Chapter 196

śrīlakṣmīruvāca |
brahmaviṣṇvorantarāle brahmaṇaḥ kiraṇaṃ ca yat |
samutpannastataḥ śarvaḥ so'bhavadvai sadāśivaḥ || 1 ||
[Analyze grammar]

kiraṇaṃ tadbrahmaliṃgaṃ śrutaṃ tava mukhānmayā |
nirākāraṃ hi tadbrahma bāṇarūpaṃ nirūpyate || 2 ||
[Analyze grammar]

tadeva śivaliṃgaṃ vā cānyadvā lokapūjitam |
iti me saṃśayaṃ chindhi yathāvṛttāntabodhanāt || 3 ||
[Analyze grammar]

śrīnārāyaṇa uvāca |
śṛṇu lakṣmi kathāṃ divyāṃ sāścaryāṃ pāpanāśinam |
daivīṃ devacamatkāramayīṃ nā'nyasya bhāvinīm || 4 ||
[Analyze grammar]

yatastapaḥprakartāro bhavanti saṃyamairyutāḥ |
sastrīkā api munayo brahmadhyānaparāyaṇāḥ || 5 ||
[Analyze grammar]

tathāpi kāmabhāvena kvacidbandhajavegataḥ |
vyavahāraṃ samāśritya brahmatvamanavāpya ca || 6 ||
[Analyze grammar]

ajñatvena ca devānāmanabhijñā bhavanti te |
purā dāruvane hyāsan ṛṣayaḥ saṃśitavratāḥ || 7 ||
[Analyze grammar]

na ca krodhena nirmuktāḥ kevalaṃ mūḍhabuddhayaḥ |
yadyapi munayaḥ sarve kāṣṭhaloṣṭhāsamadṛśaḥ || 8 ||
[Analyze grammar]

vedaṃ tvadhīyamānāśca kṛtāgnisadanakriyāḥ |
vartante sma ca śārīrabhāvena gṛhamedhinaḥ || 9 ||
[Analyze grammar]

pārvatyāstapasaḥ kāle śivo'pi cā'dvitīyakaḥ |
sarvasvaparityāgenā'vartata tāpaso yathā || 10 ||
[Analyze grammar]

na carma na ca kaupīnaṃ nānyat kimapi sādhanam |
rakṣati smā''varaṇārthaṃ digambaro hyaṭatyapi || 11 ||
[Analyze grammar]

puṣpamālāṃ dadhan kaṇṭhe yuvā sarvāṃgasundaraḥ |
vane vane ṛṣyāśrame prā'ṭat bhikṣākapālabhṛt || 12 ||
[Analyze grammar]

dehi bhikṣāṃ tataścoktvā saṃbhramannāśramān yayau |
dvijarṣabhāśca divase samidhārthaṃ vanaṃ gatāḥ || 13 ||
[Analyze grammar]

āsannāśramavaryeṣu ṛṣipatnyaśca kevalāḥ |
taṃ vilokyā''śramagataṃ yoṣito brahmavādinām || 14 ||
[Analyze grammar]

vihvalā vismitā jātāḥ kāścidbhayamupāgatāḥ |
kāścicca mohitāstatrā''jagmurdarśanalālasāḥ || 15 ||
[Analyze grammar]

procuḥ parasparaṃ nāryaḥ paśyāma ehi bhikṣukam |
darśanādarcanāttasya bhuktirmuktiśca labhyate || 16 ||
[Analyze grammar]

parasparamiti proktvā''dāya mūlaphalādikam |
āliliṃgustathā cānyā karaṃ dhṛtvā tathā'parāḥ || 17 ||
[Analyze grammar]

parasparaṃ tu saṃsparśātsaṃmagnā ṛṣipatnikāḥ |
gṛhāṇa bhikṣāmūcustāstaṃ devaṃ muniyoṣitaḥ || 18 ||
[Analyze grammar]

sopi bhikṣākapālaṃ ca prasārya yoṣitaḥ prati |
dehi bhikṣāṃ śivaṃ te'stu dhanaputravatī bhava || 19 ||
[Analyze grammar]

bhikṣāṃ datvā tu tā nāryo jahasuścañcalā bahu |
papracchuśca tvayā ko'yaṃ nagnavratavidhirdhṛtaḥ || 20 ||
[Analyze grammar]

bhavān vai tāpaso hṛdyo brūhi sma yadi manyase |
śaṃkarastu hasan prāha rahasyaṃ vratamasti me || 21 ||
[Analyze grammar]

prakāśane phalaṃ na syāditi matvā na pṛcchata |
ityuktāstā brahmapatnyaḥ pratyūcurehi no gṛham || 22 ||
[Analyze grammar]

ityuccārya tadā taṃ vai jagṛhuḥ pāṇipallavaiḥ |
kāścit kaṇṭhe kāścitpṛṣṭhe kāścidudaramaṇḍale || 23 ||
[Analyze grammar]

kāścijānvośca kaṭyāṃ ca jaṭāsu pārśvayostathā |
kāścittu pādayoḥ kāścinnāsikāyāṃ ca karṇayoḥ || 24 ||
[Analyze grammar]

evaṃ samantato bhikṣukeśvaraṃ parivārya tāḥ |
raṃjayāmāsurākṛṣya svāṃ svāṃ prati dvijāṃganāḥ || 25 ||
[Analyze grammar]

etasminnantare viprā ādāya samidho yayuḥ |
svagṛhāṇi ca tatraitatkautukaṃ tairvilokitam || 26 ||
[Analyze grammar]

viruddhaṃ tacca te dṛṣṭvā saroṣā hyabhavan kṣaṇāt |
ko'yaṃ kīdṛk pramatto'yaṃ yoṣitāṃ kṣobhakārakaḥ || 27 ||
[Analyze grammar]

ko'si kasmādāgato'si vastraṃ na dhriyate katham |
pṛṣṭho'pi nā'vadat kiṃcit so'vadhūto digambaraḥ || 28 ||
[Analyze grammar]

pratyuta tadanāśrutya liṃge cāṃcalyamāvahan |
pramattayogivattatrā'darśayat kāmanābalam || 29 ||
[Analyze grammar]

kṣobhaṃ vilokya bhūdevā jñātvā pramattameva tam |
dṛṣṭvā vikāravalliṃgaṃ jaghnurdarbhaśalākayā || 30 ||
[Analyze grammar]

tāḍayāmāsuratyarthaṃ kāṣṭhapāṣāṇapattalaiḥ |
samantrayā tayā darbhaśalākayā tu mūlataḥ || 31 ||
[Analyze grammar]

liṃgaṃ bhuvi prapatitaṃ vihāya vṛṣaṇau hatam |
śalākayā hatasyā'sya khaṇḍāśca dvādaśā'bhavan || 32 ||
[Analyze grammar]

pātite tu tato liṃge gato'ntardhānamīśvaraḥ |
tadā śoko'bhavatteṣāmṛṣīṇāṃ bhāvitātmanām || 33 ||
[Analyze grammar]

vartante vyākulāḥ sarve vidmo vayaṃ na śaṃkaram |
ko'yaṃ yogī kathamāyāt kimarthaṃ tāpasaḥ svayam || 34 ||
[Analyze grammar]

bruvanta evaṃ te sarve'manyanta pāpakaṃ kṛtam |
liṃgakhaṇḍāstadā sarve samutpatanti cāmbare || 35 ||
[Analyze grammar]

yatra yatra ca yaḥ khaṇḍo yāti tatrāgnivat tadā |
dadāha purataḥ prāptaṃ punarutplutya gacchati || 36 ||
[Analyze grammar]

yatra yatra ca yo yāti tatra dahati sarvathā |
pātāle ca gatāḥ khaṇḍāḥ svarge cāpi tathāgatāḥ || 37 ||
[Analyze grammar]

bhūmau sarvatra te yātā uḍḍayante patanti ca |
dāhayantyakhilaṃ viśvaṃ sthirā naivā'bhavan kvacita || 38 ||
[Analyze grammar]

lokāśca vyākulā jātāḥ ṛṣayaste'tiduḥkhitāḥ |
na śarma lebhire ke'pi surā'surarṣimānavāḥ || 39 ||
[Analyze grammar]

śāntyupāyavihīnāste brahmāṇaṃ śaraṇaṃ yayuḥ |
tatra gatvā ca te sarve natvā stutvā vidhiṃ tadā || 40 ||
[Analyze grammar]

pralaye tu nimittāste lajjayā'dhomukhāḥ sthitāḥ |
tatsarvamavadanvṛttaṃ brahmaṇe sṛṣṭikāriṇe || 41 ||
[Analyze grammar]

jñātvā tacchāṃkaraṃ kṛtyaṃ brahmā vacanamabravīt |
aho viprāḥ sadā kruddhā jānantyeva na tāttvikam || 42 ||
[Analyze grammar]

na dharmaṃ ca kriyāṃ kāṃcijjānanti mūḍhabuddhayaḥ |
brahmatattvaṃ vijānanti brāhmaṇāste prakīrtitāḥ || 43 ||
[Analyze grammar]

brahmaṇi naiva kāmo'sti vikṛtirna kutaśca ruṭ |
dehadharmā na vai dehā'dhyakṣe santi yathārthataḥ || 44 ||
[Analyze grammar]

ātmadharmā na vai dehe iti jānanti bhūsurāḥ |
hyetajjñānavihīnā ye dehāhaṃmamatānvitāḥ || 45 ||
[Analyze grammar]

krudhyanti dehamāśritya ghātayanti parāṃstataḥ |
druhyantyapi ca pārakyasvīyabhedasamāśritāḥ || 46 ||
[Analyze grammar]

tataḥ karmavaśāste vai bhuṃjate svarganārakān |
tanmanaḥ śodhayeddhīmān jñānayogātmabhāvanaiḥ || 47 ||
[Analyze grammar]

tasmin śuddhe hyantarātmā svayamevā'vikāravān |
na kliśyati vapuḥkleśairvapurdharmaiḥ śubhā'śubhaiḥ || 48 ||
[Analyze grammar]

tathā sati ca nā''veśaḥ kāmakrodhādimūlakaḥ |
tadbhāve ca nā'narthaḥ samutpadyeta cedṛśaḥ || 49 ||
[Analyze grammar]

bhavantaḥ krodhakāmābhyāmabhibhūtā''śrame sthitāḥ |
jñānināmāśrame krodhakāmābhibhavanaṃ vṛthā || 50 ||
[Analyze grammar]

vastuto nāsti nārīṇāṃ deho nārīti nāmabhāk |
nāpi narasya deho'pi nara ityapi nāmabhāk || 51 ||
[Analyze grammar]

ubhayostu sadā śārīrā''tmāsti naraśabdabhāk |
nṛbhogyaśarīraṃ yat tannārīti saṃprakīrtyate || 52 ||
[Analyze grammar]

śmaśrulo'śmaśrulako vā deho nārīti vocyate |
dehasyaivopabhogo'sti nānyadehasya kasyacit || 53 ||
[Analyze grammar]

paradehasukhaduḥkhe na bhujyete parātmanā |
svīyadehasukhaduḥkhe bhujyete hi nijātmanā || 54 ||
[Analyze grammar]

tasmāt keyaṃ kasya nārī ko'yaṃ kasyā narastathā |
kva ca nyastasamastecchā kva ca nārīmayo bhramaḥ || 55 ||
[Analyze grammar]

kva krodha īdṛśo ghoro yenātmānaṃ na jānatha |
sakrodho yajate yacca dadāti ca japatyapi || 56 ||
[Analyze grammar]

juhotyapi na vai tasya phalamāpnoti moghakṛt |
jñātāracca bhavanto vai kurvate garhitaṃ dvijāḥ || 57 ||
[Analyze grammar]

ajñātārastarhi kuryuḥ kiṃ tatrāścaryamūhyate |
śivaṃ viruddhya kuśalaṃ kasya jātaṃ ca vā bhavet || 58 ||
[Analyze grammar]

madhyāhnasamaye prāptamatithiṃ na parāmṛśet |
tasyaiva sukṛtaṃ nītvā datvā svīyaṃ ca duṣkṛtam || 59 ||
[Analyze grammar]

niryātyatisthitadvāsāt kiṃ punaryatra śaṃkaraḥ |
yāvalliṃgaṃ sthiraṃ na syānna vai syājjagatāṃ śubham || 60 ||
[Analyze grammar]

bhavadbhistu tathā kāryaṃ yathā svāsthyaṃ bhavediha |
śrutvaitat ṛṣayaḥ prāhurbrahman tattvaṃ samādiśa || 61 ||
[Analyze grammar]

brahmovāca samārādhya haraṃ sukhamavāpnumaḥ |
gacchāmaḥ śaraṇaṃ devaṃ kailāsa tu śivālayam || 62 ||
[Analyze grammar]

jagmuśca saṃhatāstatra dadṛśuḥ śaṃkaraṃ sthitam |
aliṃgaṃ ca tataḥ stotuṃ samārabdhāḥ surāstadā || 63 ||
[Analyze grammar]

aliṃgāya mahājvālānalarūpāya te namaḥ |
digambarāyā'vikṛtaye parā''kṛtaye namaḥ || 64 ||
[Analyze grammar]

divyalīlāprarkatre te kṣamāśīlāya te namaḥ |
namaḥ śāntasvarūpāya ghoraliṃgāya te namaḥ || 65 ||
[Analyze grammar]

no'parādhān kṣamasvā'tra mahādeva namo'stu te |
svaliṃgaṃ patitaṃ deva prabho samupasaṃhara || 66 ||
[Analyze grammar]

trailokyaṃ dahati vahnimayaṃ dvādaśarūpabhāk |
kṛpāṃ kuru mahādeva tava līlāmayaṃ jagat || 67 ||
[Analyze grammar]

evaṃ stutaḥ prasannaśca prāharṣīn śaṃkarastadā |
yasya drohaḥ kṛtastasya pūjanaṃ kuruta dvijāḥ || 68 ||
[Analyze grammar]

tadā bhaviṣyati śāntirligaṃ sthāne lagiṣyati |
saliṃgo'haṃ tathā syāṃ vai yena me prītiruttamā || 69 ||
[Analyze grammar]

yathā'bhilaṣitaṃ saukhyaṃ tataḥ prāpsyatha bhūsurāḥ |
devā ṛṣayo munayo brāhmaṇā hyasurāstathā || 70 ||
[Analyze grammar]

militvā mama liṃgasya pūjāṃ kurvantu ṣoḍaśaiḥ |
upacāraistataḥ śāntā bhaviṣyantyeva dvādaśa || 71 ||
[Analyze grammar]

śakalā mama liṃgasya nānyathā tu kadācana |
kurukṣetre tathā'nyatra yatra yatra patanti te || 72 ||
[Analyze grammar]

tatra tatra yonipīṭhe sthāpayantu dvijā nu tān |
prathamaṃ kurukṣetre ca yūyaṃ gacchantu saṃhatāḥ || 73 ||
[Analyze grammar]

tatra sarasi saṃsnātvā kurutaikasya pūjanam |
tasya śāntau bhaviṣyanti tadanye śāntavahnayaḥ || 74 ||
[Analyze grammar]

liṃgakhaṇḍā yatra yatra patitāstatra pūjanam |
prakurvantu mahābhāgā gacchantu mā ciraṃ yataḥ || 75 ||
[Analyze grammar]

ārādhya prāgbhavīyāṃ me patnīṃ satīṃ sthirāyanām |
yonirūpāṃ prasaṃkṛtvā sthāpayantu ca tatra tat || 76 ||
[Analyze grammar]

kubhamekaṃ ca saṃsthāpya kṛtvā'ṣṭadalamuttamam |
durvāyavāṃ'kuraistīrthodakairāpūrayantu tam || 77 ||
[Analyze grammar]

vedamantraistatastaṃ ca kuṃbhaṃ pramantrayantu ca |
pūjayitvā kalaśaṃ taṃ tajjalenā'bhiṣecanam || 78 ||
[Analyze grammar]

śatarudrīyamantraiśca prokṣaṇaṃ śāntimityapi |
kurvantu yonirūpāyāṃ bāṇaṃ śāntiṃ gamiṣyati || 79 ||
[Analyze grammar]

saṃsthāpyaivaṃ liṃgakhaṇḍaṃ liṅgā'gre cā''hvayantu mām |
sugandhaiścandanaiścaiva puṣpadhūpādibhistathā || 80 ||
[Analyze grammar]

naivedyādikapūjābhistoṣayantu pareśvaram |
praṇāmaiḥ saṃstavairnṛtyairgītaiścāpi pradakṣiṇaiḥ || 81 ||
[Analyze grammar]

tataḥ svastyayanaṃ kṛtvā jayeti vyāharantu ca |
sarvaśāntiṃ kuru deva prasanno bhava sarvathā || 82 ||
[Analyze grammar]

śānto bhava mahādeva rakṣāṃ kuru ca naḥ sadā |
evaṃ kurvantu bho viprā gacchantu mā ciraṃ yataḥ || 83 ||
[Analyze grammar]

ityuktāste dvijadevādayo natvā maheśvaram |
prāptāḥ prasannamanasaḥ kurukṣetre sarastaṭam || 84 ||
[Analyze grammar]

tatra tvārādhitā devī satī saṃsmṛtya bhūsuraiḥ |
drāgeva sā śaṃkarārthaṃ divyā hyupasthitā hyabhūt || 85 ||
[Analyze grammar]

brāhmaṇairvanditā yonirūpā divyā'bhavattadā |
tatra tu brāhmaṇairmantrairliṃgāgraṃ sthāpitaṃ tathā || 86 ||
[Analyze grammar]

sarvaṃ raktādi saṃkṣālya mardanādyaiḥ samīkṛtam |
ṣoḍaśopacārakaistad vedamantraiḥ surādibhiḥ || 87 ||
[Analyze grammar]

liṅgāgraṃ pūjitaṃ tatra bhaktyā yathopavastubhiḥ |
suprasanno mahādevo hyāvirāsa ca mūrtimān || 88 ||
[Analyze grammar]

svarṇavarṇo'titejasvī kiraṇaiḥ pariveṣṭitaḥ |
prasannavadanaḥ śāntaḥ sarvānāha tato haraḥ || 89 ||
[Analyze grammar]

śāntaṃ ca brāhmaṇā yuṣmatkṛtaṃ drohākhyakarma tat |
śāntāśca sakalā yatra yatra santi ca te tathā || 90 ||
[Analyze grammar]

idaṃ tu pūjitaṃ satyā yonyāṃ saṃsthāpya yanmama |
liṃgāgraṃ tat hāṭakeśasaṃjñaṃ khyātiṃ gamiṣyati || 91 ||
[Analyze grammar]

vasatu tacca pātāle hāṭakeśvarasaṃjñayā |
atra ca sṛṣṭikṛd brahmā liṃgaṃ śailamayaṃ tadā || 92 ||
[Analyze grammar]

ādyaṃ liṃgaṃ samāsthāpya svayaṃ pūjitavāṃstataḥ |
tasya sthāṇvīśvaranāmnā brahmaṇā khyātirāsthitā || 93 ||
[Analyze grammar]

tataḥ kālāntare tadvai khyātiṃ nāgeśvarābhidhām |
dārukāvanamāśritya sameṣyatīti jānatha || 94 ||
[Analyze grammar]

atha devā yatra khaṇḍāḥ patitā hyabhavaṃstadā |
tatra gatvā pupūjustān yonipīṭhān vidhāya ca || 95 ||
[Analyze grammar]

tatra tatra ca te khaṇḍāḥ pūjāṃ saṃgṛhya bhaktitaḥ |
svayamahṛśyatāṃ yātā yojitāśca yathākramam || 96 ||
[Analyze grammar]

liṃgāgraṃ cāpi pātālātsamutthāya samāgatam |
taccāpi ca yathāsthānaṃ saṃyogaṃ labdhavattadā || 97 ||
[Analyze grammar]

evaṃ sampūrṇatāṃ yātaṃ liṃgaṃ sacetanaṃ tataḥ |
śivasya vṛṣaṇau prāpya yathāsthānamavasthitam || 98 ||
[Analyze grammar]

saṃyojitaṃ yathāvattat śivenā'dbhutakarmaṇā |
brahmā vā śaṃkaro vā'tha viṣṇurvā śaknuyāttathā || 99 ||
[Analyze grammar]

nā'nyasyaitaddhi sāmarthyaṃ māraṇe yojane gatau |
pūjanārthaṃ tu sarveṣāṃ camatkāraḥ kṛto hyayam || 100 ||
[Analyze grammar]

caitrasya kṛṣṇapakṣe vai liṃgapāto'bhavattadā |
tatra dine'rhaṇīyāni liṃgāni daśa ca dvayam || 101 ||
[Analyze grammar]

caitre māse trayodaśyāṃ divyanakṣatrayogataḥ |
śukrā'rkacandrasaṃyoge dine puṇyatame śubhe || 102 ||
[Analyze grammar]

pratiṣṭhitaṃ sthāṇuliṃgaṃ brahmaṇā lokadhāriṇā |
ṛṣibhirdevasaṃghaiśca pūjitaṃ śāśvatīḥ samāḥ || 103 ||
[Analyze grammar]

evaṃ dvādaśaliṃgāni jyotirliṃgāni tāni vai |
śaṃkarasya mahājyotirmayaliṃgāni santi hi || 104 ||
[Analyze grammar]

sacetanasvarūpāṇāṃ khaṇḍānāṃ yatra saṃsthitiḥ |
pūjanaṃ ca pratiṣṭhānaṃ kṛtaṃ sa eva śaṃkaraḥ || 105 ||
[Analyze grammar]

sākṣādastīti tānyeva mūrtimān śaṃkaraḥ svayam |
virājate mahadbrahma jyotīrūpaḥ sa sarvadā || 106 ||
[Analyze grammar]

jyotirliṃgāni tānyeva kathayāmi śṛṇu priye |
saurāṣṭre somanāthaṃ ca śrīśaile mallikārjunam || 107 ||
[Analyze grammar]

ujjayinyāṃ mahākālamoṃkāre cā'mareśvaram |
kedāraṃ himavatpṛṣṭhe ḍākinyāṃ bhīmaśaṃkaram || 108 ||
[Analyze grammar]

vārāṇasyāṃ ca viśveśaṃ tryambakaṃ gomatītaṭe |
vaidyanāthaṃ citābhūmau nāgeśaṃ dārukāvane || 109 ||
[Analyze grammar]

setubandhe ca rāmeśaṃ ghuśmeśaṃ ca śivālaye |
grāhyameṣāṃ tu naivedyaṃ bhojanīyaṃ prayatnataḥ || 110 ||
[Analyze grammar]

tatastattatsthale hrāse sthāpitāni punaḥ punaḥ |
bhaktairliṃgāni tānyatra kathayāmi śṛṇu priye || 111 ||
[Analyze grammar]

saurāṣṭre somanāthastu candraduḥkhakṣayaṃkaraḥ |
candrasaṃsthāpito devaḥ pratyakṣo līnatāṃ gataḥ || 112 ||
[Analyze grammar]

kṣayakuṣṭhādirogāṇāṃ nāśakaḥ pūjanāt priye |
śivāvatāraḥ someśo liṃgarūpeṇa saṃsthitaḥ || 113 ||
[Analyze grammar]

mallikārjunasaṃjñaścāvatāraḥ śaṃkarasya vai |
dvitīyaḥ śrīgirau prokto liṃgarūpeṇa saṃsthitaḥ || 114 ||
[Analyze grammar]

gaṇeśasya vivāhena kārtikeyastu roṣataḥ |
vrahmacārivratapratijñāṃ kṛtvā saṃyayau yadā || 115 ||
[Analyze grammar]

tatra putraviyogena saśokaḥ śaṃkaro yayau |
saṃsthito liṃgarūpeṇa dvitīyaḥ sa haraḥ svayam || 116 ||
[Analyze grammar]

ujjayinyāṃ nagaryāṃ tu mahākālābhidhāharaḥ |
vedaviprasya rakṣārthaṃ mūrtimān śaṃkaro yayau || 117 ||
[Analyze grammar]

vedadharmaviloptāraṃ dūṣaṇā''khyāsuraṃ tadā |
huṃkāreṇaiva tūrṇaṃ vai bhasmasāt kṛtavān haraḥ || 118 ||
[Analyze grammar]

mahākālābhidhaḥ so'yaṃ liṃgarūpeṇa saṃsthitaḥ |
devaiḥ samprārthitaḥ śaṃbhurjyotirliṃgasvarūpavāna || 119 ||
[Analyze grammar]

atha vindhyācaladhyāto mūrtimān śaṃkaraḥ svayam |
brahmaṇā sthāpitastatra jyotirliṃgacaturthakam || 120 ||
[Analyze grammar]

oṃkāreśvaramityākhyaṃ śaṃbhustatra vyavasthitaḥ |
kedāre parvate sākṣātsvayaṃ himagirau haraḥ || 121 ||
[Analyze grammar]

kedāreśvara ityākhyo naranārāyaṇecchayā |
tiṣṭhati pañcamo divyo mūrtimān bāṇarūpataḥ || 122 ||
[Analyze grammar]

atha ṣaṣṭhaḥ śivajyotirliṃgāvatāra uttamaḥ |
sudakṣiṇākhyaṃ rājānaṃ kāmarūpādhipaṃ haraḥ || 123 ||
[Analyze grammar]

saṃrarakṣā'suraṃ bhīmaṃ hatvā bhīmeśvaro hi saḥ |
jyotirliṃgasvarūpeṇa ḍākinyāṃ saṃsthitaḥ svayam || 124 ||
[Analyze grammar]

mandarādreḥ samāgatya svayaṃ kāśyāṃ tu yaḥ sthitaḥ |
jyotiḥsvarūpaḥ kāśīviśveśvaraḥ sa tu saptamaḥ || 125 ||
[Analyze grammar]

atha gautamasaṃstutyā prāvirbhūto haraḥ svayam |
godāvaryāstaṭe tryambakeśvarākhyastathā'ṣṭamaḥ || 126 ||
[Analyze grammar]

atha rāvaṇasaṃstutyā citābhūmau haraḥ svayam |
āvirbhūto vaidyanāyeśvaro jyotirvyavasthitaḥ || 127 ||
[Analyze grammar]

daśamo dārukasaṃjñaṃ rākṣasaṃ hatavān haraḥ |
rarakṣa bhaktaṃ vaiśyaṃ saḥ supriyākhyaṃ tataḥ svayam || 128 ||
[Analyze grammar]

santasthau sāmbikaḥ śaṃbhurjyotirliṃgasvarūpadhṛk |
athaikādaśasaṃkhyāko rāmādityapratiṣṭhitaḥ || 129 ||
[Analyze grammar]

rāmeśvarasvarūpaḥ sa jyotirliṃgātmakaḥ svayam |
śaṃbhurvirājate bhaktebhyo vijayavarapradaḥ || 130 ||
[Analyze grammar]

bhaktena ghuṣmanā saṃrādhito haraḥ svayaṃ yayau |
ghuṣmāputrasya rakṣārthaṃ sudehyena hatasya vai || 131 ||
[Analyze grammar]

tato ghūṣmeśvarajyotirliṃgarūpo virājate |
iti te kathitā lakṣmi haradvādaśamūrtayaḥ || 132 ||
[Analyze grammar]

tān dṛṣṭvā ca samabhyarcya dhyātvā śrutvā'pi mānavaḥ |
mucyate sarvapāpebhyo bhuktiṃ muktiṃ ca vindati || 133 ||
[Analyze grammar]

evaṃ nimittamālambya jyotirliṃgāni cā'bhavan |
atha kālāntare sthānahrāsācca yugabhedataḥ || 134 ||
[Analyze grammar]

anye'nye sthāpayiṣyanti prajīrṇoddhārakarmabhiḥ |
yugāntaraprabhedena kimanyacchrotumicchasi || 135 ||
[Analyze grammar]

itiśrīlakṣmīnārāyaṇīyasaṃhitāyāṃ prathame kṛtayugasantāne dāruvane bhikṣārthaṃ gatasya nagnasya śaṃkarasya darbhaśalākayā liṃgapatanaṃ dvādaśakhaṇḍāśca jyotirliṃgānītinirūpaṇanāmā ṣaṇṇavatyadhikaśatatamo'dhyāyaḥ || 196 ||
[Analyze grammar]