Chapter 197

śrīlakṣmīruvāca |
ācāryapūjanaṃ vyāsapūjanaṃ gurupūjanam |
brūhi me bhagavandeva nityapūjātmakaṃ tu yat || 1 ||
[Analyze grammar]

śrīnārāyaṇa uvāca |
pūjayedvidhivadbhaktyā''cāryaṃ vyāsaṃ guruṃ tathā |
pūjāpātraṃ sopacāraṃ nītvā gatvā guroḥ puraḥ || 2 ||
[Analyze grammar]

namaskuryātprathamaṃ vai śirasā pādayoḥ spṛśet |
jalena dakṣiṇapādāṃguṣṭhābhiṣecanaṃ tataḥ || 3 ||
[Analyze grammar]

sthālyāṃ kuryāt tatastatra sapuṣpakuṃkumā'kṣatām |
arpayeccandanaṃ caiva lepayet tatra bindunā || 4 ||
[Analyze grammar]

paścāt taccandanaṃ bhāle lepayedūrdhvarekhayā |
candrakaṃ kauṃkumaṃ madhye sākṣataṃ kalpayecchubham || 5 ||
[Analyze grammar]

mastake paṭṭakaṃ dadyāt bahumūlyaṃ samujjvalam |
svarṇatārāvaliprotaṃ raṃgāḍhyaṃ dīrghamuttamam || 6 ||
[Analyze grammar]

galapaṭṭaṃ tathā dadyādaurṇaṃ satkaṃcukaṃ tathā |
uttarīyaṃ svarṇatāraṃ dhautre dve ca tathā vidhe || 7 ||
[Analyze grammar]

kaṭivastraṃ snānavastraṃ tathā prāvaraṇaṃ navam |
dadyācca gendukaṃ ramyaṃ mṛdu vai guptadorakam || 8 ||
[Analyze grammar]

mañcaṃ dadyācca kaśipuṃ vastrakhaṇḍāṃśca naktakam |
pattrāṇe komale dadyādyajñopavītamityapi || 9 ||
[Analyze grammar]

skandhapaṭṭaṃ tathā dadyādāsanaṃ śreṣṭhamityapi |
pārśvake dve ca kārpāse dadyāt tūlapaṭīṃ tathā || 10 ||
[Analyze grammar]

sthālikādvayamevaṃ ca vāṭikādvayamityapi |
ācamanīṃ homapātraṃ pūjāpātraṃ tribhāṇakam || 11 ||
[Analyze grammar]

vṛttapātraṃ tathā pānapātraṃ ca kalaśaṃ varam |
tāmbūlapātraṃ sacchatramupānahau sukomalau || 12 ||
[Analyze grammar]

pāduke yaṣṭikāṃ caiva kaṭibandhanamuttamam |
dadyādvividhadhātūnāṃ dravyāṇāṃ kāritāni vai || 13 ||
[Analyze grammar]

karṇayoḥ svarṇabhūṣāśca kaṇṭhabhūṣāstathā śubhāḥ |
hastabhūṣāḥ kaṭibhūṣāḥ pādabhūṣāśca sarvaśaḥ || 14 ||
[Analyze grammar]

śṛṃkhalāḥ kaṭakān mālāścormikāḥ kaṇṭhikā varāḥ |
raśanāṃ pauraṭīṃ dadyāt sugandhidravyamuttamam || 15 ||
[Analyze grammar]

kastūrīṃ karpūrakaṃ ca snehaṃ vividhasaurabham |
śrāṃgārikaṃ ca śārīraṃ dadyādvai bahubhāvataḥ || 16 ||
[Analyze grammar]

yānaṃ vimānaṃ gantrīṃ ca vāhanaṃ gāṃ ca dugdhadām |
dāsān dāsīṃstathā dravyaṃ svarṇaṃ rūpyaṃ viśeṣataḥ || 17 ||
[Analyze grammar]

dadyācca vividhaṃ svannaṃ dhānyaṃ ca dvidalādikam |
saṃskāravastu pātrādi jīrakādi tathāmlakam || 18 ||
[Analyze grammar]

aikṣavaṃ navanītaṃ ca ghṛtaṃ bhojyaṃ ca naikadhā |
dadyācchrīgurave sākṣānnārāyaṇāya yogine || 19 ||
[Analyze grammar]

brahmaṇe jñānadātre ca mantradātre kṛpālave |
yadyatsvasya bhavet hṛdyaṃ tattacchrīgurave'rpayet || 20 ||
[Analyze grammar]

evaṃ sarvaṃ vidhāyāṃ'kasamīpe ca tataḥ punaḥ |
vividhāni phalānyeva śuṣkāṇyārdrāṇi vā tathā || 21 ||
[Analyze grammar]

dadyācchrīgurave yo vai mokṣaṃ dānaṃ dadāti ca |
tataścaraṇayornatvā'bīraṃ gulālamityapi || 22 ||
[Analyze grammar]

dadyāchrītulasīpatraṃ puṣpāṇi vividhāni ca |
dugdhaprakṣālanaṃ kuryāccaraṇayoḥ pavitrayoḥ || 23 ||
[Analyze grammar]

snapanaṃ cāpi dugdhena guroḥ kuryādvidhānataḥ |
evaṃ pañcāmṛtaiḥ snapayitvā śuddhodakena ca || 24 ||
[Analyze grammar]

malanāśakadravyeṇa snapayitvā punaḥ punaḥ |
pariśramavināśārthaṃ gurvaṃgāni pramardayet || 25 ||
[Analyze grammar]

vastraiḥ sammārjayeddehaṃ sugandhaṃ tvarpayettataḥ |
vastrāṇyādhārayedbhūṣāḥ śṛṃgārāṇi ca dhārayet || 26 ||
[Analyze grammar]

candanā'kṣatamālābhiḥ kajjalairgandhamūrdhakaiḥ |
svarṇahāraiśca maṇibhirhīrakādibhirādarāt || 27 ||
[Analyze grammar]

pūjayeddhūpadīpaiśca naivedyairvividhaiḥ śubhaiḥ |
miṣṭairhṛdyaiḥ svādutamaiḥ pūjayedbhojayet sukham || 28 ||
[Analyze grammar]

jalaṃ sugandhaṃ pānārthaṃ dadyāttāmbūlamuttamam |
phalaṃ dadyāttathā saumyaṃ cārārtrikaṃ vidhāpayet || 29 ||
[Analyze grammar]

daṇḍavat sustutiṃ namaskārān kṣamāpanaṃ tataḥ |
pradakṣiṇaṃ prāṃjaliṃ ca puṣpāñjaliṃ samarpayet || 30 ||
[Analyze grammar]

āśīrvādān gurūktāṃśca gṛhītvā'ttvā prasādakam |
āpṛcchya ca gṛhaṃ gacchet saha nītvā prasādikam || 31 ||
[Analyze grammar]

svasambandhijanebhyaśca datvā prasādameva tam |
guruṃ dhyātvā sadā prātaḥ pūjayet kramaśastathā || 32 ||
[Analyze grammar]

gururbrahmā gururviṣṇurgururdevo maheśvaraḥ |
guruḥ sākṣātparabrahma mokṣadaḥ pāvako hi saḥ || 33 ||
[Analyze grammar]

nāsti gurusamaṃ dravyaṃ nāsti devo guroḥ paraḥ |
nāsti mokṣo guroranyo nāsti puṇyaṃ guroḥ param || 34 ||
[Analyze grammar]

gurordehe parabrahma sarvadā rājate hariḥ |
mūrdhani cā'kṣaraṃ brahma vāsudevo lalāṭake || 35 ||
[Analyze grammar]

netrayoḥ sūryacandrau ca nasyaśvinīkumārakaḥ |
mukhe nārāyaṇo yajño jihvāyāṃ vedamaṇḍalam || 36 ||
[Analyze grammar]

sarasvatī gurorvāṇyāṃ hṛdi viṣṇuḥ svayaṃ sthitaḥ |
udare bhagavānvaiśvānaro vasati sarvadā || 37 ||
[Analyze grammar]

haste padmaṃ ca kamalā mahālakṣmīstu mānase |
caraṇe vasavaḥ santi tīrthāni pāvanāni ca || 38 ||
[Analyze grammar]

sarvendriyeṣu tattvāni devatāḥ santi romasu |
gurormūrtiḥ puṇyamūrtirmantramūrtirmaheśvarī || 39 ||
[Analyze grammar]

svargaṃ satyaṃ ca vaikuṇṭhaṃ gurormūrtau vyasthitam |
brahmānando gurāvasti śāśvato nirupādhikaḥ || 40 ||
[Analyze grammar]

ānando brahmaṇo vidvān gurureva na cā'paraḥ |
gapadaṃ kiraṇe jñāne rapadṃ dravyadānayoḥ || 41 ||
[Analyze grammar]

jñānadānādguruḥ proktaḥ prakāśadravyavān svayam |
gapadaṃ mantravijñānaṃ rapadaṃ dāpanaṃ tathā || 42 ||
[Analyze grammar]

mantradāpanasāmarthyāśrayo gururhariḥ svayam |
gurave bhojanaṃ dattaṃ rājasūyaphalaṃ kriyāt || 43 ||
[Analyze grammar]

gurave vastradānādi jyotiṣṭomaphalapradam |
gurupūjā hareḥ pūjā gururyogaphalaṃ matam || 44 ||
[Analyze grammar]

gururvrataṃ gururyajñaḥ samādhirgurureva ca |
sampradāyo guruḥ proktaḥ sākṣātkāro gururmataḥ || 45 ||
[Analyze grammar]

guroḥ prasannatāyāṃ syuryamāśca niyamāḥ śamaḥ |
sādhanāni ca sarvāṇi gurau tuṣṭe kṛtāni vai || 46 ||
[Analyze grammar]

janmadau pitarau proktau gurū nāmakaro guruḥ |
bhāṣāyāḥ śikṣikā mātā kāryādiśikṣikā svasā || 47 ||
[Analyze grammar]

yajñopavītado vipraḥ śāstrādhyāpaka eva ca |
mantrado jñānadaścaiva mokṣado gururuttamaḥ || 48 ||
[Analyze grammar]

anādyajñānamagno'yamātmā bhramati yoniṣu |
tasyā'jñānaṃ vināśyaiva jñānadānena nityadā || 49 ||
[Analyze grammar]

vāsanānāṃ karmaṇāṃ ca kārayitvā kṣayaṃ tataḥ |
haryārādhanayā bhuktimārgaṃ darśayati dhruvam || 50 ||
[Analyze grammar]

mokṣasthitiṃ gamayati so'yaṃ sarvaprado guruḥ |
duḥkhahartā sukhadātā konyastasmātparo guruḥ || 51 ||
[Analyze grammar]

guroḥ śaktirjñānarūpā śiṣyātmani praviśya ca |
svā'parokṣānubhūtyā ca mokṣaṃ saṃprāpayed guruḥ || 52 ||
[Analyze grammar]

śaktijñānavaṃtī dīkṣā śiṣyadehaṃ praviśya ca |
muktatāṃ nayate dānāt kṣālanācca gurorbalāt || 53 ||
[Analyze grammar]

dīkṣāśikṣānusāreṇa śiṣyo'nugrahamarhati |
dīkṣāśikṣāviyoge tu na vidyāsiddhimuktayaḥ || 54 ||
[Analyze grammar]

ato dīkṣākhyasaṃskārāt śikṣākhyajñānasaṃgrahāt |
gurudvārā sadā śiṣyaḥ śuddhatāṃ prāpnuyāt kramāt || 55 ||
[Analyze grammar]

śiṣyastu śikṣaṇīyatvād gurorgauravakāraṇāt |
vyavahārācca śiṣṭānāṃ gurorgauravamācaret || 56 ||
[Analyze grammar]

yo guruḥ sa hariḥ prokto yo hariḥ sa guruḥ smṛtaḥ |
gururhariḥ svayaṃ kṛṣṇo vidyāśikṣātmakaḥ sthitaḥ || 57 ||
[Analyze grammar]

yathā kṛṣṇastathā vidyā yathā vidyā tathā guruḥ |
kṛṣṇavidyāgurūṇāṃ ca pūjayā sadṛśaṃ phalam || 58 ||
[Analyze grammar]

sarvadevātmakaścāsau sarvamantramayo guruḥ |
śiṣyaḥ sarvaprayatnena gurvājñāṃ śirasā vahet || 59 ||
[Analyze grammar]

śreyorthī yadi gurvājñāṃ manasāpi na laṃghayet |
gurvājñāpālakaḥ śiṣyo jñānasampattimaśnute || 60 ||
[Analyze grammar]

gacchaṃstiṣṭhansvapanbhuṃjan gurorvacanamācaret |
gurvājñayā'nyakarmāṇi kuryādātmanivedivat || 61 ||
[Analyze grammar]

samakṣaṃ karma kurvīta sarvaṃ cānujñayā guroḥ |
gurorgṛhe samakṣaṃ vā na yatheṣṭāsano bhavet || 62 ||
[Analyze grammar]

gururdevo yataḥ sākṣāttadgṛhaṃ devamandiram |
yatheha vahnisamparkānmalaṃ tyajati kāṃcanam || 63 ||
[Analyze grammar]

yathā vahnisamīpasthaṃ ghṛtaṃ pralīyate drutam |
yathā prajvalite vahnau śuṣkaṃ kāṣṭhaṃ pradahyati || 64 ||
[Analyze grammar]

tathaiva gurusamparkānmalaṃ tyajati mānavaḥ |
pāpaṃ vilīyate sarvaṃ vāsanā ca pradahyati || 65 ||
[Analyze grammar]

manasā karmaṇā vācā guroḥ krodhaṃ na kārayet |
tasya krodhena dahyanti hyāyuḥśrījñānasatkriyāḥ || 66 ||
[Analyze grammar]

tatkrodhakāriṇo ye syusteṣāṃ yajñāśca niṣphalāḥ |
yamāḥ saniyamāścāpi niṣphalāḥ saṃbhavanti hi || 67 ||
[Analyze grammar]

kadāpi na gurormarmabhedi viruddhamāvadet |
vaded yadi mahāgarvād yāti śiṣyo hyadhogatim || 68 ||
[Analyze grammar]

manasā karmaṇā vācā na mithyācāramācaret |
gurorhitaṃ priyaṃ kuryādādiṣṭo vā navā sadā || 69 ||
[Analyze grammar]

asamakṣaṃ samakṣaṃ vā guroḥ priyakaro bhavet |
svakāryaṃ paritastyaktvā guroḥ kāryaṃ samācaret || 70 ||
[Analyze grammar]

saṃvitsaṃjanana tattvaṃ paramānandamiśritam |
yenātra vidita loke sa evātra pramuktidaḥ || 71 ||
[Analyze grammar]

āśritaṃ tārayennaukā kiṃ śilā tārayecchilām |
brahmahīne kuto bodhaḥ kuto hyātmaparigrahaḥ || 72 ||
[Analyze grammar]

brahmatattvasameto'tra mukto mocayati prajāḥ |
yasyā'nubhavasantuṣṭā buddhirānandakāṣṭhikā || 73 ||
[Analyze grammar]

tasya darśanamātreṇa parānando'bhijāyate |
tasya sevanakāryeṇa naiṣkarmyaṃ siddhyati dhruvam || 74 ||
[Analyze grammar]

tasya śuśrūśayā sarvaṃ siddhaṃ bhavati dehinaḥ |
sa evānandapūrṇastu sevanīyo mumukṣubhiḥ || 75 ||
[Analyze grammar]

yasmād vidyā cātmavittirbrahmalabdhirna muktatā |
ānando'pi na cāpyeta na bhāvyaḥ sa gurusthitau || 76 ||
[Analyze grammar]

gurorbhrātṝṃstathā putrān bodhadān bhaktisaṃgrahān |
seveta bhāvato nityaṃ gurumārādhayetsadā || 77 ||
[Analyze grammar]

sarvā'bhayapradātāraṃ karuṇā''krāntamānasam |
toṣayed bahudhā bhaktyā sarvasvā'rpaṇapūjayā || 78 ||
[Analyze grammar]

tāvadārādhayecchiṣyaḥ prasanno'sau bhavedyathā |
gurau prasanne śiṣyasya sadyaḥ pāpakṣayo bhavet || 79 ||
[Analyze grammar]

tasmāddhanāni ratnāni kṣetrāṇi ca gṛhāṇi ca |
bhūṣaṇāni ca vāsāṃsi yānaśayyāsanāni ca || 80 ||
[Analyze grammar]

etāni gurave dadyādbhaktyā vittānusārataḥ |
vittaśāṭhyaṃ na kurvīta yadīcchecchreyamātmanaḥ || 81 ||
[Analyze grammar]

sa eva janako mātā bhartā bandhurdhanaṃ sukham |
sakhā mitraṃ ca yat tasmātsarvaṃ tasmai nivedayet || 82 ||
[Analyze grammar]

ākrūṣṭāstāḍitā vāpi ye viṣādaṃ na yāntyapi |
ahiṃsakā dayāvanto mokṣodyatasucetasaḥ || 83 ||
[Analyze grammar]

amānino buddhimantastyaktaspardhāḥ priyaṃvadāḥ |
ṛjavo mṛdavaḥ svacchā vinītāḥ sthiracetasaḥ || 84 ||
[Analyze grammar]

etādṛśā nityasattvamayā nārīnarāḥ śubhāḥ |
śrayeyuḥ sadguruṃ śiṣyāḥ kanyakāśca kumārakāḥ || 85 ||
[Analyze grammar]

śiṣyāḥ pariśritāḥ sevāṃ guroḥ kurvanti naiva ye |
asvātantryakṛto doṣo nāsti teṣāṃ parārthataḥ || 86 ||
[Analyze grammar]

bahunā'tra kimuktena yopi kopi guruśritaḥ |
brahmamārgagato bhāvī muktibhāṅnātra saṃśayaḥ || 87 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne saptanavatyadhikaśatatamo'dhyāyaḥ || 197 ||
[Analyze grammar]