Chapter 12 - agastyacārādhyāyaḥ [agastyacāra-adhyāya]

[English text for this chapter is available]

samudro'ntaḥ śailairmakaranakharotkhātaśikharaiḥ kṛtastoyocchittyā sapadi sutarāṃ yena ruciraḥ |
patanmuktāmiśraiḥ pravaramaṇiratnāmbunivahaiḥ surānpratyādeṣṭuṃ mitamukuṭaratnāniva purā || 1 ||
[sita]
[Analyze grammar]

yena cāmbuharaṇe'pi vidrumairbhūdharaiḥ samaṇiratnavidrumaiḥ |
nirgataistaduragaiśca rājitaḥ sāgaro'dhikataraṃ virājitaḥ || 2 ||
[Analyze grammar]

prasphurattimijalebhajihmagaḥ kṣiptaratnanikaro mahodadhiḥ |
āpadāṃ padagato'pi yāpito yena pītasalilo'maraśriyam || 3 ||
[Analyze grammar]

pracalattimiśuktijaśaṅkhacitaḥ salile'pahṛte'pi patiḥ saritām |
sataraṅgasitotpalahaṃsabhṛtaḥ sarasaḥ śaradīva vibharti rucim || 4 ||
[rucam]
[Analyze grammar]

timisitāmbudharaṃ maṇitārakaṃ sphaṭikacandramanambuśaraddyutiḥ |
phaṇiphaṇopalaraśmiśikhigrahaṃ kuṭilageśaviyacca cakāra yaḥ || 5 ||
[Analyze grammar]

dinakararathamārgavicchittaye'bhyudyataṃ yaccalacchṛṅgamudbhrāntavidyādharāṃsāvasaktapriyāvyagradattāṅkadehāvalambāmbarātyucchritoddhūyamānadhvajaiḥ śobhitam |
karikaṭamadamiśraraktāvalehānuvāsānusāridvirephāvalīnottamāṅgaiḥ kṛtānbāṇapuṣpairivottaṃsakāndhārayadbhirmṛgendraiḥ sanāthīkṛtāntardarīnirjharam || gaganatalamivollikhantaṃ pravṛddhairgajākṛṣṭaphulladrumatrāsavibhrāntamattadvirephāvalīhṛṣṭamandrasvanaiḥ śailakūṭaistarakṣarkṣaśārdūlaśākhāmṛgādhyāsitaiḥ |
rahasi madanasaktayā revayā kāntayevopagūḍhaṃ surādhyāsitodyānamambhośanānnamūlānilāhāraviprānvitaṃ vindhyamastambhayad yaśca tasyodayaḥ śrūyatām || 6 ||
[abhy | gīta]
[Analyze grammar]

udaye ca muneragastyanāmnaḥ kusamāyogamalapradūṣitāni |
hṛdayāni satāmiva svabhāvātpunarambūni bhavanti nirmalāni || 7 ||
[Analyze grammar]

pārśvadvayādhiṣṭhitacakravākāmāpuṣṇatī sasvanahaṃsapaṅktim |
tāmbūlaraktotkaṣitāgradantī vibhāti yoṣeva śaratsahāsā || 8 ||
[sarit]
[Analyze grammar]

indīvarāsannasitotpalānvitā śaradbhramatṣaṭpadapaṅktibhūṣitā |
sabhrūlatākṣepakaṭākṣavīkṣaṇā vidagdhayoṣeva vibhāti sasmarā || 9 ||
[sarit]
[Analyze grammar]

indoḥ payodavigamopahitāṃ vibhūtiṃ draṣṭuṃ taraṅgavalayā kumudaṃ niśāsu |
unmīlayatyalinilīnadalaṃ supakṣma vāpī vilocanamivāsitatārakāntam || 10 ||
[Analyze grammar]

nānāvicitrāmbujahaṃsakokakāraṇḍavāpūrṇataḍāgahastā |
ratnaiḥ prabhūtaiḥ kusumaiḥ phalaiśca bhūryacchatīvārghamagastyanāmne || 11 ||
[Analyze grammar]

salilamamarapājñayojjhitaṃ yaddhanapariveṣṭitamūrtibhirbhujaṅgaiḥ |
phaṇijanitaviṣāgnisampraduṣṭaṃ bhavati śivaṃ tadagastyadarśanena || 12 ||
[Analyze grammar]

smaraṇādapi pāpamapākurute kimuta stutibhirvaruṇāṅgaruhaḥ |
munibhiḥ kathito'sya yathārghavidhiḥ kathayāmi tathaiva narendrahitam || 13 ||
[Analyze grammar]

saṃkhyāvidhānātpratideśamasya vijñāya sandarśanamādiśejjñaḥ |
taccojjayinyāmagatasya kanyāṃ bhāgaiḥ svarākhyaiḥ sphuṭabhāskarasya || 14 ||
[ujjayanyām]
[Analyze grammar]

īṣatprabhinne'ruṇaraśmijālairnaiśe'ndhakāre diśi dakṣiṇasyām |
sāṃvatsarāveditadigvibhāge bhūpo'rghamurvyāṃ prayataḥ prayacchet || 15 ||
[Analyze grammar]

kālodbhavaiḥ surabhibhiḥ kusumaiḥ phalaiśca ratnaiśca sāgarabhavaiḥ kanakāmbaraiśca |
dhenvā vṛṣeṇa paramānnayutaiśca bhakṣyairdadhyakṣataiḥ surabhidhūpavilepanaiśca || 16 ||
[Analyze grammar]

narapatirimamarghaṃ śraddadhāno dadhānaḥ pravigatagadadoṣo nirjitārātipakṣaḥ |
bhavati yadi ca dadyātsapta varṣāṇi samyagjalanidhi raśanāyāḥ svāmitāṃ yāti bhūmeḥ || 17 ||
[rasanāyāḥ]
[Analyze grammar]

dvijo yathālābhamupāhṛtārghaḥ prāpnoti vedānpramadāśca putrān |
vaiśyaśca gāṃ bhūri ghanaṃ ca śūdro rogakṣayaṃ dharmaphalaṃ ca sarve || 18 ||
[Analyze grammar]

rogān karoti paruṣaḥ kapilastvavṛṣṭiṃ dhūmro gavāmaśubhakṛtsphuraṇo bhayāya |
māñjiṣṭharāgasadṛśaḥ kṣudhamāhavāṃśca kuryādaṇuśca purarodhamagastyanāmā || 19 ||
[Analyze grammar]

śātakumbhasadṛśaḥ sphaṭikābhastarpayanniva mahīṃ kiraṇāgraiḥ |
dṛśyate yadi tadā pracurānnā bhūrbhavatyabhayarogajanāḍhyā || 20 ||
[kiraṇaughaiḥ | tataḥ]
[Analyze grammar]

ulkayā vinihataḥ śikhinā vā kṣudbhayaṃ marakameva vidhatte |
dṛśyate sa kila hastagate'rke rohiṇīmupagate'stamupaiti || 21 ||
[dhatte]
[Analyze grammar]