Chapter 5

[English text for this chapter is available]

sūta uvāca |
atha taṃ sukhamāsīna upāsīnaṃ bṛhacchravāḥ |
devarṣiḥ prāha viprarṣiṃ vīṇāpāṇiḥ smayanniva || 1 ||
[Analyze grammar]

nārada uvāca |
pārāśarya mahābhāga bhavataḥ kaccidātmanā |
parituṣyati śārīra ātmā mānasa eva vā || 2 ||
[Analyze grammar]

jijñāsitaṃ susaṃpannaṃ api te mahadad‍bhutam |
kṛtavān bhārataṃ yastvaṃ sarvārthaparibṛṃhitam || 3 ||
[Analyze grammar]

jijñāsitamadhītaṃ ca yattad brahma sanātanam |
tathāpi śocasyātmānaṃ akṛtārtha iva prabho || 4 ||
[Analyze grammar]

vyāsa uvāca |
astyeva me sarvamidaṃ tvayoktaṃ |
tathāpi nātmā parituṣyate me |
tanmūlamavyaktamagādhabodhaṃ |
pṛcchāmahe tvātmabhavātmabhūtam || 5 ||
[Analyze grammar]

sa vai bhavān veda samastaguhyaṃ |
upāsito yatpuruṣaḥ purāṇaḥ |
parāvareśo manasaiva viśvaṃ |
sṛjatyavatyatti guṇairasaṅgaḥ || 6 ||
[Analyze grammar]

tvaṃ paryaṭannarka iva trilokīṃ |
antaścaro vāyurivātmasākṣī |
parāvare brahmaṇi dharmato vrataiḥ |
snātasya me nyūnamalaṃ vicakṣva || 7 ||
[Analyze grammar]

śrīnārada uvāca |
bhavatānuditaprāyaṃ yaśo bhagavato'malam |
yenaivāsau na tuṣyeta manye taddarśanaṃ khilam || 8 ||
[Analyze grammar]

yathā dharmādayaścārthā munivaryānukīrtitāḥ |
na tathā vāsudevasya mahimā hyanuvarṇitaḥ || 9 ||
[Analyze grammar]

na yad vacaścitrapadaṃ hareryaśo |
jagatpavitraṃ pragṛṇīta karhicit |
tadvāyasaṃ tīrthamuśanti mānasā |
na yatra haṃsā niramantyuśikkṣayāḥ || 10 ||
[Analyze grammar]

tadvāgvisargo janatāghaviplavo |
yasmin pratiślokamabaddhavatyapi |
nāmānyanantasya yaśo'ṅkitāni yat |
śrṛṇvanti gāyanti gṛṇanti sādhavaḥ || 11 ||
[Analyze grammar]

naiṣkarmyamapyacyutabhāvavarjitaṃ |
na śobhate jñānamalaṃ nirañjanam |
kutaḥ punaḥ śaśvadabhadramīśvare |
na cārpitaṃ karma yadapyakāraṇam || 12 ||
[Analyze grammar]

atho mahābhāga bhavānamoghadṛk |
śuciśravāḥ satyarato dhṛtavrataḥ |
urukramasyākhilabaṃdhamuktaye |
samādhinānusmara tadviceṣṭitam || 13 ||
[Analyze grammar]

tato'nyathā kiñcana yadvivakṣataḥ |
pṛthag dṛśastat kṛtarūpanāmabhiḥ |
na karhicit kvāpi ca duḥsthitā matiḥ |
labheta vātāhatanaurivāspadam || 14 ||
[Analyze grammar]

jugupsitaṃ dharmakṛte'nuśāsataḥ |
svabhāvaraktasya mahān vyatikramaḥ |
yadvākyato dharma itītaraḥ sthito |
na manyate tasya nivāraṇaṃ janaḥ || 15 ||
[Analyze grammar]

vicakṣaṇo'syārhati vedituṃ vibhoḥ |
anantapārasya nivṛttitaḥ sukham |
pravartamānasya guṇairanātmanaḥ |
tato bhavān darśaya ceṣṭitaṃ vibhoḥ || 16 ||
[Analyze grammar]

tyaktvā svadharmaṃ caraṇāmbujaṃ hareḥ |
bhajan apakvo'tha patet tato yadi |
yatra kva vābhadramabhūdamuṣya kiṃ |
ko vārtha āpto'bhajatāṃ svadharmataḥ || 17 ||
[Analyze grammar]

tasyaiva hetoḥ prayateta kovido |
na labhyate yad‍bhramatāmuparyadhaḥ |
tallabhyate duḥkhavadanyataḥ sukhaṃ |
kālena sarvatra gabhīraraṃhasā || 18 ||
[Analyze grammar]

na vai jano jātu kathañcanāvrajet |
mukuṃdasevyanyavadaṅga saṃsṛtim |
smaran mukuṃdāṅghryupagūhanaṃ punaḥ |
vihātumicchenna rasagraho janaḥ || 19 ||
[Analyze grammar]

idaṃ hi viśvaṃ bhagavānivetaro |
yato jagatsthānanirodhasaṃbhavāḥ |
taddhi svayaṃ veda bhavāṃstathāpi vai |
prādeśamātraṃ bhavataḥ pradarśitam || 20 ||
[Analyze grammar]

tvamātmanātmānamavehyamoghadṛk |
parasya puṃsaḥ paramātmanaḥ kalām |
ajaṃ prajātaṃ jagataḥ śivāya tan |
mahānubhāvābhyudayo'dhigaṇyatām || 21 ||
[Analyze grammar]

idaṃ hi puṃsastapasaḥ śrutasya vā |
sviṣṭasya sūktasya ca buddhidattayoḥ |
avicyuto'rthaḥ kavibhirnirūpito |
yaduttamaśloka guṇānuvarṇanam || 22 ||
[Analyze grammar]

ahaṃ purātītabhave'bhavaṃ mune |
dāsyāstu kasyāścana vedavādinām |
nirūpito bālaka eva yogināṃ |
śuśrūṣaṇe prāvṛṣi nirvivikṣatām || 23 ||
[Analyze grammar]

te mayyapetākhilacāpale'rbhake |
dānte'dhṛtakrīḍanake'nuvartini |
cakruḥ kṛpāṃ yadyapi tulyadarśanāḥ |
śuśrūṣamāṇe munayo'lpabhāṣiṇi || 24 ||
[Analyze grammar]

ucchiṣṭalepānanumodito dvijaiḥ |
sakṛtsma bhuñje tadapāstakilbiṣaḥ |
evaṃ pravṛttasya viśuddhacetasaḥ |
taddharma evātmaruciḥ prajāyate || 25 ||
[Analyze grammar]

tatrānvahaṃ kṛṣṇakathāḥ pragāyatāṃ |
anugraheṇāśrṛṇavaṃ manoharāḥ |
tāḥ śraddhayā me'nupadaṃ viśrṛṇvataḥ |
priyaśravasyaṅga mamābhavad ruciḥ || 26 ||
[Analyze grammar]

tasmiṃstadā labdharucermahāmate |
priyaśravasyaskhalitā matirmama |
yayāhametat sadasatsvamāyayā |
paśye mayi brahmaṇi kalpitaṃ pare || 27 ||
[Analyze grammar]

itthaṃ śarat prāvṛṣikāvṛtū hareḥ |
viśrṛṇvato me'nusavaṃ yaśo'malam |
saṅkīrtyamānaṃ munibhirmahātmabhiḥ |
bhaktiḥ pravṛttā'tmarajastamopahā || 28 ||
[Analyze grammar]

tasyaivaṃ me'nuraktasya praśritasya hatainasaḥ |
śraddadhānasya bālasya dāntasyānucarasya ca || 29 ||
[Analyze grammar]

jñānaṃ guhyatamaṃ yattat sākṣād‍bhagavatoditam |
anvavocan gamiṣyantaḥ kṛpayā dīnavatsalāḥ || 30 ||
[Analyze grammar]

yenaivāhaṃ bhagavato vāsudevasya vedhasaḥ |
māyānubhāvamavidaṃ yena gacchanti tatpadam || 31 ||
[Analyze grammar]

etat saṃsūcitaṃ brahman tāpatrayacikitsitam |
yadīśvare bhagavati karma brahmaṇi bhāvitam || 32 ||
[Analyze grammar]

āmayo yaśca bhūtānāṃ jāyate yena suvrata |
tadeva hyāmayaṃ dravyaṃ na punāti cikitsitam || 33 ||
[Analyze grammar]

evaṃ nṛṇāṃ kriyāyogāḥ sarve saṃsṛtihetavaḥ |
ta evātmavināśāya kalpante kalpitāḥ pare || 34 ||
[Analyze grammar]

yadatra kriyate karma bhagavat paritoṣaṇam |
jñānaṃ yat tad adhīnaṃ hi bhaktiyogasamanvitam || 35 ||
[Analyze grammar]

kurvāṇā yatra karmāṇi bhagavacchikṣayāsakṛt |
gṛṇanti guṇanāmāni kṛṣṇasyānusmaranti ca || 36 ||
[Analyze grammar]

namo bhagavate tubhyaṃ vāsudevāya dhīmahi |
pradyumnāyāniruddhāya namaḥ saṅkarṣaṇāya ca || 37 ||
[Analyze grammar]

iti mūrtyabhidhānena maṃtramūrtimamūrtikam |
yajate yajñapuruṣaṃ sa samyag darśanaḥ pumān || 38 ||
[Analyze grammar]

imaṃ svanigamaṃ brahman avetya madanuṣṭhitam |
adānme jñānamaiśvaryaṃ svasmin bhāvaṃ ca keśavaḥ || 39 ||
[Analyze grammar]

tvamapyadabhraśruta viśrutaṃ vibhoḥ |
samāpyate yena vidāṃ bubhutsitam |
prākhyāhi duḥkhairmuhurarditātmanāṃ |
saṃkleśanirvāṇamuśanti nānyathā || 40 ||
[Analyze grammar]

iti śrīmadbhāgavate mahāpurāṇe pāramahaṃsyāṃ saṃhitāyāṃ |
prathamaskandhe vyāsanāradasaṃvāde pañcamo'dhyāyaḥ || 5 ||
[Analyze grammar]