Chapter 85

[English text for this chapter is available]

vasudevamukhena bhagavattattvapratipādanaṃ bhagavatā devakīprārthanayā tadīya mṛtaputrāṇāṃ ānayanaṃ ca |
śrībādarāyaṇiruvāca |
athaikadātmajau prāptau kṛtapādābhivandanau |
vasudevo'bhinandyāha prītyā saṅkarṣaṇācyutau || 1 ||
[Analyze grammar]

munīnāṃ sa vacaḥ śrutvā putrayordhāmasūcakam |
tadvīryairjātaviśrambhaḥ paribhāṣyābhyabhāṣata || 2 ||
[Analyze grammar]

kṛṣṇa kṛṣṇa mahāyoginsaṅkarṣaṇa sanātana |
jāne vāmasya yatsākṣātpradhānapuruṣau parau || 3 ||
[Analyze grammar]

yatra yena yato yasya yasmai yadyadyathā yadā |
syādidaṃ bhagavānsākṣātpradhānapuruṣeśvaraḥ || 4 ||
[Analyze grammar]

etannānāvidhaṃ viśvamātmasṛṣṭamadhokṣaja |
ātmanānupraviśyātmanprāṇo jīvo bibharṣyaja || 5 ||
[Analyze grammar]

prāṇādīnāṃ viśvasṛjāṃ śaktayo yāḥ parasya tāḥ |
pāratantryādvai sādṛśyād dvayośceṣṭaiva ceṣṭatām || 6 ||
[Analyze grammar]

kāntistejaḥ prabhā sattā candrāgnyarkarkṣavidyutām |
yatsthairyaṃ bhūbhṛtāṃ bhūmervṛttirgandho'rthato bhavān || 7 ||
[Analyze grammar]

tarpaṇaṃ prāṇanamapāṃ deva tvaṃ tāśca tadrasaḥ |
ojaḥ saho balaṃ ceṣṭā gatirvāyostaveśvara || 8 ||
[Analyze grammar]

diśāṃ tvamavakāśo'si diśaḥ khaṃ sphoṭa āśrayaḥ |
nādo varṇastvamaoṃkāra ākṛtīnāṃ pṛthakkṛtiḥ || 9 ||
[Analyze grammar]

indriyaṃ tvindriyāṇāṃ tvaṃ devāśca tadanugrahaḥ |
avabodho bhavānbuddherjīvasyānusmṛtiḥ satī || 10 ||
[Analyze grammar]

bhūtānāmasi bhūtādirindriyāṇāṃ ca taijasaḥ |
vaikāriko vikalpānāṃ pradhānamanuśāyinam || 11 ||
[Analyze grammar]

naśvareṣviha bhāveṣu tadasi tvamanaśvaram |
yathā dravyavikāreṣu dravyamātraṃ nirūpitam || 12 ||
[Analyze grammar]

sattvamrajastama iti guṇāstadvṛttayaśca yāḥ |
tvayyaddhā brahmaṇi pare kalpitā yogamāyayā || 13 ||
[Analyze grammar]

tasmānna santyamī bhāvā yarhi tvayi vikalpitāḥ |
tvaṃ cāmīṣu vikāreṣu hyanyadā vyāvahārikaḥ || 14 ||
[Analyze grammar]

guṇapravāha etasminnabudhāstvakhilātmanaḥ |
gatiṃ sūkṣmāmabodhena saṃsarantīha karmabhiḥ || 15 ||
[Analyze grammar]

yadṛcchayā nṛtāṃ prāpya sukalpāmiha durlabhām |
svārthe pramattasya vayo gataṃ tvanmāyayeśvara || 16 ||
[Analyze grammar]

asāvahammamaivaite dehe cāsyānvayādiṣu |
snehapāśairnibadhnāti bhavānsarvamidaṃ jagat || 17 ||
[Analyze grammar]

yuvāṃ na naḥ sutau sākṣātpradhānapuruṣeśvarau |
bhūbhārakṣatrakṣapaṇa avatīrṇau tathāttha ha || 18 ||
[Analyze grammar]

tatte gato'smyaraṇamadya padāravindam |
āpannasaṃsṛtibhayāpahamārtabandho |
etāvatālamalamindriyalālasena |
martyātmadṛktvayi pare yadapatyabuddhiḥ || 19 ||
[Analyze grammar]

sūtīgṛhe nanu jagāda bhavānajo nau |
sañjajña ityanuyugaṃ nijadharmaguptyai |
nānātanūrgaganavadvidadhajjahāsi |
ko veda bhūmna urugāya vibhūtimāyām || 20 ||
[Analyze grammar]

śrīśuka uvāca |
ākarṇyetthaṃ piturvākyaṃ bhagavānsātvatarṣabhaḥ |
pratyāha praśrayānamraḥ prahasanślakṣṇayā girā || 21 ||
[Analyze grammar]

śrībhagavānuvāca |
vaco vaḥ samavetārthaṃ tātaitadupamanmahe |
yannaḥ putrānsamuddiśya tattvagrāma udāhṛtaḥ || 22 ||
[Analyze grammar]

ahaṃ yūyamasāvārya ime ca dvārakaukasaḥ |
sarve'pyevaṃ yaduśreṣṭha vimṛgyāḥ sacarācaram || 23 ||
[Analyze grammar]

ātmā hyekaḥ svayaṃjyotirnityo'nyo nirguṇo guṇaiḥ |
ātmasṛṣṭaistatkṛteṣu bhūteṣu bahudheyate || 24 ||
[Analyze grammar]

khaṃ vāyurjyotirāpo bhūstatkṛteṣu yathāśayam |
āvistiro'lpabhūryeko nānātvaṃ yātyasāvapi || 25 ||
[Analyze grammar]

śrīśuka uvāca |
evaṃ bhagavatā rājanvasudeva udāhṛtaḥ |
śrutvā vinaṣṭanānādhīstūṣṇīṃ prītamanā abhūt || 26 ||
[Analyze grammar]

atha tatra kuruśreṣṭha devakī sarvadevatā |
śrutvānītaṃ guroḥ putramātmajābhyāṃ suvismitā || 27 ||
[Analyze grammar]

kṛṣṇarāmau samāśrāvya putrānkaṃsavihiṃsitān |
smarantī kṛpaṇaṃ prāha vaiklavyādaśrulocanā || 28 ||
[Analyze grammar]

śrīdevakyuvāca |
rāma rāmāprameyātmankṛṣṇa yogeśvareśvara |
vedāhaṃ vāṃ viśvasṛjāmīśvarāvādipūruṣau || 29 ||
[Analyze grammar]

kalavidhvastasattvānāṃ rājñāmucchāstravartinām |
bhūmerbhārāyamāṇānāmavatīrṇau kilādya me || 30 ||
[Analyze grammar]

yasyāṃśāṃśāṃśabhāgena viśvotpattilayodayāḥ |
bhavanti kila viśvātmaṃstaṃ tvādyāhaṃ gatiṃ gatā || 31 ||
[Analyze grammar]

cirānmṛtasutādāne guruṇā kila coditau |
āninyathuḥ pitṛsthānādgurave gurudakṣiṇām || 32 ||
[Analyze grammar]

tathā me kurutaṃ kāmaṃ yuvāṃ yogeśvareśvarau |
bhojarājahatānputrānkāmaye draṣṭumāhṛtān || 33 ||
[Analyze grammar]

ṛṣiruvāca |
evaṃ sañcoditau mātrā rāmaḥ kṛṣṇaśca bhārata |
sutalaṃ saṃviviśaturyogamāyāmupāśritau || 34 ||
[Analyze grammar]

tasminpraviṣṭāvupalabhya daityarāḍ |
viśvātmadaivaṃ sutarāṃ tathātmanaḥ |
taddarśanāhlādapariplutāśayaḥ |
sadyaḥ samutthāya nanāma sānvayaḥ || 35 ||
[Analyze grammar]

tayoḥ samānīya varāsanaṃ mudā niviṣṭayostatra mahātmanostayoḥ |
dadhāra pādāvavanijya tajjalaṃ savṛnda ābrahma punadyadambu ha || 36 ||
[Analyze grammar]

samarhayāmāsa sa tau vibhūtibhirmahārhavastrābharaṇānulepanaiḥ |
tāmbūladīpāmṛtabhakṣaṇādibhiḥ svagotravittātmasamarpaṇena ca || 37 ||
[Analyze grammar]

sa indraseno bhagavatpadāmbujaṃ bibhranmuhuḥ premavibhinnayā dhiyā |
uvāca hānandajalākulekṣaṇaḥ prahṛṣṭaromā nṛpa gadgadākṣaram || 38 ||
[Analyze grammar]

baliruvāca |
namo'nantāya bṛhate namaḥ kṛṣṇāya vedhase |
sāṅkhyayogavitānāya brahmaṇe paramātmane || 39 ||
[Analyze grammar]

darśanaṃ vāṃ hi bhūtānāṃ duṣprāpaṃ cāpyadurlabham |
rajastamaḥ svabhāvānāṃ yannaḥ prāptau yadṛcchayā || 40 ||
[Analyze grammar]

daityadānavagandharvāḥ siddhavidyādhracāraṇāḥ |
yakṣarakṣaḥ piśācāśca bhūtapramathanāyakāḥ || 41 ||
[Analyze grammar]

viśuddhasattvadhāmnyaddhā tvayi śāstraśarīriṇi |
nityaṃ nibaddhavairāste vayaṃ cānye ca tādṛśāḥ || 42 ||
[Analyze grammar]

kecanodbaddhavaireṇa bhaktyā kecana kāmataḥ |
na tathā sattvasaṃrabdhāḥ sannikṛṣṭāḥ surādayaḥ || 43 ||
[Analyze grammar]

idamitthamiti prāyastava yogeśvareśvara |
na vidantyapi yogeśā yogamāyāṃ kuto vayam || 44 ||
[Analyze grammar]

tannaḥ prasīda nirapekṣavimṛgyayuṣmat |
pādāravindadhiṣaṇānyagṛhāndhakūpāt |
niṣkramya viśvaśaraṇāṅghryupalabdhavṛttiḥ |
śānto yathaika uta sarvasakhaiścarāmi || 45 ||
[Analyze grammar]

śādhyasmānīśitavyeśa niṣpāpānkuru naḥ prabho |
pumānyacchraddhayātiṣṭhaṃścodanāyā vimucyate || 46 ||
[Analyze grammar]

śrībhagavānuvāca |
āsanmarīceḥ ṣaṭputrā ūrṇāyāṃ prathame'ntare |
devāḥ kaṃ jahasurvīkṣya sutaṃ yabhitumudyatam || 47 ||
[Analyze grammar]

tenāsurīmaganyonimadhunāvadyakarmaṇā |
hiraṇyakaśiporjātā nītāste yogamāyayā || 48 ||
[Analyze grammar]

devakyā udare jātā rājankaṃsavihiṃsitāḥ |
sā tānśocatyātmajānsvāṃsta ime'dhyāsate'ntike || 49 ||
[Analyze grammar]

ita etānpraṇeṣyāmo mātṛśokāpanuttaye |
tataḥ śāpādvinirmuktā lokaṃ yāsyanti vijvarāḥ || 50 ||
[Analyze grammar]

smarodgīthaḥ pariṣvaṅgaḥ pataṅgaḥ kṣudrabhṛdghṛṇī |
ṣaḍime matprasādena punaryāsyanti sadgatim || 51 ||
[Analyze grammar]

ityuktvā tānsamādāya indrasenena pūjitau |
punardvāravatīmetya mātuḥ putrānayacchatām || 52 ||
[Analyze grammar]

tāndṛṣṭvā bālakāndevī putrasnehasnutastanī |
pariṣvajyāṅkamāropya mūrdhnyajighradabhīkṣṇaśaḥ || 53 ||
[Analyze grammar]

apāyayatstanaṃ prītā sutasparśaparisnutam |
mohitā māyayā viṣṇoryayā sṛṣṭiḥ pravartate || 54 ||
[Analyze grammar]

pītvāmṛtaṃ payastasyāḥ pītaśeṣaṃ gadābhṛtaḥ |
nārāyaṇāṅgasaṃsparśa pratilabdhātmadarśanāḥ || 55 ||
[Analyze grammar]

te namaskṛtya govindaṃ devakīṃ pitaraṃ balam |
miṣatāṃ sarvabhūtānāṃ yayurdhāma divaukasām || 56 ||
[Analyze grammar]

taṃ dṛṣṭvā devakī devī mṛtāgamananirgamam |
mene suvismitā māyāṃ kṛṣṇasya racitāṃ nṛpa || 57 ||
[Analyze grammar]

evaṃvidhānyadbhutāni kṛṣṇasya paramātmanaḥ |
vīryāṇyanantavīryasya santyanantāni bhārata || 58 ||
[Analyze grammar]

śrīsūta uvāca |
ya idamanuśṛṇoti śrāvayedvā murāreś |
caritamamṛtakīrtervarṇitaṃ vyāsaputraiḥ |
jagadaghabhidalaṃ tadbhaktasatkarṇapūraṃ |
bhagavati kṛtacitto yāti tatkṣemadhāma || 59 ||
[Analyze grammar]