Chapter 4

[English text for this chapter is available]

nabhagavaṃśavarṇanaṃ nābhāgacaritam aṃbarīṣopākhyānaṃ durvāsaḥ palāyanaṃ ca |
śrīśuka uvāca |
nābhāgo nabhagāpatyaṃ yaṃ tataṃ bhrātaraḥ kavim |
yaviṣṭhaṃ vyabhajan dāyaṃ brahmacāriṇamāgatam || 1 ||
[Analyze grammar]

bhrātaro'bhāṅkta kiṃ mahyaṃ bhajāma pitaraṃ tava |
tvāṃ mamāryāstatābhāṅkṣuḥ mā putraka tadādṛthāḥ || 2 ||
[Analyze grammar]

ime aṃgirasaḥ satraṃ āsate'dya sumedhasaḥ |
ṣaṣṭhaṃ ṣaṣṭhaṃ upetyāhaḥ kave muhyanti karmaṇi || 3 ||
[Analyze grammar]

tāṃn tvaṃ śaṃsaya sūkte dve vaiśvadeve mahātmanaḥ |
te svaryanto dhanaṃ satra pariśeṣitamātmanaḥ || 4 ||
[Analyze grammar]

dāsyanti te'tha tān gaccha tathā sa kṛtavān yathā |
tasmai dattvā yayuḥ svargaṃ te satrapariśeṣaṇam || 5 ||
[Analyze grammar]

taṃ kaścit svīkariṣyantaṃ puruṣaḥ kṛṣṇadarśanaḥ |
uvācottarato'bhyetya mamedaṃ vāstukaṃ vasu || 6 ||
[Analyze grammar]

mamedaṃ ṛṣibhiḥ dattaṃ iti tarhi sma mānavaḥ |
syānnau te pitari praśnaḥ pṛṣṭavān pitaraṃ yathā || 7 ||
[Analyze grammar]

yajñavāstugataṃ sarvaṃ ucchiṣṭaṃ ṛṣayaḥ kvacit |
cakrurvibhāgaṃ rudrāya sa devaḥ sarvamarhati || 8 ||
[Analyze grammar]

nābhāgastaṃ praṇamyāha taveśa kila vāstukam |
ityāha me pitā brahman śirasā tvāṃ prasādaye || 9 ||
[Analyze grammar]

yat te pitāvadad dharmaṃ tvaṃ ca satyaṃ prabhāṣase |
dadāmi te mantradṛśe jñānaṃ brahma sanātanam || 10 ||
[Analyze grammar]

gṛhāṇa draviṇaṃ dattaṃ matsatre pariśeṣitam |
ityuktvāntarhito rudro bhagavān satyavatsalaḥ || 11 ||
[Analyze grammar]

ya etat saṃsmaret prātaḥ sāyaṃ ca susamāhitaḥ |
kavirbhavati maṃtrajño gatiṃ caiva tathā'tmanaḥ || 12 ||
[Analyze grammar]

nābhāgād aṃbarīṣo'bhūt mahābhāgavataḥ kṛtī |
nāspṛśad brahmaśāpo'pi yaṃ na pratihataḥ kvacit || 13 ||
[Analyze grammar]

śrīrājovāca |
bhagavan śrotumicchāmi rājarṣeḥ tasya dhīmataḥ |
na prābhūd yatra nirmukto brahmadaṇḍo duratyayaḥ || 14 ||
[Analyze grammar]

śrīśuka uvāca |
aṃbarīṣo mahābhāgaḥ saptadvīpavatīṃ mahīm |
avyayāṃ ca śriyaṃ labdhvā vibhavaṃ cātulaṃ bhuvi || 15 ||
[Analyze grammar]

mene'tidurlabhaṃ puṃsāṃ sarvaṃ tat svapnasaṃstutam |
vidvān vibhavanirvāṇaṃ tamo viśati yat pumān || 16 ||
[Analyze grammar]

vāsudeve bhagavati tad‍bhakteṣu ca sādhuṣu |
prāpto bhāvaṃ paraṃ viśvaṃ yenedaṃ loṣṭavat smṛtam || 17 ||
[Analyze grammar]

sa vai manaḥ kṛṣṇapadāravindayoḥ |
vacāṃsi vaikuṇṭhaguṇānuvarṇane |
karau harermandiramārjanādiṣu |
śrutiṃ cakārācyutasatkathodaye || 18 ||
[Analyze grammar]

mukundaliṃgālayadarśane dṛśau |
tad‍bhṛtyagātrasparśeṅgasaṃgamam |
ghrāṇaṃ ca tatpādasarojasaurabhe |
śrīmat tulasyā rasanāṃ tadarpite || 19 ||
[Analyze grammar]

pādau hareḥ kṣetrapadānusarpaṇe |
śiro hṛṣīkeśa padābhivandane |
kāmaṃ ca dāsye na tu kāmakāmyayā |
yathottamaśloka janāśrayā ratiḥ || 20 ||
[Analyze grammar]

evaṃ sadā karmakalāpamātmanaḥ |
pare'dhiyajñe bhagavatyadhokṣaje |
sarvātmabhāvaṃ vidadhanmahīmimāṃ |
tanniṣṭhaviprābhihitaḥ śaśāsa ha || 21 ||
[Analyze grammar]

īje'śvamedhairadhiyajñamīśvaraṃ |
mahāvibhūtyopacitāṃgadakṣiṇaiḥ |
tatairvasiṣṭhāsitagautamādibhiḥ |
dhanvanyabhisrotamasau sarasvatīm || 22 ||
[Analyze grammar]

yasya kratuṣu gīrvāṇaiḥ sadasyā ṛtvijo janāḥ |
tulyarūpāḥ cānimiṣā vyadṛśyanta suvāsasaḥ || 23 ||
[Analyze grammar]

svargo na prārthito yasya manujaiḥ amarapriyaḥ |
śrṛṇvadbhiḥ upagāyadbhiḥ uttamaślokaceṣṭitam || 24 ||
[Analyze grammar]

samarddhayanti tān kāmāḥ svārājyaparibhāvitāḥ |
durlabhā nāpi siddhānāṃ mukundaṃ hṛdi paśyataḥ || 25 ||
[Analyze grammar]

sa itthaṃ bhaktiyogena tapoyuktena pārthivaḥ |
svadharmeṇa hariṃ prīṇan saṃgān sarvān śanairjahau || 26 ||
[Analyze grammar]

gṛheṣu dāreṣu suteṣu bandhuṣu |
dvipottamasyandana vājivastuṣu |
akṣayyarat‍nābharaṇāmbarādiṣu |
anantakośeṣu akarot asan matim || 27 ||
[Analyze grammar]

tasmā adād hariścakraṃ pratyanīkabhayāvaham |
ekāntabhaktibhāvena prīto bhṛtyābhirakṣaṇam || 28 ||
[Analyze grammar]

ārirādhayiṣuḥ kṛṣṇaṃ mahiṣyā tulyaśīlayā |
yuktaḥ sāṃvatsaraṃ vīro dadhāra dvādaśīvratam || 29 ||
[Analyze grammar]

vratānte kārtike māsi trirātraṃ samupoṣitaḥ |
snātaḥ kadācit kālindyāṃ hariṃ madhuvane'rcayat || 30 ||
[Analyze grammar]

mahābhiṣekavidhinā sarvopaskarasampadā |
abhiṣicyāmbarākalpaiḥ gandhamālyārhaṇādibhiḥ || 31 ||
[Analyze grammar]

tad‍gatāntarabhāvena pūjayāmāsa keśavam |
brāhmaṇāṃśca mahābhāgān siddhārthānapi bhaktitaḥ || 32 ||
[Analyze grammar]

gavāṃ rukmaviṣāṇīnāṃ rūpyāṅghrīṇāṃ suvāsasām |
payaḥśīlavayorūpa vatsopaskarasaṃpadām || 33 ||
[Analyze grammar]

prāhiṇot sādhuviprebhyo gṛheṣu nyarbudāni ṣaṭ |
bhojayitvā dvijānagre svādvannaṃ guṇavattamam || 34 ||
[Analyze grammar]

labdhakāmaiḥ anujñātaḥ pāraṇāyopacakrame |
tasya tarhyatithiḥ sākṣāt durvāsā bhagavānabhūt || 35 ||
[Analyze grammar]

taṃ ānarcātithiṃ bhūpaḥ pratyutthān āsanārhaṇaiḥ |
yayāce'bhyavahārāya pādamūlamupāgataḥ || 36 ||
[Analyze grammar]

pratinandya sa tāṃ yācñāṃ kartumāvaśyakaṃ gataḥ |
nimamajja bṛhad dhyāyan kālindīsalile śubhe || 37 ||
[Analyze grammar]

muhūrtārdhāvaśiṣṭāyāṃ dvādaśyāṃ pāraṇaṃ prati |
cintayāmāsa dharmajño dvijaiḥ tad dharmasaṃkaṭe || 38 ||
[Analyze grammar]

brāhmaṇātikrame doṣo dvādaśyāṃ yadapāraṇe |
yatkṛtvā sādhu me bhūyād adharmo vā na māṃ spṛśet || 39 ||
[Analyze grammar]

ambhasā kevalenātha kariṣye vratapāraṇam |
āhurabbhakṣaṇaṃ viprā hi aśitaṃ nāśitaṃ ca tat || 40 ||
[Analyze grammar]

ityapaḥ prāśya rājarṣiḥ cintayan manasācyutam |
pratyacaṣṭa kuruśreṣṭha dvija āgamanameva saḥ || 41 ||
[Analyze grammar]

durvāsā yamunākūlāt kṛta āvaśyaka āgataḥ |
rājñābhinanditastasya bubudhe ceṣṭitaṃ dhiyā || 42 ||
[Analyze grammar]

manyunā pracalad‍gātro bhrukuṭīkuṭilānanaḥ |
bubhukṣitaśca sutarāṃ kṛtāñjalimabhāṣata || 43 ||
[Analyze grammar]

aho asya nṛśaṃsasya śriyonmattasya paśyata |
dharmavyatikramaṃ viṣṇoḥ abhaktasya īśamāninaḥ || 44 ||
[Analyze grammar]

yo māṃ atithiṃ āyātaṃ ātithyena nimaṃtrya ca |
adattvā bhuktavān tasya sadyaste darśaye phalam || 45 ||
[Analyze grammar]

evaṃ bruvāṇa utkṛtya jaṭāṃ roṣapradīpitaḥ |
tayā sa nirmame tasmai kṛtyāṃ kālānalopamām || 46 ||
[Analyze grammar]

tāṃ āpatantīṃ jvalatīṃ asihastāṃ padā bhuvam |
vepayantīṃ samudvīkṣya na cacāla padānnṛpaḥ || 47 ||
[Analyze grammar]

prāg diṣṭaṃ bhṛtyarakṣāyāṃ puruṣeṇa mahātmanā |
dadāha kṛtyāṃ tāṃ cakraṃ kruddhāhimiva pāvakaḥ || 48 ||
[Analyze grammar]

tad abhidravad udvīkṣya svaprayāsaṃ ca niṣphalam |
durvāsā dudruve bhīto dikṣu prāṇaparīpsayā || 49 ||
[Analyze grammar]

tamanvadhāvad‍bhagavadrathāṃgaṃ |
dāvāgniḥ uddhūtaśikho yathāhim |
tathānuṣaktaṃ munirīkṣamāṇo |
guhāṃ vivikṣuḥ prasasāra meroḥ || 50 ||
[Analyze grammar]

diśo nabhaḥ kṣmāṃ vivarān samudrān |
lokān sapālān tridivaṃ gataḥ saḥ |
yato yato dhāvati tatra tatra |
sudarśanaṃ duṣprasahaṃ dadarśa || 51 ||
[Analyze grammar]

alabdhanāthaḥ sa sadā kutaścit |
saṃtrastacitto'raṇameṣamāṇaḥ |
devaṃ viriñcaṃ samagādvidhātaḥ |
trāhyātmayone'jitatejaso mām || 52 ||
[Analyze grammar]

śrībrahmovāca |
sthānaṃ madīyaṃ sahaviśvametat |
krīḍāvasāne dviparārdhasaṃjñe |
bhrūbhaṃgamātreṇa hi saṃdidhakṣoḥ |
kālātmano yasya tirobhaviṣyati || 53 ||
[Analyze grammar]

ahaṃ bhavo dakṣabhṛgupradhānāḥ |
prajeśabhūteśa sureśamukhyāḥ |
sarve vayaṃ yat niyamaṃ prapannā |
mūrdhnyarpitaṃ lokahitaṃ vahāmaḥ || 54 ||
[Analyze grammar]

pratyākhyāto viriñcena viṣṇucakropatāpitaḥ |
durvāsāḥ śaraṇaṃ yātaḥ śarvaṃ kailāsavāsinam || 55 ||
[Analyze grammar]

śrīrudra uvāca |
vayaṃ na tāta prabhavāma bhūmni |
yasmin pare'nye'pyajajīvakośāḥ |
bhavanti kāle na bhavanti hīdṛśāḥ |
sahasraśo yatra vayaṃ bhramāmaḥ || 56 ||
[Analyze grammar]

ahaṃ sanatkumāraśca nārado bhagavānajaḥ |
kapilo apāntaratamo devalo dharma āsuriḥ || 57 ||
[Analyze grammar]

marīcipramukhāścānye siddheśāḥ pāradarśanāḥ |
vidāma na vayaṃ sarve yanmāyāṃ māyayā'vṛtāḥ || 58 ||
[Analyze grammar]

tasya viśveśvarasyedaṃ śastraṃ durviṣahaṃ hi naḥ |
tamevaṃ śaraṇaṃ yāhi hariste śaṃ vidhāsyati || 59 ||
[Analyze grammar]

tato nirāśo durvāsāḥ padaṃ bhagavato yayau |
vaikuṇṭhākhyaṃ yadadhyāste śrīnivāsaḥ śriyā saha || 60 ||
[Analyze grammar]

sandahyamāno'jitaśastravahninā |
tatpādamūle patitaḥ savepathuḥ |
āhācyutānanta sadīpsita prabho |
kṛtāgasaṃ māva hi viśvabhāvana || 61 ||
[Analyze grammar]

ajānatā te paramānubhāvaṃ |
kṛtaṃ mayāghaṃ bhavataḥ priyāṇām |
vidhehi tasyāpacitiṃ vidhātaḥ |
mucyeta yannāmnyudite nārako'pi || 62 ||
[Analyze grammar]

śrībhagavānuvāca |
ahaṃ bhaktaparādhīno hi asvataṃtra iva dvija |
sādhubhirgrastahṛdayo bhaktairbhaktajanapriyaḥ || 63 ||
[Analyze grammar]

nāhaṃ ātmānamāśāse mad‍bhaktaiḥ sādhubhirvinā |
śriyaṃ cātyantikīṃ brahman yeṣāṃ gatiḥ ahaṃ parā || 64 ||
[Analyze grammar]

ye dārāgāraputrāptān prāṇān vittamimaṃ param |
hitvā māṃ śaraṇaṃ yātāḥ kathaṃ tān tyaktumutsahe || 65 ||
[Analyze grammar]

mayi nirbaddhahṛdayāḥ sādhavaḥ samadarśanāḥ |
vaśīkurvanti māṃ bhaktyā satstriyaḥ satpatiṃ yathā || 66 ||
[Analyze grammar]

matsevayā pratītaṃ ca sālokyādi catuṣṭayam |
necchanti sevayā pūrṇāḥ kuto'nyat kālavidrutam || 67 ||
[Analyze grammar]

sādhavo hṛdayaṃ mahyaṃ sādhūnāṃ hṛdayaṃ tvaham |
madanyat te na jānanti nāhaṃ tebhyo manāgapi || 68 ||
[Analyze grammar]

upāyaṃ kathayiṣyāmi tava vipra śrṛṇuṣva tat |
ayaṃ hyātmābhicāraste yatastaṃ yāhi mā ciram |
sādhuṣu prahitaṃ tejaḥ prahartuḥ kurute'śivam || 69 ||
[Analyze grammar]

tapo vidyā ca viprāṇāṃ niḥśreyasakare ubhe |
te eva durvinītasya kalpete karturanyathā || 70 ||
[Analyze grammar]

brahman tad gaccha bhadraṃ te nābhāgatanayaṃ nṛpam |
kṣamāpaya mahābhāgaṃ tataḥ śāntirbhaviṣyati || 71 ||
[Analyze grammar]

iti śrīmad‍bhāgavate mahāpurāṇe pāramahaṃsyāṃ |
saṃhitāyāṃ navamaskandhe caturtho'dhyāyaḥ || 4 ||
[Analyze grammar]