Chapter 11

tato gatvā punas tasya nikaṭaṃ śiṃśapātaroḥ |
sa trivikramaseno 'tra śmaśānaṃ niśi bhūpatiḥ || 1 ||
[Analyze grammar]

labdhvā muktāttahāsaṃ taṃ vetālaṃ nṛśarīragam |
niḥkampaḥ skandham āropya tūṣṇīm udacalat tataḥ || 2 ||
[Analyze grammar]

calantaṃ ca tam aṃsastho vetālaḥ so 'bravīt punaḥ |
rājan kubhikṣor etasya kṛte ko 'yaṃ tava śramaḥ || 3 ||
[Analyze grammar]

āyāse niṣphale 'muṣmin viveko bata nāsti te |
tad imāṃ śṛṇu mattas tvaṃ kathāṃ pathi vinodinīm || 4 ||
[Analyze grammar]

asti śobhāvatī nāma satyākhyā nagarī bhuvi |
tasyāṃ ca śūdrakākhyo 'bhūd bhūpatiḥ prājyavikramaḥ || 5 ||
[Analyze grammar]

yasya jajvāla jayinaḥ pratāpajvalano niśam |
bandīkṛtārilalanādhūtacāmaramārutaiḥ || 6 ||
[Analyze grammar]

aluptadharmacaraṇasphītā manthe vasuṃdharā |
rājñi yasmin visasmāra rāmādīn api bhūpatīn || 7 ||
[Analyze grammar]

taṃ kadācin mahīpālaṃ priyaśūram upāyayau |
sevārthaṃ mālavād eko namnā vīravaro dvijaḥ || 8 ||
[Analyze grammar]

yasya dharmavatī nāma bhāryā satvavaraḥ sutaḥ |
kanyā vīravatī ceti trayaṃ gṛhaparicchadaḥ || 9 ||
[Analyze grammar]

sevāparicchadaś cānyat trayaṃ kaṭyāṃ kṛpāṇikā |
kare karatalaikatra cāru carma paratra ca || 10 ||
[Analyze grammar]

tāvanmātraparīvāro dīnāraśatapañcakam |
pratyahaṃ prārthayāmāsa rājñas tasmāt sa vṛttaye || 11 ||
[Analyze grammar]

rājāpi sa tam ākārasūcitodārapauruṣam |
vīkṣya tasmai dadau vṛttiṃ sūdrakas tāṃ yathepsitām || 12 ||
[Analyze grammar]

alpe parikare 'py ebhir iyadbhiḥ svarṇarūpakaiḥ |
kim eṣa vyasanaṃ puṣṇāty atha kaṃcana sadvyayam || 13 ||
[Analyze grammar]

ity anveṣṭuṃ samācāraṃ kautukāt sa mahīpatiḥ |
pracchannān sthāpayāmāsa cārānasyātra pṛṣṭhataḥ || 14 ||
[Analyze grammar]

sa ca vīravaraḥ prātaḥ kṛtvā bhūpasya darśanam |
sthitvā ca tasyā madhyāhnaṃ siṃhadvāre dhṛtāyudhaḥ || 15 ||
[Analyze grammar]

gatvā svavṛttilabdhānāṃ dīnārāṇāṃ śataṃ gṛhe |
bhojanārthaṃ svabhāryāyā haste prādāt kilānvaham || 16 ||
[Analyze grammar]

vastrāṅgarāgatāmbūlaṃ krīṇāti sma śatena ca |
śataṃ snātvā ca pūjārthaṃ vyadhād viṣṇoḥ śivasya ca || 17 ||
[Analyze grammar]

viprebhyaḥ kṛpaṇebhyaś ca dadau dānaṃ śatadvayam |
evaṃ vibheje pañcāpi tāni nityaṃ śatāny asau || 18 ||
[Analyze grammar]

tataḥ kṛtvāgnikāryādi bhūktvā gatvaikako niśi |
siṃhadvāre punas tasthau pāṇau karatalāṃ dadhat || 19 ||
[Analyze grammar]

etāṃ satatacaryāṃ ca tasya vīravarasya saḥ |
rājā cāramukhāc chrutvā tutoṣa hṛdi śudrakaḥ || 20 ||
[Analyze grammar]

nivārayāmāsa ca tāṃś cārāṃs tasyānumārgagān |
mene viśeṣapūjārhaṃ puruṣātiśayaṃ ca tam || 21 ||
[Analyze grammar]

atha yāteṣu divaseṣv avahelāvalaṅghite |
grīṣme vīravareṇātra supracaṇḍārkatejasi || 22 ||
[Analyze grammar]

tadīrṣyāta ivodbhūtavidyutkaratalāṃ dadhat |
dhārāprahārī ninadann ājagāma ghanāgamaḥ || 23 ||
[Analyze grammar]

tadā ca ghora meghaughe pravarṣati divāniśam |
siṃhadvāre tathaivāsīt so 'tra vīravaro 'calaḥ || 24 ||
[Analyze grammar]

taṃ ca dṛṣṭvā divā rājā prāsādāgrāt sa śūdrakaḥ |
niśi bhūyas tadārohaj jijñāsus tasya tāṃ sthitim || 25 ||
[Analyze grammar]

jagāda ca tataḥ ko nu siṃhadvāre sthito 'tra bhoḥ |
tac chrutvāhaṃ sthito 'treti so 'pi vīravaro 'bravīt || 26 ||
[Analyze grammar]

aho sudṛḍhasattvo 'yaṃ bhakto vīravaro mayi |
tad eṣa prāpaṇīyo me 'vaśyam eva mahat padam || 27 ||
[Analyze grammar]

iti saṃcintya nṛpatiḥ prāsādād avatīrya saḥ |
śūdrakaḥ śayanaṃ bheje praviśyāntaḥpuraṃ tataḥ || 28 ||
[Analyze grammar]

anyedyuś ca bhṛśaṃ meghe dhārāsāreṇa varṣati |
pradoṣe guptabhavane kāle tamasi jṛmbhite || 29 ||
[Analyze grammar]

punaḥ sa rājā jijñāsuḥ prāsādam adhiruhya tam |
siṃhadvāre sthitaḥ ko 'trety ekākī prāha taṃ sphuṭam || 30 ||
[Analyze grammar]

ahaṃ sthita iti prokte punar vīravareṇa ca |
yāvad vismayate so 'tra rājā taddhairyadarśanāt || 31 ||
[Analyze grammar]

tāvad vidūre śuśrāva sahasā rudatīṃ striyam |
viṣādavikalām ekāṃ pralāpakaruṇasvanam || 32 ||
[Analyze grammar]

na me rāṣṭre parābhūto na daridro na duḥkhitaḥ |
kaś cid asti tad eṣā kā rodity ekākinī niśi || 33 ||
[Analyze grammar]

iti cācintayac chrutvā sa jātakaruṇo nṛpaḥ |
ādideśa ca taṃ vīravaram ekam adhaḥ sthitam || 34 ||
[Analyze grammar]

bho vīravara śṛṇv eṣā dūre strī kāpi roditi |
kāsau roditi kiṃ ceti tvayā gatvā nirūpyatām || 35 ||
[Analyze grammar]

tac chrutvā sa tathety uktvā gantuṃ vīravaras tataḥ |
prāvartata nibaddhāsidhenuḥ karatalākaraḥ || 36 ||
[Analyze grammar]

na ca meghāndhakāraṃ taj jvaladvidyudvilocanam |
sthūladhārāśilāvārṣi rakṣorūpam ajīgaṇat || 37 ||
[Analyze grammar]

prasthitaṃ vīkṣya tādṛśyāṃ tasyāṃ rātrau tam ekakam |
karuṇākautukāviṣṭo rājā prāsādapṛṣṭhataḥ || 38 ||
[Analyze grammar]

āvatīrya gṛhītāsir ekākī tasya pṛṣṭhataḥ |
so 'pi pratasthe tatraiva śudrako 'nupalakṣitaḥ || 39 ||
[Analyze grammar]

sa ca vīravaro gatvā ruditānusṛtikriyaḥ |
bahirnagaryāḥ prāpaikaṃ saras tatra dadarśa ca || 40 ||
[Analyze grammar]

hā śūra hā kṛpālo hā tyāgiñ śūnyā tvayā katham |
vatsyāmītyādi rudatīṃ tāṃ striyaṃ vārimadhyagām || 41 ||
[Analyze grammar]

kā tvaṃ rodiṣi kiṃ caivam ity anvakprāptabhūpatiḥ |
papraccha tāṃ ca sāścaryas tataḥ sāpy evam abhyadhāt || 42 ||
[Analyze grammar]

bho vīravara jānīhi vatsa māṃ pṛthivīm imām |
tasyā mamādhunā rājā śūdrako dhārmikaḥ patiḥ || 43 ||
[Analyze grammar]

tṛtīye ca dine tasya rājño mṛtyur bhaviṣyati |
tādṛśaṃ ca patiṃ prāpsyāmy aham anyaṃ nṛpaṃ kutaḥ || 44 ||
[Analyze grammar]

atas tam anuśocāmi duḥkhitātmānam eva ca |
etac chrutvā sa tāṃ trasta iva vīravaro 'bravīt || 45 ||
[Analyze grammar]

he devi kac cid apy asti ko 'py upāyaḥ sa tādṛśaḥ |
yenāsya na bhavenmṛtyur jagadrakṣāmaṇeḥ prabhoḥ || 46 ||
[Analyze grammar]

iti tad vacanaṃ śrutvā sā jagāda vasuṃdharā |
eko 'sty upāyas taṃ caikaḥ kartuṃ śakto bhavān iti || 47 ||
[Analyze grammar]

tato vīravaro 'vādīt tarhi devi vada drutam |
yāvat tat sādhayāmy āśu ko 'rthaḥ prāṇair mamānyathā || 48 ||
[Analyze grammar]

tac chrutvovāca vasudhā viraḥ ko 'nyas tvayā samaḥ |
svāmibhaktas tad etasya śarmopāyam imaṃ śṛṇu || 49 ||
[Analyze grammar]

rājñā kṛtapratiṣṭāsti yaiṣā rājakulāntike |
uttamā caṇḍikā devī sāṃnidhyotkarṣaśālinī || 50 ||
[Analyze grammar]

tasyai sattvavaraṃ putram upahārīkaroṣi cet |
tan naiṣa rājā mriyate jīvaty anyat samāśatam || 51 ||
[Analyze grammar]

adyaiva caitad bhavatā kṛtaṃ ced asti tac chivam |
anyathāsya tṛtīye 'hni prāpte nāsty eva jīvitam || 52 ||
[Analyze grammar]

ity uktaḥ sa tayā pṛthvyā vīro vīravaras tadā |
yāmi devi karomy etad adhunaivety abhāṣata || 53 ||
[Analyze grammar]

tato bhadraṃ tavety uktvā vasudhā sā tirodadhe |
tac ca sarvaṃ sa śuśrāva guptam anvaksthito nṛpaḥ || 54 ||
[Analyze grammar]

tataś ca gūḍhe jijñāsau tasmin rājñy anugacchati |
śūdrake tvaritaṃ gehaṃ niśi vīravaro yayau || 55 ||
[Analyze grammar]

tatra putropahāro 'sya rājārthe dharayā yathā |
uktas tathābravīt patnyai dharmavatyai vibodhya saḥ || 56 ||
[Analyze grammar]

tac chrutvā sā tam āha sma nātha kāryaṃ śivaṃ prabhoḥ |
tatprabodhya sutasyāsya śiśor vaktu bhavān iti || 57 ||
[Analyze grammar]

tataḥ prabodhya suptaṃ taṃ bālaṃ sattvavaraṃ sutam |
ākhyāya taṃ ca vṛttāntam evaṃ vīravaro 'bravīt || 58 ||
[Analyze grammar]

tat putra caṇḍikādevyā upahārīkṛte tvayi |
rājā jīvaty asau no cet tṛtīye 'hni vipadyate || 59 ||
[Analyze grammar]

etac chrutvaiva bālo 'pi yathārthaṃ nāma darśayan |
aklībacittaḥ pitaraṃ taṃ sa sattvavaro 'bravīt || 60 ||
[Analyze grammar]

kṛtārtho 'haṃ mama prāṇai rājā cet tāta jīvati |
bhuktasya hi tadannasya dattā syān niṣkṛtir mayā || 61 ||
[Analyze grammar]

tatkiṃ vilambyate nītvā bhagavatyāḥ puro 'dhunā |
upahārīkurudhvaṃ mām astu śāntir mayā prabhoḥ || 62 ||
[Analyze grammar]

iti sattvavareṇokte tena vīravaro 'tra saḥ |
sādhu satyaṃ prasūto 'si mattaḥ putrety abhāṣata || 63 ||
[Analyze grammar]

etat so 'nvāgato rājā sarvaṃ śrutvā bahiḥ sthitaḥ |
aha eṣāṃ samaṃ sattvaṃ sarveṣām ity acintayat || 64 ||
[Analyze grammar]

tato vīravaraḥ skandhe kṛtvā sattvavaraṃ sutam |
bharyā dharmavatī cāsya kanyāṃ vīravatīm api || 65 ||
[Analyze grammar]

ubhau tau yayatus tasyāṃ rātrau tac caṇḍikāgṛham |
rājāpi śūdrakaś channaḥ pṛṣṭataḥ sa tayor yayau || 66 ||
[Analyze grammar]

tatra devyāḥ puraḥ skandhāt so 'tha pitrāvatāritaḥ |
devīṃ sattvavaro natvā dhairyarāśir vyajijñapat || 67 ||
[Analyze grammar]

mama mūrdhopahāreṇa rājā jīvatu śudrakaḥ |
anyad varṣaśataṃ devi kuryād rājyam akaṇṭakam || 68 ||
[Analyze grammar]

evam uktavatas tasya sādhu sādhv ity udīrya saḥ |
sūnoḥ sattvavarasyātha kṛṣṭvā karatalāṃ śiśoḥ || 69 ||
[Analyze grammar]

chittvā śiraś caṇḍikāyai devyai vīravaro dadau |
matputreṇopahāreṇa rājā jīvatv iti bruvan || 70 ||
[Analyze grammar]

sādhu kaḥ svāmibhakto 'nyaḥ samo vīravara tvayā |
yenaivam ekasatputraprāṇavyayavidhāyinā || 71 ||
[Analyze grammar]

datto jīvaś ca rājyaṃ ca śudrakasyāsya bhūpateḥ |
ity antarikṣād udagāt tatkṣaṇaṃ tatra bhāratī || 72 ||
[Analyze grammar]

tac ca sarvaṃ nṛpe tasmiṃś channe śṛṇvati pasyati |
kanyā vīravatī sā tu bālā vīravarātmajā || 73 ||
[Analyze grammar]

upetyāśliṣya mūrdhāṇaṃ tasya bhrātur hatasya tam |
vilapanty uruśokāndhā hṛtsphoṭena vyapadyata || 74 ||
[Analyze grammar]

tato vīravaraṃ bhāryā dharmavaty evam abravīt |
rājñas tāvat kṛtaṃ śreyas tad idānīṃ vadāmi te || 75 ||
[Analyze grammar]

nirjñānā yatra bālāpi bhrātṛśokād iyaṃ mṛtā |
naṣṭe 'patyadvaye 'py asmiṃs tatra kiṃ jīvitena me || 76 ||
[Analyze grammar]

prāg eva rājñaḥ śreyorthaṃ mūḍhayā svaśiro mayā |
devyai nopahṛtaṃ tasmād dehy anujñāṃ mamādhunā || 77 ||
[Analyze grammar]

praviṣamy analaṃ tāvad āttāpatyakalevarā |
ityāgrahād vadantīṃ tāṃ so 'tha vīravaro 'bravīt || 78 ||
[Analyze grammar]

evaṃ kuruṣva bhadraṃ te kā hi saṃprati te ratiḥ |
apatyaduḥkhaikamaye jīvitavye manasvini || 79 ||
[Analyze grammar]

kiṃ na datto mayaivātmety eṣā mā bhūc ca te vyathā |
dadyāṃ kiṃ nāham ātmānam anyasādhyaṃ bhaved yadi || 80 ||
[Analyze grammar]

tat pratīkṣasva yāvat te citām atra karomy aham |
amībhir dārubhir devīkṣetranirmāṇasaṃbhṛtaiḥ || 81 ||
[Analyze grammar]

ity uktvā dārubhis taiḥ sa kṛtvā vīravaraś citām |
dīpāgre jvālayāmāsa nyastāpatyaśavadvayām || 82 ||
[Analyze grammar]

tato dharmavatī patnī patitvā sāsya pādayoḥ |
praṇamya devīṃ caṇḍīṃ tāṃ vyajijñapad apāṃsulā || 83 ||
[Analyze grammar]

janmāntare 'py ayaṃ bhūyād āryaputraḥ patir mama |
etat prabhos tu rājño 'stu maddehenāmunā śivam || 84 ||
[Analyze grammar]

ity udīryaiva sā sādhvī tasminn ambhovahelayā |
jvālākalāpajaṭile nipapāta citānale || 85 ||
[Analyze grammar]

tataś ca cintayāmāsa vīro vīravaro 'tra saḥ |
niṣpannaṃ rājakāryaṃ me vāg divyā hy udgatā yathā || 86 ||
[Analyze grammar]

bhuktasya cānnapiṇḍasya jāto 'ham anṛṇaḥ prabhoḥ |
tad idānīṃ mamaikasya keyaṃ jīvitagṛdhnutā || 87 ||
[Analyze grammar]

bharaṇīyaṃ priyaṃ kṛtsnaṃ vyayīkṛtya kuṭumbakam |
jīvayann ekam ātmānaṃ mādṛśaḥ ko hi śobhate || 88 ||
[Analyze grammar]

tat kim ātmopahāreṇāpy etāṃ prīṇāmi nāmbikām |
ity ālocya sa devīṃ tāṃ stutyā prāg upatasthivān || 89 ||
[Analyze grammar]

jaya mahiṣāsuramāriṇi dāriṇi rurudānavasya śūlakare |
jaya vibudhotsavakāriṇi dhāriṇi bhuvanatrayasya mātṛvare || 90 ||
[Analyze grammar]

jaya jagad arcitacaraṇe śaraṇe niḥśreyasasya bhaktānām |
jaya dhṛtabhāskarakiraṇe haraṇe duritāndhakāravṛndānām || 91 ||
[Analyze grammar]

jaya kāli jaya kapālini jaya kaṅkālini śive namas te 'stu |
śūdrakanṛpater adhunā prasīda manmastakopahāreṇa || 92 ||
[Analyze grammar]

ity upasthāya devyāṃ sa tasyāṃ vīravaraḥ punaḥ |
sadyaḥ karatalāghātenottamāṅgaṃ svamacchinat || 93 ||
[Analyze grammar]

tad ālokyākhilaṃ tatra channasthaḥ śudrako nṛpaḥ |
sākulaś ca saduḥkhaś ca sāścaryaś ca vyacintayat || 94 ||
[Analyze grammar]

aho kim apy anenaitad anyatrādṛṣṭam aśrutam |
sādhunā sakuṭumbena duḥkaraṃ matkṛte kṛtam || 95 ||
[Analyze grammar]

vicitre 'py atra saṃsāre dhīraḥ syādīdṛśaḥ kutaḥ |
akhyāpayan prabho arthe parokṣaṃ yo dadāty asūn || 96 ||
[Analyze grammar]

etasya copakārosya na kuryāṃ sadṛśaṃ yadi |
tan me kā prabhutā kiṃ ca jīvitavyaṃ paśor iva || 97 ||
[Analyze grammar]

iti saṃcintya nṛpatiḥ khaḍgam ākṛṣya kopataḥ |
upetya śūdrako devīṃ tāṃ pravīro vyajijñapat || 98 ||
[Analyze grammar]

satatānuprapannasya bhagavaty adhunāmunā |
mama mūrdhopahāreṇa suprītā kurv anugraham || 99 ||
[Analyze grammar]

ayaṃ vīravaro vipro nāmānuguṇaceṣṭitaḥ |
madartham ujjhitaprāṇaḥ sakuṭumbo 'pi jīvatu || 100 ||
[Analyze grammar]

ity udīryāsinā rājā śiraś chettuṃ sa śūdrakaḥ |
yāvat pravartate tāvad udabhūd bhāratī divaḥ || 101 ||
[Analyze grammar]

mā sāhasaṃ kṛthās tuṣṭā sattvenānena te hy aham |
pratyujjīvatu sāpatyadāro vīravaro dvijaḥ || 102 ||
[Analyze grammar]

ity uktvā vyaramad vāk sā sa cottasthau saputrakaḥ |
sākaṃ duhitrā patnyā ca jīvan vīravaro 'kṣataḥ || 103 ||
[Analyze grammar]

tad vilokyādbhutaṃ rājā channo bhūtvā punaś ca saḥ |
paśyann atṛptas tām āsīd dṛṣṭyā harṣāśrupūrṇayā || 104 ||
[Analyze grammar]

so 'pi vīravaro dṛṣṭvā suptotthita ivāśu tam |
putradāraṃ tathātmānam abhūd vibhrāntamānasaḥ || 105 ||
[Analyze grammar]

papraccha ca pṛthaṅ nāmagrāhaṃ dārasutān sa tān |
bhasmībhūtāḥ kathaṃ yūyaṃ jīvantaḥ puna utthitāḥ || 106 ||
[Analyze grammar]

mayāpi svaśiraś chinnaṃ jīvāmy eṣaś ca kiṃ nv idam |
kiṃ vibhramo 'yam āho svit suspaṣṭo devyanugrahaḥ || 107 ||
[Analyze grammar]

evaṃ vadan sa tair ūce dārāpatyair alakṣitaḥ |
devyanugraha evāyaṃ jīvāmo yad amī iti || 108 ||
[Analyze grammar]

tataḥ sa tat tathā matvā natvā vīravaro 'mbakām |
ādāya putradārāṃs tānsiddhakāryo gṛhaṃ yayau || 109 ||
[Analyze grammar]

tatra praveśya putraṃ taṃ bhāryāṃ duhitaraṃ ca tām |
siṃhadvāram agād rājño rātrau tasyāṃ sa pūrvavat || 110 ||
[Analyze grammar]

rājā sa śūdrako 'py etad dṛṣṭvā sarvam alakṣitaḥ |
gatvāruroha svāvāsaprāsādaṃ taṃ punas tadā || 111 ||
[Analyze grammar]

vyāharac ca sthitaḥ ko 'tra siṃhadvārīti pṛṣṭhataḥ |
tato vīravaro 'vādīt saiṣa tiṣṭhāmy ahaṃ prabho || 112 ||
[Analyze grammar]

devādeśād gataś cāham abhūvaṃ tāṃ striyaṃ prati |
rākṣasīva ca sā kvāpi dṛṣṭanaṣṭaiva me gatā || 113 ||
[Analyze grammar]

etac chrutvā vacas tasya rājā vīravarasya saḥ |
sutarāṃ vismayāviṣṭo dṛṣṭodanto vyacintayat || 114 ||
[Analyze grammar]

aho samudragambhīradhīracittā manasvinaḥ |
kṛtvāpy ananyasāmānyam ullekhaṃ nodgiranti ye || 115 ||
[Analyze grammar]

ity ādy ākalayaṃs tūṣṇīṃ prāsādād avaruhya saḥ |
praviśyāntaḥpuraṃ rājā rātriśeṣaṃ nināya tam || 116 ||
[Analyze grammar]

prātaś cāsthānasamaye darśanopagatasthite |
tasmin vīravare prītas tathā kṛtsnaṃ sa bhūpatiḥ || 117 ||
[Analyze grammar]

tadīyaṃ rātrivṛttāntaṃ mantribhyas tam avarṇayat |
yathā babhūvur āścaryamohitā iva te 'khilāḥ || 118 ||
[Analyze grammar]

dadau tasmai saputrāya prītyā vīravarāya ca |
lāṭadeśe tato rājyaṃ sa karṇāṭayute nṛpaḥ || 119 ||
[Analyze grammar]

tato 'tra tulyavibhavāv anyonyasyopakāriṇau |
āsātāṃ tau sukhaṃ vīravaraśūdrakabhūpatī || 120 ||
[Analyze grammar]

ity ākhyāya kathām etāṃ vetālo 'tyadbhutāṃ tadā |
taṃ trivikramasenaṃ sa rājānam avadat punaḥ || 121 ||
[Analyze grammar]

tad brūhi rājann eteṣu vīraḥ sarveṣu ko 'dhikaḥ |
pūrva eva sa śāpas te yadi jānan na vakṣyasi || 122 ||
[Analyze grammar]

etac chrutvā sa bhūpālo vetālaṃ pratyuvāca tam |
eteṣu śudrako rājā pravīraḥ so 'khileṣv iti || 123 ||
[Analyze grammar]

tato 'bravīt sa vetālo rājan vīravaro na kim |
so 'dhiko yasya tulyo 'syāṃ pṛthvyām eva na jāyate || 124 ||
[Analyze grammar]

tatpatnī nādhikā kiṃ vā strībhutā yānvamanyata |
tathopahārapaśutāṃ sūnoḥ pratyakṣadarśinī || 125 ||
[Analyze grammar]

sa vā sattvavaro nātra tatputro 'bhyadhikaḥ katham |
bālasyāpi sato yasya sattvotkarṣaḥ sa tādṛśaḥ || 126 ||
[Analyze grammar]

tat kasmāc chudrakaṃ bhūpam ebhyas tvaṃ bhāṣase 'dhikam |
ity uktavantaṃ vetālaṃ sa jagāda punar nṛpaḥ || 127 ||
[Analyze grammar]

maivaṃ vīravaras tāvat sa tādṛkkulaputrakaḥ |
tasya prāṇaiḥ sutair dāraiḥ svāmisaṃrakṣaṇaṃ vratam || 128 ||
[Analyze grammar]

tatpatnī sāpi kulajā sādvī patyekadevatā |
bhartṛvartmānusāreṇa tasyā dharmo 'stu ko 'paraḥ || 129 ||
[Analyze grammar]

tābhyāṃ jātas tu tadrūpa eva sattvavaro 'pi saḥ |
yādṛśās tantavaḥ kāmaṃ tādṛśo jāyate paṭaḥ || 130 ||
[Analyze grammar]

yeṣāṃ prāṇais tu bhṛtyānāṃ nṛpair ātmābhirakṣyate |
teṣām arthe tyajandehaṃ śudrako 'tra viśiṣyate || 131 ||
[Analyze grammar]

ity ākarṇya vacaḥ sa tasya nṛpater aṃsād asaṃlakṣitaḥ vetālaḥ sahasā yayau nijapadaṃ bhūyo 'pi tanmāyayā |
rājāpy uccalito babhūva punar apy ānetum etaṃ pathā pūrveṇaiva suniścitaḥ pitṛvane tasmin sa tasyāṃ niśi || 132 ||
[Analyze grammar]