Chapter 3

[English text for this chapter is available]

śaryātivaṃśaḥ sukanyākhyānaṃ revatakanyākhyānaṃ ca |
śrīśuka uvāca |
śaryātirmānavo rājā brahmiṣṭhaḥ saṃbabhūva ha |
yo vā aṃgirasāṃ satre dvitīyaṃ aha ūcivān || 1 ||
[Analyze grammar]

sukanyā nāma tasyāsīt kanyā kamalalocanā |
tayā sārdhaṃ vanagato hi agamat vyavanāśramam || 2 ||
[Analyze grammar]

sā sakhībhiḥ parivṛtā vicinvantyaṃghripān vane |
valmīkarandhre dadṛśe khadyote iva jyotiṣī || 3 ||
[Analyze grammar]

te daivacoditā bālā jyotiṣī kaṇṭakena vai |
avidhyan mugdhabhāvena susrāvāsṛk tato bahiḥ || 4 ||
[Analyze grammar]

śakṛt mūtranirodho'bhūt sainikānāṃ ca tatkṣaṇāt |
rājarṣiḥ taṃ upālakṣya puruṣān vismito'bravīt || 5 ||
[Analyze grammar]

apyabhadraṃ na yuṣmābhiḥ bhārgavasya viceṣṭitam |
vyaktaṃ kenāpi nastasya kṛtaṃ āśramadūṣaṇam || 6 ||
[Analyze grammar]

sukanyā prāha pitaraṃ bhītā kiñcit kṛtaṃ mayā |
dve jyotiṣī ajānantyā nirbhinne kaṇṭakena vai || 7 ||
[Analyze grammar]

duhitustad vacaḥ śrutvā śaryātirjātasādhvasaḥ |
muniṃ prasādayāmāsa valmīkāntarhitaṃ śanaiḥ || 8 ||
[Analyze grammar]

tad abhiprāyamājñāya prādād duhitaraṃ muneḥ |
kṛcchrāt muktaḥ tamāmaṃtrya puraṃ prāyāt samāhitaḥ || 9 ||
[Analyze grammar]

sukanyā cyavanaṃ prāpya patiṃ paramakopanam |
prīṇayāmāsa cittajñā apramattānuvṛttibhiḥ || 10 ||
[Analyze grammar]

kasyacit tvatha kālasya nāsatyāvāśramāgatau |
tau pūjayitvā provāca vayo me dattamīśvarau || 11 ||
[Analyze grammar]

grahaṃ grahīṣye somasya yajñe vāmapyasomapoḥ |
kriyatāṃ me vayo rūpaṃ pramadānāṃ yadīpsitam || 12 ||
[Analyze grammar]

bāḍhaṃ iti ūcaturvipraṃ abhinandya bhiṣaktamau |
nimajjatāṃ bhavān asmin hrade siddhavinirmite || 13 ||
[Analyze grammar]

ityuktvā jarayā grasta deho dhamanisantataḥ |
hradaṃ praveśito'śvibhyāṃ valīpalita vipriyaḥ || 14 ||
[Analyze grammar]

puruṣāstraya uttasthuḥ apīvyā vanitāpriyāḥ |
padmasrajaḥ kuṇḍalinaḥ tulyarūpāḥ suvāsasaḥ || 15 ||
[Analyze grammar]

tān nirīkṣya varārohā sarūpān sūryavarcasaḥ |
ajānatī patiṃ sādhvī aśvinau śaraṇaṃ yayau || 16 ||
[Analyze grammar]

darśayitvā patiṃ tasyai pātivratyena toṣitau |
ṛṣimāmantrya yayatuḥ vimānena triviṣṭapam || 17 ||
[Analyze grammar]

yakṣyamāṇo'tha śaryātiḥ cyavanasyāśramaṃ gataḥ |
dadarśa duhituḥ pārśve puruṣaṃ sūryavarcasam || 18 ||
[Analyze grammar]

rājā duhitaraṃ prāha kṛtapādābhivandanām |
āśiṣaścāprayuñjāno nātiprītimanā iva || 19 ||
[Analyze grammar]

cikīrṣitaṃ te kimidaṃ patistvayā |
pralambhito lokanamaskṛto muniḥ |
yattvaṃ jarāgrastamasatyasammataṃ |
vihāya jāraṃ bhajase'mumadhvagam || 20 ||
[Analyze grammar]

kathaṃ matiste'vagatānyathā satāṃ |
kulaprasūte kuladūṣaṇaṃ tvidam |
bibharṣi jāraṃ yadapatrapā kulaṃ |
pituśca bhartuśca nayasyadhastamaḥ || 21 ||
[Analyze grammar]

evaṃ bruvāṇaṃ pitaraṃ smayamānā śucismitā |
uvāca tāta jāmātā tavaiṣa bhṛgunandanaḥ || 22 ||
[Analyze grammar]

śaśaṃsa pitre tat sarvaṃ vayorūpābhilambhanam |
vismitaḥ paramaprītaḥ tanayāṃ pariṣasvaje || 23 ||
[Analyze grammar]

somena yājayan vīraṃ grahaṃ somasya cāgrahīt |
asomapoḥ api aśvinoḥ cyavanaḥ svena tejasā || 24 ||
[Analyze grammar]

hantuṃ tamādade vajraṃ sadyo manyuramarṣitaḥ |
savajraṃ stambhayāmāsa bhujaṃ indrasya bhārgavaḥ || 25 ||
[Analyze grammar]

anvajānan tataḥ sarve grahaṃ somasya cāśvinoḥ |
bhiṣajāviti yat pūrvaṃ somāhutyā bahiṣkṛtau || 26 ||
[Analyze grammar]

uttānabarhirānarto bhūriṣeṇa iti trayaḥ |
śaryāterabhavan putrā ānartād revato'bhavat || 27 ||
[Analyze grammar]

so'ntaḥsamudre nagarīṃ vinirmāya kuśasthalīm |
āsthito'bhuṅkta viṣayān ānartādīn arindama || 28 ||
[Analyze grammar]

tasya putraśataṃ jajñe kakudmi jyeṣṭhamuttamam |
kakudmī revatīṃ kanyāṃ svāṃ ādāya vibhuṃ gataḥ || 29 ||
[Analyze grammar]

putryā varaṃ paripraṣṭuṃ brahmalokaṃ apāvṛtam |
āvartamāne gāndharve sthito'labdhakṣaṇaḥ kṣaṇam || 30 ||
[Analyze grammar]

tadanta ādyamānamya svābhiprāyaṃ nyavedayat |
tat śrutvā bhagavān brahmā prahasya tamuvāca ha || 31 ||
[Analyze grammar]

aho rājan niruddhāste kālena hṛdi ye kṛtāḥ |
tatputrapautra naptṝṇāṃ gotrāṇi ca na śrṛṇmahe || 32 ||
[Analyze grammar]

kālo'bhiyātastriṇava caturyugavikalpitaḥ |
tad‍gaccha devadevāṃśo baladevo mahābalaḥ || 33 ||
[Analyze grammar]

kanyārat‍namidaṃ rājan nararat‍nāya dehi bhoḥ |
bhuvo bhārāvatārāya bhagavān bhūtabhāvanaḥ || 34 ||
[Analyze grammar]

avatīrṇo nijāṃśena puṇyaśravaṇakīrtanaḥ |
ityādiṣṭo'bhivandyājaṃ nṛpaḥ svapuramāgataḥ |
tyaktaṃ puṇyajanatrāsād‍bhrātṛbhirdikṣvavasthitaiḥ || 35 ||
[Analyze grammar]

sutāṃ dattvānavadyāṅgīṃ balāya balaśāline |
badaryākhyaṃ gato rājā taptuṃ nārāyaṇāśramam || 36 ||
[Analyze grammar]

iti śrīmad‍bhāgavate mahāpurāṇe pāramahaṃsyāṃ |
saṃhitāyāṃ navamaskandhe tṛtīyo'dhyāyaḥ || 3 ||
[Analyze grammar]