Chapter 44

[English text for this chapter is available]

cāṇūramuṣṭikādīnāṃ mallānāṃ nidhanaṃ kaṃsasya vadhaśca |
śrīśuka uvāca |
evaṃ carcitasaṅkalpo bhagavān madhusūdanaḥ |
āsasādātha caṇūraṃ muṣṭikaṃ rohiṇīsutaḥ || 1 ||
[Analyze grammar]

hastābhyāṃ hastayorbaddhvā pad‍bhyāmeva ca pādayoḥ |
vicakarṣaturanyonyaṃ prasahya vijigīṣayā || 2 ||
[Analyze grammar]

arat‍nī dve arat‍nibhyāṃ jānubhyāṃ caiva jānunī |
śiraḥ śīrṣṇorasorastau anyonyaṃ abhijaghnatuḥ || 3 ||
[Analyze grammar]

paribhrāmaṇavikṣepa parirambhāvapātanaiḥ |
utsarpaṇāpasarpaṇaiḥ cānyonyaṃ pratyarundhatām || 4 ||
[Analyze grammar]

utthāpanairunnayanaiḥ cālanaiḥ sthāpanairapi |
parasparaṃ jigīṣantau apacakraturātmanaḥ || 5 ||
[Analyze grammar]

tad‍balābalavad yuddhaṃ sametāḥ sarvayoṣitaḥ |
ūcuḥ parasparaṃ rājan sānukampā varūthaśaḥ || 6 ||
[Analyze grammar]

mahānayaṃ batādharma eṣāṃ rājasabhāsadām |
ye balābalavad yuddhaṃ rājño'nvicchanti paśyataḥ || 7 ||
[Analyze grammar]

kva vajrasārasarvāṅgau mallau śailendrasannibhau |
kva cātisukumārāṅgau kiśorau nāptayauvanau || 8 ||
[Analyze grammar]

dharmavyatikramo hyasya samājasya dhruvaṃ bhavet |
yatrādharmaḥ samuttiṣṭhet na stheyaṃ tatra karhicit || 9 ||
[Analyze grammar]

na sabhāṃ praviśet prājñaḥ sabhyadoṣān anusmaran |
abruvan vibruvannajño naraḥ kilbiṣamaśnute || 10 ||
[Analyze grammar]

valgataḥ śatrumabhitaḥ kṛṣṇasya vadanāmbujam |
vīkṣyatāṃ śramavāryuptaṃ padmakośamivāmbubhiḥ || 11 ||
[Analyze grammar]

kiṃ na paśyata rāmasya mukhamātāmralocanam |
muṣṭikaṃ prati sāmarṣaṃ hāsasaṃrambhaśobhitam || 12 ||
[Analyze grammar]

puṇyā bata vrajabhuvo yadayaṃ nṛliṅga |
gūḍhaḥ purāṇapuruṣo vanacitramālyaḥ |
gāḥ pālayansahabalaḥ kvaṇayaṃśca veṇuṃ |
vikrīdayāñcati giritraramārcitāṅghriḥ || 13 ||
[Analyze grammar]

gopyastapaḥ kimacaran yadamuṣya rūpaṃ |
lāvaṇyasāramasamordhvamananyasiddham |
dṛgbhiḥ pibantyanusavābhinavaṃ durāpam |
ekāntadhāma yaśasaḥ śrīya aiśvarasya || 14 ||
[Analyze grammar]

yā dohane'vahanane mathanopalepa |
preṅkheṅkhanārbharuditokṣaṇamārjanādau |
gāyanti cainamanuraktadhiyo'śrukaṇṭhyo |
dhanyā vrajastriya urukramacittayānāḥ || 15 ||
[Analyze grammar]

prātarvrajād vrajata āviśataśca sāyaṃ |
gobhiḥ samaṃ kvaṇayato'sya niśamya veṇum |
nirgamya tūrṇamabalāḥ pathi bhūripuṇyāḥ |
paśyanti sasmitamukhaṃ sadayāvalokam || 16 ||
[Analyze grammar]

evaṃ prabhāṣamāṇāsu strīṣu yogeśvaro hariḥ |
śatruṃ hantuṃ manaścakre bhagavān bharatarṣabha || 17 ||
[Analyze grammar]

sabhayāḥ strīgiraḥ śrutvā putrasnehaśucā'turau |
pitarau anvatapyetāṃ putrayorabudhau balam || 18 ||
[Analyze grammar]

taistairniyuddhavidhibhiḥ vividhairacyutetarau |
yuyudhāte yathānyonyaṃ tathaiva balamuṣṭikau || 19 ||
[Analyze grammar]

bhagavad‍gātraniṣpātaiḥ vajranīṣpeṣaniṣṭhuraiḥ |
cāṇūro bhajyamānāṅgo muhurglānimavāpa ha || 20 ||
[Analyze grammar]

sa śyenavega utpatya muṣṭīkṛtya karāvubhau |
bhagavantaṃ vāsudevaṃ kruddho vakṣasyabādhata || 21 ||
[Analyze grammar]

nācalat tatprahāreṇa mālāhata iva dvipaḥ |
bāhvornigṛhya cāṇūraṃ bahuśo bhrāmayan hariḥ || 22 ||
[Analyze grammar]

bhūpṛṣṭhe pothayāmāsa tarasā kṣīṇa jīvitam |
visrastākalpakeśasrag indradhvaja ivāpatat || 23 ||
[Analyze grammar]

tathaiva muṣṭikaḥ pūrvaṃ svamuṣṭyābhihatena vai |
balabhadreṇa balinā talenābhihato bhṛśam || 24 ||
[Analyze grammar]

pravepitaḥ sa rudhiraṃ udvaman mukhato'rditaḥ |
vyasuḥ papātorvyupasthe vātāhata ivāṅghripaḥ || 25 ||
[Analyze grammar]

tataḥ kūṭamanuprāptaṃ rāmaḥ praharatāṃ varaḥ |
avadhīt līlayā rājan sāvajñaṃ vāmamuṣṭinā || 26 ||
[Analyze grammar]

tarhyeva hi śalaḥ kṛṣṇa prapadāhataśīrṣakaḥ |
dvidhā vidīrṇastośalaka ubhāvapi nipetatuḥ || 27 ||
[Analyze grammar]

cāṇūre muṣṭike kūṭe śale tośalake hate |
śeṣāḥ pradudruvurmallāḥ sarve prāṇaparīpsavaḥ || 28 ||
[Analyze grammar]

gopān vayasyān ākṛṣya taiḥ saṃsṛjya vijahratuḥ |
vādyamāneṣu tūryeṣu valgantau rutanūpurau || 29 ||
[Analyze grammar]

janāḥ prajahṛṣuḥ sarve karmaṇā rāmakṛṣṇayoḥ |
ṛte kaṃsaṃ vipramukhyāḥ sādhavaḥ sādhu sādhviti || 30 ||
[Analyze grammar]

hateṣu mallavaryeṣu vidruteṣu ca bhojarāṭ |
nyavārayat svatūryāṇi vākyaṃ cedamuvāca ha || 31 ||
[Analyze grammar]

niḥsārayata durvṛttau vasudevātmajau purāt |
dhanaṃ harata gopānāṃ nandaṃ badhnīta durmatim || 32 ||
[Analyze grammar]

vasudevastu durmedhā hanyatāmāśvasattamaḥ |
ugrasenaḥ pitā cāpi sānugaḥ parapakṣagaḥ || 33 ||
[Analyze grammar]

evaṃ vikatthamāne vai kaṃse prakupito'vyayaḥ |
laghimnotpatya tarasā mañcamuttuṅgamāruhat || 34 ||
[Analyze grammar]

taṃ āviśantamālokya mṛtyumātmana āsanāt |
manasvī sahasotthāya jagṛhe so'sicarmaṇī || 35 ||
[Analyze grammar]

taṃ khaḍgapāṇiṃ vicarantamāśu |
śyenaṃ yathā dakṣiṇasavyamambare |
samagrahīd durviṣahogratejā |
yathoragaṃ tārkṣyasutaḥ prasahya || 36 ||
[Analyze grammar]

pragṛhya keśeṣu calatkirītaṃ |
nipātya raṅgopari tuṅgamañcāt |
tasyopariṣṭāt svatsvayamabjanābhaḥ |
papāta viśvāśraya ātmatantraḥ || 37 ||
[Analyze grammar]

taṃ samparetaṃ vicakarṣa bhūmau |
hariryathebhaṃ jagato vipaśyataḥ |
hā heti śabdaḥ sumahān tadābhūd |
udīritaḥ sarvajanairnarendra || 38 ||
[Analyze grammar]

sa nityadodvignadhiyā tamīśvaraṃ |
piban vadan vā vicaran svapanśvasan |
dadarśa cakrāyudhamagrato yataḥ |
tadeva rūpaṃ duravāpamāpa || 39 ||
[Analyze grammar]

tasyānujā bhrātaro'ṣṭau kaṃkanyagrodhakādayaḥ |
abhyadhāvan atikruddhā bhrāturnirveśakāriṇaḥ || 40 ||
[Analyze grammar]

tathātirabhasāṃstāṃstu saṃyattāt rohiṇīsutaḥ |
ahan parighamudyamya paśūniva mṛgādhipaḥ || 41 ||
[Analyze grammar]

nedurdundubhayo vyomni brahmeśādyā vibhūtayaḥ |
puṣpaiḥ kirantastaṃ prītāḥ śaśaṃsurnanṛtuḥ striyaḥ || 42 ||
[Analyze grammar]

teṣāṃ striyo mahārāja suhṛnmaraṇaduḥkhitāḥ |
tatrābhīyurvinighnantyaḥ śīrṣāṇyaśruvilocanāḥ || 43 ||
[Analyze grammar]

śayānān nvīraśayyāyāṃ patīn āliṅgya śocatīḥ |
vilepuḥ susvaraṃ nāryo visṛjantyo muhuḥ śucaḥ || 44 ||
[Analyze grammar]

hā nātha priya dharmajña karuṇānāthavatsala |
tvayā hatena nihatā vayaṃ te sagṛhaprajāḥ || 45 ||
[Analyze grammar]

tvayā virahitā patyā purīyaṃ puruṣarṣabha |
na śobhate vayamiva nivṛttotsavamaṅgalā || 46 ||
[Analyze grammar]

anāgasāṃ tvaṃ bhūtānāṃ kṛtavān drohamulbaṇam |
tenemāṃ bho daśāṃ nīto bhūtadhruk ko labheta śam || 47 ||
[Analyze grammar]

sarveṣāmiha bhūtānāṃ eṣa hi prabhavāpyayaḥ |
goptā ca tadavadhyāyī na kvacit sukhamedhate || 48 ||
[Analyze grammar]

śrīśuka uvāca |
rājayoṣita āśvāsya bhagavān lokabhāvanaḥ |
yāmāhurlaukikīṃ saṃsthāṃ hatānāṃ samakārayat || 49 ||
[Analyze grammar]

mātaraṃ pitaraṃ caiva mocayitvātha bandhanāt |
kṛṣṇarāmau vavandāte śirasā spṛśya pādayoḥ || 50 ||
[Analyze grammar]

devakī vasudevaśca vijñāya jagadīśvarau |
kṛtasaṃvandanau putrau sasvajāte na śaṅkitau || 51 ||
[Analyze grammar]

iti śrīmad‍bhāgavate mahāpurāṇe pāramahaṃsyāṃ |
saṃhitāyāṃ daśamaskandhe pūrvārdhe kaṃsavadho nāma caturcatvāriṃśo'dhyāyaḥ || 44 ||
[Analyze grammar]