Chapter 263

śrīlakṣmīruvāca |
kṛcchre kaṣṭamiti proktaṃ sukhaṃ tvayyarpitaṃ tu tat |
sukhadaṃ puṇyadaṃ kṛcchravrataṃ tatte prasaṃgataḥ || 1 ||
[Analyze grammar]

vrataṃ puṇyaṃ tathā peyaṃ bhakṣyaṃ sarvaṃ tvameva hi |
tvāṃ vinā niṣphalaṃ sarvaṃ yato nāsti dhruva hi tat || 2 ||
[Analyze grammar]

brūhi me bhagavan māse puruṣottamasaṃjñake |
ekādaśī kṛṣṇapakṣe kiṃnāmnī kiṃ phalaṃ vrate || 3 ||
[Analyze grammar]

ko vidhiḥ pūjanaṃ kīdṛk ko devaścātra pūjyate |
kiṃ dānaṃ ke ca niyamāḥ sarvaṃ brūhi suvistaram || 4 ||
[Analyze grammar]

kathaṃ snānaṃ ca kiṃ jāpyaṃ kiṃ bhojyaṃ tūttamaṃ matam |
kiṃ tyājyaṃ cātra māse'pi tanme brūhi janārdana || 5 ||
[Analyze grammar]

śrīnārāyaṇa uvāca |
ekādaśyadhike māsi kamalā nāma nāmataḥ |
puruṣottama ityuktaḥ pūjanīyaśca tatpatiḥ || 6 ||
[Analyze grammar]

lakṣmīyutaḥ suvarṇasya mūrtirūpo hariḥ prabhuḥ |
dhyeyau vaikuṇṭhatasthānau śrīlakṣmīpuruṣottamau || 7 ||
[Analyze grammar]

kamalāyā vratenātra kamalā'bhimukhī bhavet |
daśamyāmekabhuktaḥ syād rātrau bhūśayano bhavet || 8 ||
[Analyze grammar]

brahmacārī bhaveccaiva krodhādyaṃ tu parityajet |
brāhme muhūrte cotthāya saṃsmṛtya puruṣottamam || 9 ||
[Analyze grammar]

snātvā cāpi vidhānena niyamaṃ gṛhaṇīyād vratī |
puruṣottamamāse vā prātaśca pratipaddine || 10 ||
[Analyze grammar]

gṛhṇīyānniyamānpālyānpāvanān dehināṃ khalu |
nityaṃ nāmnāṃ sahasraṃ vā lakṣaṃ vā niyamo jape || 11 ||
[Analyze grammar]

gṛhe tvekaguṇaṃ jāpyaṃ nadyāṃ tu dviguṇaṃ smṛtam |
sahasraṃ gosthale vahniśālāyāṃ tattu lakṣakam || 12 ||
[Analyze grammar]

devakṣetreṣu tīrtheṣu sādhūnāṃ sannidhau tathā |
daśalakṣaguṇaṃ koṭiguṇaṃ tulasīsannidhau || 13 ||
[Analyze grammar]

viṣṇostu sannidhau jāpyamanantaṃ bhavati dhruvam |
mālikāvartanaṃ saṃsārā''vartadhvaṃsakaṃ smṛtam || 14 ||
[Analyze grammar]

cāturmāsye tu niyamā māsi te puruṣottame |
grāhyā aivobhayatrāpi bhuktimuktiphalapradāḥ || 15 ||
[Analyze grammar]

grāhyā māsasamāraṃbhe harermūrtestu sannidhau |
gūḍasya varjanaṃ kāryaṃ tathā tailasya varjanam || 16 ||
[Analyze grammar]

ghṛtasya varjanaṃ tailādestyāgaḥ kaṭuvarjanam |
sugandhatailasaṃtyāgaḥ puṣpabhogavivarjanam || 17 ||
[Analyze grammar]

kaṭvamblamadhurakṣāratiktakaṣāyavarjanam |
tāmbūlavarjanaṃ miṣṭaphalādeścāpi varjanam || 18 ||
[Analyze grammar]

pālāśapatre tvaśanaṃ pādābhyaṃgavivarjanam |
śiro'bhyaṃgaparityāgo dadhidugdhavivarjanam || 19 ||
[Analyze grammar]

kajjalādeḥ parityāgo dvirbhojanavivarjanam |
maunaṃ grāhma kathā kāryā grāmyavārtāvivarjanam || 20 ||
[Analyze grammar]

sthālīpākaparityāgaḥ śākamātravivarjanam |
annamātraparityāgaḥ phalānyatamavarjanam || 21 ||
[Analyze grammar]

śilopari prāśanaṃ ca kadalīpatrabhojanam |
puṣkarasnānakararṇa gṛhasnānavivarjanam || 22 ||
[Analyze grammar]

guroḥ pādāmbujasparśo viṣṇoḥ pādābhivandam |
ekabhaktāśanaṃ naktāśanaṃ niraśanaṃ ca vā || 23 ||
[Analyze grammar]

harergṛhe lepanaṃ mārjanaṃ prakṣālanādikam |
pradakṣiṇaṃ śatamaṣṭottaraśataṃ ca vā'dhikam || 24 ||
[Analyze grammar]

gītavāditrasannṛtyaṃ pañcagavyāśanaṃ ca vā |
śāstrakathāprabodhaśca vyāsākhyānaprabodhanam || 25 ||
[Analyze grammar]

tulasīdalapūjā ca prokṣaṇaṃ viṣṇumandire |
patreṣu bhojanaṃ caiva dvidalādivivarjanam || 26 ||
[Analyze grammar]

prasādamātragrahaṇaṃ tāmrapātrādyabhojanam |
kāṃsyapātrā'bhojanaṃ ca randhitānnā'prabhojanam || 27 ||
[Analyze grammar]

jalapakvakaṇamātrādanaṃ pakvakaṇādanam |
mṛttikāpātrabhojitvamañjalijalapānakam || 28 ||
[Analyze grammar]

karapātrā'danaṃ cāpi pṛthivyāmupaveśanam |
kapilāgopradānaṃ ca padmapatraprabhojanam || 29 ||
[Analyze grammar]

bhikṣānnaṃ tvamṛtakalpaṃ vrataṃ mokṣakaraṃ śubham |
svarṇadānaṃ rūpyadānaṃ vastradānaṃ gṛhārpaṇam || 30 ||
[Analyze grammar]

nityaṃ yathābalaṃ dānamannādīnāṃ supuṇyakṛt |
yathā viṣṇustathā sādhurdvāvetau puruṣottamau || 31 ||
[Analyze grammar]

teṣāṃ pūjā prakartavyā pratyahaṃ sevanaṃ tathā |
śūdro vā'pyatha śūdrī vā sevāṃ kuryād gurorhareḥ || 22 ||
[Analyze grammar]

gururvai viṣṇurūpo'sti gururdevatrayātmakaḥ |
dehena sevā kartavyā yathā tuṣṭo bhavedguruḥ || 33 ||
[Analyze grammar]

pāñcabhautikametaddhi tvanarthakamudāhṛtam |
sevayitvā guruṃ tena phalānantyamavāpnuyāt || 34 ||
[Analyze grammar]

dharmo'yaṃ durlabho loke dharmakāmārthamokṣadaḥ |
ayācitaṃ vrataṃ pālyaṃ drohahiṃsādivarjam || 35 ||
[Analyze grammar]

dānaṃ dayā dama iti kāryaṃ vai mahatāmapi |
gurave ye prayacchanti dehadaihikasampadaḥ || 36 ||
[Analyze grammar]

te nu dānaprabhāveṇa viṣṇorvallabhatāṃ gatāḥ |
madhu tyājyaṃ ghṛtaṃ tyājyaṃ tyājyaṃ dugdhādikaṃ tathā || 37 ||
[Analyze grammar]

dāḍimaṃ mātuliṃgaṃ ca nālikeraṃ ca varjayet |
vrīhityāgo yavatyāgo godhūmānāṃ vivarjanam || 38 ||
[Analyze grammar]

padaṃ ślokaṃ ṛcāṃ stotramadhyāyaṃ kīrtanaṃ tathā |
kāryaṃ geyaṃ hareragre viṣṇordhāmapradaṃ vratam || 39 ||
[Analyze grammar]

ratestyāgo maithunasya karmatyāgo vrataṃ mahat |
dadhiṃ dugdhaṃ tathā takraṃ gūḍaṃ śākaṃ ca varjayet || 40 ||
[Analyze grammar]

snānamāmalakaiḥ kāryaṃ tilaiḥ kartavyameva vā |
dhātrīphalaṃ sadā pāpaharaṃ vai pāvanāstilāḥ || 41 ||
[Analyze grammar]

sandhyāmaunaṃ vrataṃ rakṣyaṃ rātrāvagnyaprabodhanam |
maunabhojitvamevāpi vrataṃ śuddhikaraṃ śubham || 42 ||
[Analyze grammar]

upavāsasamaṃ jñeyaṃ phaladaṃ maunabhojanam |
mithyākrodhaśca paiśūnyaṃ rājasaṃ tāmasaṃ tathā || 43 ||
[Analyze grammar]

vartanaṃ sarvathā tyājyaṃ māsi vai puruṣottame |
puṇyakāryaṃ śubhaṃ kāryaṃ tyaktavyaṃ pāpakarma ca || 44 ||
[Analyze grammar]

dhyeyaḥ pūjyastoṣaṇīyaḥ smartavyaḥ puruṣottamaḥ |
kṛcchrāṇyapi prakāryāṇi māse vai puruṣottame || 45 ||
[Analyze grammar]

kamalāyā vratakartuḥ kamalā jāyate gṛhe |
kamalāyāstathā lakṣmyāḥ śrīpuruṣottamasya ca || 46 ||
[Analyze grammar]

ekādaśyāṃ prage dhyānaṃ kṛtvā snātvā vidhānataḥ |
naityakaṃ pūjanaṃ kuryāt sarvatobhadramaṇḍale || 47 ||
[Analyze grammar]

ghaṭān dvādaśasaṃkhyākān jalaratnadalānvitān |
akṣataphalavastrādyaiḥ saṃyutānpūjayettataḥ || 48 ||
[Analyze grammar]

madhye ghaṭaṃ suvarṇe vā tāmrajaṃ sthāpayed vratī |
suvāriphalaratnādyaiḥ sahitaṃ pūjayet tataḥ || 49 ||
[Analyze grammar]

ghaṇṭāṃ śaṃkhaṃ kalaśaṃ ca pūjayedvastubhistathā |
ghaṭopari tilasthālyāṃ vinyasya puruṣottamam || 50 ||
[Analyze grammar]

pūjayed vidhinā sarvavastubhirvratakārakaḥ |
āvāhanādikaṃ kuryāt pañcāmṛtavilepanam || 51 ||
[Analyze grammar]

tīrthajalena ca snānaṃ kārayed varṣma mārjayet |
vastrālaṃkārabhūṣādi candanādi samarpayet || 52 ||
[Analyze grammar]

kajjalā'gurukastūrīsugandhi tailamarpayet |
hāraśṛṃgāraśobhādi dhūpadīpādi cārpayet || 53 ||
[Analyze grammar]

naivedye vividhaṃ bhojyaṃ phalaṃ vāri ca cūrṇakam |
tāmbūlaṃ subhagaṃ datvā tato nīrājayetprabhum || 94 ||
[Analyze grammar]

śaṃkhodakaṃ bhrāmayecca daṇḍavacca pradakṣiṇam |
stutiṃ namaḥ kṣamāyāñcāṃ kṛtvā śayyādi kārayet || 55 ||
[Analyze grammar]

pādasaṃvāhanaṃ kuryāt tadānandaṃ vikāsayet |
dadyād dānāni bhūrīṇi madhyāhne'pi tathā''caret || 56 ||
[Analyze grammar]

bhojayedvividhānnāni pūjayeccātibhāvataḥ |
sāyamārārtrikaṃ kuryāt stutvā saṃbhojayettathā || 57 ||
[Analyze grammar]

rātrau tu jāgaraṃ kuryānnṛtyagītapuraḥsaram |
dvādaśyāṃ tu prage snātvā pūjayitvā hariṃ tathā || 58 ||
[Analyze grammar]

bhojayitvā guroḥ pūjāṃ kṛtvā'nyān bhojayed bahu |
tataḥ svaḥ pāraṇāṃ kuryād dadyād dānāni bhāvataḥ || 59 ||
[Analyze grammar]

evaṃ vrataṃ prakuryādvai bhuktimuktipradāyakam |
niyamānāṃ tathā kuryādudyāpanaṃ phalapradam || 60 ||
[Analyze grammar]

maṇḍapaṃ kārayedramyaṃ saptadhānyaistu maṇḍalam |
svastikān kārayeccāpi śayyādānāni dāpayet || 61 ||
[Analyze grammar]

śrīhariṃ ca ramāṃ tatra pūjayed vidhinā vratī |
gadinaṃ ca gavārcāṃ ca sādhubhyo bhojanaṃ tathā || 62 ||
[Analyze grammar]

dadyācca gurave'pekṣyaṃ vastrānnābhūṣaṇādikam |
ṣoḍaśavastubhirdevamahāpūjottaraṃ tataḥ || 66 ||
[Analyze grammar]

dānāni khalu dadyād vai vividhāni svayaṃ vratī |
udyāpane tu dānāni deyāni vratapūrtaye || 64 ||
[Analyze grammar]

udyāpane kṛte sarvaṃ sampūrṇaṃ bhavati dhruvam |
vrataṃ kṛtvā mahālakṣmi yadi nodyāpanaṃ caret || 65 ||
[Analyze grammar]

vratavaikalyamāsādya na samyak phalabhāgbhavet |
vrate yanniyamaḥ svena dhṛtastatpratirūpakam || 66 ||
[Analyze grammar]

udyāpane tvavaśyaṃ saṃdadyāddānaṃ vratī svayam |
tailatyāge ghṛtaṃ dadyād ghṛtatyāge payaḥ smṛtam || 67 ||
[Analyze grammar]

maune tilādayo deyāḥ sahiraṇyāstu śārṅgiṇe |
bhojane bhojanaṃ dadyād dadhyodanasamanvitam || 68 ||
[Analyze grammar]

annaṃ miṣṭaṃ suvarṇāḍhyaṃ dadyādvai bahubhāvataḥ |
pālāśapātrabhojī tu dadyānmiṣṭaṃ ghṛtādikam || 69 ||
[Analyze grammar]

naktabhojī pradadyādvai bhojanaṃ ṣaḍrasānvitam |
ayācite tvanaḍvāhaṃ sopaskaraṃ samarpayet || 70 ||
[Analyze grammar]

māṣatyāgī pradadyāttu savatsāṃ gāṃ sulakṣaṇām |
dhātrīsnāne vratī dadyāt suvarṇaṃ māṣamātrakam || 71 ||
[Analyze grammar]

phalānāṃ niyame dadyāt phalāni vividhāni vai |
dhānyānāṃ niyame dadyāt dhānyāni śāligodhūmān || 72 ||
[Analyze grammar]

dadyādbhūśayane śayyāṃ satūlāṃ gendukānvitām |
brahmacaryakṛte dadyād dampatyorbhojanāni vai || 73 ||
[Analyze grammar]

śākatyāge tu śākāni nairlāvaṇye rasādikam |
nityasnāne ca niḥsnehe dadyād ghṛtaṃ ca saktukān || 74 ||
[Analyze grammar]

nakhakeśavrate dadyādādarśaṃ vyajanādikam |
upānahoḥ parityāge dadyādupānahau mudā || 75 ||
[Analyze grammar]

dugdhādisaṃparityāge dadyādvai kapilāṃ tu gām |
dīpavrate pradadyādvai sauvarṇa dīpapātrakam || 76 ||
[Analyze grammar]

maithunānāṃ tu niyame raupyaṃ dadyād dhanādikam |
evaṃ yadyad vrataṃ sveṣṭaṃ kṛtaṃ ca niyamo dhṛtaḥ || 77 ||
[Analyze grammar]

tattad datvā niyamasya prapūrtiṃ parikalpayet |
godānaṃ śarkarādānaṃ gṛhadānaṃ dhanārpaṇam || 78 ||
[Analyze grammar]

bhūdānaṃ kanyakādānaṃ brahmasūtrapradānakam |
vidyādānaṃ mokṣadānaṃ svasarvārpaṇamityapi || 79 ||
[Analyze grammar]

svargadaṃ mokṣadaṃ cāpi bhavatyeva na saṃśayaḥ |
kiṃ bahunā'tra coktena yadyadiṣṭatamaṃ bhavet || 80 ||
[Analyze grammar]

punaḥ prāptyarthamevā'sya dānaṃ kuryādasaṃśayaḥ |
svasya svīyasya sarvasya haraye dānamuttamam || 81 ||
[Analyze grammar]

gurave mokṣadātre vā dadyāt sarvasvameva vai |
adhruveṇa dhruvaṃ mokṣaṃ sādhayet kuśalo janaḥ || 82 ||
[Analyze grammar]

kamalāyā vratakarturgṛhe tu kamalā''gamaḥ |
śṛṇu lakṣmi kathayāmi prāgvṛttaṃ tu kathānakam || 83 ||
[Analyze grammar]

haridvāre'bhavat kaścit śākaṭāyanabhūsuraḥ |
svalpaṃ vai śakaṭaṃ tasya gṛhamāsanamāśrayam || 84 ||
[Analyze grammar]

bhikṣāhārastṛṇatūlaḥ kaṭagenduka eva saḥ |
vartate devagaṃgāyā nikaṭe karapātrakaḥ || 85 ||
[Analyze grammar]

ekadā sa gato bhikṣāyācanāya digantare |
vṛṣṭyā''kasmikayā tasya hṛtaṃ vai śakaṭaṃ priye || 86 ||
[Analyze grammar]

asvo dṛṣṭvā hṛtaṃ svasya śakaṭaṃ sa yayau tataḥ |
padbhyāṃ prayāgarājākhyaṃ tīrthaṃ tīrthāya caikalaḥ || 87 ||
[Analyze grammar]

kṣutkṣāmo dīnavadanastriveṇyāṃ snānamācarat |
munīnāmāśramāṃstatra gaveṣayan kṣudhārditaḥ || 88 ||
[Analyze grammar]

bhāradvājāśramaṃ tatra dadarśa divyamadbhutam |
puruṣottamamāse vai janānāṃ saṃsad tathā || 89 ||
[Analyze grammar]

tatrāśrame tu sulabhāṃ kathāṃ kalmaṣanāśinīm |
bhāradvājamukhād ramyāṃ śuśrāva kamalāmayīm || 90 ||
[Analyze grammar]

ekādaśyāḥ kathāṃ śrutvā bhuktimuktipradāyinīm |
lakṣmīnārāyaṇasaṃhitāyāṃ proktāṃ dhanapradām || 91 ||
[Analyze grammar]

śākaṭāyanavipro'sau śrutvā tāṃ kamalākathām |
vrataṃ taiḥ kṛtavān sārdhaṃ sthitvā munyāśrame tadā || 92 ||
[Analyze grammar]

rātraṃ jāgaraṇaṃ cakre kṛṣṇaṃ kṛṣṇaṃ smaran hṛdi |
brāhmemuhūrte dvādaśyāṃ lakṣmīstatra samāgatā || 93 ||
[Analyze grammar]

divyāṃgā divyatejaskā divyābharaṇabhūṣitā |
prāha varaṃ dadāmyatra prasannā'smi vratānmama || 94 ||
[Analyze grammar]

śākaṭāyanavipro'pi papracchāścaryasaṃbhṛtaḥ |
kā tvaṃ kasyāsi rambhoru prasannāpi kathaṃ mama || 95 ||
[Analyze grammar]

lakṣmīḥ prāha prasannā'haṃ jātā vrataprabhāvataḥ |
preritā devadevena vaikuṇṭhādahamāgatā || 96 ||
[Analyze grammar]

puruṣottamamāsasya kamalāyā vratāttu te |
kamalāṃ vipulāṃ lakṣmīṃ dātumatra samāgatā || 97 ||
[Analyze grammar]

mamavrataṃ tvayā cīrṇaṃ prayāge ṛṣiyogataḥ |
āśiṣo vratavaśagā dade tvāṃ dhanavān bhava || 98 ||
[Analyze grammar]

ravāvekādaśī yatra madhyādau dvādaśī tathā |
trayodaśī niśāśeṣe vratānāmuttamaṃ vratam || 99 ||
[Analyze grammar]

tatra kratuśanaṃ puṇyaṃ trayodaśyāṃ tu pāraṇe |
etadvrataṃ tvayā cīrṇaṃ prasannā'smi mahāmune || 100 ||
[Analyze grammar]

gṛhāṇemaṃ maṇiṃ divyaṃ yasmātsvarṇaṃ prapadyate |
ityuktvā kamalā tasmai maṇiṃ datvā tirodadhe || 101 ||
[Analyze grammar]

śākaṭāyanavipro'pi maṇiṃ nītvā gṛhaṃ gataḥ |
nityaṃ svarṇaśataṃ prātardadātyeṣo maṇirmahān || 102 ||
[Analyze grammar]

śākaṭāyanavipro'pi datte dānaṃ tvaharniśam |
evaṃ sa ṛṣivaryo'pi śākaṭāyanabhūsuraḥ || 103 ||
[Analyze grammar]

indrādapyadhikāṃ smṛddhiṃ labdhavān kamalāvratāt |
yācakāya pradātavyaṃ yadyad vāñchati madgṛhāt || 104 ||
[Analyze grammar]

evaṃ prakāśitaṃ śākaṭāyanena bhuvastale |
athaikadā pulastyo vai brāhmaṇo brahmaṇaḥ sutaḥ || 105 ||
[Analyze grammar]

śrutvaivaṃ dānakīrtiṃ ca maṇerbhikṣecchayā svayam |
śākaṭāyanabhavanaṃ tvājagāma vicārya ca || 106 ||
[Analyze grammar]

yayāce tanmaṇerbhikṣāṃ nispṛho'pi munirdadau |
pulastyo'pi maṇiṃ nītvā yayau dvīpaṃ tu siṃhalam || 107 ||
[Analyze grammar]

tatra svarṇamayaṃ sarvaṃ cakre puravanādikam |
tenā'rpitaḥ kuberāya dhanādhipataye maṇiḥ || 108 ||
[Analyze grammar]

rāvaṇastaṃ jahārā'tha svarṇalaṃkāṃ cakāra saḥ |
evaṃ vai kamalā devī vratena yadi tuṣyati || 109 ||
[Analyze grammar]

sarvaṃ dadāti bhaktāya vrataṃ yat toṣakārakam |
śṛṇuyādvā paṭhedvāpi kamalāyāḥ phalaṃ bhavet || 110 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne puruṣottamamāsasya kṛṣṇapakṣakamalaikādaśīmāhātmyaṃ niyamāḥ udyāpanam śākaṭāyanasya vratena maṇiprāptirlakṣmīprāptistato pulastyakuberarāvaṇa |
suvarṇalābhādiścetikathananāmā triṣaṣṭyadhikadviśatatamo'dhyāyaḥ || 263 ||
[Analyze grammar]