Chapter 13

[English text for this chapter is available]

sūta uvāca |
vidurastīrthayātrāyāṃ maitreyādātmano gatim |
jñātvāgāt hāstinapuraṃ tayāvāptavivitsitaḥ || 1 ||
[Analyze grammar]

yāvataḥ kṛtavān praśnān kṣattā kauṣāravāgrataḥ |
jātaikabhaktiḥ govinde tebhyaścopararāma ha || 2 ||
[Analyze grammar]

taṃ bandhumāgataṃ dṛṣṭvā dharmaputraḥ sahānujaḥ |
dhṛtarāṣṭro yuyutsuśca sūtaḥ śāradvataḥ pṛthā || 3 ||
[Analyze grammar]

gāndhārī draupadī brahman subhadrā cottarā kṛpī |
anyāśca jāmayaḥ pāṇḍoḥ jñātayaḥ sasutāḥ striyaḥ || 4 ||
[Analyze grammar]

pratyujjagmuḥ praharṣeṇa prāṇaṃ tanva ivāgatam |
abhisaṅgamya vidhivat pariṣvaṅgābhivādanaiḥ || 5 ||
[Analyze grammar]

mumucuḥ premabāṣpaughaṃ virahautkaṇṭhya kātarāḥ |
rājā tamarhayāṃ cakre kṛtāsana parigraham || 6 ||
[Analyze grammar]

taṃ bhuktavantaṃ viśrāntaṃ āsīnaṃ sukhamāsane |
praśrayāvanato rājā prāha teṣāṃ ca śrṛṇvatām || 7 ||
[Analyze grammar]

yudhiṣṭhira uvāca |
api smaratha no yuṣmat pakṣacchāyāsamedhitān |
vipad‍gaṇād viṣāgnyādeḥ mocitā yatsamātṛkāḥ || 8 ||
[Analyze grammar]

kayā vṛttyā vartitaṃ vaḥ caradbhiḥ kṣitimaṇḍalam |
tīrthāni kṣetramukhyāni sevitānīha bhūtale || 9 ||
[Analyze grammar]

bhavadvidhā bhāgavatāḥ tīrthabhūtāḥ svayaṃ vibho |
tīrthīkurvanti tīrthāni svāntaḥsthena gadābhṛtā || 10 ||
[Analyze grammar]

api naḥ suhṛdastāta bāndhavāḥ kṛṣṇadevatāḥ |
dṛṣṭāḥ śrutā vā yadavaḥ svapuryāṃ sukhamāsate || 11 ||
[Analyze grammar]

ityukto dharmarājena sarvaṃ tat samavarṇayat |
yathānubhūtaṃ kramaśo vinā yadukulakṣayam || 12 ||
[Analyze grammar]

nanvapriyaṃ durviṣahaṃ nṛṇāṃ svayamupasthitam |
nāvedayat sakaruṇo duḥkhitān draṣṭumakṣamaḥ || 13 ||
[Analyze grammar]

kañcit kālamatha avātsīt satkṛto devavatsukham |
bhrāturjyeṣṭhasya śreyaskṛt sarveṣāṃ sukhamāvahan || 14 ||
[Analyze grammar]

abibhradaryamā daṇḍaṃ yathāvat aghakāriṣu |
yāvad dadhāra śūdratvaṃ śāpāt varṣaśataṃ yamaḥ || 15 ||
[Analyze grammar]

yudhiṣṭhiro labdharājyo dṛṣṭvā pautraṃ kulandharam |
bhrātṛbhirlokapālābhaiḥ mumude parayā śriyā || 16 ||
[Analyze grammar]

evaṃ gṛheṣu saktānāṃ pramattānāṃ tadīhayā |
atyakrāmat avijñātaḥ kālaḥ paramadustaraḥ || 17 ||
[Analyze grammar]

vidurastat abhipretya dhṛtarāṣṭraṃ abhāṣata |
rājan nirgamyatāṃ śīghraṃ paśyedaṃ bhayamāgatam || 18 ||
[Analyze grammar]

pratikriyā na yasyeha kutaścit karhicit prabho |
sa eṣa bhagavān kālaḥ sarveṣāṃ naḥ samāgataḥ || 19 ||
[Analyze grammar]

yena caivābhipanno'yaṃ prāṇaiḥ priyatamairapi |
janaḥ sadyo viyujyeta kimutānyaiḥ dhanādibhiḥ || 20 ||
[Analyze grammar]

pitṛbhrātṛsuhṛtputrā hatāste vigataṃ vayaḥ |
ātmā ca jarayā grastaḥ paragehamupāsase || 21 ||
[Analyze grammar]

aho mahīyasī jantoḥ jīvitāśā yayā bhavān |
bhīmāpavarjitaṃ piṇḍaṃ ādatte gṛhapālavat || 22 ||
[Analyze grammar]

agnirnisṛṣṭo dattaśca garo dārāśca dūṣitāḥ |
hṛtaṃ kṣetraṃ dhanaṃ yeṣāṃ taddattairasubhiḥ kiyat || 23 ||
[Analyze grammar]

tasyāpi tava deho'yaṃ kṛpaṇasya jijīviṣoḥ |
paraityanicchato jīrṇo jarayā vāsasī iva || 24 ||
[Analyze grammar]

gatasvārthamimaṃ dehaṃ virakto muktabandhanaḥ |
avijñātagatiḥ jahyāt sa vai dhīra udāhṛtaḥ || 25 ||
[Analyze grammar]

yaḥ svakātparato veha jātanirveda ātmavān |
hṛdi kṛtvā hariṃ gehāt pravrajet sa narottamaḥ || 26 ||
[Analyze grammar]

athodīcīṃ diśaṃ yātu svairajñāta gatirbhavān |
ito'rvāk prāyaśaḥ kālaḥ puṃsāṃ guṇavikarṣaṇaḥ || 27 ||
[Analyze grammar]

evaṃ rājā vidureṇānujena |
prajñācakṣurbodhita ājamīḍhaḥ |
chittvā sveṣu snehapāśāndraḍhimno |
niścakrāma bhrātṛsandarśitādhvā || 28 ||
[Analyze grammar]

patiṃ prayāntaṃ subalasya putrī |
pativratā cānujagāma sādhvī |
himālayaṃ nyastadaṇḍapraharṣaṃ |
manasvināmiva satsamprahāraḥ || 29 ||
[Analyze grammar]

ajātaśatruḥ kṛtamaitro hutāgniḥ |
viprān natvā tilagobhūmirukmaiḥ |
gṛhaṃ praviṣṭo guruvandanāya |
na cāpaśyat pitarau saubalīṃ ca || 30 ||
[Analyze grammar]

tatra sañjayamāsīnaṃ papracchodvignamānasaḥ |
gāvalgaṇe kva nastāto vṛddho hīnaśca netrayoḥ || 31 ||
[Analyze grammar]

ambā ca hataputrā'rtā pitṛvyaḥ kva gataḥ suhṛt |
api mayyakṛtaprajñe hatabandhuḥ sa bhāryayā |
āśaṃsamānaḥ śamalaṃ gaṅgāyāṃ duḥkhito'patat || 32 ||
[Analyze grammar]

pitaryuparate pāṇḍau sarvānnaḥ suhṛdaḥ śiśūn |
arakṣatāṃ vyasanataḥ pitṛvyau kva gatāvitaḥ || 33 ||
[Analyze grammar]

sūta uvāca |
kṛpayā snehavaiklavyāt sūto virahakarśitaḥ |
ātmeśvaramacakṣāṇo na pratyāhātipīḍitaḥ || 34 ||
[Analyze grammar]

vimṛjyāśrūṇi pāṇibhyāṃ viṣṭabhyātmānamātmanā |
ajātaśatruṃ pratyūce prabhoḥ pādāvanusmaran || 35 ||
[Analyze grammar]

sañjaya uvāca |
nāhaṃ veda vyavasitaṃ pitrorvaḥ kulanandana |
gāndhāryā vā mahābāho muṣito'smi mahātmabhiḥ || 37 ||
[Analyze grammar]

athājagāma bhagavān nāradaḥ sahatumburuḥ |
pratyutthāyābhivādyāha sānujo'bhyarcayan munim || 38 ||
[Analyze grammar]

yudhiṣṭhira uvāca |
nāhaṃ veda gatiṃ pitroḥ bhagavan kva gatāvitaḥ |
ambā vā hataputrārtā kva gatā ca tapasvinī || 39 ||
[Analyze grammar]

karṇadhāra ivāpāre bhagavān pāradarśakaḥ |
athābabhāṣe bhagavān nārado munisattamaḥ || 40 ||
[Analyze grammar]

nārada uvāca |
mā kañcana śuco rājan yadīśvaravaśaṃ jagat |
lokāḥ sapālā yasyeme vahanti balimīśituḥ |
sa saṃyunakti bhūtāni sa eva viyunakti ca || 40 ||
[Analyze grammar]

yathā gāvo nasi protāḥ tantyāṃ baddhāḥ svadāmabhiḥ |
vāktantyāṃ nāmabhirbaddhā vahanti balimīśituḥ || 41 ||
[Analyze grammar]

yathā krīḍopaskarāṇāṃ saṃyogavigamāviha |
icchayā krīḍituḥ syātāṃ tathaiveśecchayā nṛṇām || 42 ||
[Analyze grammar]

yanmanyase dhruvaṃ lokaṃ adhruvaṃ vā na cobhayam |
sarvathā na hi śocyāste snehāt anyatra mohajāt || 43 ||
[Analyze grammar]

tasmājjahyaṅga vaiklavyaṃ ajñānakṛtamātmanaḥ |
kathaṃ tvanāthāḥ kṛpaṇā varteraṃste ca māṃ vinā || 44 ||
[Analyze grammar]

kālakarma guṇādhīno deho'yaṃ pāñcabhautikaḥ |
kathamanyāṃstu gopāyet sarpagrasto yathā param || 45 ||
[Analyze grammar]

ahastāni sahastānāṃ apadāni catuṣpadām |
phalgūni tatra mahatāṃ jīvo jīvasya jīvanam || 46 ||
[Analyze grammar]

tadidaṃ bhagavān rājan eka ātmātmanāṃ svadṛk |
antaro'nantaro bhāti paśya taṃ māyayorudhā || 47 ||
[Analyze grammar]

so'yamadya mahārāja bhagavān bhūtabhāvanaḥ |
kālarūpo'vatīrṇo'syāṃ abhāvāya suradviṣām || 48 ||
[Analyze grammar]

niṣpāditaṃ devakṛtyaṃ avaśeṣaṃ pratīkṣate |
tāvad yūyaṃ avekṣadhvaṃ bhaved yāvadiheśvaraḥ || 49 ||
[Analyze grammar]

dhṛtarāṣṭraḥ saha bhrātrā gāndhāryā ca svabhāryayā |
dakṣiṇena himavata ṛṣīṇāṃ āśramaṃ gataḥ || 50 ||
[Analyze grammar]

srotobhiḥ saptabhiryā vai svardhunī saptadhā vyadhāt |
saptānāṃ prītaye nānā saptasrotaḥ pracakṣate || 51 ||
[Analyze grammar]

snātvānusavanaṃ tasmin hutvā cāgnīnyathāvidhi |
abbhakṣa upaśāntātmā sa āste vigataiṣaṇaḥ || 52 ||
[Analyze grammar]

jitāsano jitaśvāsaḥ pratyāhṛtaṣaḍindriyaḥ |
haribhāvanayā dhvastaḥ ajaḥsattvatamomalaḥ || 53 ||
[Analyze grammar]

vijñānātmani saṃyojya kṣetrajñe pravilāpya tam |
brahmaṇyātmānamādhāre ghaṭāmbaramivāmbare || 54 ||
[Analyze grammar]

dhvastamāyāguṇodarko niruddhakaraṇāśayaḥ |
nivartitākhilāhāra āste sthāṇurivācalaḥ |
tasyāntarāyo maivābhūḥ sannyastākhilakarmaṇaḥ || 55 ||
[Analyze grammar]

sa vā adyatanād rājan parataḥ pañcame'hani |
kalevaraṃ hāsyati svaṃ tacca bhasmībhaviṣyati || 56 ||
[Analyze grammar]

dahyamāne'gnibhirdehe patyuḥ pat‍nī sahoṭaje |
bahiḥ sthitā patiṃ sādhvī tamagnimanu vekṣyati || 57 ||
[Analyze grammar]

vidurastu tadāścaryaṃ niśāmya kurunandana |
harṣaśokayutastasmād gantā tīrthaniṣevakaḥ || 58 ||
[Analyze grammar]

ityuktvāthāruhat svargaṃ nāradaḥ sahatumburuḥ |
yudhiṣṭhiro vacastasya hṛdi kṛtvājahācchucaḥ || 59 ||
[Analyze grammar]

iti śrīmadbhāgavate mahāpurāṇe pāramahaṃsyāṃ saṃhitāyāṃ |
prathamaskandhe naimiṣīyopākhyāne trayodaśo'dhyāyaḥ || 13 ||
[Analyze grammar]