Analyze grammar]

arghyaṃ datvā ca saṃkalpaṃ puruṣottamalabdhikam |
vijñāpayāmāsatuśca hṛdā prārthanayā muhuḥ || 57 ||
[Analyze grammar]

kumārītvaṃ sadākālaṃ yogyaṃ vai brahmadhāmani |
muktatvaṃ tatra yogyaṃ vai divyāvasthādiśobhitam || 58 ||
[Analyze grammar]

brahmacaryaṃ brahmarūpaṃ brahmaiva parameśvaraḥ |
āvayoḥ rakṣakaścā'stu kṛṣṇanārāyāṇo hariḥ || 59 ||
[Analyze grammar]

rakṣakaḥ prerako dhātā vidhātā dhārako hi saḥ |
poṣakaḥ sahajo nāthaḥ sarveśvareśvareśvaraḥ || 60 ||
[Analyze grammar]

akṣarādhipatiḥ kṛṣṇo brahmeśaḥ puruṣottamaḥ |
nāthaḥ pātā taṃ vinā'nyaḥ kaścitpātā'sti nā''vayoḥ || 61 ||
[Analyze grammar]

kṛpānātha kriyānātha yatnanātha phalaprada |
varṣmanāthā''tmanornātha sarvanāthā'kṣaraṃ naya || 62 ||
[Analyze grammar]

tava svo dāsike kṛṣṇanārāyaṇa hṛdisthita |
antaryāmin vratapuṇyapradātarhṛdayaṃgama || 63 ||
[Analyze grammar]

hṛnnivāsa hṛdayajña bhāvajña pūrayā''ntaram |
karau saṃgṛhya nau kṛṣṇa śīghraṃ nayā'kṣaraṃ prabho || 64 ||
[Analyze grammar]

iti stutvā dadatuste svakṣatān mūrtaye yadā |
tāvattatra dayāluḥ sa āvirbabhūva sundaraḥ || 65 ||
[Analyze grammar]

kiśoro divyarūpaśca kṛṣṇanārāyaṇo hariḥ |
gajapṛṣṭhe sthito divyarūpānuvayavaḥ pumān || 66 ||
[Analyze grammar]

yatkeśānāṃ prāntabhāgāḥ koṭividyutsamojjvalāḥ |
āmūlāt snigdhakṛṣṇābhā mañjulāśca taraṃgitāḥ || 67 ||
[Analyze grammar]

camatkṛtiṃbharā bhaṃgīśobhitāstasya mūrdhajāḥ |
paścāttu karṇayormadhye prānte'pyākarṣakāḥ śubhāḥ || 68 ||
[Analyze grammar]

lalāṭaphalakaṃ cordhvarekhācandravirājitam |
bhrūdhanuḥkoṭikāmānāṃ śubhaṃ garvāpahārakam || 69 ||
[Analyze grammar]

bhāle'vicchinnasadrekha brahmamārgaprasūcikā |
karṇayornikaṣā gatvā lokadvayavibodhikā || 70 ||
[Analyze grammar]

śaṣkulīdvayaśobhāḍhyau karṇau mohakarāvubhau |
suraktapuṇḍarīkābhe netre dve sudalāyate || 71 ||
[Analyze grammar]

vidyutsamātisūkṣmābhā rekhāḥ santi manoharāḥ |
ākarṇāntaṃ sakoṇaṃ ca bhāvagarbhaṃ ca kāminam || 72 ||
[Analyze grammar]

ehyāgaccheti hṛdayasthitasya vyañjakaṃ hi tat |
surakta pronnataṃ hāsyabodhakaṃ netragaṇḍakam || 73 ||
[Analyze grammar]

tasyāsīnnāsikā ramyā tilapuṣpasamākṛtiḥ |
oṣṭhau pakvasuraktāḍhya bimbatulyau babhūvatuḥ || 74 ||
[Analyze grammar]

sūkṣma ramyā nātigamyā śmaśrurekhā sma rājate |
kambukaṇṭhaḥ puṣṭavakṣāḥ skandhau puṣṭau tathā hareḥ || 75 ||
[Analyze grammar]

bhujaṃgabhogavaddhastau nakhacandrāvaliśrayau |
dhvajadhanurmahāmīnabāṇasvastikarājitau || 76 ||
[Analyze grammar]

śūlacakrābdhijarekhānvitau karāñjalī hareḥ |
romarājimayau śubhraraktaraṃgau karāvubhau || 77 ||
[Analyze grammar]

śrīvatsakaustubhalakṣmīrekhāhāramuraḥsthalam |
udaraṃ trivalīśobhaṃ nābhau brahmāsanaṃ śubham || 78 ||
[Analyze grammar]

kaṭiḥ kṛśā tathā guptaṃ saccidānandapūritam |
hastikaropame ramye sakthinī romarājite || 79 ||
[Analyze grammar]

jānū ca vartulau tasya jaṅghe puṣṭottare kṛśe |
gulphatrayaṃ pratipādaṃ madhyonnataṃ prakāśakṛt || 80 ||
[Analyze grammar]

ṣoḍaśāṃkasurekhābhī rājannakhamaṇiprabham |
sarvaṃ dvyaṣṭasamaṃ puṣṭaṃ tejaḥpūritavigraham || 81 ||
[Analyze grammar]

surūpaṃ śrīkṛṣṇanārāyaṇasya paramādbhutam |
apaśyatāṃ ca te kanye preyasīśreyasī hyubhe || 82 ||
[Analyze grammar]

jaharṣatuśca vai tatra prāpya śrīpuruṣottamam |
puṣpamāle dhārayāmāsatuḥ kaṇṭhe harerubhe || 83 ||
[Analyze grammar]

ubhe ca sannidhau tasya sthite bhāvā''rdratāṃ gate |
hariste prāha bhaktyā me vratenā'tha ca bhāvataḥ || 84 ||
[Analyze grammar]

vāṃ nayāmi mama dhāmā'kṣaraṃ sukhasupūritam |
mayi tādātmyabhāvena vāṃ nayāmi ca varṣmaṇī || 85 ||
[Analyze grammar]

ityuktvā bhagavāṃstatra tirobabhūva tatkṣaṇam |
te hyubhe cāti saṃvigne hyabhūtāṃ tadviyogataḥ || 86 ||
[Analyze grammar]

madhyāhne tādṛśīṃ pūjāṃ sāyaṃ cāpi tathā niśi |
cakraturvidhinā kṛṣṇanārāyaṇasya jāgaram || 87 ||
[Analyze grammar]

nartanaṃ gāyanaṃ divyaṃ cakraturmadhyarātrike |
tāvatpunaḥ samāyāto drutaṃ rātrau mahāprabhuḥ || 88 ||
[Analyze grammar]

svajyotsnāvyāptadhavalaḥ sarveṣāṃ śreyasāṃkaraḥ |
yathā prāptastathā rātrau rājate sma hariḥ svayam || 89 ||
[Analyze grammar]

gṛhe tatrotsave prāptaṃ jñātvā śrīpuruṣottamam |
dharmo bhaktiśca taṃ natvā jñātvā śrīharimāgatam || 90 ||
[Analyze grammar]

putrīdvayaṃ svakaṃ dhāma netumājñāṃ pracakratuḥ |
preyasī śreyasī prāpya hariṃ śrīpuruṣottamam || 91 ||
[Analyze grammar]

kṛtakṛtye'tisampanne'kṣare dhāmni virājite |
bhuktirmuktiśca te khyāte divye dhāmani tatra vai || 92 ||
[Analyze grammar]

dharmabhaktyośca sevārthaṃ kṛṣṇanārāyaṇena ca |
dvedhā rūpe ca te kṛtvā'rpite pitrorgṛhe'pi ca || 93 ||
[Analyze grammar]

yatra dharmaśca bhaktiśca tatra bhuktiśca muktikā |
loke'pi dve ca vartaṃte vartete cāpi dhāmani || 94 ||
[Analyze grammar]

te'śnuvāte sarvakāmān brahmaṇā saha śāśvatān |
evaṃ te prāptavatyau vai dhāma śrīparamātmanaḥ || 95 ||
[Analyze grammar]

yaścātra dharmavān bhaktimāṃśca syātparameśvare |
bhuktiṃ muktiṃ sa cāsādya modate brahmaṇā saha || 96 ||
[Analyze grammar]

preyasīṃ śreyasīṃ prāpya modate'kṣaradhāmani |
śrotā vaktā'sya labhate pūrṇaṃ vrataphalaṃ priye || 97 ||
[Analyze grammar]

itiśrīlakṣmīnārāyaṇīyasaṃhitāyāṃ prathame kṛtayugasantāne puruṣottamamāsamāhātmye dharmabhaktyormānasīputryoḥ preyasīśreyasyoḥ pitṛsevā māsamadhyamāyāstithervratenā'kṣaradhāmni śrīpuruṣottamaprāptiḥ bhuktimuktiriti khyātiścetyādinirūpaṇanāmā saptādhikatriśatatamo'dhyāyaḥ || 1307 ||
[Analyze grammar]