Chapter 14

[English text for this chapter is available]

sūta uvāca |
samprasthite dvārakāyāṃ jiṣṇau bandhudidṛkṣayā |
jñātuṃ ca puṇyaślokasya kṛṣṇasya ca viceṣṭitam || 1 ||
[Analyze grammar]

vyatītāḥ katicinmāsāḥ tadā nāyāt tato'rjunaḥ |
dadarśa ghorarūpāṇi nimittāni kurūdvahaḥ || 2 ||
[Analyze grammar]

kālasya ca gatiṃ raudrāṃ viparyastartudharmiṇaḥ |
pāpīyasīṃ nṛṇāṃ vārtāṃ krodhalobhānṛtātmanām || 3 ||
[Analyze grammar]

jihmaprāyaṃ vyavahṛtaṃ śāṭhyamiśraṃ ca sauhṛdam |
pitṛmātṛsuhṛd‍bhrātṛ dampatīnāṃ ca kalkanam || 4 ||
[Analyze grammar]

nimittānyatyariṣṭāni kāle tu anugate nṛṇām |
lobhādi adharmaprakṛtiṃ dṛṣṭvovācānujaṃ nṛpaḥ || 5 ||
[Analyze grammar]

yudhiṣṭhira uvāca |
sampreṣito dvārakāyāṃ jiṣṇurbandhu didṛkṣayā |
jñātuṃ ca puṇyaślokasya kṛṣṇasya ca viceṣṭitam || 6 ||
[Analyze grammar]

gatāḥ saptādhunā māsā bhīmasena tavānujaḥ |
nāyāti kasya vā hetoḥ nāhaṃ vededamañjasā || 7 ||
[Analyze grammar]

api devarṣiṇā'diṣṭaḥ sa kālo'yamupasthitaḥ |
yadā'tmano'ṅgamākrīḍaṃ bhagavān utsisṛkṣati || 8 ||
[Analyze grammar]

yasmānnaḥ sampado rājyaṃ dārāḥ prāṇāḥ kulaṃ prajāḥ |
āsan sapat‍navijayo lokāśca yadanugrahāt || 9 ||
[Analyze grammar]

paśyotpātān naravyāghra divyān bhaumān sadaihikān |
dāruṇānśaṃsato'dūrād bhayaṃ no buddhimohanam || 10 ||
[Analyze grammar]

ūrvakṣibāhavo mahyaṃ sphurantyaṅga punaḥ punaḥ |
vepathuścāpi hṛdaye ārāt dāsyanti vipriyam || 11 ||
[Analyze grammar]

śivaiṣodyantaṃ ādityaṃ abhirauti analānanā |
māmaṅga sārameyo'yaṃ abhirebhatyabhīruvat || 12 ||
[Analyze grammar]

śastāḥ kurvanti māṃ savyaṃ dakṣiṇaṃ paśavo'pare |
vāhāṃśca puruṣavyāghra lakṣaye rudato mama || 13 ||
[Analyze grammar]

mṛtyudūtaḥ kapoto'yaṃ ulūkaḥ kampayan manaḥ |
pratyulūkaśca kuhvānaiḥ anidrau śūnyamicchataḥ || 14 ||
[Analyze grammar]

dhūmrā diśaḥ paridhayaḥ kampate bhūḥ sahādribhiḥ |
nirghātaśca mahāṃstāta sākaṃ ca stanayit‍nubhiḥ || 15 ||
[Analyze grammar]

vāyurvāti kharasparśo rajasā visṛjaṃstamaḥ |
asṛg varṣanti jaladā bībhatsaṃ iva sarvataḥ || 16 ||
[Analyze grammar]

sūryaṃ hataprabhaṃ paśya grahamardaṃ mitho divi |
sasaṅkulairbhūtagaṇaiḥ jvalite iva rodasī || 17 ||
[Analyze grammar]

nadyo nadāśca kṣubhitāḥ sarāṃsi ca manāṃsi ca |
na jvalatyagnirājyena kālo'yaṃ kiṃ vidhāsyati || 18 ||
[Analyze grammar]

na pibanti stanaṃ vatsā na duhyanti ca mātaraḥ |
rudantyaśrumukhā gāvo na hṛṣyanti ṛṣabhā vraje || 19 ||
[Analyze grammar]

daivatāni rudantīva svidyanti hyuccalanti ca |
ime janapadā grāmāḥ purodyānākarāśramāḥ |
bhraṣṭaśriyo nirānandāḥ kimaghaṃ darśayanti naḥ || 20 ||
[Analyze grammar]

manya etairmahotpātaiḥ nūnaṃ bhagavataḥ padaiḥ |
ananyapuruṣaśrībhiḥ hīnā bhūrhatasaubhagā || 21 ||
[Analyze grammar]

iti cintayatastasya dṛṣṭāriṣṭena cetasā |
rājñaḥ pratyāgamad brahman yadupuryāḥ kapidhvajaḥ || 22 ||
[Analyze grammar]

taṃ pādayoḥ nipatitaṃ ayathāpūrvamāturam |
adhovadanaṃ abbindūn sṛjantaṃ nayanābjayoḥ || 23 ||
[Analyze grammar]

vilokya udvignahṛdayo vicchāyaṃ anujaṃ nṛpaḥ |
pṛcchati sma suhṛt madhye saṃsmaran nāraderitam || 24 ||
[Analyze grammar]

yudhiṣṭhira uvāca |
kaccidānartapuryāṃ naḥ svajanāḥ sukhamāsate |
madhubhojadaśārhārha sātvatāndhakavṛṣṇayaḥ || 25 ||
[Analyze grammar]

śūro mātāmahaḥ kaccit svastyāste vātha māriṣaḥ |
mātulaḥ sānujaḥ kaccit kuśalyānakadundubhiḥ || 26 ||
[Analyze grammar]

sapta svasārastatpat‍nyo mātulānyaḥ sahātmajāḥ |
āsate sasnuṣāḥ kṣemaṃ devakīpramukhāḥ svayam || 27 ||
[Analyze grammar]

kaccit rājā'huko jīvati asatputro'sya cānujaḥ |
hṛdīkaḥ sasuto'krūro jayantagadasāraṇāḥ || 28 ||
[Analyze grammar]

āsate kuśalaṃ kaccit ye ca śatrujidādayaḥ |
kaccidāste sukhaṃ rāmo bhagavān sātvatāṃ prabhuḥ || 29 ||
[Analyze grammar]

pradyumnaḥ sarvavṛṣṇīnāṃ sukhamāste mahārathaḥ |
gambhīrarayo'niruddho vardhate bhagavānuta || 30 ||
[Analyze grammar]

suṣeṇaścārudeṣṇaśca sāmbo jāmbavatīsutaḥ |
anye ca kārṣṇipravarāḥ saputrā ṛṣabhādayaḥ || 31 ||
[Analyze grammar]

tathaivānucarāḥ śaureḥ śrutadevoddhavādayaḥ |
sunandanandaśīrṣaṇyā ye cānye sātvatarṣabhāḥ || 32 ||
[Analyze grammar]

api svastyāsate sarve rāmakṛṣṇa bhujāśrayāḥ |
api smaranti kuśalaṃ asmākaṃ baddhasauhṛdāḥ || 33 ||
[Analyze grammar]

bhagavānapi govindo brahmaṇyo bhaktavatsalaḥ |
kaccitpure sudharmāyāṃ sukhamāste suhṛdvṛtaḥ || 34 ||
[Analyze grammar]

maṅgalāya ca lokānāṃ kṣemāya ca bhavāya ca |
āste yadukulāmbhodhau ādyo'nantasakhaḥ pumān || 35 ||
[Analyze grammar]

yad‍bāhudaṇḍaguptāyāṃ svapuryāṃ yadavo'rcitāḥ |
krīḍanti paramānandaṃ mahāpauruṣikā iva || 36 ||
[Analyze grammar]

yat pādaśuśrūṣaṇamukhya karmaṇā |
satyādayo dvyaṣṭasahasrayoṣitaḥ |
nirjitya saṅkhye tridaśāṃstadāśiṣo |
haranti vajrāyudhavallabhocitāḥ || 37 ||
[Analyze grammar]

yad‍bāhudaṇḍābhyudayānujīvino |
yadupravīrā hyakutobhayā muhuḥ |
adhikramantyaṅghribhirāhṛtāṃ balāt |
sabhāṃ sudharmāṃ surasattamocitām || 38 ||
[Analyze grammar]

kaccitte'nāmayaṃ tāta bhraṣṭatejā vibhāsi me |
alabdhamāno'vajñātaḥ kiṃ vā tāta ciroṣitaḥ || 39 ||
[Analyze grammar]

kaccit nābhihato'bhāvaiḥ śabdādibhiramaṅgalaiḥ |
na dattamuktamarthibhya āśayā yatpratiśrutam || 40 ||
[Analyze grammar]

kaccittvaṃ brāhmaṇaṃ bālaṃ gāṃ vṛddhaṃ rogiṇaṃ striyam |
śaraṇopasṛtaṃ sattvaṃ nātyākṣīḥ śaraṇapradaḥ || 41 ||
[Analyze grammar]

kaccittvaṃ nāgamo'gamyāṃ gamyāṃ vāsatkṛtāṃ striyam |
parājito vātha bhavān nottamairnāsamaiḥ pathi || 42 ||
[Analyze grammar]

api svitparyabhuṅkthāstvaṃ sambhojyān vṛddhabālakān |
jugupsitaṃ karma kiñcit kṛtavānna yadakṣamam || 43 ||
[Analyze grammar]

kaccitpreṣṭhatamenātha hṛdayenātmabandhunā |
śūnyo'smi rahito nityaṃ manyase te'nyathā na ruk || 44 ||
[Analyze grammar]

iti śrīmadbhāgavate mahāpurāṇe pāramahaṃsyāṃ saṃhitāyāṃ |
prathamaskandhe yudhiṣṭiravitarko nāma caturdaśo'dhyāyaḥ || 14 ||
[Analyze grammar]