Chapter 64

śrīnārāyaṇa uvāca |
yāmyanairṛtayormadhye puraṃ vaivasvatasya tu |
sarvaṃ vajramayaṃ divyamabhedyaṃ yat surā'suraiḥ || 1 ||
[Analyze grammar]

caturasraṃ caturdvāraṃ saptaprākāratoraṇam |
svayaṃ tiṣṭhati tasyā'ntaryamo dūtaiḥ samanvitaḥ || 2 ||
[Analyze grammar]

yojanānāṃ sahasraṃ hi pramāṇena tu dṛśyate |
sarvaṃ ratnamayaṃ divyaṃ vidyunmālārkavarttulam || 3 ||
[Analyze grammar]

pañcaviṃśapramāṇena yojanāni samucchritam |
vṛtaṃ stambhasahasraistu vaidūryamaṇimaṇḍitam || 4 ||
[Analyze grammar]

muktājālaṃ gavākṣantu patākāśatabhūṣitam |
ghaṇṭāśataninādāḍhyaṃ toraṇānāṃ śatairvṛtam || 5 ||
[Analyze grammar]

tatrastho bhagavān dharmaḥ āsane niyate śubhe |
daśayojanavistīrṇe nīlajīmūtasannibhe || 6 ||
[Analyze grammar]

dharmajño dharmaśīlaśca dharmanyāyahito yamaḥ |
bhayadaḥ pāpayuktānāṃ dharmiṇāṃ tu sukhapradaḥ || 7 ||
[Analyze grammar]

puramadhye praveśe tu citraguptasya vai gṛham |
pañcaviṃśatisaṃkhyānāṃ yojanānāṃ pramāṇataḥ || 8 ||
[Analyze grammar]

daśocchritaṃ mahādivyaṃ lohaprākāraveṣṭitam |
pratolīśatasañcāraṃ patākāśataśobhitam || 9 ||
[Analyze grammar]

dīpikāśatasaṃkīrṇaṃ gītadhvanisamākulam |
citritaṃ citrakuśalaiścitraguptasya vai gṛham || 10 ||
[Analyze grammar]

maṇimuktāmaye divye āsane paramādbhute |
susthito gaṇapatyāyurmānuṣeṣvitareṣu ca || 11 ||
[Analyze grammar]

na muhyati kathaṃcitsaḥ sukṛte duṣkṛte'pi ca |
janmanopārjitaṃ yāvat sadasadveti tasya tat || 12 ||
[Analyze grammar]

dehendriyamanobhiśca kṛtaṃ karma likhatyasau |
citraguptagṛhātprācyāṃ jvarasyā'sti mahāgṛham || 13 ||
[Analyze grammar]

dakṣiṇe cāpi śūlasya lūtāvisphoṭakasya ca |
paścime kālapāśasya ajīrṇasyā'rucestathā || 14 ||
[Analyze grammar]

madhyapīṭhottare jñeyā nānāvidhā visūcikā |
aiśānyāṃ tu śirorogo vahridiśi tu mūrchanā || 15 ||
[Analyze grammar]

nairṛtyāmatisāraśca vāyavyāṃ dāhapīḍanam |
ebhiḥ parivṛto nityaṃ citraguptaḥ sa vartate || 16 ||
[Analyze grammar]

yatkarma kriyate yaiśca tatsarvaṃ tu likhatyasau |
dharmarājagṛhadvāri dūtāstiṣṭhanti koṭiśaḥ || 17 ||
[Analyze grammar]

yamalokasya cā'dhvā vai antaro mānuṣasya ca |
duḥkhena pāpino yānti yamamārgaṃ sudurgamam || 18 ||
[Analyze grammar]

yamaścaturbhujo bhūtvā śaṃkhacakragadābjabhṛt |
āhūya pāpinaḥ sarvān dūtairdaṇḍaṃ dadāti vai || 19 ||
[Analyze grammar]

pralayāmbudanirghoṣo hyaṃjanādrisamaprabhaḥ |
mahiṣastho durārādhyaḥ sūryatejaḥsamadyutiḥ || 20 ||
[Analyze grammar]

yojanatrayavistṛtadeho krūro'tibhītidaḥ |
doṣṇā daṇḍadharo bhīmaḥ pāśapāṇirdurākṛtiḥ || 21 ||
[Analyze grammar]

raktanetro'tibhayado darśanaṃ yāti pāpinām |
aṃguṣṭhamātraḥpuruṣo hāhākurvan kalevarāt || 22 ||
[Analyze grammar]

yadeva nīyate dūtairyāmyairyamapurīṃ tadā |
darśayanti bhayaṃ tīvraṃ dūtāḥ saṃtarjayanti hi || 23 ||
[Analyze grammar]

śīghraṃ pracala duṣṭātman yāsyasi tvaṃ yamālayam |
kumbhīpākādinarakān tvāṃ neṣyāmo drutaṃ kuru || 24 ||
[Analyze grammar]

mārge prayāti vai preto hyasipatravanānvite |
kaṇṭakaśarkarātaptavālukāviṣakardame || 25 ||
[Analyze grammar]

ahanyahani sa preto yojanānāṃ śatadvayam |
catvāriṃśattathā sapta ahorātreṇa gacchati || 26 ||
[Analyze grammar]

trayodaśe'hni sa preto nīyate yamakiṃkaraiḥ |
tasminmārge vrajatyeko gṛhīta iva markaṭaḥ || 27 ||
[Analyze grammar]

saptadaśadinānyeko vāyumārgeṇa gacchati |
aṣṭādaśetvahorātre pūrvaṃ yāmyapuraṃ vrajet || 28 ||
[Analyze grammar]

yāmyaṃ tu prathamaṃ proktaṃ sauripuraṃ dvitīyakam |
surendrapuraṃ tṛtīyaṃ gandharvanagaraṃ tataḥ || 29 ||
[Analyze grammar]

śailapuraṃ pañcamaṃ ca ṣaṣṭhaṃ krūrapuraṃ tathā |
saptamaṃ krauṃcanagaraṃ citrapuraṃ tathā'ṣṭamam || 30 ||
[Analyze grammar]

bahvāpannagaraṃ paścād daśamaṃ duḥkhadaṃ puram |
daśaikamākrandapuraṃ sutaptanagaraṃ tataḥ || 31 ||
[Analyze grammar]

trayodaśaṃ raudrapuraṃ payovṛṣṭaṃ caturdaśam |
pañcadaśaṃ śītapuraṃ bahubhayaṃ tu ṣoḍaśam || 32 ||
[Analyze grammar]

saptadaśaṃ dharmapuraṃ yāmyaṃ cāṣṭādaśaṃ puram |
purāṇyetāni santyeva mārge viśrāntilabdhaye || 33 ||
[Analyze grammar]

pāpī mṛto bhavetpretaḥ pretadehaṃ tu vindati |
pretadehastu navabhirahorātraiḥ subaddhyate || 34 ||
[Analyze grammar]

dehaniṣpattilābhāya piṇḍā deyāḥ pṛthak pṛthaka |
prathame'hani yaḥ piṇḍastena mūrddhā prajāyate || 35 ||
[Analyze grammar]

grīvāskandhau dvitīye tu tṛtīye hṛdayaṃ bhavet |
caturthe'hni bhavet pārṣṇirnābhirvai paṃcame tathā || 36 ||
[Analyze grammar]

ṣaṣṭhe kaṭiḥ saptame tu guhyaṃ pūrṇaṃ prajāyate |
dine'ṣṭame sakthinī ca jānvaṃghrī navame tathā || 37 ||
[Analyze grammar]

navabhirdehamāsādya daśame'hni bhavet kṣudhā |
deharūpaḥ kṣudhitaśca gṛhāgropari tiṣṭhati || 38 ||
[Analyze grammar]

daśame'hani taṃ piṇḍaṃ dadyātkṣudhānivartakaḥ |
ekādaśadvādaśāhe preto bhuṃkte dinadvayam || 39 ||
[Analyze grammar]

trayodaśe'hni vai preto nīyate tu mahāpathe |
saptadaśadinaṃ yāvat vāyumārgeṇa gacchati || 40 ||
[Analyze grammar]

aṣṭādaśe tvahorātre pūrvaṃ yāmyapuraṃ vrajet |
tatra mahānpretagaṇaḥ puṣpabhadrānadītaṭe || 41 ||
[Analyze grammar]

mahānyagrodhachāyāyāṃ preto viśrāmamṛcchati |
krandati karuṇairvākyaistṛṣārtaḥ śramapīḍitaḥ || 42 ||
[Analyze grammar]

śambalastatpurādhyakṣaḥ pretāya saṃprayacchati |
yadi dattaṃ sutaiḥ putraiḥ snehādvā kṛpayā'thavā || 43 ||
[Analyze grammar]

māsikaṃ piṇḍamattvā ca yāti sauripuraṃ tataḥ |
tatra nāmnā tu rājā vai jaṃgamaḥ kālarūpadhṛk || 44 ||
[Analyze grammar]

tripākṣikaṃ tu piṇḍaṃ vai dadātyasmai subhuktaye |
jalaṃ cānnaṃ tatra bhuktvā tatpuraṃ so'tigacchati || 45 ||
[Analyze grammar]

māsadvayā''bhyantare vai surendrapuramṛcchati |
surendro bhīṣaṇastantā'dhiṣṭhātā'smai dadāti hi || 46 ||
[Analyze grammar]

māsadvayāntare dattaṃ piṇḍaṃ vā yadi bhojanam |
vyatikramya puraṃ tacca tṛtīye māsi cāparam || 47 ||
[Analyze grammar]

gandharvapuramāsādyā'śnāti piṇḍaṃ trimāsagam |
tataḥ śailapuraṃ māsi caturthe preta eti ca || 48 ||
[Analyze grammar]

patanti tatra pāṣāṇāḥ pretasyopari pṛṣṭhataḥ |
caturthamāsikaṃ śrāddhaṃ bhuktvā krūrapuraṃ gataḥ || 49 ||
[Analyze grammar]

pañcame māsi tatrasthaḥ piṇḍaṃ pañcamamāsikam |
bhuktvā yāti krauṃcapuraṃ ṣaṣṭhaṃ krauṃcā'dhivāsitam || 50 ||
[Analyze grammar]

sārdhapaṃcamamāsārjyamūnaṣāṇmāsikaṃ tathā |
śrāddhe dattaṃ tu piṇḍādi bhuktvā viśramya yāti ca || 51 ||
[Analyze grammar]

citrapuraṃ saptamaṃ tatpurarājastu citrakaḥ |
yamā'nujo hyadhiṣṭhātā piṇḍaṃ ṣāṇmāsikaṃ jalam || 52 ||
[Analyze grammar]

bhojayatyatha bhuktvā sa mārge gacchati cāgrataḥ |
āyānti sammukhāstatra kaivartāstu sahasraśaḥ || 53 ||
[Analyze grammar]

vayaṃ tvāṃ tārayiṣyāmo mahāvaitaraṇīṃ nadīm |
śatayojanavistīrṇāṃ pūyaśoṇitapūritām || 54 ||
[Analyze grammar]

āmiṣādapatatryahijhaṣakṛkacasaṃvṛtām |
yena tatra pradattā gauḥ pretaṃ tārayati drutam || 55 ||
[Analyze grammar]

na pradattā yadi dhenurvaitaraṇyāṃ sa majjati |
svasthā'vasthe śarīre tu vaitariṇyā vrataṃ caret || 56 ||
[Analyze grammar]

deyā ca viduṣe dhenustāṃ nadīṃ tartumicchatā |
ṣāṇmāsikaṃ kṛtaṃ śrāddhaṃ tatra bhuktvā prasarpati || 57 ||
[Analyze grammar]

saptame māsi saṃprāpte yāti bahvāpadaṃ puram |
tatra bhuktvā pradattaṃ yat sāptamāsikasaṃbhavam || 58 ||
[Analyze grammar]

tatpuraṃ sa vyatikramya puraṃ duḥkhadamṛcchati |
mahadduḥkhamanubhūya krośatyatra pratāpitaḥ || 59 ||
[Analyze grammar]

māsyaṣṭame pradattaṃ yat tatra bhuktvā sa gacchati |
navamaṃ māsikaṃ bhuṃkte nānākrandapure sthitaḥ || 60 ||
[Analyze grammar]

tatrā'yaṃ śūnyahṛdayaḥ samākrandati duḥkhitaḥ |
vihāya tatpuraṃ preto yāti taptapura prati || 61 ||
[Analyze grammar]

sutaptanagaraṃ prāpya daśame māsi so'śnute |
bhojanaiḥ piṇḍadānaistu dattaistatra phalaṃ bhavet || 62 ||
[Analyze grammar]

māsi caikādaśe pūrṇe raudraṃ puraṃ sa gacchati |
daśaimāsikaṃ bhuktvā payovṛṣṭaṃ pragacchati || 63 ||
[Analyze grammar]

meghāstatra pravarṣanti pretānāṃ duḥkhakārakāḥ |
nyūnā''bdikaṃ ca yacchrāddhaṃ tatra bhuṃkte paretakaḥ || 64 ||
[Analyze grammar]

sampūrṇe ca tato varṣe yāti śītapuraṃ tataḥ |
mahāśītārditaḥ preta ākrandati muhurjaḍaḥ || 65 ||
[Analyze grammar]

śītapuraṃ cātikramya bahubhītipuraṃ vrajet |
tatra kṣuttṛṭbhayād dagdho yāti dharmapuraṃ tataḥ || 66 ||
[Analyze grammar]

yatroṣmaṇā prabāṣpeṇa bharjito bhavate mṛtaḥ |
khādanti yamadūtāstaṃ mārgaśramāpanuttaye || 67 ||
[Analyze grammar]

bahubhītipuraṃ dharmapuraṃ ca dharmakheṭakau |
dharmarājapurasyaitau śākhāgrāmau samīpagau || 68 ||
[Analyze grammar]

atha pretaṃ nayantīme yāmyaṃ dharmapuraṃ param |
caturaśītilakṣaiśca mūrtā'mūrtairadhiṣṭhitam || 69 ||
[Analyze grammar]

yamadūtairmahākrūrairāgatānāṃ prapīḍakaiḥ |
pretamatra nyāyasaudhe dūtāḥ kurvantyupasthitam || 70 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne yamapurapariṇāhacitraguptasaudhamārgīyā'ṣṭādaśapuragamanavat pretadaśāpradarśananāmā catuḥṣaṣṭitamo'dhyāyaḥ || 64 ||
[Analyze grammar]