Chapter 6

[English text for this chapter is available]

sūta uvāca |
evaṃ niśamya bhagavān devarṣerjanma karma ca |
bhūyaḥ papraccha taṃ brahman vyāsaḥ satyavatīsutaḥ || 1 ||
[Analyze grammar]

vyāsa uvāca |
bhikṣubhirvipravasite vijñānādeṣṭṛbhistava |
vartamāno vayasyādye tataḥ kimakarod‍bhavān || 2 ||
[Analyze grammar]

svāyaṃbhuva kayā vṛttyā vartitaṃ te paraṃ vayaḥ |
kathaṃ cedamudasrākṣīḥ kāle prāpte kalevaram || 3 ||
[Analyze grammar]

prākkalpaviṣayāmetāṃ smṛtiṃ te surasattama |
na hyeṣa vyavadhātkāla eṣa sarvanirākṛtiḥ || 4 ||
[Analyze grammar]

nārada uvāca |
bhikṣubhirvipravasite vijñānādeṣṭṛbhirmama |
vartamāno vayasyādye tata etadakāraṣam || 5 ||
[Analyze grammar]

ekātmajā me jananī yoṣinmūḍhā ca kiṅkarī |
mayyātmaje'nanyagatau cakre snehānubaṃdhanam || 6 ||
[Analyze grammar]

sāsvataṃtrā na kalpāsīd yogakṣemaṃ mamecchatī |
īśasya hi vaśe loko yoṣā dārumayī yathā || 7 ||
[Analyze grammar]

ahaṃ ca tad‍brahmakule ūṣivāṃstadapekṣayā |
digdeśakālāvyutpanno bālakaḥ pañcahāyanaḥ || 8 ||
[Analyze grammar]

ekadā nirgatāṃ gehād duhantīṃ niśi gāṃ pathi |
sarpo'daśatpadā spṛṣṭaḥ kṛpaṇāṃ kālacoditaḥ || 9 ||
[Analyze grammar]

tadā tadahamīśasya bhaktānāṃ śamabhīpsataḥ |
anugrahaṃ manyamānaḥ prātiṣṭhaṃ diśamuttarām || 10 ||
[Analyze grammar]

sphītāñjanapadāṃstatra puragrāmavrajākarān |
kheṭakharvaṭavāṭīśca vanānyupavanāni ca || 11 ||
[Analyze grammar]

citradhātuvicitrādrīn ibhabhagnabhujadrumān |
jalāśayān śivajalān nalinīḥ surasevitāḥ || 12 ||
[Analyze grammar]

citrasvanaiḥ patrarathaiḥ vibhramad bhramaraśriyaḥ |
nalaveṇuśarastamba kuśakīcakagahvaram || 13 ||
[Analyze grammar]

eka evātiyāto'haṃ adrākṣaṃ vipinaṃ mahat |
ghoraṃ pratibhayākāraṃ vyālolūkaśivājiram || 14 ||
[Analyze grammar]

pariśrāntendriyātmāhaṃ tṛṭparīto bubhukṣitaḥ |
snātvā pītvā hrade nadyā upaspṛṣṭo gataśramaḥ || 15 ||
[Analyze grammar]

tasminnirmanuje'raṇye pippalopastha āśritaḥ |
ātmanātmānamātmasthaṃ yathāśrutamacintayam || 16 ||
[Analyze grammar]

dhyāyataścaraṇāṃbhojaṃ bhāvanirjitacetasā |
autkaṇṭhyāśrukalākṣasya hṛdyāsīnme śanairhariḥ || 17 ||
[Analyze grammar]

premātibharanirbhinna pulakāṅgo'tinirvṛtaḥ |
ānaṃdasaṃplave līno nāpaśyamubhayaṃ mune || 18 ||
[Analyze grammar]

rūpaṃ bhagavato yattan manaḥkāntaṃ śucāpaham |
apaśyan sahasottasthe vaiklavyād durmanā iva || 19 ||
[Analyze grammar]

didṛkṣustadahaṃ bhūyaḥ praṇidhāya mano hṛdi |
vīkṣamāṇo'pi nāpaśyaṃ avitṛpta ivāturaḥ || 20 ||
[Analyze grammar]

evaṃ yatantaṃ vijane māmāhāgocaro girām |
gaṃbhīraślakṣṇayā vācā śucaḥ praśamayanniva || 21 ||
[Analyze grammar]

hantāsmin janmani bhavān mā māṃ draṣṭumihārhati |
avipakvakaṣāyāṇāṃ durdarśo'haṃ kuyoginām || 22 ||
[Analyze grammar]

sakṛd yad darśitaṃ rūpaṃ etatkāmāya te'nagha |
matkāmaḥ śanakaiḥ sādhu sarvān muñcati hṛcchayān || 23 ||
[Analyze grammar]

satsevayā'dīrghayā te jātā mayi dṛḍhā matiḥ |
hitvāvadyamimaṃ lokaṃ gantā majjanatāmasi || 24 ||
[Analyze grammar]

matirmayi nibaddheyaṃ na vipadyeta karhicit |
prajāsarganirodhe'pi smṛtiśca madanugrahāt || 25 ||
[Analyze grammar]

etāvaduktvopararāma tanmahad |
bhūtaṃ nabholiṅgamaliṅgamīśvaram |
ahaṃ ca tasmai mahatāṃ mahīyase |
śīrṣṇāvanāmaṃ vidadhe'nukaṃpitaḥ || 26 ||
[Analyze grammar]

nāmānyanantasya hatatrapaḥ paṭhan |
guhyāni bhadrāṇi kṛtāni ca smaran |
gāṃ paryaṭan tuṣṭamanā gataspṛhaḥ |
kālaṃ pratīkṣan vimado vimatsaraḥ || 27 ||
[Analyze grammar]

evaṃ kṛṣṇamaterbrahman asaktasyāmalātmanaḥ |
kālaḥ prādurabhūtkāle taḍitsaudāmanī yathā || 28 ||
[Analyze grammar]

prayujyamāne mayi tāṃ śuddhāṃ bhāgavatīṃ tanum |
ārabdhakarmanirvāṇo nyapatat pāṃcabhautikaḥ || 29 ||
[Analyze grammar]

kalpānta idamādāya śayāne'mbhasyudanvataḥ |
śiśayiṣoranuprāṇaṃ viviśe'ntarahaṃ vibhoḥ || 30 ||
[Analyze grammar]

sahasrayugaparyante utthāyedaṃ sisṛkṣataḥ |
marīcimiśrā ṛṣayaḥ prāṇebhyo'haṃ ca jajñire || 31 ||
[Analyze grammar]

aṃtarbahiśca lokān trīn paryemyaskanditavrataḥ |
anugrahāt mahāviṣṇoḥ avighātagatiḥ kvacit || 32 ||
[Analyze grammar]

devadattāmimāṃ vīṇāṃ svarabrahmavibhūṣitām |
mūrcchayitvā harikathāṃ gāyamānaścarāmyaham || 33 ||
[Analyze grammar]

pragāyataḥ svavīryāṇi tīrthapādaḥ priyaśravāḥ |
āhūta iva me śīghraṃ darśanaṃ yāti cetasi || 34 ||
[Analyze grammar]

etaddhyāturacittānāṃ mātrāsparśecchayā muhuḥ |
bhavasindhuplavo dṛṣṭo haricaryānuvarṇanam || 35 ||
[Analyze grammar]

yamādibhiryogapathaiḥ kāmalobhahato muhuḥ |
mukuṃdasevayā yadvat tathātmāddhā na śāmyati || 36 ||
[Analyze grammar]

sarvaṃ tadidamākhyātaṃ yatpṛṣṭo'haṃ tvayānagha |
janmakarmarahasyaṃ me bhavataścātmatoṣaṇam || 37 ||
[Analyze grammar]

sūta uvāca |
evaṃ saṃbhāṣya bhagavān nārado vāsavīsutam |
āmaṃtrya vīṇāṃ raṇayan yayau yādṛcchiko muniḥ || 38 ||
[Analyze grammar]

aho devarṣirdhanyo'yaṃ yatkīrtiṃ śārṅgadhanvanaḥ |
gāyanmādyannidaṃ taṃtryā ramayatyāturaṃ jagat || 39 ||
[Analyze grammar]

iti śrīmadbhāgavate mahāpurāṇe pāramahaṃsyāṃ saṃhitāyāṃ |
prathamaskandhe vyāsanāradasaṃvāde ṣaṣṭho'dhyāyaḥ || 6 ||
[Analyze grammar]