Chapter 6

śrīnārāyaṇa uvāca |
vairājasya nābhideśāt kamalaṃ yadajāyata |
tatra caturmukho brahmā samajāyata prāg yathā || 1 ||
[Analyze grammar]

tatastannābhideśādvai dvitīyaṃ padmamutthitam |
tatra brahmā dvitīyo'bhūdaṣṭānana iti śrutaḥ || 2 ||
[Analyze grammar]

tatastṛtīyapadme tu brahmā ṣoḍaśamastakaḥ |
caturthe kamale brahmā dvātriṃśanmastako hyabhūt || 3 ||
[Analyze grammar]

pañcame kamale brahmā pañcāśanmukhavānabhūt |
ṣaṣṭhe jāte tu kamale brahmā śatamukho hyabhūt || 4 ||
[Analyze grammar]

tatastu saptame padme brahmā pañcaśatānanaḥ |
aṣṭame paṃkaje vedhāḥ sahasrānana ityabhūt || 5 ||
[Analyze grammar]

brahmā pañcasahasrā''syo jāto vai navame kaje |
daśame hyabhavadbrahmā daśasāhasramastakaḥ || 6 ||
[Analyze grammar]

ekādaśe kaje pañcāśatsāhasrānano hyajaḥ |
samudbhūtastathā tu dvādaśe lakṣamukho hyajaḥ || 7 ||
[Analyze grammar]

trayodaśe tu kamale dvilakṣamukhavānajaḥ |
padme caturdaśe pañcāśallakṣamukhavānajaḥ || 8 ||
[Analyze grammar]

jātaḥ pañcadaśe padme koṭyāsyaśca prajāpatiḥ |
ṣoḍaśe kamale brahmā jajñe hyarbudamastakaḥ || 9 ||
[Analyze grammar]

tataḥ saptadaśe padme viśvasṛḍabjamastakaḥ |
aṣṭādaśe tathā padme brahmā kharvapramastakaḥ || 10 ||
[Analyze grammar]

ekonaviṃśake tatra padmāsyaḥ samabhūddhi saḥ |
viṃśake kamale vedhāḥ parārdhamukhavānabhūt || 11 ||
[Analyze grammar]

ityevaṃ tatra tatraikakamale brahmakoṭayaḥ |
samudbhūtāḥ sajātīyāḥ saṃkhyāsteṣāmanantakāḥ || 12 ||
[Analyze grammar]

tathaiva viṣṇurudrāṇāṃ koṭayaśca tathāvidhāḥ |
tattatsthānātsamutpannāsteṣāṃ saṃkhyā na vidyate || 13 ||
[Analyze grammar]

īśasṛṣṭau yathaiṣāṃ vai pāro nāsti tathā punaḥ |
vairājānāṃ na cāstyantastatpitṝṇāṃ mahātmanām || 14 ||
[Analyze grammar]

mahāviṣṇuprabhṛtīnāmasaṃkhyānāṃ tu tatra vai |
saṃkhyāpāramapārāṇāṃ kenāpyāptuṃ na śakyate || 15 ||
[Analyze grammar]

atha teṣāṃ caturāsyaprabhṛtivedhasāṃ kṛte |
adhikāraḥ sunirṇītaścaturdaśastarātmake || 16 ||
[Analyze grammar]

aṣṭāsyānāṃ tu sattā syādaṣṭāviṃśatibhūstare |
brahmāṇḍe'tha tathā bodhyā ṣoḍaśānanavedhasām || 17 ||
[Analyze grammar]

ṣaṭpañcāśadvivarātmabrahmāṇḍeṣvādhikāritā |
dvātriṃśanmastakānāntu śatastarā'ṇḍanenṛtā || 18 ||
[Analyze grammar]

śatadvayaprabhūmidhṛgbrahmāṇḍeṣvadhikāritā |
saṃsthāpitā virājeṇa pañcāśanmukhavedhasām || 19 ||
[Analyze grammar]

śatāsyabrahmaṇāṃ paṃcāśatastarāṇḍanetṛtā |
pañcaśatamukhā'jasya sahasrabilake'ṇḍake || 20 ||
[Analyze grammar]

netṛtā'dhikṛtā cātha sahasrānanavedhasaḥ |
dvisahasrastarā'ṇḍeṣu netṛtā vihitā tathā || 21 ||
[Analyze grammar]

pañcasahasramukhavadvedhaso netṛtā tathā |
catuḥsahasrakakṣā'ṇḍe virājeṇa sthirīkṛtā || 22 ||
[Analyze grammar]

daśasahasramukhavadvedhaso'pyadhikāritā |
daśasāhasrakakṣā'ṇḍe virājeṇa suniścitā || 23 ||
[Analyze grammar]

adhikāripadaṃ pañcāśatsāhasrānanasya tu |
kṛtaṃ viṃśatisāhasravivarāṇḍeṣu tena vai || 24 ||
[Analyze grammar]

lakṣāsyasya catuścatvāriṃśadbilāṇḍakeṣu tat |
dvilakṣamukhavān vedhā lakṣabhūmyaṇḍakāryakṛt || 25 ||
[Analyze grammar]

pañcāśallakṣamukhavān dvilakṣabilakāṇḍake |
kṛto netā'tha koṭyāsyaḥ pañcalakṣastarāṇḍake || 26 ||
[Analyze grammar]

kṛto netā'rbudāsyastu daśalakṣastarāṇḍake |
abjā''syo viṃśatilakṣabilāṇḍanetṛtāṃ gataḥ || 27 ||
[Analyze grammar]

kharvāsyastu kṛtaḥ pañcāśallakṣabilakāṇḍake |
netā'tha padmasakhyāsyaḥ kṛtaḥ koṭistarātmake || 28 ||
[Analyze grammar]

parārdhamukhavān brahmā koṭidaśastarātmake |
brahmāṇḍe sthāpitaścaite hyevamanye'pi cā''hitāḥ || 29 ||
[Analyze grammar]

svasvakāryaṃ prakurvanti svādhikārānusārataḥ |
athaikadā virājasya rājasūyamahotsave || 30 ||
[Analyze grammar]

virājasya gṛhe ceśāḥ samājagmuḥ sahasraśaḥ |
naikabhujā viṣṇavo'pi rudrā vibhinnanetriṇaḥ |
samājagmuśca vairājā tathā'nye'pīśvareśvarāḥ || 31 ||
[Analyze grammar]

tatrotsave samāje vai ko yāyādagrapūjyatām |
itijāte vicāre tu mahān kolāhalo'bhavat || 32 ||
[Analyze grammar]

kecidāhuḥ parārdhāsyo brahmā'grapūjyatāṃ labhet |
anye'pyāhuḥ parārdhadṛk śaṃbhuragrārhaṇāṃ labhet || 33 ||
[Analyze grammar]

pare tvagrārhaṇāṃ viṣṇuḥ parārdhabhujavāṃllabhet |
itivāde vivāde ca nirṇayaṃ naiva lebhire || 34 ||
[Analyze grammar]

tadā vicāritaṃ sarvairvāde jāte parasparam |
vṛddhānāṃ vacanaṃ grāhyaṃ kārye vādādivibhrame || 5 ||
[Analyze grammar]

vṛddhastu prapitā teṣāṃ mahāviṣṇustu buddhimān |
yaṃ vai nirṇayamāsthāya darśayet sa bhavenmataḥ || 36 ||
[Analyze grammar]

iti te samayaṃ kṛtvā mahāviṣṇoḥ samantike |
natvā nivedayāmāsuḥ sarvaṃ vṛttāntamīśvarāḥ || 37 ||
[Analyze grammar]

mahāviṣṇuḥ kṣaṇaṃ dhyātvā prāha pautrān vicāritam |
bhavantastu trayastulyāḥ samānabalaśālinaḥ || 38 ||
[Analyze grammar]

samapūjyāḥ samaśreṣṭhāḥ samakāryavahāstathā |
parasparaṃ na vai nyūnāḥ pūjanārhāstrayo'pi hi || 29 ||
[Analyze grammar]

tathāpi rājasūye tu pūjaikasya bhavediti |
vicāryaiva bhavanto vai nirṇayaṃ yāntu ceśvarāḥ || 40 ||
[Analyze grammar]

ekasmai pūjyatā deyā dvābhyāṃ grāhyā'nuvṛttitā |
ityājñāpya mahāviṣṇurmaunamāsthāya saṃsthitaḥ || 41 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne bahuvidhabrahmādīnāmadhikārādivarṇananāmā ṣaṣṭho'dhyāyaḥ || 6 ||
[Analyze grammar]