Chapter 7

[English text for this chapter is available]

śrīnārada uvāca |
evaṃ daityasutaiḥ pṛṣṭo mahābhāgavato'suraḥ |
uvāca tānsmayamānaḥ smaranmadanubhāṣitam || 1 ||
[Analyze grammar]

śrīprahrāda uvāca |
pitari prasthite'smākaṃ tapase mandarācalam |
yuddhodyamaṃ paraṃ cakrurvibudhā dānavānprati || 2 ||
[Analyze grammar]

pipīlikairahiriva diṣṭyā lokopatāpanaḥ |
pāpena pāpo'bhakṣīti vadanto vāsavādayaḥ || 3 ||
[Analyze grammar]

teṣāmatibalodyogaṃ niśamyāsurayūthapāḥ |
vadhyamānāḥ surairbhītā dudruvuḥ sarvato diśam || 4 ||
[Analyze grammar]

kalatraputravittāptāngṛhānpaśuparicchadān |
nāvekṣyamāṇāstvaritāḥ sarve prāṇaparīpsavaḥ || 5 ||
[Analyze grammar]

vyalumpanrājaśibiramamarā jayakāṅkṣiṇaḥ |
indrastu rājamahiṣīṃ mātaraṃ mama cāgrahīt || 6 ||
[Analyze grammar]

nīyamānāṃ bhayodvignāṃ rudatīṃ kurarīmiva |
yadṛcchayāgatastatra devarṣirdadṛśe pathi || 7 ||
[Analyze grammar]

prāha naināṃ surapate netumarhasyanāgasam |
muñca muñca mahābhāga satīṃ paraparigraham || 8 ||
[Analyze grammar]

śrīindra uvāca |
āste'syā jaṭhare vīryamaviṣahyaṃ suradviṣaḥ |
āsyatāṃ yāvatprasavaṃ mokṣye'rthapadavīṃ gataḥ || 9 ||
[Analyze grammar]

śrīnārada uvāca |
ayaṃ niṣkilbiṣaḥ sākṣānmahābhāgavato mahān |
tvayā na prāpsyate saṃsthāmanantānucaro balī || 10 ||
[Analyze grammar]

ityuktastāṃ vihāyendro devarṣermānayanvacaḥ |
anantapriyabhaktyaināṃ parikramya divaṃ yayau || 11 ||
[Analyze grammar]

tato me mātaramṛṣiḥ samānīya nijāśrame |
āśvāsyehoṣyatāṃ vatse yāvatte bharturāgamaḥ || 12 ||
[Analyze grammar]

tathetyavātsīddevarṣerantike sākutobhayā |
yāvaddaityapatirghorāttapaso na nyavartata || 13 ||
[Analyze grammar]

ṛṣiṃ paryacarattatra bhaktyā paramayā satī |
antarvatnī svagarbhasya kṣemāyecchāprasūtaye || 14 ||
[Analyze grammar]

ṛṣiḥ kāruṇikastasyāḥ prādādubhayamīśvaraḥ |
dharmasya tattvaṃ jñānaṃ ca māmapyuddiśya nirmalam || 15 ||
[Analyze grammar]

tattu kālasya dīrghatvātstrītvānmātustirodadhe |
ṛṣiṇānugṛhītaṃ māṃ nādhunāpyajahātsmṛtiḥ || 16 ||
[Analyze grammar]

bhavatāmapi bhūyānme yadi śraddadhate vacaḥ |
vaiśāradī dhīḥ śraddhātaḥ strībālānāṃ ca me yathā || 17 ||
[Analyze grammar]

janmādyāḥ ṣaḍime bhāvā dṛṣṭā dehasya nātmanaḥ |
phalānāmiva vṛkṣasya kāleneśvaramūrtinā || 18 ||
[Analyze grammar]

ātmā nityo'vyayaḥ śuddha ekaḥ kṣetrajña āśrayaḥ |
avikriyaḥ svadṛgheturvyāpako'saṅgyanāvṛtaḥ || 19 ||
[Analyze grammar]

etairdvādaśabhirvidvānātmano lakṣaṇaiḥ paraiḥ |
ahaṃ mametyasadbhāvaṃ dehādau mohajaṃ tyajet || 20 ||
[Analyze grammar]

svarṇaṃ yathā grāvasu hemakāraḥ kṣetreṣu yogaistadabhijña āpnuyāt |
kṣetreṣu deheṣu tathātmayogairadhyātmavidbrahmagatiṃ labheta || 21 ||
[Analyze grammar]

aṣṭau prakṛtayaḥ proktāstraya eva hi tadguṇāḥ |
vikārāḥ ṣoḍaśācāryaiḥ pumānekaḥ samanvayāt || 22 ||
[Analyze grammar]

dehastu sarvasaṅghāto jagattasthuriti dvidhā |
atraiva mṛgyaḥ puruṣo neti netītyatattyajan || 23 ||
[Analyze grammar]

anvayavyatirekeṇa vivekenośatātmanā |
svargasthānasamāmnāyairvimṛśadbhirasatvaraiḥ || 24 ||
[Analyze grammar]

buddherjāgaraṇaṃ svapnaḥ suṣuptiriti vṛttayaḥ |
tā yenaivānubhūyante so'dhyakṣaḥ puruṣaḥ paraḥ || 25 ||
[Analyze grammar]

ebhistrivarṇaiḥ paryastairbuddhibhedaiḥ kriyodbhavaiḥ |
svarūpamātmano budhyedgandhairvāyumivānvayāt || 26 ||
[Analyze grammar]

etaddvāro hi saṃsāro guṇakarmanibandhanaḥ |
ajñānamūlo'pārtho'pi puṃsaḥ svapna ivārpyate || 27 ||
[Analyze grammar]

tasmādbhavadbhiḥ kartavyaṃ karmaṇāṃ triguṇātmanām |
bījanirharaṇaṃ yogaḥ pravāhoparamo dhiyaḥ || 28 ||
[Analyze grammar]

tatropāyasahasrāṇāmayaṃ bhagavatoditaḥ |
yadīśvare bhagavati yathā yairañjasā ratiḥ || 29 ||
[Analyze grammar]

guruśuśrūṣayā bhaktyā sarvalabdhārpaṇena ca |
saṅgena sādhubhaktānāmīśvarārādhanena ca || 30 ||
[Analyze grammar]

śraddhayā tatkathāyāṃ ca kīrtanairguṇakarmaṇām |
tatpādāmburuhadhyānāttalliṅgekṣārhaṇādibhiḥ || 31 ||
[Analyze grammar]

hariḥ sarveṣu bhūteṣu bhagavānāsta īśvaraḥ |
iti bhūtāni manasā kāmaistaiḥ sādhu mānayet || 32 ||
[Analyze grammar]

evaṃ nirjitaṣaḍvargaiḥ kriyate bhaktirīśvare |
vāsudeve bhagavati yayā saṃlabhyate ratiḥ || 33 ||
[Analyze grammar]

niśamya karmāṇi guṇānatulyānvīryāṇi līlātanubhiḥ kṛtāni |
yadātiharṣotpulakāśrugadgadaṃ protkaṇṭha udgāyati rauti nṛtyati || 34 ||
[Analyze grammar]

yadā grahagrasta iva kvaciddhasatyākrandate dhyāyati vandate janam |
muhuḥ śvasanvakti hare jagatpate nārāyaṇetyātmamatirgatatrapaḥ || 35 ||
[Analyze grammar]

tadā pumānmuktasamastabandhanastadbhāvabhāvānukṛtāśayākṛtiḥ |
nirdagdhabījānuśayo mahīyasā bhaktiprayogeṇa sametyadhokṣajam || 36 ||
[Analyze grammar]

adhokṣajālambhamihāśubhātmanaḥ śarīriṇaḥ saṃsṛticakraśātanam |
tadbrahmanirvāṇasukhaṃ vidurbudhāstato bhajadhvaṃ hṛdaye hṛdīśvaram || 37 ||
[Analyze grammar]

ko'tiprayāso'surabālakā harerupāsane sve hṛdi chidra vatsataḥ |
svasyātmanaḥ sakhyuraśeṣadehināṃ sāmānyataḥ kiṃ viṣayopapādanaiḥ || 38 ||
[Analyze grammar]

rāyaḥ kalatraṃ paśavaḥ sutādayo gṛhā mahī kuñjarakośabhūtayaḥ |
sarve'rthakāmāḥ kṣaṇabhaṅgurāyuṣaḥ kurvanti martyasya kiyatpriyaṃ calāḥ || 39 ||
[Analyze grammar]

evaṃ hi lokāḥ kratubhiḥ kṛtā amī kṣayiṣṇavaḥ sātiśayā na nirmalāḥ |
tasmādadṛṣṭaśrutadūṣaṇaṃ paraṃ bhaktyoktayeśaṃ bhajatātmalabdhaye || 40 ||
[Analyze grammar]

yadartha iha karmāṇi vidvanmānyasakṛnnaraḥ |
karotyato viparyāsamamoghaṃ vindate phalam || 41 ||
[Analyze grammar]

sukhāya duḥkhamokṣāya saṅkalpa iha karmiṇaḥ |
sadāpnotīhayā duḥkhamanīhāyāḥ sukhāvṛtaḥ || 42 ||
[Analyze grammar]

kāmānkāmayate kāmyairyadarthamiha pūruṣaḥ |
sa vai dehastu pārakyo bhaṅguro yātyupaiti ca || 43 ||
[Analyze grammar]

kimu vyavahitāpatya dārāgāradhanādayaḥ |
rājyakośagajāmātya bhṛtyāptā mamatāspadāḥ || 44 ||
[Analyze grammar]

kimetairātmanastucchaiḥ saha dehena naśvaraiḥ |
anarthairarthasaṅkāśairnityānandarasodadheḥ || 45 ||
[Analyze grammar]

nirūpyatāmiha svārthaḥ kiyāndehabhṛto'surāḥ |
niṣekādiṣvavasthāsu kliśyamānasya karmabhiḥ || 46 ||
[Analyze grammar]

karmāṇyārabhate dehī dehenātmānuvartinā |
karmabhistanute dehamubhayaṃ tvavivekataḥ || 47 ||
[Analyze grammar]

tasmādarthāśca kāmāśca dharmāśca yadapāśrayāḥ |
bhajatānīhayātmānamanīhaṃ harimīśvaram || 48 ||
[Analyze grammar]

sarveṣāmapi bhūtānāṃ harirātmeśvaraḥ priyaḥ |
bhūtairmahadbhiḥ svakṛtaiḥ kṛtānāṃ jīvasaṃjñitaḥ || 49 ||
[Analyze grammar]

devo'suro manuṣyo vā yakṣo gandharva eva vā |
bhajanmukundacaraṇaṃ svastimānsyādyathā vayam || 50 ||
[Analyze grammar]

nālaṃ dvijatvaṃ devatvamṛṣitvaṃ vāsurātmajāḥ |
prīṇanāya mukundasya na vṛttaṃ na bahujñatā || 51 ||
[Analyze grammar]

na dānaṃ na tapo nejyā na śaucaṃ na vratāni ca |
prīyate'malayā bhaktyā hariranyadviḍambanam || 52 ||
[Analyze grammar]

tato harau bhagavati bhaktiṃ kuruta dānavāḥ |
ātmaupamyena sarvatra sarvabhūtātmanīśvare || 53 ||
[Analyze grammar]

daiteyā yakṣarakṣāṃsi striyaḥ śūdrā vrajaukasaḥ |
khagā mṛgāḥ pāpajīvāḥ santi hyacyutatāṃ gatāḥ || 54 ||
[Analyze grammar]

etāvāneva loke'sminpuṃsaḥ svārthaḥ paraḥ smṛtaḥ |
ekāntabhaktirgovinde yatsarvatra tadīkṣaṇam || 55 ||
[Analyze grammar]