Chapter 63

śrīnārāyaṇa uvāca |
yamasyaitadvacaḥ śrutvā bhagavān lokabhāskaraḥ |
hārdaṃ gambhīramevaitajjñātvā provāca vai yamam || 1 ||
[Analyze grammar]

asaṃśayaṃ mahatputra bhaviṣyatyatra kāraṇam |
yena tvāmāviśatkrodho mātaraṃ prati tattathā || 2 ||
[Analyze grammar]

putraṃ pratyapi mātuśca krodhaḥ samāviśannanu |
putra tvamasi dharmajñaḥ satyavādī ca mānadaḥ || 3 ||
[Analyze grammar]

na śakyametanmithyā tu kartuṃ māturvacastava |
kṛmayo māṃsamādāya yāsyanti tu mahīṃ tava || 4 ||
[Analyze grammar]

tataḥ pādaṃ mahāprājña punaḥ saṃprāpsyase sukham |
kṛtamevaṃ vacaḥ satyaṃ mātustava bhaviṣyati || 5 ||
[Analyze grammar]

śāpasya parihāreṇa tvaṃ ca trāto bhaviṣyasi |
ādityastvabravīcchāyāṃ kimarthaṃ tanayeṣu vai || 6 ||
[Analyze grammar]

nyūnādhiko nu tulyeṣu sneho vai kriyate tvayā |
kathamevaṃ dvitīyāṃ tu vinā syātpakṣapātitā || 7 ||
[Analyze grammar]

kā tvaṃ saiva dvitīyā vā vada yāthārthyameva me |
sā cāha tanayā tvaṣṭurahaṃ saṃjñā vibhāvaso || 8 ||
[Analyze grammar]

patnī tava tvayā'patyānyetāni janitāni me |
itthaṃ vivasvatastāṃ tu bahuśaḥ pṛcchato yadā || 9 ||
[Analyze grammar]

nā''cakṣe tu tadā kruddho ravistāṃ śaptumudyataḥ |
tataḥ sā kathayāmāsa yathāvṛttaṃ vivasvate || 10 ||
[Analyze grammar]

viditārthaśca bhagavān sūryaḥ śaśāpa tāṃ tadā |
sarvadā tvaṃ kṛṣṇavarṇā chāyā vṛkṣādijā bhava || 11 ||
[Analyze grammar]

andhakārasvarūpā tvaṃ madviyogavatī sadā |
rodhakavastvāvaraṇā jaḍarūpā sadā bhava || 12 ||
[Analyze grammar]

gaccha gehātsadā dūraṃ mā māṃ darśaya te mukham |
madraśmirodhakavastvadhastāttvaṃ tu sadā vasa || 13 ||
[Analyze grammar]

nirvivāsyeti vai chāyāṃ jagāma tvaṣṭurālayam |
tatra saṃpūjayāmāsa tvaṣṭā sūryamupāgatam || 14 ||
[Analyze grammar]

bhāsvan  kiṃ rahitaḥ śaktyā mama gehamupāgataḥ |
papracchā'tha ca tasmai sa kathayāmāsa tattvataḥ || 15 ||
[Analyze grammar]

prāha tvaṣṭā''gatā sā'tra bhavataḥ preṣitā rave |
mama gṛhātpunaryātā tava gehaṃ divākara || 16 ||
[Analyze grammar]

divākaraḥ samādhau tām vaḍavārūpadhāriṇīm |
tapaścarantīmācaṣṭe cottareṣu kuruṣvatha || 17 ||
[Analyze grammar]

tāṃ śaptukāmo bhagavānnāśāya kupito raviḥ |
tvaṣṭā tu taṃ yathānyāyaṃ sāntvayāmāsa vai śanaiḥ || 18 ||
[Analyze grammar]

deva te sā'sahamānā tejasā hyatipīḍitā |
vahnyābhanijarūpasya chāyārūpaṃ vimucya ca || 19 ||
[Analyze grammar]

ghorāraṇye tu sā gatvā tapaścarati duścaram |
ghṛṣṇyauṣṇyād dagdhadehā sā tapaścarati duḥsaham || 20 ||
[Analyze grammar]

yena tvāṃ tejasā'sahyaṃ śarīreṇā'pyasaṃskṛtam |
bahuśṛṃgoccadhāraṃ ca khararūkṣocanīcinam || 21 ||
[Analyze grammar]

vajrādapi sukaṭhinaṃ draṣṭuṃ soḍhuṃ śaśāka na |
tavedamativairūpyaṃ naiva bhāti na śobhate || 22 ||
[Analyze grammar]

asahā tasya sā saṃjñā vane carati śādvale |
tasmādrūpaṃ vraja mandaṃ tādṛṅnirvartaye tvaham || 23 ||
[Analyze grammar]

rūpaṃ vivasvatastvāsīdavyavasthaṃ kharā'ghaṭam |
ekataḥ prajvālayati cā'nyato'nuṣṇaśītalam || 24 ||
[Analyze grammar]

vivasvānatha tacchrutvā vrīḍito'bhūnmuhustadā |
anujñātastatastvaṣṭā rūpasamīkarāya vai || 25 ||
[Analyze grammar]

bhramimāropya sūryaṃ tu śātayāmāsa śāṇataḥ |
śṛṃgadeśāstadā tasya dvādaśa śātitāḥ pṛthak || 26 ||
[Analyze grammar]

samīkṛtastadā saumyaḥ surūpobhūcca bhāskaraḥ |
sahyatejāḥ sparśayogyaḥ sahavāsyo'bhavadraviḥ || 27 ||
[Analyze grammar]

dvādaśebhyastu khaṇḍebhyastvaṣṭā''yudhāni nirmame |
cakraṃ sudarśanaṃ kṛtvā viṣṇave tatsamārpayat || 28 ||
[Analyze grammar]

triśūlaṃ sumahat kṛtvā śaṃbhave tatsamārpayat |
śaktiṃ kṛtvā mahālambāṃ kārtikāya samārpayat || 29 ||
[Analyze grammar]

vajraṃ kṛtvā'ṣṭadhāraṃ tatsurendrāya samārpayat |
daṇḍaṃ kṛtvā mahāghoraṃ yamāya sa samārpayat || 30 ||
[Analyze grammar]

maṇiṃ kṛtvā mahāmūlyaṃ kuberāya samārpayat |
pāśaṃ kṛtvā tu vaidyutaṃ varuṇāya samārpayat || 31 ||
[Analyze grammar]

khaḍgaṃ kṛtvā mahaddhoraṃ devyai kālyai samārpayat |
kṛpāṇaṃ tu mahāghoraṃ kṛtvā'gnaye samārpayat || 32 ||
[Analyze grammar]

phalaṃ kṛtvā mahābāṇe narāya tatsamārpayat |
ulkāṃ kṛtvā mahādivyāṃ vāyave tāṃ samārpayat || 33 ||
[Analyze grammar]

kṛkaśāṃ dantrikāṃ kṛtvā nirṛtāya samārpayat |
tadanye svalpakhaṇḍāstu hīrakā maṇayo'bhavan || 34 ||
[Analyze grammar]

atha susaṃskṛtaḥ sūryo devarūpaṃ dadhāra ca |
dadarśa yogamāsthāya svāṃ bhāryāṃ vaḍavāṃ raviḥ || 35 ||
[Analyze grammar]

gatastatra sthale rūpaṃ pracchādya cā'spṛśattataḥ |
aśvarūpeṇa mārtaṇḍaḥ tāṃ cucumba muhurmuhuḥ || 36 ||
[Analyze grammar]

pṛṣṭhe gacchannathordhvaṃ tāṃ samārohati kāmataḥ |
maithunāya viceṣṭantaṃ parapuṃsaṃ viśaṃkya sā || 37 ||
[Analyze grammar]

vivṛtya tatsamīpe tu mukhaṃ kṛtvā sthitā'bhavat |
aśvarūpo'pi sūryastu kāmavegena cākulaḥ || 38 ||
[Analyze grammar]

kaṃdharāyāṃ samutplutya ghrāṇe liṃgaṃ niveśya ca |
vīryaṃ sarvamasiñcadvai nāsikāyāṃ dvidhā tadā || 39 ||
[Analyze grammar]

sā taṃ niradhamacchukraṃ nāsikāśvāsavāyunā |
devau tasmātsamutpannāvaśvinau bhiṣajāṃvarau || 40 ||
[Analyze grammar]

nāsatyaścaiva dasraśca smṛtau dvāvaśvināviti |
atyadbhutaśarīrau tau devavedyau babhūvatuḥ || 41 ||
[Analyze grammar]

avaśeṣeṇa vīryeṇa nāsikātastadaiva hi |
tṛtīyo'bhūd revatākhyaḥ putro nīlasurūpakaḥ || 42 ||
[Analyze grammar]

sa vai tasmāt tapaḥ kartuṃ paścimāyāṃ gato diśi |
raivatācalamāsādya tatra vāsaṃ cakāra ha || 43 ||
[Analyze grammar]

raivatasya gireḥ so'yamātivāhikadaivataḥ |
bhūtvā vasati tatraiva kalpāntaṃ tapa ādadhan || 44 ||
[Analyze grammar]

atha sūryaḥ svakaṃ rūpaṃ bhāskaraṃ samadarśayat |
tadā saṃjñāpi viśvastā patipādau prapūjya ca || 45 ||
[Analyze grammar]

kṣamāpya svāparādhaṃ vai jagāma ravimaṇḍale |
sarvadā sā mahādivyā devī sūryasarūpiṇī || 46 ||
[Analyze grammar]

samāste ramate sārdhaṃ sūryeṇa divi modate |
ityevaṃ sūryabālānāṃ navānāṃ divyajanmatā || 47 ||
[Analyze grammar]

śrāddhadevo yamo yamī sāvarṇiśca śanaiścaraḥ |
tapatī cāśvinībālau revataśca nava smṛtāḥ || 48 ||
[Analyze grammar]

tatra yamāya sūryeṇa brahmaṇā ca samarpitam |
lokapālatvamevaitya dakṣiṇāṃ diśamāsthitaḥ || 49 ||
[Analyze grammar]

yamapūrīti sā proktā kṛtānāṃ tu vikarmaṇām |
phalabhogāya duḥkhātmaniṣkṛtistatra kāryate || 50 ||
[Analyze grammar]

prāyaścittenā'tra loke pāṃkto bhavati mātrataḥ |
yamapūryāṃ phalabhogācchuddho bhavati cā''tmataḥ || 51 ||
[Analyze grammar]

itiśrīlakṣmīnārāyaṇīyasaṃhitāyāṃ prathame kṛtayugasantāne saṃjñāyā vaḍavārūpeṇa tapaścaryā sūryo'śvo bhūtvā tayā saṃśliṣṭo'śvinīkumārau revataṃ cotpādayāmāsa viśvakarmaṇā śāṇollīḍhasūryasya khaṇḍairdivyacakraśūlādiśastrotpādanamityādivarṇananāmā triṣaṣṭitamo'dhyāyaḥ || 63 ||
[Analyze grammar]