Chapter 10

atha bhūyo 'pi vetālam ānetuṃ nṛpasattamaḥ |
sa trivikramasenas tam upāgāc chiṃśapātarum || 1 ||
[Analyze grammar]

tatrastham etaṃ saṃprāpya mṛtadehagataṃ punaḥ |
skandhe gṛhītvaivāgantuṃ tūṣṇīṃ pravavṛte tataḥ || 2 ||
[Analyze grammar]

prayāntaṃ ca tam āha sma sa vetālo 'sya pṛṣṭhagaḥ |
citraṃ nodvijase rājan niśi kurvan gamāgamam || 3 ||
[Analyze grammar]

tad akhedāya bhūyas te varṇayāmi kathāṃ śṛṇu |
asti pāṭaliputrākhyaṃ khyātaṃ bhūmaṇḍale puram || 4 ||
[Analyze grammar]

tatrāsīn nṛpatiḥ pūrvaṃ nāmnā vikramakesarī |
guṇānām iva ratnānām āśrayaṃ yaṃ vyadhād vidhiḥ || 5 ||
[Analyze grammar]

tatra śāpāvatīrṇo 'bhūd divyavijñānavāñ śukaḥ |
vidagdhacūdamaṇir ity ākhyayā sarvaśāstravit || 6 ||
[Analyze grammar]

tenopadiṣṭāṃ sadṛśīṃ rājaputrīṃ nṛpātmajaḥ |
māgadhīm upayeme sa bhāryāṃ candraprabhābhidhām || 7 ||
[Analyze grammar]

tasyā api tathābhūtā sarvavijñānaśālinī |
śārikā somikā nāma rājaputryāḥ kilābhavat || 8 ||
[Analyze grammar]

te caikapañjarasthe dve tatrāstāṃ śukaśārike |
sevamāne svaviñjānair daṃpatī tau nijaprabhū || 9 ||
[Analyze grammar]

ekadā sābhilāṣas tāṃ śārikāṃ so 'bravīc chukaḥ |
ekaśayyāsanāhāraṃ subhage bhaja mām iti || 10 ||
[Analyze grammar]

nāhaṃ puruṣasaṃsargam icchāmi puruṣā yataḥ |
duṣṭāḥ kṛtaghnā iti sā sārikā pratyuvāca tam || 11 ||
[Analyze grammar]

na duṣṭāḥ puruṣā duṣṭā nṛśaṃsahṛdayāḥ striyaḥ |
iti bhūyaḥ śukenokte vivādo 'trālagat tayoḥ || 12 ||
[Analyze grammar]

kṛtadāsatvabhāryātvapaṇau tau śakunī mithaḥ |
niścayāyātha sabhyaṃ taṃ rājaputram upeyatuḥ || 13 ||
[Analyze grammar]

sa vivādapadaṃ śrutvā tayor āsthānagaḥ pituḥ |
kathaṃ kṛtaghnāḥ puruṣā brūhīty āha sma śārikām || 14 ||
[Analyze grammar]

tataḥ sā śṛṇutety uktvā nijapakṣaprasiddhaye |
puṃdoṣākhyāyinīm etāṃ śārikākathayat kathām || 15 ||
[Analyze grammar]

asti kāmandikā nāma yā mahānagarī bhuvi |
arthadattābhidhāno 'sti vaṇik tasyāṃ mahādhanaḥ || 16 ||
[Analyze grammar]

dhanadattābhidhānaś ca putras tasyodapadyata |
pitary uparate so 'pi babhūvocchṛṅkhalo yuvā || 17 ||
[Analyze grammar]

dyūtādisaṅge dūrtāś ca militvā tam apātayan |
kāmaṃ vyasanavṛkṣasya mūlaṃ durjanasaṃgatiḥ || 18 ||
[Analyze grammar]

acirād vyasanakṣīṇadhano daurgatyalajjayā |
so 'tha tyaktvā svadeśaṃ taṃ bhrāntuṃ deśāntarāṇy agāt || 19 ||
[Analyze grammar]

gacchaṃś ca candanapuraṃ nāma sthānam avāpya saḥ |
viveśa bhojanārthī sann ekasya vaṇijo gṛham || 20 ||
[Analyze grammar]

sa vaṇik sukumāraṃ taṃ dṛṣṭvā pṛṣṭvānvayādikam |
jñātvā kulīnaṃ satkṛtya svīcakre daivayogataḥ || 21 ||
[Analyze grammar]

dadau ca sadhanāṃ tasmai nāmnā ratnāvalīṃ sutām |
tataḥ sa dhanadatto 'tra tasthau śvaśuraveśmani || 22 ||
[Analyze grammar]

dineṣv eva ca yāteṣu sukhavismṛtadurgatiḥ |
svadeśaṃ gantukāmo 'bhūt prāptārtho vyasanonmukhaḥ || 23 ||
[Analyze grammar]

tato 'numānya katham apy avaśaṃ śvaśuraṃ śaṭhaḥ |
taṃ duhitrekasaṃtānaṃ gṛhītvā tām alaṃkṛtām || 24 ||
[Analyze grammar]

bhāryāṃ ratnāvalīṃ yuktām ekayā vṛddhayā striyā |
sa ātmanā tṛtīyaḥ sandeśāt prasthitavāṃs tataḥ || 25 ||
[Analyze grammar]

kramāt prāpyāṭavīṃ dūrām uktvā taskarajāṃ bhiyam |
gṛhītvābharaṇaṃ tasyā bhāryāyāḥ svīcakāra saḥ || 26 ||
[Analyze grammar]

dṛśyatāṃ dyūtaveśyādikaṣṭavyasanasaṅginām |
hṛdayaṃ hā kṛtaghnānāṃ puṃsāṃ nistriṃśakarkaśam || 27 ||
[Analyze grammar]

so 'tha pāpo 'rthahetos tāṃ bhāryāṃ guṇavatīm api |
hantuṃ śvabhre nicikṣepa tayā vṛddhastriyā yutām || 28 ||
[Analyze grammar]

kṣiptvaiva ca gate tasmin sātha vṛddhā vyapadyata |
tad bhāryā tu latāgulmavignayā na vyapādi sā || 29 ||
[Analyze grammar]

uttasthau ca tataḥ śvabhrāt krośantī karuṇaṃ śaṇaiḥ |
ālambya tṛṇagulmādi saśeṣatvāt kilāyuṣaḥ || 30 ||
[Analyze grammar]

āyayau vikṣatāṅgī ca pṛṣṭvā mārgaṃ pade pade |
yathāgatenaiva pathā kṛcchrāt tat sadanaṃ pituḥ || 31 ||
[Analyze grammar]

tatrākasmāt tathābhūtā prāptā pṛṣṭā sasaṃbhramam |
mātrā pitrā ca rudatī sādhvī saivam abhāṣata || 32 ||
[Analyze grammar]

muṣitāḥ sma pathi stenair nīto baddhvā ca matpatiḥ |
vṛddhā mṛtā nipatyāpi śvabhre nāhaṃ mṛtā punaḥ || 33 ||
[Analyze grammar]

athāgatena kenāpi pathikena kṛpālunā |
uddhṛtāhaṃ tataḥ śvabhrāt prāptāsmīha ca daivataḥ || 34 ||
[Analyze grammar]

evam uktavatī mātrā pitrā cāśvāsitā tataḥ |
bhartṛcittaiva sā tasthau tatra ratnāvalī satī || 35 ||
[Analyze grammar]

yāti kāle ca tadbhartā sa svadeśagataḥ punaḥ |
dyūtakṣapitatadvitto danadatto vyacintayat || 36 ||
[Analyze grammar]

ānayāmi punar gatvā mārgitvā śvaśurād dhanam |
gṛhe sthitā me tvat putrīty abhidhāsye ca tatra tam || 37 ||
[Analyze grammar]

evaṃ sa hṛdaye dhyātvā prāyāc chvaśuraveśma tat |
prāptaṃ ca tatra taṃ dūrāt svabhāryā paśyati sma sā || 38 ||
[Analyze grammar]

dhāvitvā cāpatat tasya sā pāpasyāpi pādayoḥ |
duṣṭe 'pi patyau sādhvīnāṃ nānyathāvṛttimānasam || 39 ||
[Analyze grammar]

bhītāya ca tatas tasmai tad aśeṣaṃ nyavedayat |
yan mṛṣā caurapātādi pitroḥ prāg varṇitaṃ tayā || 40 ||
[Analyze grammar]

tatas tayā samaṃ tatra nirbhayaḥ śvāśure gṛhe |
praviṣṭaḥ śvaśurābhyāṃ sa harṣād dṛṣṭvābhyanandyata || 41 ||
[Analyze grammar]

diṣṭyā jīvann ayaṃ muktaś caurair iti mahotsavaḥ |
tena tacchvaśureṇātha cakre militabandhunā || 42 ||
[Analyze grammar]

tataḥ sa dhanadatto 'tra bhuñjānaḥ śvaśuraśriyam |
ratnāvalyā tayā sākam āsīt patnyā yathāsukham || 43 ||
[Analyze grammar]

ekadā tatra rātrau ca sa nṛśaṃsaś cakāra yat |
kathoparodhataḥ śāntam avācyam api kathyate || 44 ||
[Analyze grammar]

hatvāṅkasuptāṃ bhāryāṃ tāṃ tadābharaṇasaṃcayam |
apahṛtya tataḥ prāyāt sa svadeśam alakṣitaḥ || 45 ||
[Analyze grammar]

īdṛśāḥ puruṣāḥ pāpā iti śārikayodite |
tvam idānīṃ vadety āha rājaputras tadā śukam || 46 ||
[Analyze grammar]

tato jagāda sa śuko deva duḥsahasāhasāḥ |
striyo duścaritāḥ pāpās tathā ca śrūyatāṃ kathā || 47 ||
[Analyze grammar]

asti harṣavatī nāma nagarī tatra cābhavat |
agraṇīr dharmadattākhyo bahukoṭīśvaro vaṇik || 48 ||
[Analyze grammar]

vasudattābhidhānā ca rūpe 'nanyasamā sutā |
babhūva tasya vaṇijaḥ prāṇebhyo 'py adhikapriyā || 49 ||
[Analyze grammar]

sā ca tena samānāya rūpayauvanaśāline |
dattā varāṅganānetracakorāmṛtaraśmaye || 50 ||
[Analyze grammar]

nāmnā samudradattāya vaṇikputrāya sādhave |
nagaryām āryajuṣṭāyāṃ tāmraliptyāṃ nivāsine || 51 ||
[Analyze grammar]

kadācit sā svadeśasthe patyau svasya pitur gṛhe |
sthitā vaṇiksutā dūrāt kaṃcit puruṣam aikṣata || 52 ||
[Analyze grammar]

taṃ yuvānaṃ sukāntaṃ sā capalā māramohitā |
guptaṃ sakhīmukhānītaṃ bheje pracchannakāmukam || 53 ||
[Analyze grammar]

tataḥprabhṛti tenaiva saha tatra sadā rahaḥ |
rātrau rātrāv araṃstāsau tadekāsaktamānasā || 54 ||
[Analyze grammar]

ekadā ca sa kaumāraḥ patis tasyāḥ svadeśataḥ |
ājagāmātra tatpitroḥ pramoda iva mūrtimān || 55 ||
[Analyze grammar]

sotsave ca dine tasmin sā naktaṃ kṛtamaṇḍanā |
mātrānupreṣitā bheje śayyāsthāpi na taṃ patim || 56 ||
[Analyze grammar]

prārthitā tena cālīkasuptaṃ cakre 'nyamānasā |
pānamatto 'dhvakhinnaś ca so 'pi jahre 'tha nidrayā || 57 ||
[Analyze grammar]

tataś ca supte sarvasmin bhuktapīte jane śanaiḥ |
saṃdhiṃ bhittvā viveśātra cauro vāsagṛhāntare || 58 ||
[Analyze grammar]

tatkālaṃ tam apaśyantī sāpy utthāya vaṇiksutā |
svajārakṛtasaṃketā niragān nibhṛtaṃ tataḥ || 59 ||
[Analyze grammar]

tadālokya sa cauro 'tra vighniteccho vyacintayat |
yeṣām arthe praviṣṭo 'haṃ tair evābharaṇair vṛtā || 60 ||
[Analyze grammar]

niśīthe nirgataiṣā tad vīkṣe 'haṃ sā kva gacchati |
ity ākalayya nirgatya sa cauras tāṃ vaṇiksutām || 61 ||
[Analyze grammar]

vasudattām anu yayau dattadṛṣṭir alakṣitaḥ |
sāpi puṣpādihastaikasasaṃketasakhīyutā || 62 ||
[Analyze grammar]

gatvā bāhyaṃ praviṣṭābhūd udyānaṃ nātidūragam |
tatrāpaśyac ca taṃ vṛkṣe lambamānaṃ svakāmukam || 63 ||
[Analyze grammar]

saṃketakāgataṃ rātrau labdhvā nagararakṣibhiḥ |
ullambitaṃ caurabuddhyā pāśakaṇṭhaṃ mṛtaṃ sthitam || 64 ||
[Analyze grammar]

tataḥ sā vihvalodbhrāntā hā hatāsmīti vādinī |
papāta bhūmau kṛpaṇaṃ vilapantī ruroda ca || 65 ||
[Analyze grammar]

avatāryātha vṛkṣāt taṃ gatāsuṃ nijakāmukam |
upaveśyāṅgarāgeṇa puṣpaiś cālaṃcakāra sā || 66 ||
[Analyze grammar]

samāliṅgya ca niḥsaṃjñaṃ rāgaśokāndhamānasā |
unnamayya mukhaṃ yāvat tasyārtā paricumbati || 67 ||
[Analyze grammar]

tāvat sa tasyāḥ sahasā nirjīvaḥ parapūruṣaḥ |
vetālānupraviṣṭaḥ sad dantaiś ciccheda nāsikām || 68 ||
[Analyze grammar]

tena sā vihvalā tasmāt savyathāpasṛtāpy aho |
kiṃ svij jīved iti hatā puna etya tam aikṣata || 69 ||
[Analyze grammar]

dṛṣṭvā ca vītavetālaṃ niśceṣṭaṃ mṛtam eva tam |
sā bhītā paribhūtā ca cacāla rudatī śanaiḥ || 70 ||
[Analyze grammar]

tāvac channaḥ sthitaḥ so 'tha cauraḥ sarvaṃ vyalokayat |
acintayac ca kim idaṃ pāpayā kṛtam etayā || 71 ||
[Analyze grammar]

aho batāśayaḥ strīṇāṃ bhīṣaṇo ghanatāmasaḥ |
andhakūpa ivāgādhaḥ pātāya gahanaḥ param || 72 ||
[Analyze grammar]

tad idānīm iyaṃ kiṃ nu kuryād iti vicintya saḥ |
kautukād dūrataś cauro bhūyo 'py anusasāra tām || 73 ||
[Analyze grammar]

sāpi gatvā praviśyaiva tat suptasthitabhartṛkam |
gṛhaṃ tadā svakaṃ prauccaiḥ prarudaty evam abravīt || 74 ||
[Analyze grammar]

paritrāyadhvam etena duṣṭena mama nāsikā |
chinnā niraparādhāyā bhartṛrūpeṇa śatruṇā || 75 ||
[Analyze grammar]

śrutvaitaṃ muhur ākrandaṃ tasyāḥ sarve sasaṃbhramam |
udatiṣṭhan prabudhyātra patiḥ parijanaḥ pitā || 76 ||
[Analyze grammar]

etyātha tatpitā dṛṣṭvā tām ārdracchinnanāsikām |
kruddhas taṃ bandhayāmāsa bhāryādrohīti tat patim || 77 ||
[Analyze grammar]

sa tu naivābravīt kiṃcid badhyamāno 'pi mūkavat |
viparyasteṣu sarveṣu śṛṇvatsu śvaśurādiṣu || 78 ||
[Analyze grammar]

tato jñatvaiva tac caure tasminn apasṛte laghu |
kolāhalena tasyāṃ ca vyatītāyāṃ kramān niśi || 79 ||
[Analyze grammar]

sa ninye vaṇijā tena śvaśureṇa vaṇiksutaḥ |
rājāntikaṃ tayā sārdhaṃ bhāryayā chinnanāsayā || 80 ||
[Analyze grammar]

rājā ca kṛtavijñaptiḥ svadāradrohy asāv iti |
tasyādiśad vaṇiksūnor vadhaṃ nyakkṛtatadvacāḥ || 81 ||
[Analyze grammar]

tato vadhyabhuvaṃ tasmin nīyamāne saḍiṇḍimam |
upāgamya sa cauro 'tra babhāṣe rājapūruṣān || 82 ||
[Analyze grammar]

niḥkāraṇaṃ na vadhyo 'yaṃ yathāvṛttaṃ tu vedmy aham |
māṃ prāpayata rājāgraṃ yāvat sarvaṃ vadāmy ataḥ || 83 ||
[Analyze grammar]

ity ūcivān sa nītas tair nṛpasyāgraṃ vṛtābhayaḥ |
ā mūlād rātrivṛttāntaṃ cauraḥ sarvaṃ nyavedayat || 84 ||
[Analyze grammar]

abravīc ca na ced deva madvāci pratyayas tava |
tat sā nāsā mukhe tasya śavasyādyāpi vīkṣyatām || 85 ||
[Analyze grammar]

tac chrutvā vīkṣituṃ bhṛtyān preṣya satyam avetya tat |
sa rājā taṃ vaṇikputraṃ muktavān vadhanigrahāt || 86 ||
[Analyze grammar]

tāṃ ca karṇāv api chitvā duṣṭāṃ deśān nirastavān |
tad bhāryāṃ śvaśuraṃ cāsya taṃ sarvasvam adaṇḍayat || 87 ||
[Analyze grammar]

cauraṃ ca taṃ purādhyakṣaṃ tuṣṭaś cakre sa bhūpatiḥ |
evaṃ striyo bhavantīha nisargaviṣamāḥ śaṭhāḥ || 88 ||
[Analyze grammar]

ity uktavān eva śuko bhūtvā citrarathābhidhaḥ |
kṣīṇendraśāpo gandharvo divyarūpo divaṃ yayau || 89 ||
[Analyze grammar]

śārikā sāpi tatkālaṃ bhūtvā svaḥstrī tilottamā |
tathaiva kṣīṇatacchāpā jagāma sahasā divam || 90 ||
[Analyze grammar]

vivādaś cāpy anirṇītaḥ sabhāyāṃ so 'bhavat tayoḥ |
ity ākhyāya kathāṃ bhūyas taṃ vetālo 'bravīn nṛpam || 91 ||
[Analyze grammar]

tad bhavān vaktu kiṃ pāpāḥ puruṣāḥ kimuta striyaḥ |
ajalpato jāna tas te śiro yasyati khaṇḍaśaḥ || 92 ||
[Analyze grammar]

etan niśamya vacanaṃ vetālasyāṃsavartinas tasya |
sa jagāda bhūpatis taṃ yogeśvara yoṣitaḥ pāpāḥ || 93 ||
[Analyze grammar]

puruṣaḥ ko'pi hi tādṛk kvāpi kadācid bhaved durācāraḥ |
prāyaḥ sarvatra sadā striyas tu tādṛgvidhā eva || 94 ||
[Analyze grammar]

ity uktavato nṛpateḥ prāgvat skandhāt sa tasya vetālaḥ |
naṣṭo 'bhūt sa ca rājā jagrāha punas tadānayanayatram || 95 ||
[Analyze grammar]