Chapter 63

[English text for this chapter is available]

śrīkṛṣṇabāṇāsurasaṃgrāmaḥ tatra māheśvarajvareṇa |
māheśvareṇa ca kṛtā bhagavat stutiḥ |
śrīśuka uvāca |
apaśyatāṃ cāniruddhaṃ tadbandhūnāṃ ca bhārata |
catvāro vārṣikā māsā vyatīyuranuśocatām || 1 ||
[Analyze grammar]

nāradāt tadupākarṇya vārtāṃ baddhasya karma ca |
prayayuḥ śoṇitapuraṃ vṛṣṇayaḥ kṛṣṇadaivatāḥ || 2 ||
[Analyze grammar]

pradyumno yuyudhānaśca gadaḥ sāmbo'tha sāraṇaḥ |
nandopanandabhadrādyā rāmakṛṣṇānuvartinaḥ || 3 ||
[Analyze grammar]

akṣauhiṇībhirdvādaśabhiḥ sametāḥ sarvato diśam |
rurudhurbāṇanagaraṃ samantāt sātvatarṣabhāḥ || 4 ||
[Analyze grammar]

bhajyamānapurodyāna prākārāṭṭālagopuram |
prekṣamāṇo ruṣāviṣṭaḥ tulyasainyo'bhiniryayau || 5 ||
[Analyze grammar]

bāṇārthe bhagavān rudraḥ sasutaḥ pramathairvṛtaḥ |
āruhya nandivṛṣabhaṃ yuyudhe rāmakṛṣṇayoḥ || 6 ||
[Analyze grammar]

āsīt sutumulaṃ yuddhaṃ adbhutaṃ romaharṣaṇam |
kṛṣṇaśaṅkarayo rājan pradyumnaguhayorapi || 7 ||
[Analyze grammar]

kumbhāṇḍakūpakarṇābhyāṃ balena saha saṃyugaḥ |
sāmbasya bāṇaputreṇa bāṇena saha sātyakeḥ || 8 ||
[Analyze grammar]

brahmādayaḥ surādhīśā munayaḥ siddhacāraṇāḥ |
gandharvāpsaraso yakṣā vimānairdraṣṭumāgaman || 9 ||
[Analyze grammar]

śaṅkarānucarān śauriḥ bhūtapramathaguhyakān |
ḍākinīryātudhānāṃśca vetālān savināyakān || 10 ||
[Analyze grammar]

pretamātṛpiśācāṃśca kuṣmāṇḍān brahmarākṣasān |
drāvayāmāsa tīkṣṇāgraiḥ śaraiḥ śārṅgadhanuścyutaiḥ || 11 ||
[Analyze grammar]

pṛthagvidhāni prāyuṅkta piṇākyastrāṇi śāṅrgiṇe |
pratyastraiḥ śamayāmāsa śārṅgapāṇiravismitaḥ || 12 ||
[Analyze grammar]

brahmāstrasya ca brahmāstraṃ vāyavyasya ca pārvatam |
āgneyasya ca pārjanyaṃ naijaṃ pāśupatasya ca || 13 ||
[Analyze grammar]

mohayitvā tu giriśaṃ jṛmbhaṇāstreṇa jṛmbhitam |
bāṇasya pṛtanāṃ śauriḥ jaghānāsigadeṣubhiḥ || 14 ||
[Analyze grammar]

skandaḥ pradyumnabāṇaughaiḥ ardyamānaḥ samantataḥ |
asṛg vimuñcan gātrebhyaḥ śikhināpakramad raṇāt || 15 ||
[Analyze grammar]

kumbhāṇḍaḥ kūpakarṇaśca petaturmuṣalārditau |
dudruvustadanīkani hatanāthāni sarvataḥ || 16 ||
[Analyze grammar]

viśīryamāṇaṃ svabalaṃ dṛṣṭvā bāṇo'tyamarṣaṇaḥ |
kṛṣṇaṃ abhyadravat saṃkhye rathī hitvaiva sātyakim || 17 ||
[Analyze grammar]

dhanūṃṣyākṛṣya yugapad bāṇaḥ pañcaśatāni vai |
ekaikasmin śarau dvau dvau sandadhe raṇadurmadaḥ || 18 ||
[Analyze grammar]

tāni ciccheda bhagavān dhanūṃsi yugapaddhariḥ |
sārathiṃ rathamaśvāṃśca hatvā śaṅkhamapūrayat || 19 ||
[Analyze grammar]

tanmātā koṭarā nāma nagnā maktaśiroruhā |
puro'vatasthe kṛṣṇasya putraprāṇarirakṣayā || 20 ||
[Analyze grammar]

tatastiryaṅmukho nagnāṃ anirīkṣan gadāgrajaḥ |
bāṇaśca tāvad virathaḥ chinnadhanvāviśat puram || 21 ||
[Analyze grammar]

vidrāvite bhūtagaṇe jvarastu trīśirāstripāt |
abhyadhāvata dāśārhaṃ dahanniva diśo daśa || 22 ||
[Analyze grammar]

atha nārāyaṇaḥ devaḥ taṃ dṛṣṭvā vyasṛjajjvaram |
māheśvaro vaiṣṇavaśca yuyudhāte jvarāvubhau || 23 ||
[Analyze grammar]

māheśvaraḥ samākrandan vaiṣṇavena balārditaḥ |
alabdhvābhayamanyatra bhīto māheśvaro jvaraḥ |
śaraṇārthī hṛṣīkeśaṃ tuṣṭāva prayatāñjaliḥ || 24 ||
[Analyze grammar]

jvara uvāca |
namāmi tvānantaśaktiṃ pareśaṃ |
sarvātmānaṃ kevalaṃ jñaptimātram |
viśvotpattisthānasaṃrodhahetuṃ |
yattad brahma brahmaliṅgaṃ praśāntam || 25 ||
[Analyze grammar]

kālo daivaṃ karma jīvaḥ svabhāvo |
dravyaṃ kṣetraṃ prāṇa ātmā vikāraḥ |
tatsaṅghāto bījarohapravāhaḥ |
tvanmāyaiṣā tanniṣedhaṃ prapadye || 26 ||
[Analyze grammar]

nānābhāvairlīlayaivopapannaiḥ |
devān sādhūn lokasetūnbibharṣi |
haṃsyunmārgān hiṃsayā vartamānān |
janmaitatte bhārahārāya bhūmeḥ || 27 ||
[Analyze grammar]

tapto'haṃ te tejasā duḥsahena |
śāntogreṇātyulbaṇena jvareṇa |
tāvattāpo dehināṃ te'ṅghrimūlaṃ |
no severan yāvadāśānubaddhāḥ || 28 ||
[Analyze grammar]

śrībhagavānuvāca |
triśiraste prasanno'smi vyetu te majjvarādbhayam |
yo nau smarati saṃvādaṃ tasya tvanna bhavedbhayam || 29 ||
[Analyze grammar]

ityukto'cyutamānamya gato māheśvaro jvaraḥ |
bāṇastu rathamārūḍhaḥ prāgādyotsyañjanārdanam || 30 ||
[Analyze grammar]

tato bāhusahasreṇa nānāyudhadharo'suraḥ |
mumoca paramakruddho bāṇāṃścakrāyudhe nṛpa || 31 ||
[Analyze grammar]

tasyāsyato'strāṇyasakṛt cakreṇa kṣuraneminā |
ciccheda bhagavānbāhūn śākhā iva vanaspateḥ || 32 ||
[Analyze grammar]

bāhuṣu chidyamāneṣu bāṇasya bhagavān bhavaḥ |
bhaktānakampyupavrajya cakrāyudhamabhāṣata || 33 ||
[Analyze grammar]

śrīrudra uvāca |
tvaṃ hi brahma paraṃ jyotiḥ gūḍhaṃ brahmaṇi vāṅmaye |
yaṃ paśyantyamalātmāna ākāśamiva kevalam || 34 ||
[Analyze grammar]

nābhirnabho'gnirmukhamambu reto |
dyauḥ śīrṣamāśāḥ śrutiraṅghrirurvī |
candro mano yasya dṛgarka ātmā |
ahaṃ samudro jaṭharaṃ bhujendraḥ || 35 ||
[Analyze grammar]

romāṇi yasyauṣadhayo'mbuvāhāḥ |
keśā viriñco dhiṣaṇā visargaḥ |
prajāpatirhṛdayaṃ yasya dharmaḥ |
sa vai bhavān puruṣo lokakalpaḥ || 36 ||
[Analyze grammar]

tavāvatāro'yamakuṇṭhadhāman |
dharmasya guptyai jagato hitāya |
vayaṃ ca sarve bhavatānubhāvitā |
vibhāvayāmo bhuvanāni sapta || 37 ||
[Analyze grammar]

tvameka ādyaḥ puruṣo'dvitīyaḥ |
turyaḥ svadṛg heturaheturīśaḥ |
pratīyase'thāpi yathāvikāraṃ |
svamāyayā sarvaguṇaprasiddhyai || 38 ||
[Analyze grammar]

yathaiva sūryaḥ pihitaśchāyayā svayā |
chāyāṃ ca rūpāṇi ca sañcakāsti |
evaṃ guṇenāpihito guṇāṃstvam |
ātmapradīpo guṇinaśca bhūman || 39 ||
[Analyze grammar]

yanmāyāmohitadhiyaḥ putradāragṛhādiṣu |
unmajjanti nimajjanti prasaktā vṛjinārṇave || 40 ||
[Analyze grammar]

devadattamimaṃ labdhvā nṛlokamajitendriyaḥ |
yo nādriyeta tvatpādau sa śocyo hyātmavañcakaḥ || 41 ||
[Analyze grammar]

yastvāṃ visṛjate martya ātmānaṃ priyamīśvaram |
viparyayendriyārthārthaṃ viṣamattyamṛtaṃ tyajan || 42 ||
[Analyze grammar]

ahaṃ brahmātha vibudhā munayaścāmalāśayāḥ |
sarvātmanā prapannāstvāṃ ātmānaṃ preṣṭhamīśvaram || 43 ||
[Analyze grammar]

taṃ tvā jagatsthityudayāntahetuṃ |
samaṃ praśāntaṃ suhṛdātmadaivam |
ananyamekaṃ jagadātmaketaṃ |
bhavāpavargāya bhajāma devam || 44 ||
[Analyze grammar]

ayaṃ mameṣṭo dayito'nuvartī |
mayābhayaṃ dattamamuṣya deva |
saṃpādyatāṃ tadbhavataḥ prasādo |
yathā hi te daityapatau prasādaḥ || 45 ||
[Analyze grammar]

śrībhagavānuvāca |
yadāttha bhagavan tvaṃ naḥ karavāma priyaṃ tava |
bhavato yadvyavasitaṃ tanme sādhvanumoditam || 46 ||
[Analyze grammar]

avadhyo'yaṃ mamāpyeṣa vairocanisuto'suraḥ |
prahrādāya varo datto na vadhyo me tavānvayaḥ || 47 ||
[Analyze grammar]

darpopaśamanāyāsya pravṛkṇā bāhavo mayā |
sūditaṃ ca balaṃ bhūri yacca bhārāyitaṃ bhuvaḥ || 48 ||
[Analyze grammar]

catvāro'sya bhujāḥ śiṣṭā bhaviṣyatyajarāmaraḥ |
pārṣadamukhyo bhavato na kutaścidbhayo'suraḥ || 49 ||
[Analyze grammar]

iti labdhvābhayaṃ kṛṣṇaṃ praṇamya śirasāsuraḥ |
prādyumniṃ rathamāropya savadhvā samupānayat || 50 ||
[Analyze grammar]

akṣauhiṇyā parivṛtaṃ suvāsaḥsamalaṅkṛtam |
sapat‍nīkaṃ puraskṛtya yayau rudrānumoditaḥ || 51 ||
[Analyze grammar]

svarājadhānīṃ samalaṅkṛtāṃ dhvajaiḥ |
satoraṇairukṣitamārgacatvarām |
viveśa śaṅkhānakadundubhisvanaiḥ |
abhyudyataḥ paurasuhṛddvijātibhiḥ || 52 ||
[Analyze grammar]

ya evaṃ kṛṣṇavijayaṃ śaṅkareṇa ca saṃyugam |
saṃsmaret prātarutthāya na tasya syāt parājayaḥ || 53 ||
[Analyze grammar]

iti śrīmad‍bhāgavate mahāpurāṇe pāramahaṃsyāṃ |
saṃhitāyāṃ daśamaskandhe uttarārdhe |
aniruddhānayanaṃ nāma triṣaṣṭitamo'dhyāyaḥ || 63 ||
[Analyze grammar]