Chapter 86

[English text for this chapter is available]

subhadrāharaṇaṃ śrīkṛṣṇasya mithilāgamanaṃ tatra bahulāśvaśrutadevayoḥ sadmani sakṛdeva praveśaḥ |
śrīrājovāca |
brahman veditumicchāmaḥ svasāraṃ rāmakṛṣṇayoḥ |
yathopayeme vijayo yā mamāsīt pitāmahī || 1 ||
[Analyze grammar]

śrīśuka uvāca |
arjunastīrthayātrāyāṃ paryaṭan avanīṃ prabhuḥ |
gataḥ prabhāsamaśrṛṇon mātuleyīṃ sa ātmanaḥ || 2 ||
[Analyze grammar]

duryodhanāya rāmastāṃ dāsyatīti na cāpare |
tallipsuḥ sa yatirbhūtvā tridaṇḍī dvārakāmagāt || 3 ||
[Analyze grammar]

tatra vai vārṣikān māsān avātsīt svārthasādhakaḥ |
pauraiḥ sabhājito'bhīkṣṇaṃ rāmeṇājānatā ca saḥ || 4 ||
[Analyze grammar]

ekadā gṛhamānīya ātithyena nimaṃtrya tam |
śraddhayopahṛtaṃ bhaikṣyaṃ balena bubhuje kila || 5 ||
[Analyze grammar]

so'paśyattatra mahatīṃ kanyāṃ vīramanoharām |
prītyutphullekṣaṇastasyāṃ bhāvakṣubdhaṃ mano dadhe || 6 ||
[Analyze grammar]

sāpi taṃ cakame vīkṣya nārīṇāṃ hṛdayaṃgamam |
hasantī vrīḍitāpāṅgī tannyastahṛdayekṣaṇā || 7 ||
[Analyze grammar]

tāṃ paraṃ samanudhyāyan nantaraṃ prepsurarjunaḥ |
na lebhe śaṃ bhramaccittaḥ kāmenātibalīyasā || 8 ||
[Analyze grammar]

mahatyāṃ devayātrāyāṃ rathasthāṃ durganirgatāṃ |
jahārānumataḥ pitroḥ kṛṣṇasya ca mahārathaḥ || 9 ||
[Analyze grammar]

rathastho dhanurādāya śūrāṃścārundhato bhaṭān |
vidrāvya krośatāṃ svānāṃ svabhāgaṃ mṛgarāḍiva || 10 ||
[Analyze grammar]

tacchrutvā kṣubhito rāmaḥ parvaṇīva mahārṇavaḥ |
gṛhītapādaḥ kṛṣṇena suhṛdbhiścānusāmyata || 11 ||
[Analyze grammar]

prāhiṇotpāribarhāṇi varavadhvormudā balaḥ |
mahādhanopaskarebha rathāśvanarayoṣitaḥ || 12 ||
[Analyze grammar]

śrīśuka uvāca |
kṛṣṇasyāsīd dvijaśreṣṭhaḥ śrutadeva iti śrutaḥ |
kṛṣṇaikabhaktyā pūrṇārthaḥ śāntaḥ kaviralampaṭaḥ || 13 ||
[Analyze grammar]

sa uvāsa videheṣu mithilāyāṃ gṛhāśramī |
anīhayāgatāhārya nirvartitanijakriyaḥ || 14 ||
[Analyze grammar]

yātrāmātraṃ tvaharahaḥ daivād upanamatyuta |
nādhikaṃ tāvatā tuṣṭaḥ kriyā cakre yathocitāḥ || 15 ||
[Analyze grammar]

tathā tadrāṣṭrapālo'ṅga bahulāśva iti śrutaḥ |
maithilo nirahammāna ubhāvapyacyutapriyau || 16 ||
[Analyze grammar]

tayoḥ prasanno bhagavān dārukeṇāhṛtaṃ ratham |
āruhya sākaṃ munibhiḥ videhān prayayau prabhuḥ || 17 ||
[Analyze grammar]

nārado vāmadevo'triḥ kṛṣṇo rāmo'sito'ruṇiḥ |
ahaṃ bṛhaspatiḥ kaṇvo maitreyaścyavanādayaḥ || 18 ||
[Analyze grammar]

tatra tatra tamāyāntaṃ paurā jānapadā nṛpa |
upatasthuḥ sārghyahastā grahaiḥ sūryamivoditam || 19 ||
[Analyze grammar]

ānartadhanvakurujāṅgalakaṅkamatsya |
pāñcālakuntimadhukekayakośalārṇāḥ |
anye ca tanmukhasarojamudārahāsa |
snigdhekṣaṇaṃ nṛpa papurdṛśibhirnṛnāryaḥ || 20 ||
[Analyze grammar]

tebhyaḥ svavīkṣaṇavinaṣṭatamisradṛgbhyaḥ |
kṣemaṃ trilokagururarthadṛśaṃ ca yacchan |
śrṛṇavan digantadhavalaṃ svayaśo'śubhaghnaṃ |
gītaṃ surairnṛbhiragāt śanakairvidehān || 21 ||
[Analyze grammar]

te'cyutaṃ prāptamākarṇya paurā jānapadā nṛpa |
abhīyurmuditāstasmai gṛhītārhaṇapāṇayaḥ || 22 ||
[Analyze grammar]

dṛṣṭvā ta uttamaḥślokaṃ prītyutphulānanāśayāḥ |
kairdhṛtāñjalibhirnemuḥ śrutapūrvān tathā munīn || 23 ||
[Analyze grammar]

svānugrahāya samprāptaṃ manvānau taṃ jagadgurum |
maithilaḥ śrutadevaśca pādayoḥ petatuḥ prabhoḥ || 24 ||
[Analyze grammar]

nyamantrayetāṃ dāśārhaṃ ātithyena saha dvijaiḥ |
maithilaḥ śrutadevaśca yugapat saṃhatāñjalī || 25 ||
[Analyze grammar]

bhagavān tadabhipretya dvayoḥ priyacikīrṣayā |
ubhayorāviśad gehaṃ ubhābhyāṃ tadalakṣitaḥ || 26 ||
[Analyze grammar]

śrotumapyasatāṃ dūrān janakaḥ svagṛhāgatān |
ānīteṣvāsanāgryeṣu sukhāsīnān mahāmanāḥ || 27 ||
[Analyze grammar]

pravṛddhabhaktyā uddharṣa hṛdayāsrāvilekṣaṇaḥ |
natvā tadaṅghrīn prakṣālya tadapo lokapāvanīḥ || 28 ||
[Analyze grammar]

sakuṭumbo vahanmūrdhnā pūjayāṃ cakra īśvarān |
gandhamālyāmbarākalpa dhūpadīpārghyagovṛṣaiḥ || 29 ||
[Analyze grammar]

vācā madhurayā prīṇan idamāhānnatarpitān |
pādāvaṅkagatau viṣṇoḥ saṃspṛśañchanakairmudā || 30 ||
[Analyze grammar]

śrībahulāśva uvāca |
bhavānhi sarvabhūtānāṃ ātmā sākṣī svadṛg vibho |
atha nastvatpadāmbhojaṃ smaratāṃ darśanaṃ gataḥ || 31 ||
[Analyze grammar]

svavacastadṛtaṃ kartuṃ asmaddṛggocaro bhavān |
yadātthaikāntabhaktān me nānantaḥ śrīrajaḥ priyaḥ || 32 ||
[Analyze grammar]

ko nu tvaccaraṇāmbhojaṃ evaṃvid visṛjet pumān |
niṣkiñcanānāṃ śāntānāṃ munīnāṃ yastvamātmadaḥ || 33 ||
[Analyze grammar]

yo'vatīrya yadorvaṃśe nṛṇāṃ saṃsaratāmiha |
yaśo vitene tacchāntyai trailokyavṛjināpaham || 34 ||
[Analyze grammar]

namastubhyaṃ bhagavate kṛṣṇāyākuṇṭhamedhase |
nārāyaṇāya ṛṣaye suśāntaṃ tapa īyuṣe || 35 ||
[Analyze grammar]

dināni katicid bhūman gṛhān no nivasa dvijaiḥ |
sametaḥ pādarajasā punīhīdaṃ nimeḥ kulam || 36 ||
[Analyze grammar]

ityupāmantrito rājñā bhagavān lokabhāvanaḥ |
uvāsa kurvan kalyāṇaṃ mithilānarayoṣitām || 37 ||
[Analyze grammar]

śrutadevo'cyutaṃ prāptaṃ svagṛhāñjanako yathā |
natvā munīn susaṃhṛṣṭo dhunvan vāso nanarta ha || 38 ||
[Analyze grammar]

tṛṇapīṭhabṛṣīṣvetān ānīteṣūpaveśya saḥ |
svāgatenābhinandyāṅghrīn sabhāryo'vanije mudā || 39 ||
[Analyze grammar]

tadambhasā mahābhāga ātmānaṃ sagṛhānvayam |
snāpayāṃ cakra uddharṣo labdhasarvamanorathaḥ || 40 ||
[Analyze grammar]

phalārhaṇośīraśivāmṛtāmbubhiḥ |
mṛdā surabhyā tulasīkuśāmbujaiḥ |
ārādhayāmāsa yathopapannayā |
saparyayā sattvavivardhanāndhasā || 41 ||
[Analyze grammar]

sa tarkayāmāsa kuto mamānvabhūd |
gṛhāndhakupe patitasya saṅgamaḥ |
yaḥ sarvatīrthāspadapādareṇubhiḥ |
kṛṣṇena cāsyātmaniketabhūsuraiḥ || 42 ||
[Analyze grammar]

sūpaviṣṭān kṛtātithyān śrutadeva upasthitaḥ |
sabhāryasvajanāpatya uvācāṅghryabhimarśanaḥ || 43 ||
[Analyze grammar]

śrutadeva uvāca |
nādya no darśanaṃ prāptaḥ paraṃ paramapūruṣaḥ |
yarhīdaṃ śaktibhiḥ sṛṣṭvā praviṣṭo hyātmasattayā || 44 ||
[Analyze grammar]

yathā śayānaḥ puruṣo manasaivātmamāyayā |
sṛṣṭvā lokaṃ paraṃ svāpnaṃ anuviśyāvabhāsate || 45 ||
[Analyze grammar]

śrṛṇvatāṃ gadatāṃ śaśvad arcatāṃ tvābhivandatām |
nṛṇāṃ saṃvadatāmantaḥ hṛdi bhāsyamalātmanām || 46 ||
[Analyze grammar]

hṛdistho'pyatidūrasthaḥ karmavikṣiptacetasām |
ātmaśaktibhiragrāhyo'pi antyupetaguṇātmanām || 47 ||
[Analyze grammar]

namo'stu te'dhyātmavidāṃ parātmane |
anātmane svātmavibhaktamṛtyave |
sakāraṇākāraṇaliṅgamīyuṣe |
svamāyayāsaṃvṛtaruddhadṛṣṭaye || 48 ||
[Analyze grammar]

sa tvaṃ śādhi svabhṛtyān naḥ kiṃ deva karavāmahe |
etadanto nṛṇāṃ kleśo yadbhavānakṣigocaraḥ || 49 ||
[Analyze grammar]

śrīśuka uvāca |
taduktamityupākarṇya bhagavān praṇatārtihā |
gṛhītvā pāṇinā pāṇiṃ prahasan tamuvāca ha || 50 ||
[Analyze grammar]

śrībhagavānuvāca |
brahmaṃste'nugrahārthāya samprāptān viddhyamūn munīn |
sañcaranti mayā lokān punantaḥ pādareṇubhiḥ || 51 ||
[Analyze grammar]

devāḥ kṣetrāṇi tīrthāni darśanasparśanārcanaiḥ |
śanaiḥ punanti kālena tadapyarhattamekṣayā || 52 ||
[Analyze grammar]

brāhmaṇo janmanā śreyān sarveṣāṃ prāṇināmiha |
tapasā vidyayā tuṣṭyā kimu matkalayā yutaḥ || 53 ||
[Analyze grammar]

na brāhmaṇānme dayitaṃ rūpametaccaturbhujam |
sarvavedamayo vipraḥ sarvadevamayo hyaham || 54 ||
[Analyze grammar]

duṣprajñā aviditvaivaṃ avajānantyasūyavaḥ |
guruṃ māṃ vipramātmānaṃ arcādāvijyadṛṣṭayaḥ || 55 ||
[Analyze grammar]

carācaramidaṃ viśvaṃ bhāvā ye cāsya hetavaḥ |
mad rūpāṇīti cetasya ādhatte vipro madīkṣayā || 56 ||
[Analyze grammar]

tasmād brahmaṛṣīnetān brahman macchraddhayārcaya |
evaṃ cedarcito'smyaddhā nānyathā bhūribhūtibhiḥ || 57 ||
[Analyze grammar]

śrīśuka uvāca |
sa itthaṃ prabhunādiṣṭaḥ sahakṛṣṇān dvijottamān |
ārādhyaikātmabhāvena maithilaścāpa sadgatim || 58 ||
[Analyze grammar]

evaṃ svabhaktayo rājan bhagavān bhaktabhaktimān |
uṣitvā'diśya sanmārgaṃ punardvāravatīmagāt || 59 ||
[Analyze grammar]

iti śrīmad‍bhāgavate mahāpurāṇe pāramahaṃsyāṃ |
saṃhitāyāṃ daśamaskandhe uttarārdhe |
śrutadevānugraho nāma ṣaḍaśītitamo'dhyāyaḥ || 86 ||
[Analyze grammar]