Chapter 12

atha māṃ kṛtakartavyaṃ sukhāsīnamaharmukhe |
vādī jita ivācchāyastrapayā gomukho'bravīt || 1 ||
[Analyze grammar]

ahamaryasutāṃ nītvā gṛhaṃ svagṛhamāgataḥ |
tato'pi vandituṃ devyau narendrāntaḥpuraṃ gataḥ || 2 ||
[Analyze grammar]

vanditā ca vihasyāha devī padmāvatī yathā |
kiṃkāraṇaṃ vadhūradya nāsmānāyāti vanditum || 3 ||
[Analyze grammar]

bhrātrā te kiṃ na muktaiva na vādyāpi vibudhyate |
kopitā vā bhavedbhartrā śiṣṭā duścaritairiti || 4 ||
[Analyze grammar]

athāgat hatoraskā krandantī padmadevikā |
nāsti naḥ svāminītyuktvā devyornipatitā puraḥ || 5 ||
[Analyze grammar]

tato devyau tataḥ śeṣamaśeṣamavarodhanam |
rājā ca śrutavṛttāntaḥ sāsthāno dhairyamatyajat || 6 ||
[Analyze grammar]

tataḥ prāpyācirātsaṃjñāṃ māgadhyā padmadevikā |
kathaṃ jānāsi nāstīti pṛṣṭācaṣṭa niśāmyatām || 7 ||
[Analyze grammar]

yathaiva gomukhenāsau svamāvāsaṃ praveśitā |
tathaiva kagiti ghrāto gandho'smābhiramānuṣaḥ || 8 ||
[Analyze grammar]

akasmācca kṣaṇaṃ nidrāṃ gacchāmaḥ pratibudhya ca |
śūnyāmīkṣāmahe śayyāmaśrīkāṃ nalinīmiva || 9 ||
[Analyze grammar]

tato hā heti vikruṣya samūrchāḥ kṣaṇamāsmahe |
na kvacicca vicinvatyaḥ paśyāmaḥ svāminīmiti || 10 ||
[Analyze grammar]

kaliṅgasenayā tvatra śokagadgadayoditam |
idaṃ tadāgataṃ manya durvidyādharaceṣṭitam || 11 ||
[Analyze grammar]

bālikāmahamādāya pūrvaṃ madanamañcukām |
harmyāgre krīḍayāmi sma candrikāsaṅgaśītale || 12 ||
[Analyze grammar]

ehi vidyādharā ehi gṛhāṇemāṃ surūpikām |
ekāmeva mayā labdhāṃ sutāṃ durlabhikāmiti || 13 ||
[Analyze grammar]

tataścarmāsikeyūrahārādikarabhāsuraḥ |
avātaraddivaḥ ko'pi divyagandhasragambaraḥ || 14 ||
[Analyze grammar]

dūrādeva ca māṃ bhītāṃ mā bhaiṣīriti sāntvayan |
gambhīradhvanivitrastatanayāmidamabravīt || 15 ||
[Analyze grammar]

yadi mahyamiyaṃ dattā satyena tanayā tvayā |
tato muñca nayāmyenāṃ nyāsabhūtā hi kanyakā || 16 ||
[Analyze grammar]

nāmnā mānasavego'haṃ vidyādharagaṇādhipaḥ |
sarvavijñeyavijñānamanojvalitadhīriti || 17 ||
[Analyze grammar]

anicchantī tatastasya saṃnidhau ciramāsitum |
prayatnāddhairyamādhāya pragalbheva tamabravam || 18 ||
[Analyze grammar]

arhatyavaśyameveyamīdṛśī tvādṛśaṃ patim |
na punardīyate tāvadbālikā śaiśavāditi || 19 ||
[Analyze grammar]

atha māmabhivādyāsāv ulkāsaṃghātabhāsuraḥ |
dṛśyamāno mahāvegaḥ kṣaṇenāntarhito'bhavat || 20 ||
[Analyze grammar]

tena bravīmi tenādya tatsmṛtvā kṣudrabuddhinā |
vidyādharādhamenāsau nītā yadi bhavediti || 21 ||
[Analyze grammar]

sarvathā dṛśyate neha devī madanamañjukā |
yadatrānantaraṃ nyāyyaṃ tadanuṣṭhīyatāmiti || 22 ||
[Analyze grammar]

tataḥ samutpatanneva śokaḥ krodhena māmakaḥ |
preritaḥ pavaneneva prabalena balāhakaḥ || 23 ||
[Analyze grammar]

strītaskara durācāra mūḍha mānasavegaka |
tiṣṭha tiṣṭha kva yāsīti prālapaṃ gaganonmukhaḥ || 24 ||
[Analyze grammar]

yugapatkrodhaśokābhyāṃ śoṣito'haṃ krameṇa ca |
yathānilatuṣārābhyāṃ śiśire kamalākaraḥ || 25 ||
[Analyze grammar]

gomukhastu nṛpāhutaḥ pratyāgatyedamabravīt |
kimetaditi pṛṣṭena vṛttānto'yaṃ mayoditaḥ || 26 ||
[Analyze grammar]

tataḥ saṃbhramavisrastamākarṣannuttarāmbaram |
viṣādākulito rājā prasthito yuṣmadantikam || 27 ||
[Analyze grammar]

antare ca rumaṇvantamāha keyaṃ pramāditā |
sarvathā khyāpitaṃ lokairbhavatāṃ nītikauśalam || 28 ||
[Analyze grammar]

yuktaṃ tadā yadālocya mahatsīdatprayojanam |
vipralabdho'smi yuṣmābhirdevyā vāsavadattayā || 29 ||
[Analyze grammar]

adhunā dhriyamāṇe'pi samarthasacive mayi |
apanītā vadhūḥ kasmādbālānmama sutāditi || 30 ||
[Analyze grammar]

sa tamāha nivartadhvamalaṃ tatra gatena vaḥ |
yuṣmāndṛṣṭvā hi sa śiśuḥ prāṇānapi parityajet || 31 ||
[Analyze grammar]

ājñāpayatha māṃ yacca yacca vijñāpayāmi vaḥ |
āsīnānāsane tena nivṛtya sthīyatāmiti || 32 ||
[Analyze grammar]

upaviṣṭāya cācaṣṭa sphuṭaṃ divyena sā hṛtā |
anāthāpi na vaḥ kācitkenacitparibhūyate || 33 ||
[Analyze grammar]

yāvadantaḥpurāṭavyau yāvacca gṛhapakṣiṇaḥ |
nāstyasau yo na cāsmābhirīkṣitaścāracakṣuṣā || 34 ||
[Analyze grammar]

ākāśe tu na me prajñā kramate divyagocare |
tena vidyādhareṇāsau hṛteti hṛdaye mama || 35 ||
[Analyze grammar]

atha vā bhavatūdyāne yuvarājaḥ parīkṣatām |
kadācitkupitā bhartre tatrāsīta vadhūriti || 36 ||
[Analyze grammar]

kupitānāṃ hi bhartṛbhyaḥ śrūyante kulayoṣitām |
sādhubhiḥ kathyamānāni pañca sthānāni tad yathā || 37 ||
[Analyze grammar]

śvaśrūbhrātṛnanāndṛṇāṃ bhartṛmitrasya vā gṛham |
duṣṭasaṃcāraśūnyāni mandiropavanāni vā || 38 ||
[Analyze grammar]

atrāntare kathitavānākhyānaṃ marubhūtikaḥ |
prastāve yanmayā pūrvaṃ śrutaṃ tadavadhīyatām || 39 ||
[Analyze grammar]

aṣṭāvakrasya duhitā sāvitrī nāma kanyakā |
āsīd yā caritākāraiḥ sāvitrīmatiricyate || 40 ||
[Analyze grammar]

aṣṭāvakramayāciṣṭa kadācidṛṣiraṅgirāḥ |
brahmannakṛtadāro'smi sutā me dīyatāmiti || 41 ||
[Analyze grammar]

so'bravīdbhavataḥ ko'nyastrailokye'pi varo varaḥ |
kiṃ tu datteyamanyasmai kṣamatāṃ bhagavāniti || 42 ||
[Analyze grammar]

tasya bhrātā vṛṣo nāma sa cāṅgirasamabravīt |
amṛtā nāma duhitā mama sā gṛhyatāmiti || 43 ||
[Analyze grammar]

pariṇīya tu tāṃ kanyāmamṛtāmamṛtopamām |
ātmānamaṅgirā mene pītāmṛtamivāmṛtam || 44 ||
[Analyze grammar]

sā kadācitkathaṃcittaṃ kāraṇe'lpe'pi pīḍitā |
upālabdhavatī nāthamṛṣiputrasya vallabhā || 45 ||
[Analyze grammar]

cakṣūraktena bhavatā sāvitrī svayamarthitā |
ahaṃ tvanicchate tubhyaṃ pitrā dattā balāditi || 46 ||
[Analyze grammar]

nānāvidhaiḥ sa śapathairamṛtāṃ parisantvayan |
kaṃcidabhyanayatkālamekadāstaṃgate ravau || 47 ||
[Analyze grammar]

paścātsandhyāmupāsīnamāsīnaṃ maunadhāriṇam |
apṛcchadamṛtāgatya kiṃ dhyāyati bhavāniti || 48 ||
[Analyze grammar]

tena vanditasaṃdhyena cirāduktaṃ nanu priye |
devīṃ vihāya sāvitrīṃ kimanyaccintayāmyaham || 49 ||
[Analyze grammar]

atha sā śrutamityuktvā svasminnāśramapādape |
devatābhyo namaskṛtya śarīramudalambayat || 50 ||
[Analyze grammar]

ākṛṣṭakaṇṭhapāśā ca puraḥ praikṣata devatām |
vidyutpiṅgajaṭābhārāṃ sākṣamālākamaṇḍalum || 51 ||
[Analyze grammar]

tato dantaprabhājālaprabhāsitatapovanā |
devatāvocadamṛtāmamṛteneva siñcatī || 52 ||
[Analyze grammar]

putri mā sma tyaja prāṇāndustyajāndharmasādhanān |
straiṇamajñānamāśritya saṃtuṣṭo hi patistvayā || 53 ||
[Analyze grammar]

nāṣṭāvakrasya duhitā sāvitrī tena cintitā |
kiṃ tvahaṃ brahmarudraādisaptalokanamaskṛtā || 54 ||
[Analyze grammar]

sarvathā matprasādātte putri putro bhaviṣyati |
balena tapasā yasya na samāno bhaviṣyati || 55 ||
[Analyze grammar]

iti dattvā varaṃ tasyai sāvitrī divamāśrayat |
amṛtāpi gatāśaṅkā bhartrā saha sameyuṣī || 56 ||
[Analyze grammar]

tena bravīmi kupitā kadācidamṛteva sā |
udyānaṃ praviśetttatra svayamanviṣyatāmiti || 57 ||
[Analyze grammar]

athāhaṃ śibikārūḍhaḥ prasthito veśamasmṛtiḥ |
cakṣuścetoharākārāḥ paśyanveśyāḥ samūhaśaḥ || 58 ||
[Analyze grammar]

āsīcca mama devībhyāṃ prayogo'yamanuṣṭhitaḥ |
api nāmāsya kasyāṃcitstriyāṃ bhāvo bhavediti || 59 ||
[Analyze grammar]

tadāyaṃ mohasaṃkalpo na hi saṃkalpajanmanaḥ |
rateranyāsu saṃkalpaḥ pramadāsu pravartate || 60 ||
[Analyze grammar]

tataḥ saṃkalpayannevamacandrikamivāmbaram |
kāntāmāturgṛhaṃ kāntaṃ kāntāśūnyamupāgamam || 61 ||
[Analyze grammar]

prakāśānaprakāśāṃśca pradeśānbahuśo bahūn |
anviṣyanto bhramāma sma na cāpaśyāma tatra tām || 62 ||
[Analyze grammar]

gomukhoddiṣṭamārgaśca praviśya gṛhakānanam |
pṛcchāmi sma priyāvārttāṃ sākṣiśākhāmṛgāṇḍajān || 63 ||
[Analyze grammar]

kebhyaścitkupitaḥ śāpān kebhyaścidvitaran karān |
viḍambayannaśāstrajñamityutkaṭarasaṃ naṭam || 64 ||
[Analyze grammar]

athopagamya tvaritaḥ prahṛṣṭo marubhūtikaḥ |
aryaputrāryaduhitā mayā dṛṣṭetyabhāṣata || 65 ||
[Analyze grammar]

tatastasya parāmṛjya pāṇinā vikasanmukham |
api satyamidaṃ saumya syātkrīḍetyahamabravam || 66 ||
[Analyze grammar]

so'bravītsatyamapyetatkrīḍā yaiṣātiharṣajā |
asatye hyatra yā krīḍā tadunmattavijṛmbhitam || 67 ||
[Analyze grammar]

atha vālaṃ vimarśena mahābhyudayavairiṇā |
tvaritaṃ gamyatāṃ yasmānnārtaḥ kālamudīkṣate || 68 ||
[Analyze grammar]

paśyāmi sma tato gacchannaśokaśiśumagrataḥ |
raktaṃ kusumasaṃghātamayamābhūmipallavam || 69 ||
[Analyze grammar]

akāle kimaśokasya kusumānīti cintayan |
tasya skandhe hriyālīnamapaśyaṃ prāṇadāyinīm || 70 ||
[Analyze grammar]

āsīcca mama kiṃ citraṃ yatpādasparśadohadaḥ |
sadyaḥ kusumito'śokaḥ prāpya sarvāṅgasaṃgatim || 71 ||
[Analyze grammar]

idamatra mahat citraṃ yadālokitametayā |
vanadevatayodyānaṃ sakalaṃ na vijṛmbhitam || 72 ||
[Analyze grammar]

sarvathācetanā vṛkṣāḥ kāntāyā darśane sati |
subhage nirvikāratvādaṅgāratuṣabhasmavat || 73 ||
[Analyze grammar]

athāliṅgitumārabdhaḥ sānurāgamahaṃ ca tām |
tayā cāṅgāni saṃhṛtya mā tāvaditi vāritaḥ || 74 ||
[Analyze grammar]

tataḥ prasarabhaṅgena vilakṣamupalakṣya mām |
sābravīdaparodho'yamaryaputreṇa mṛṣyatām || 75 ||
[Analyze grammar]

ārādhitavatī yakṣamahaṃ kanyā satī yathā |
aryaputrasya bhūyāsaṃ dayitā paricārikā || 76 ||
[Analyze grammar]

tubhyaṃ kārye ca saṃsiddhe śamīlājasugandhinā |
pānaṃ hastena dāsyāmi prasīdatu bhavāniti || 77 ||
[Analyze grammar]

sa ca tasya prasādānme yātaḥ siddhiṃ manorathaḥ |
āyācitaṃ tu yakṣāya na mayā pratiyācitam || 78 ||
[Analyze grammar]

tenāhaṃ pānaśauṇḍena nītā dhanapateḥ sabhām |
vṛttāntaḥ kathitaścāyamathokto dhanadena saḥ || 79 ||
[Analyze grammar]

āyācitamiyaṃ tubhyamacireṇaiva dāsyati |
nītvā samarpaya kṣipraṃ dārakāya vadhūmiti || 80 ||
[Analyze grammar]

tena cāhamihānītā gaganāgamanācca me |
śarīraṃ paruṣībhūtaṃ vāritā stha tato mayā || 81 ||
[Analyze grammar]

tasmai yakṣāya yuṣmābhiḥ sa me saṃpādyatāmiti || 82 ||
[Analyze grammar]

athāsyai ganikādhyakṣo rājādeśaṃ nyavedayat |
adyārabhya kulastrītvaṃ bhavatīnāṃ bhavatviti || 83 ||
[Analyze grammar]

taṃ cākarṇya mahāmanorathamidaṃ pūrṇaṃ cirātkāṅkṣitaṃ naiva prītivikāsihārihasitaṃ dhatte sma kāntāmukham |
yācñāvṛttikadarthitairbahubhirapyāptairna hi prārthakāḥ prītiṃ yānti tathā yathā tanubhirapyarthaiḥ sukhābhyāgataiḥ || 84 ||
[Analyze grammar]