Chapter 70

[English text for this chapter is available]

śrīkṛṣṇasyāhnikakṛtyavarṇanaṃ yudhiṣṭhirasaṃdeśamādāya nāradasya |
jarāsaṃdhakārānibaddhanṛpāṇāṃ saṃdeśamādāya dūtasya cāgamanam |
śrīśuka uvāca |
athoṣasyupavṛttāyāṃ kukkuṭān kūjato'śapan |
gṛhītakaṇṭhyaḥ patibhiḥ bhādhavyo virahāturāḥ || 1 ||
[Analyze grammar]

vayāṃsyarūruvan kṛṣṇaṃ bodhayantīva vandinaḥ |
gāyatsvaliṣvanidrāṇi mandāravanavāyubhiḥ || 2 ||
[Analyze grammar]

muhūrtaṃ taṃ tu vaidarbhī nāmṛṣyad atiśobhanam |
parirambhaṇaviśleṣāt priyabāhvantaraṃ gatā || 3 ||
[Analyze grammar]

brāhme muhūrta utthāya vāryupaspṛśya mādhavaḥ |
dadhyau prasannakaraṇa ātmānaṃ tamasaḥ param || 4 ||
[Analyze grammar]

ekaṃ svayaṃjyotirananyamavyayaṃ |
svasaṃsthayā nityanirastakalmaṣam |
brahmākhyamasyodbhavanāśahetubhiḥ |
svaśaktibhirlakṣitabhāvanirvṛtim || 5 ||
[Analyze grammar]

athāpluto'mbhasyamale yathāvidhi |
kriyākalāpaṃ paridhāya vāsasī |
cakāra sandhyopagamādi sattamo |
hutānalo brahma jajāpa vāgyataḥ || 6 ||
[Analyze grammar]

upasthāyārkamudyantaṃ tarpayitvātmanaḥ kalāḥ |
devān ṛṣīn pitṝn vṛddhān viprānabhyarcya cātmavān || 7 ||
[Analyze grammar]

dhenūnāṃ rukmaśrṛṅgīṇāṃ sādhvīnāṃ mauktikasrajām |
payasvinīnāṃ gṛṣṭīnāṃ savatsānāṃ suvāsasām || 8 ||
[Analyze grammar]

dadau rūpyakhurāgrāṇāṃ kṣaumājinatilaiḥ saha |
alaṅkṛtebhyo viprebhyo badvaṃ badvaṃ dine dine || 9 ||
[Analyze grammar]

govipradevatāvṛddha gurūn bhūtāni sarvaśaḥ |
namaskṛtyātmasaṃbhūtīḥ maṅgalāni samaspṛśat || 10 ||
[Analyze grammar]

ātmānaṃ bhūṣayāmāsa naralokavibhūṣaṇam |
vāsobhirbhūṣaṇaiḥ svīyaiḥ divyasrag anulepanaiḥ || 11 ||
[Analyze grammar]

avekṣyājyaṃ tathā'darśaṃ govṛṣadvijadevatāḥ |
kāmāṃśca sarvavarṇānāṃ paurāntaḥpuracāriṇām |
pradāpya prakṛtīḥ kāmaiḥ pratoṣya pratyanandata || 12 ||
[Analyze grammar]

saṃvibhajyāgrato viprān sraktāmbūlānulepanaiḥ |
suhṛdaḥ prakṛtīrdārān upāyuṅkta tataḥ svayam || 13 ||
[Analyze grammar]

tāvat sūta upānīya syandanaṃ paramādbhutam |
sugrīvādyairhayairyuktaṃ praṇamyāvasthito'grataḥ || 14 ||
[Analyze grammar]

gṛhītvā pāṇinā pāṇī sārathestamathāruhat |
sātyakyuddhavasaṃyuktaḥ pūrvādrimiva bhāskaraḥ || 15 ||
[Analyze grammar]

īkṣito'ntaḥpurastrīṇāṃ savrīḍapremavīkṣitaiḥ |
kṛcchrād visṛṣṭo niragāt jātahāso haran manaḥ || 16 ||
[Analyze grammar]

sudharmākhyāṃ sabhāṃ sarvaiḥ vṛṣṇibhiḥ parivāritaḥ |
prāviśad yanniviṣṭānāṃ na santyaṅga ṣaḍūrmayaḥ || 17 ||
[Analyze grammar]

tatropaviṣṭaḥ paramāsane vibhuḥ |
babhau svabhāsā kakubho'vabhāsayan |
vṛto nṛsiṃhairyadubhiryadūttamo |
yathoḍurājo divi tārakāgaṇaiḥ || 18 ||
[Analyze grammar]

tatropamaṃtriṇo rājan nānāhāsyarasairvibhum |
upatasthurnaṭācāryā nartakyastāṇḍavaiḥ pṛthak || 19 ||
[Analyze grammar]

mṛdaṅgavīṇāmuraja veṇutāladarasvanaiḥ |
nanṛturjagustuṣṭuvuśca sūtamāgadhavandinaḥ || 20 ||
[Analyze grammar]

tatrāhurbrāhmaṇāḥ kecit āsīnā brahmavādinaḥ |
pūrveṣāṃ puṇyayaśasāṃ rājñāṃ cākathayan kathāḥ || 21 ||
[Analyze grammar]

tatraikaḥ puruṣo rājan āgato'pūrvadarśanaḥ |
vijñāpito bhagavate pratīhāraiḥ praveśitaḥ || 22 ||
[Analyze grammar]

sa namaskṛtya kṛṣṇāya pareśāya kṛtāñjaliḥ |
rājñāmāvedayad dukhaṃ jarāsandhanirodhajam || 23 ||
[Analyze grammar]

ye ca digvijaye tasya sannatiṃ na yayurnṛpāḥ |
prasahya ruddhāstenāsan ayute dve girivraje || 24 ||
[Analyze grammar]

rājāna ūcuḥ |
kṛṣṇa kṛṣṇāprameyātman prapannabhayabhañjana |
vayaṃ tvāṃ śaraṇaṃ yāmo bhavabhītāḥ pṛthagdhiyaḥ || 25 ||
[Analyze grammar]

loko vikarmanirataḥ kuśale pramattaḥ |
karmaṇyayaṃ tvadudite bhavadarcane sve |
yastāvadasya balavāniha jīvitāśāṃ |
sadyaśchinattyanimiṣāya namo'stu tasmai || 26 ||
[Analyze grammar]

loke bhavāñjagadinaḥ kalayāvatīrṇaḥ |
sad rakṣaṇāya khalanigrahaṇāya cānyaḥ |
kaścit tvadīyamatiyāti nideśamīśa |
kiṃ vā janaḥ svakṛtamṛcchati tanna vidmaḥ || 27 ||
[Analyze grammar]

svapnāyitaṃ nṛpasukhaṃ parataṃtramīśa |
śaśvadbhayena mṛtakena dhuraṃ vahāmaḥ |
hitvā tadātmani sukhaṃ tvadanīhalabhyaṃ |
kliśyāmahe'tikṛpaṇāstava māyayeha || 28 ||
[Analyze grammar]

tanno bhavān praṇataśokaharāṅghriyugmo |
baddhān viyuṅkṣva magadhāhvayakarmapāśāt |
yo bhūbhujo'yutamataṅgajavīryameko |
bibhrad rurodha bhavane mṛgarāḍivāvīḥ || 29 ||
[Analyze grammar]

yo vai tvayā dvinavakṛtva udāttacakra |
bhagno mṛdhe khalu bhavantamanantavīryam |
jitvā nṛlokanirataṃ sakṛdūḍhadarpo |
yuṣmatprajā rujati no'jita tadvidhehi || 30 ||
[Analyze grammar]

dūta uvāca |
iti māgadhasaṃruddhā bhavaddarśanakāṅkṣiṇaḥ |
prapannāḥ pādamūlaṃ te dīnānāṃ śaṃ vidhīyatām || 31 ||
[Analyze grammar]

śrīśuka uvāca |
rājadūte bruvatyevaṃ devarṣiḥ paramadyutiḥ |
bibhrat piṅgajaṭābhāraṃ prādurāsīd yathā raviḥ || 32 ||
[Analyze grammar]

taṃ dṛṣṭvā bhagavān kṛṣṇaḥ sarvalokeśvareśvaraḥ |
vavanda utthitaḥ śīrṣṇā sasabhyaḥ sānugo mudā || 33 ||
[Analyze grammar]

sabhājayitvā vidhivat kṛtāsanaparigraham |
babhāṣe sunṛtairvākyaiḥ śraddhayā tarpayan munim || 34 ||
[Analyze grammar]

api svidadya lokānāṃ trayāṇāṃ akutobhayam |
nanu bhūyān bhagavato lokān paryaṭato guṇaḥ || 35 ||
[Analyze grammar]

na hi te'viditaṃ kiñcit lokeṣu īśvara kartṛṣu |
atha pṛcchāmahe yuṣmān pāṇḍavānāṃ cikīrṣitam || 36 ||
[Analyze grammar]

śrīnārada uvāca |
dṛṣṭā māyā te bahuśo duratyayā |
māyā vibho viśvasṛjaśca māyinaḥ |
bhūteṣu bhūmaṃścarataḥ svaśaktibhiḥ |
vahnerivacchannaruco na me'dbhutam || 37 ||
[Analyze grammar]

tavehitaṃ ko'rhati sādhu vedituṃ |
svamāyayedaṃ sṛjato niyacchataḥ |
yad vidyamānāt matayāvabhāsate |
tasmai namaste svavilakṣaṇātmane || 38 ||
[Analyze grammar]

jīvasya yaḥ saṃsarato vimokṣaṇaṃ |
na jānato'narthavahāccharīrataḥ |
līlāvatāraiḥ svayaśaḥ pradīpakaṃ |
prājvālayattvā tamahaṃ prapadye || 39 ||
[Analyze grammar]

athāpyāśrāvaye brahma naralokaviḍambanam |
rājñaḥ paitṛṣvaseyasya bhaktasya ca cikīrṣitam || 40 ||
[Analyze grammar]

yakṣyati tvāṃ makhendreṇa rājasūyena pāṇḍavaḥ |
pārameṣṭhyakāmo nṛpatiḥ tadbhavānanumodatām || 41 ||
[Analyze grammar]

tasmin deva kratuvare bhavantaṃ vai surādayaḥ |
didṛkṣavaḥ sameṣyanti rājānaśca yaśasvinaḥ || 42 ||
[Analyze grammar]

śravaṇāt kīrtanād dhyānāt pūyante'ntevasāyinaḥ |
tava brahmamayasyeśa kimutekṣābhimarśinaḥ || 43 ||
[Analyze grammar]

yasyāmalaṃ divi yaśaḥ prathitaṃ rasāyāṃ |
bhūmau ca te bhuvanamaṅgala digvitānam |
mandākinīti divi bhogavatīti cādho |
gaṅgeti ceha caraṇāmbu punāti viśvam || 44 ||
[Analyze grammar]

śrīśuka uvāca |
tatra teṣvātmapakṣeṣva gṛhṇatsu vijigīṣayā |
vācaḥ peśaiḥ smayan bhṛtyamuddhavaṃ prāha keśavaḥ || 45 ||
[Analyze grammar]

śrībhagavānuvāca |
tvaṃ hi naḥ paramaṃ cakṣuḥ suhṛn maṃtrārthatattvavit |
athātra brūhyanuṣṭheyaṃ śraddadhmaḥ karavāma tat || 46 ||
[Analyze grammar]

ityupāmaṃtrito bhartrā sarvajñenāpi mugdhavat |
nideśaṃ śirasā'dhāya uddhavaḥ pratyabhāṣata || 47 ||
[Analyze grammar]

iti śrīmad‍bhāgavate mahāpurāṇe pāramahaṃsyāṃ |
saṃhitāyāṃ daśamaskandhe uttarārdhe |
bhagavadyānavicāre nāma saptatitamo'dhyāyaḥ || 70 ||
[Analyze grammar]