Chapter 2

tatastāṃ nūtanāṃ prāpya bhāryāṃ lalitalocanām |
naravāhanadattaḥ sa tasminmalayaparvate || 1 ||
[Analyze grammar]

madhupravṛttisubhage vijahāra tayā saha |
teṣu teṣu vanānteṣu puṣpitadrumaśobhiṣu || 2 ||
[Analyze grammar]

ekasmiṃś ca vane krīḍākusumāvacayakramāt |
tasyāṃ priyāyāṃ gahane gatāyāṃ dṛṣṭigocarāt || 3 ||
[Analyze grammar]

saṃcaransa dadarśaikaṃ mahadacchajalaṃ saraḥ |
satārakamivākāśaṃ puṣpaistīratarucyutaiḥ || 4 ||
[Analyze grammar]

puṣpāṇy uccinvatī yāvan na samabhyeti sā priyā |
tāvat snātvā sarasy asmin kṣaṇam āse sarastaṭe || 5 ||
[Analyze grammar]

iti saṃcintya sa snātvā kṛtadevārcano 'tra ca |
sacandanatarucchāyam adhyāste sma śilātalam || 6 ||
[Analyze grammar]

tatrastho rājahaṃsīnāṃ dṛṣṭvā tatsadṛśīṃ gatim |
śrutvā tannibhamālāpaṃ pikīnāṃ cūtavalliṣu || 7 ||
[Analyze grammar]

vilokya hariṇīnāṃ ca tannetrābhe vilocane |
dūrasthāṃ tāṃ sa sasmāra priyāṃ madanamañcukām || 8 ||
[Analyze grammar]

smṛtvaivodbhūtakāmāgnisaṃtaptaś ca mumūrccha saḥ |
tatkṣaṇaṃ cāyayau snātuṃ tatraiko punipuṃgavaḥ || 9 ||
[Analyze grammar]

sa piśaṅgajaṭo nāma tadavasthamavekṣya tam |
asiñcatsvapriyāsparśatulyaiścandanavāribhiḥ || 10 ||
[Analyze grammar]

tataḥ prabuddhaṃ praṇataṃ divyadṛṣṭiḥ sa taṃ muniḥ |
uvāca putra prāpnoṣi yatheṣṭaṃ dhair yamāpnuhi || 11 ||
[Analyze grammar]

tena hi prāpyate sasrvaṃ tathā caitya madāśramam |
kathāṃ mṛgāṅkadattīyāṃ mattaḥ śṛṇu na cecchrutā || 12 ||
[Analyze grammar]

ity uktvā sa muniḥ snātvā nināya nijamāśramam |
naravāhanadattaṃ taṃ cakre ca tvarayāhnikam || 13 ||
[Analyze grammar]

kṛtvātithyaṃ phalais tasya tatra bhuktaphalaḥ svayam |
sa piṅgalajaṭo vaktuṃ kathāṃ tasmai pracakrame || 14 ||
[Analyze grammar]

astyayodhyeti nagarī bhuvanastrayaviśrutā |
tasyāmamaradattākhyaḥ pūrvamāsīnmahīpatiḥ || 15 ||
[Analyze grammar]

tasya nityānuraktaikā pradīptataratejasaḥ |
bhāryā vahneriva svāhā babhūva surataprabhā || 16 ||
[Analyze grammar]

tasyāṃ mṛgāṅkadattākhyaḥ sutastasyodapadyata |
svakodaṇḍa ivābhūdyaḥ koṭiprāptaguṇānataḥ || 17 ||
[Analyze grammar]

tasyābhavaṃś ca sacivā rājasūnornijā daśa |
pracaṇḍaśaktiḥ sa sthūlabāhurvikramakesarī || 18 ||
[Analyze grammar]

dṛḍhamuṣṭir meghabalas tathā bhīmaparākramaḥ |
tadvad vimalabuddhiś ca vyāghrasenaguṇākarau || 19 ||
[Analyze grammar]

vicitrakathasaṃjñaś ca daśamas te ca satkulāḥ |
sarve yuvānaḥ śūrāś ca prājñāḥ prabhuhitaiṣiṇaḥ || 20 ||
[Analyze grammar]

taiḥ samaṃ sa sukhaṃ tiṣṭhanrājaputraḥ pitur gṛhe |
mṛgāṅkadattaḥ sadṛśīṃ na bhāryāṃ tāvadāptavān || 21 ||
[Analyze grammar]

ekadā ca rahasyeko mantrī bhīmaparākramaḥ |
tamāha śrūyatāṃ deva rātrau vṛttaṃ mamādya yat || 22 ||
[Analyze grammar]

ahaṃ prāsādasupto 'dya prabuddho 'śaṅkitaṃ niśi |
vajrogranakharaṃ siṃham apaśyam abhidhāvitam || 23 ||
[Analyze grammar]

utthite churikāhas te mayi so 'tha palāyitum |
siṃhaḥ prāvartatāhaṃ ca tam evānvapataṃ javāt || 24 ||
[Analyze grammar]

sa ca gatvā nadīpāraṃ prasārya rasanāṃ mayi |
āsīdahaṃ ca tāmasya dīrghāṃ churikayācchidam || 25 ||
[Analyze grammar]

tayaiva setupṛthvyā ca yāvattīrṇo 'smi tāṃ nadīm |
tāvat sa siṃhaḥ sumahānsaṃpanno vikṛtaḥ pumān || 26 ||
[Analyze grammar]

ko bhavāniti pṛṣṭaś ca mayā sa puruṣo 'bravīt |
vetālo 'haṃ tvayā vīra sattvenāsmi ca toṣitaḥ || 27 ||
[Analyze grammar]

tac chrutvāhaṃ tamaprākṣaṃ yadyevaṃ tattvayocyatām |
bhāryā mṛgāṅkadattasya kā bhaviṣyati me prabhoḥ || 28 ||
[Analyze grammar]

etanmadvacanaṃ śrutvā sa vetālo 'bravīttadā |
asyujjayinyāṃ nṛpatiḥ karmasena iti śrutaḥ || 29 ||
[Analyze grammar]

tasyāsti tanayā rājño lāvaṇyanyakkṛtāpsarāḥ |
nidhānabhūmiḥ saundaryasargasyeva prajāpateḥ || 30 ||
[Analyze grammar]

sā śaśāṅkavatī nāma bhāryā tasya bhaviṣyati |
tvatprabhustadavāptyā ca pṛthvīrājyaṃ kariṣyati || 31 ||
[Analyze grammar]

ity uktvā sa tiro 'bhūnme vetālo 'haṃ tathaiva ca |
āgato gṛhamityetanniśi vṛttaṃ mama prabho || 32 ||
[Analyze grammar]

etanmṛgāṅkadatto 'sau śrutvā bhīmaparākramāt |
āhūya śrāvayām āsa sarvāṃstānnijamantriṇaḥ || 33 ||
[Analyze grammar]

jagāda caitāñ śṛṇuta svapne dṛṣṭaṃ mayā ca yat |
jāne mahāṭavīṃ kāṃcit praviṣṭā nikhilā vayam || 34 ||
[Analyze grammar]

tatrādhvatṛṣitāḥ kṛcchrātprāpya toyaṃ pipāsavaḥ |
ruddhāḥ smaḥ sāyudhaiḥ puṃbhistata utthāya pañcabhiḥ || 35 ||
[Analyze grammar]

tān hatvā punar icchāmaḥ pātuṃ yāvat tṛṣāturāḥ |
tāvan na tatra puṃsas tān apaśyāma na tajjalam || 36 ||
[Analyze grammar]

tataḥ kṛcchrāṃ daśāṃ prāptāścandrojjvalamaśaṅkitam |
vṛṣabhārūḍhamāyāntamaikṣāmahi maheśvaram || 37 ||
[Analyze grammar]

so 'smāsu praṇateṣv akṣṇo dakṣiṇādaśruṇaḥ kaṇam |
bhūmāv apātayatso 'tra samudraḥ samapadyata || 38 ||
[Analyze grammar]

tasmānmuktāvalīṃ prāptāṃ śubhāṃ baddhvā mayā gale |
pīto raktānuliptena nṛkapālena so 'mbudhiḥ || 39 ||
[Analyze grammar]

tatkṣaṇaṃ ca prabuddho 'smi prayātā ca vibhāvarī |
evaṃ mṛgāṅkadattena svapnāścarye nivedite || 40 ||
[Analyze grammar]

mantrī vimalabuddhistaṃ nandatsvanyeṣv abhāṣata |
tvaṃ deva dhanyo yasyaivaṃ vihitānugraho haraḥ || 41 ||
[Analyze grammar]

svapne muktāvalīṃ labdhvā yatpītaś ca tvayāmbudhiḥ |
tacchaśāṅkavatīṃ prāpya bhoktāsi pṛthivīṃ dhruvam || 42 ||
[Analyze grammar]

anyan manāk tu kleśāyety ukte vimalabuddhinā |
tato mṛgāṅkadattas tān uvāca sacivān punaḥ || 43 ||
[Analyze grammar]

yathā phalaṃ me svapnasya yathā bhīmaparākramaḥ |
śrutavāniha vetālāt tathā yady api bhāvi tat || 44 ||
[Analyze grammar]

tathāpi karmasenasya baladurgābhimāninaḥ |
prajñābalānmayā prāpyā sā śaśāṅkavatī sutā || 45 ||
[Analyze grammar]

prajñābalaṃ ca sarveṣu mukhyaṃ kāryeṣu sādhanam |
tathā ca śṛṇutātraitāṃ kathāṃ vaḥ kathayāmy aham || 46 ||
[Analyze grammar]

bhadrabāhurabhūnnāmnā magadheṣu mahīpatiḥ |
tasyāsīnmantraguptākhyo mantrī buddhimatāṃ varaḥ || 47 ||
[Analyze grammar]

sa rājā taṃ nijāmātyaṃ kadācitsvair am abravīt |
anaṅgalīleti sutā rājño vārāṇasīpateḥ || 48 ||
[Analyze grammar]

asti yā dharmagopasya jagattritayasundarī |
tāmārthito 'pi dveṣānme na sa rājā prayacchati || 49 ||
[Analyze grammar]

dantino bhadradantasya prabhāvātsa ca durjayaḥ |
notsahe jīvituṃ cāhaṃ tayā tatsutayā vinā || 50 ||
[Analyze grammar]

tad atra nāstyupāyo me sakhe kiṃ kāryamucyatām |
iti tenodite rājñā sa mantrī nijagāda tam || 51 ||
[Analyze grammar]

kiṃ deva vikramādeva siddhirasti na buddhitaḥ |
tadalaṃ cintayāhaṃ te svabuddhyā sādhayāmyadaḥ || 52 ||
[Analyze grammar]

ity uktvā nṛpamanyedyuḥ pañcasaptānugānvitaḥ |
mahāvratikaveṣaḥ sanmantrī vārāṇasīṃ yayau || 53 ||
[Analyze grammar]

tatra taṃ śiṣyaveṣāste siddho 'yamiti sarvataḥ |
svānugāḥ khyāpayāmāsurbhaktiprahvamilajjanam || 54 ||
[Analyze grammar]

ekadā ca niśi bhrāmyan kāryayuktyupalabdhaye |
sānugaḥ sa dadarśātra dūrād gṛhavinirgatām || 55 ||
[Analyze grammar]

gṛhiṇīṃ hastipālasya śaṅkātvaritagāminīm |
nīyamānāṃ tricaturaiḥ puruṣaiḥ kvāpi sāyudhaiḥ || 56 ||
[Analyze grammar]

dhruvaṃ vyutthāya yāteyaṃ tatpaśyāmaḥ kva gacchati |
iti saṃcintya sa svair aṃ sānugo 'nusasāra tām || 57 ||
[Analyze grammar]

gatvā praviṣṭā sā yatra tac ca gehaṃ vidūrataḥ |
dṛṣṭvā nivāsasthānaṃ svam ājagāma tadaiva saḥ || 58 ||
[Analyze grammar]

prātaś ca hastipālasya hṛtārthā tāṃ gatāṃ priyām |
cinvānasyāntikaṃ yuktyā prāhiṇodbhramato 'nugān || 59 ||
[Analyze grammar]

te taṃ dṛṣṭvā tadaprāptiduḥkhajagdhaviṣaṃ tadā |
nivāritaviṣaṃ cakruḥ kṛpayeva svavidyayā || 60 ||
[Analyze grammar]

āgacchāsmadguroḥ pārśvaṃ jñānī sarvaṃ hi vetti saḥ |
ity uktvā ca tamāninyurnikaṭaṃ tasya mantriṇaḥ || 61 ||
[Analyze grammar]

sa ca hastipako dṛṣṭvā pādayoś ca praṇamya tam |
bhāryāpravṛttiṃ papraccha vratākalpopaśobhitam || 62 ||
[Analyze grammar]

so 'pi mantrī mṛṣā dhyātvā sābhijñānaṃ śaśaṃsa tat |
sthānaṃ tasmai parair nītā puruṣair yatra sā niśi || 63 ||
[Analyze grammar]

tataḥ praṇamya taṃ gatvā samaṃ nagararakṣibhiḥ |
sa hastipālakaḥ prāpya sthānaṃ tatparyaveṣṭayat || 64 ||
[Analyze grammar]

abadhītpuruṣāṃstāṃś ca pāpāndārāpahāriṇaḥ |
prāpa sābharaṇāṃ tāṃ ca sadhanāṃ nijayoṣitām || 65 ||
[Analyze grammar]

dvitīye 'hni sa ca prātaretya natvā kṛtasthitiḥ |
cakāra vyājasiddhasya tasyāhāranimantraṇam || 66 ||
[Analyze grammar]

gṛhapraveśān icchoś ca naktabhojitvavādinaḥ |
pradoṣe hastiśālāyāṃ tasyāhāramakalpayat || 67 ||
[Analyze grammar]

so 'pi mantrabalātsarvaṃ vaṃśanāḍīniveśitam |
guptaṃ gṛhītvā gatvātra mantrī bhuṅkte sma sānugaḥ || 68 ||
[Analyze grammar]

tato gate hastipāle supteṣv anyeṣu tatra saḥ |
hastino bhadradantasya vaṃśanāḍyā niveśya tam || 69 ||
[Analyze grammar]

karṇe suptasya bhujagaṃ rātriṃ nītvaiva tatra tām |
yayau svadeśaṃ magadhān hastī tena vyapādi ca || 70 ||
[Analyze grammar]

hatvā taṃ dharmagopasya gajaṃ darpamivāgate |
tasminmantrivare rājā bhadrabāhurnananda saḥ || 71 ||
[Analyze grammar]

tato vārāṇasīṃ tasmai dharmagopāya yācitum |
anaṅgalīlāṃ kanyāṃ tāṃ dūtaṃ ca visasarja saḥ || 72 ||
[Analyze grammar]

so 'pi tāṃ pradadau tasmai tadgajābhāvadurbalaḥ |
bhajanti vaitasīṃ vṛttiṃ rājānaḥ kālavedinaḥ || 73 ||
[Analyze grammar]

tadevaṃ prajñayā tasya mantraguptasya mantriṇaḥ |
anaṅgalīlāṃ saṃprāpa bhadrabāhuḥ sa bhūpatiḥ || 74 ||
[Analyze grammar]

tasmānmayāpi buddhyā sā bhāryā prāpyeti vādinam |
mṛgāṅkadattaṃ sacivastaṃ vicitrakatho 'bravīt || 75 ||
[Analyze grammar]

sarvaṃ setsyati te hārāt svapnadṛṣṭād anugrahāt |
amogho devatānāṃ ca prasādaḥ kiṃ na sādhayet || 76 ||
[Analyze grammar]

tathā ca śṛṇutātraikāṃ varṇyamānāṃ mayā kathām |
āsīttakṣaśilāpūryāṃ bhadrākṣo nāma bhūpatiḥ || 77 ||
[Analyze grammar]

sa putrakāmaḥ padmānāṃ śatenāṣṭabhir eva ca |
sitānāṃ pūjayām āsa khaḍge lakṣmīṃ dine dine || 78 ||
[Analyze grammar]

ekadārcayatas tasya rājño maunamamuñcataḥ |
ūnamekamabhūtpadmaṃ daivādgaṇayato dhiyā || 79 ||
[Analyze grammar]

sa hṛtpadmaṃ vipāṭya svaṃ dadau devyai tataś ca sā |
tuṣṭā tasmai dadau sārvabhaumaputrapradaṃ varam || 80 ||
[Analyze grammar]

kṛtvā cākṣatadehaṃ taṃ nṛpaṃ prāyādadarśanam |
atha tasya suto rājño mahādevyāmajāyata || 81 ||
[Analyze grammar]

hṛtpuṣkaraprasādena jāsto 'yamiti taṃ ca saḥ |
puṣkarākṣaṃ nṛpaścakre nāmnā putraṃ sulakṣaṇam || 82 ||
[Analyze grammar]

kramāc ca yauvanaprāptaṃ tanayaṃ taṃ guṇānvitam |
rājye 'bhiṣicya bhadrākṣaḥ sa rājā śiśriye vanam || 83 ||
[Analyze grammar]

puṣkarākṣo 'pi saṃprāpya rājyaṃ pratidinaṃ haram |
pūjayannekadābhyarcya bhāryāṃ tasmādayācata || 84 ||
[Analyze grammar]

sarvaṃ saṃpatsyate putra yathābhilaṣitaṃ tava |
iti śuśrāva sa giraṃ gaganādudgatāṃ tadā || 85 ||
[Analyze grammar]

tataḥ prahṛṣṭo jātāsthaḥ sa tiṣṭhañjātucinnṛpaḥ |
ākheṭakavinodāya jagāma mṛgakānanam || 86 ||
[Analyze grammar]

tatra saṃbhogasaṃsaktabhujaṃgamithunāśane |
pravṛttaṃ karabhaṃ dṛṣṭvā śokākrānto nyapātayat || 87 ||
[Analyze grammar]

sa nipātitamātraḥ sanmuktvā tāṃ karabhastanum |
bhūtvā vidyādharaḥ prītaḥ puṣkarākṣaṃ tam abravīt || 88 ||
[Analyze grammar]

bhavān kṛtopakāro me tatte yad vacmi tac chṛṇu |
raṅkumālīti nāmnāsti rājan vidyādharottamaḥ || 89 ||
[Analyze grammar]

taṃ rūpalubdhā taruṇaṃ vavre dṛṣṭvānurāgiṇī |
svayaṃ tārāvalī nāma vidyādharavarātmajā || 90 ||
[Analyze grammar]

tasyāḥ pitā ca svecchātastayoḥ kṛtavivāhayoḥ |
kopādapātayacchāpaṃ kaṃcitkālaṃ viyogadam || 91 ||
[Analyze grammar]

tatastārāvalīraṅkumālinau tau vijahratuḥ |
daṃpatī prasaratprītī tāsu tāsu svabhūmiṣu || 92 ||
[Analyze grammar]

kadācittena śāpena mitho dṛṣṭipathāccyutau |
anyonyaviprayuktau tau jātau kvāpi vanāntare || 93 ||
[Analyze grammar]

tatastārāvalī sā tamanviṣyantī patiṃ kramāt |
paścimābdheragātpāre vanaṃ siddharṣisevitam || 94 ||
[Analyze grammar]

tatra sāpaśyadutphullamekaṃ jambumahātarum |
āśvāsayantaṃ prītyeva madhurair bhramarāravaiḥ || 95 ||
[Analyze grammar]

upāviśac ca viśrāntyai bhṛṅgīrūpaṃ vidhāya sā |
vṛkṣe tasminn athaikasmin kusume madhupāyinī || 96 ||
[Analyze grammar]

kṣaṇāddaivāttamatraiva prāptaṃ dṛṣṭvā cirātpatim |
harṣacyutena vīryeṇa siktaṃ puṣpaṃ tayāśu tat || 97 ||
[Analyze grammar]

tyaktvā bhṛṅgīvapurgatvā saṃgatābhūc ca tena sā |
jyotsneva śaśinā bhartrā cinvatā raṅkumālinā || 98 ||
[Analyze grammar]

tatastena samaṃ tasyāṃ gatāyāṃ svaniketanam |
tadvīryasiktā tatrābhūjjambupuṣpāttataḥ phalam || 99 ||
[Analyze grammar]

tasya cāntaḥ phalasyātra kālayogena kanyakā |
samabhūnnahi divyānāṃ vīryaṃ bhajati moghatām || 100 ||
[Analyze grammar]

kadācitphalamūlārthaṃ vijitāśvābhidho muniḥ |
tatrāgādapatattac ca pakvaṃ jambutaroḥ phalam || 101 ||
[Analyze grammar]

tasmātpatitabhagnāc ca divyā nirgatya kanyakā |
avandata munes tasya caraṇau vinayānatā || 102 ||
[Analyze grammar]

sa divyadṛṣṭir dṛṣṭvā tāṃ buddhvā tattvaṃ savismayaḥ |
nītvāśramaṃ svaṃ vinayavatīṃ nāmnākaronmuniḥ || 103 ||
[Analyze grammar]

tatra kālena sā vṛddhiṃ prāptā tasyāśrame muneḥ |
dṛṣṭā vinayavatyeṣā nabhasā gacchatā mayā || 104 ||
[Analyze grammar]

tato 'haṃ rūpagarveṇa madanena ca mohitaḥ |
upetya tāmanicchantīṃ haṭhāddhartuṃ pravṛttavān || 105 ||
[Analyze grammar]

tatkṣaṇaṃ sa muniḥ kruddhaḥ krandantyā śrāvitastayā |
vijitāsurupāgatya śāpaṃ mahyamadānnṛpa || 106 ||
[Analyze grammar]

rūpagarvita sarvāṅganinditaḥ karabho bhava |
puṣkarākṣānnṛpātprāpte vadhe śāpādvimokṣyase || 107 ||
[Analyze grammar]

bhartā vinayavatyāś ca sa evāsyā bhaviṣyati |
ityahaṃ muninā śapto jāto 'syāṃ karabho bhuvi || 108 ||
[Analyze grammar]

jātaś ca so 'dya śāpāntastvattastatpaścimāmbudheḥ |
pārasthaṃ tadvanaṃ gaccha nāmnā surabhimārutam || 109 ||
[Analyze grammar]

bhāryāmāpnuhi tāṃ divyāṃ rūpadarpaharāṃ śriyaḥ |
ity uktvā puṣkarākṣaṃ sa divaṃ vidyādharo yayau || 110 ||
[Analyze grammar]

puṣkarākṣo 'pi gatvā svāṃ purīṃ vinyasya mantriṣu |
rājyaṃ rātrau tataḥ prāyādeko 'śvamadhiruhya saḥ || 111 ||
[Analyze grammar]

gacchan kramāc ca saṃprāpya paścimābdhes taṭaṃ punaḥ |
kathaṃ tareyam ambhodhim iti tatra vyacintayat || 112 ||
[Analyze grammar]

tato dadarśa tatraikaṃ sa śūnyaṃ caṇḍikāgṛham |
praviśya ca tataḥ snātvā devīṃ tāṃ praṇanāma ca || 113 ||
[Analyze grammar]

kenāpi nihitāṃ tatra vīṇāmādāya sādaraḥ |
upavīṇayati smaitāṃ devīmatra svagītakaiḥ || 114 ||
[Analyze grammar]

upavīṇitatuṣṭā ca suptaṃ tatraiva sā niśi |
bhūtagrāmeṇa taṃ svena pāramabdheranāyayat || 115 ||
[Analyze grammar]

tataḥ prātaḥ prabuddho 'bdhestīre rājā dadarśa saḥ |
vanāntaḥsthitamātmānaṃ na tasmiṃścaṇḍikāgṛhe || 116 ||
[Analyze grammar]

utthāya vismitaścātra bhramannāśramamaikṣata |
praṇamantamivātithyātphalabhārānatair drumaiḥ || 117 ||
[Analyze grammar]

kurvāṇaṃ svāgatam iva kvaṇitena patatriṇām |
praviśya tatra cāpaśyatsthitaṃ śiṣyair vṛtaṃ munim || 118 ||
[Analyze grammar]

upetya ca vavande tamṛṣiṃ rājā sa pādayoḥ |
so 'pyenaṃ vihitātithyo jñānavānmunirabravīt || 119 ||
[Analyze grammar]

puṣkarākṣa yadarthaṃ tvamāgataḥ sā kṣaṇaṃ gatā |
idhmādihetor vinayavatī tattiṣṭha saṃprati || 120 ||
[Analyze grammar]

upayacchasva tāṃ pūrvabhāryāmadyaiva bhūpate |
ity ukto muninā so 'pi puṣkarākṣo vyacintayat || 121 ||
[Analyze grammar]

diṣṭyā muniḥ sa evāyaṃ vijitāsustadeva ca |
vanametaddhruvaṃ devyā tārito 'haṃ mahārṇavamf || 122 ||
[Analyze grammar]

citraṃ ca pūrvabhāryaiṣā mamoktā munināmunā |
ityālocyaiva hṛṣṭastaṃ sa papraccha muniṃ nṛpaḥ || 123 ||
[Analyze grammar]

bhagavan pūrvabhāryaiṣā kathaṃ me kathyatām iti |
tato jagāda sa muniḥ śrūyatāṃ yadi kautukam || 124 ||
[Analyze grammar]

babhūva dharmasenākhyas tāmraliptyāṃ purā vaṇik |
vidyullekheti nāmnā ca bhāryā tasyābhavacchubhā || 125 ||
[Analyze grammar]

sa daivānmuṣitaścauraiḥ śastraiścābhyāhato vaṇik |
mumūrṣurniragādvahniṃ praveṣṭuṃ bhāryayā saha || 126 ||
[Analyze grammar]

apaśyatāmakasmāc ca tāvubhāvapi daṃpatī |
ākāśenāgataṃ haṃsamithunaṃ rucirākṛti || 127 ||
[Analyze grammar]

tatas tadgatacittau tau praviśya dahanaṃ mṛtau |
rājahaṃsau samutpannau punarbhāryāpatī ubhau || 128 ||
[Analyze grammar]

kadācittau ca varṣāsu rātrau kharjūrapādape |
nīḍasthitau tamunmūlya taruṃ vātyā vyayūyujat || 129 ||
[Analyze grammar]

prātaḥ sa haṃsas tāṃ haṃsīṃ cinvañ śānte prabhañjane |
saraḥsv atha diganteṣu na kutaścid avāptavān || 130 ||
[Analyze grammar]

tatas tatkālasaṃsevyaṃ haṃsānāṃ mānasaṃ saraḥ |
smarārtaḥ sa yayau haṃsyā janitāśo 'nyayā pathi || 131 ||
[Analyze grammar]

tatra tāṃ prāpya haṃsīṃ svāṃ nītvā ca jaladāgamam |
giriśṛṅgaṃ jagāmaikaṃ vihartuṃ sa tayā saha || 132 ||
[Analyze grammar]

tatra tasya hatāṃ haṃsīṃ mṛtām ādāya vīkṣya ca |
dūrān mārgāgatān kāṃścit puruṣān sāyudhān bahūn || 133 ||
[Analyze grammar]

lubdhakas tāṃ hatāṃ haṃsīṃ mṛtām ādāya vīkṣya ca |
dūrān mārgāgatān kāṃścit puruṣān sāyudhān bahūn || 134 ||
[Analyze grammar]

drutaṃ churikayā chinnaistāmācchādya tṛṇair bhuvi |
haṃsīṃ nyadhādvilokyaitāṃ hareyurjātvamī iti || 135 ||
[Analyze grammar]

gateṣu teṣu puruṣeṣūpagamya jighṛkṣataḥ |
lubdhakasyoddhṛtatṛṇā haṃsī sā tasya paśyataḥ || 136 ||
[Analyze grammar]

tattṛṇāntarnikṛttāyā mṛtasaṃjīvanauṣadheḥ |
rasena jīvitaṃ prāpya khamutpatya tato yayau || 137 ||
[Analyze grammar]

tāvat sa haṃsas tadbhartā gatvaikasminsarastaṭe |
mūḍho 'patad dhaṃsayūthe paśyaṃstām eva tanmanāḥ || 138 ||
[Analyze grammar]

tatkṣaṇaṃ dhīvaraḥ ko'pi kṣiptvā jālaṃ nibadhya tān |
haṃsānsarvānupāvikṣadāhārārthaṃ kila kṣaṇāt || 139 ||
[Analyze grammar]

tāvac cāgatya tatraiva sā haṃsī cinvatī patim |
dadarśa jālabaddhaṃ taṃ diśaścārtā vyalokayat || 140 ||
[Analyze grammar]

tataḥ snātuṃ pravṛttena kenāpyatra sarastaṭe |
puṃsā vastropari nyastāmapaśyadratnakaṇṭhikām || 141 ||
[Analyze grammar]

gatvā cāpaśyatas tasya tāṃ gṛhītvaiva kaṇṭhikām |
dāśāya darśayantī sā tasmai vyomnā śanair yayau || 142 ||
[Analyze grammar]

dāśo 'pi so 'nvadhāvat tāṃ dṛṣṭvā cañcvāttakaṇṭhikām |
haṃsīṃ gṛhītalaguḍaḥ pakṣijālaṃ vihāya tat || 143 ||
[Analyze grammar]

haṃsī ca gatvā śailāgre dūre tāṃ kaṇṭhikāṃ nyadhāt |
dhīvaro 'pi sa tallobhāttatrāroḍhuṃ pracakrame || 144 ||
[Analyze grammar]

tad dṛṣṭvā sā drutaṃ gatvā haṃsī patyuḥ samīpage |
baddhasya vṛkṣe saṃsuptaṃ kapiṃ cañcvākṣṇy atāḍayat || 145 ||
[Analyze grammar]

sa kapistāḍitastrastaḥ patitvoparyapāṭayat |
jālaṃ tattena nirjagmurhaṃsāḥ sarve 'pi te tataḥ || 146 ||
[Analyze grammar]

atha tau saṃgatāvuktasvavṛttāntau parasparam |
haṃsau bhāryāpatī hṛṣṭau yathākāmaṃ vijahratuḥ || 147 ||
[Analyze grammar]

dāśaṃ taṃ cāgataṃ prāptakaṇṭhikaṃ pakṣilobhataḥ |
lebhe 'tra sa pumāṃś cinvan hṛtā sā yasya kaṇṭhikā || 148 ||
[Analyze grammar]

sa bhītisūcitasyāsya hastātsaṃprāpya kaṇṭhikām |
dāśasya dakṣiṇaṃ pāṇiṃ pumāṃśchurikayācchinat || 149 ||
[Analyze grammar]

tau cāpi jātu haṃsau dvau chattīkṛtyaikamambujam |
madhyāhnakāle sarasaḥ protthāya vyomni ceratuḥ || 150 ||
[Analyze grammar]

kṣaṇāc ca nadyāḥ kasyāścitkhagau tau tīramāpatuḥ |
muninādhyāsitaṃ kenāpyarcāvyagreṇa dhūrjaṭeḥ || 151 ||
[Analyze grammar]

tatra vyādhena kenāpi yāntau tau saha daṃpatī |
hatāvekena yugapacchareṇa bhuvi petatuḥ || 152 ||
[Analyze grammar]

ātapatrāmbujaṃ tac ca tadīyamapatattadā |
munerarcayatas tasya śivaliṅgasya mūrdhani || 153 ||
[Analyze grammar]

tato vyādhaḥ sa dṛṣṭvā tau haṃsaṃ svīkṛtya haṃsikām |
tāṃ dadau munaye tasmai so 'pyānarca śivaṃ tayā || 154 ||
[Analyze grammar]

talliṅgamūrdhni sras tasya tasyābjasya prabhāvataḥ |
sa puṣkarākṣa haṃsastvaṃ jāto rājanvaye 'dhunā || 155 ||
[Analyze grammar]

haṃsī ca saiṣā vinayavatī vidyādharānvaye |
jātā viśeṣato hy asyā māṃsair abhyarcito haraḥ || 156 ||
[Analyze grammar]

itthaṃ te pūrvabhāryāsāv ity ukto vijitāsunā |
muninā puṣkarākṣaḥ sa rājā taṃ punar abravīt || 157 ||
[Analyze grammar]

katham agnipraveśasya tasyāghaughavighātinaḥ |
pakṣiyonāv abhūj janma bhagavan phalam āvayoḥ || 158 ||
[Analyze grammar]

ity uktavantaṃ rājānaṃ taṃ sa pratyabravīnmuniḥ |
yadbhāvitātmā mriyate jantūstadrūpamaśnute || 159 ||
[Analyze grammar]

tathā hyujjayinīpuryāṃ naiṣṭhikī brahmacāriṇī |
lāvaṇyamañjarī nāma kumārī brāhmaṇī purā || 160 ||
[Analyze grammar]

yuvānaṃ brāhmaṇaṃ dṛṣṭvā kamalodayasaṃjñakam |
sahasā tadgatasvāntā dahyamānā smarāgninā || 161 ||
[Analyze grammar]

amuñcantī svaniyamaṃ tadbhogadhyānabhāvitā |
gatvā gandhavatītīraṃ tīrthe tatyāja jīvitam || 162 ||
[Analyze grammar]

tayā bhāvanayā kiṃ na jātābhūdbhogasaṃginī |
nagaryāmekalavyāyāṃ veśyā rūpavatīti sā || 163 ||
[Analyze grammar]

tīrthavrataprabhāvāc ca saiva jātismarā satī |
prasaṅgāccoḍakarṇāya jāpakāya dvijanmane || 164 ||
[Analyze grammar]

svapūrvajanmavṛttāntarahasyaṃ tadavarṇayat |
japakarmaikacittatve kurvāṇasyānuśāsanam || 165 ||
[Analyze grammar]

ante ca śuddhasaṃkalpā yayau veśyāpi sadgatim |
tadrājanyo 'tra yaccittastanmayatvam upaiti saḥ || 166 ||
[Analyze grammar]

evam uktvā sa rājānaṃ snānāya visasarja tam |
munirmadhyāhnasavanaṃ svayaṃ ca niravartayat || 167 ||
[Analyze grammar]

rājā sa puṣkarākṣo 'pi gato vananadītaṭam |
tāṃ dadarśātra vinayavatīṃ puṣpāṇi cinvatīm || 168 ||
[Analyze grammar]

bhāsamānāṃ svavapuṣā prabhām iva vivasvataḥ |
adṛṣṭapūrvaṃ gahanaṃ praviṣṭāṃ kautukādvanam || 169 ||
[Analyze grammar]

keyaṃ syāditi yāvac ca sa cintayati sotsukaḥ |
tāvatkathāṃ niṣaṇṇā sā visrabdhāmavadatsakhīm || 170 ||
[Analyze grammar]

sakhi vidyādharo yo māṃ hartumaicchatpurā sa me |
āgatya śāpamukto 'dya bhartṛprāptimihoktavān || 171 ||
[Analyze grammar]

tac chrutvā pratyavocattāṃ sā sakhī munikanyakām |
astyetanmayi śṛṇvatyāṃ muñjakeśo 'dya hi prage || 172 ||
[Analyze grammar]

itthamukto nijaḥ śiṣyo muninā vijitāsunā |
gaccha tārāvalīraṅkumālināvānaya drutam || 173 ||
[Analyze grammar]

kāmaṃ vinayavatyā hi vatseha duhitustayoḥ |
rājñaś ca puṣkarākṣasya vivāho 'dya bhaviṣyati || 174 ||
[Analyze grammar]

ity ukto guruṇā muñjakeśo yātas tatheti saḥ |
ata ehyāśramapadaṃ gacchāvaḥ sakhi saṃprati || 175 ||
[Analyze grammar]

evaṃ tayokte vinayavatī sātha tato yayau |
puṣkarākṣaś ca śuśrāva sa taddūrādalakṣitaḥ || 176 ||
[Analyze grammar]

jvalatkāmāgnisaṃtāpādiva nadyāṃ nimajjya ca |
jagāma vijitāsostamāśramaṃ sa punarnṛpaḥ || 177 ||
[Analyze grammar]

tatra tārāvalīr aṅkumālinau tau samāgatau |
ānarcatustaṃ praṇataṃ parivavruś ca tāpasāḥ || 178 ||
[Analyze grammar]

tato vedyāṃ svatejobhir bhāsitāyāṃ maharṣiṇā |
dvitīyeneva mūrtena vahninā vijitāsunā || 179 ||
[Analyze grammar]

tasmai sa rājñe vinayavatīṃ tāṃ pratyapādayat |
raṅkumālī dadau cāsmai rathaṃ divyaṃ nabhaścaram || 180 ||
[Analyze grammar]

catuḥ samudrāṃ pṛthivīṃ praśādhi samametayā |
ityetasmai varaṃ cādādvijitāsurmahāmuniḥ || 181 ||
[Analyze grammar]

athaiṣa tadanujñayā navavadhūm upādāya tāṃ nṛpo gaganagāminaṃ tamadhiruhya divyaṃ ratham |
vilaṅghya ca payonidhiṃ sapadi puṣkarākṣastato jagāma nagarīṃ nijāṃ prakṛtinetracandrodayaḥ || 182 ||
[Analyze grammar]

tatra ca jitvā pṛthivīṃ rathaprabhāvādavāptasāmrājyaḥ |
āste sma vinayavatyā sahito bhogāṃścirāya bhuñjānaḥ || 183 ||
[Analyze grammar]

itthaṃ suduṣkaram apisvarasena kāryaṃ siddhyatyanugrahavatīṣviha devatāsu |
tatsvapnadṛṣṭagirijādayitaprasādāt setsyaty abhīṣṭam acireṇa tavāpi deva || 184 ||
[Analyze grammar]

etāṃ niśamya sa vicitrakathāmamātyād autsukyavānadhigamāya śaśāṅkavatyāḥ |
rājātmajaḥ svasacivaiḥ samamujjayinyāṃ buddhiṃ babandha gamanāya mṛgāṅkadattaḥ || 185 ||
[Analyze grammar]