Chapter 4

[English text for this chapter is available]

vyāsa uvāca |
iti bruvāṇaṃ saṃstūya munīnāṃ dīrghasatriṇām |
vṛddhaḥ kulapatiḥ sūtaṃ bahvṛcaḥ śaunako'bravīt || 1 ||
[Analyze grammar]

śaunaka uvāca |
sūta sūta mahābhāga vada no vadatāṃ vara |
kathāṃ bhāgavatīṃ puṇyāṃ yadāha bhagavān śukaḥ || 2 ||
[Analyze grammar]

kasmin yuge pravṛtteyaṃ sthāne vā kena hetunā |
kutaḥ sañcoditaḥ kṛṣṇaḥ kṛtavān saṃhitāṃ muniḥ || 3 ||
[Analyze grammar]

tasya putro mahāyogī samadṛṅ nirvikalpakaḥ |
ekāntamatiḥ unnidro gūḍho mūḍha iveyate || 4 ||
[Analyze grammar]

dṛṣṭvānuyāntamṛṣimātmajamapyanagnaṃ |
devyo hriyā paridadhurna sutasya citram |
tadvīkṣya pṛcchati munau jagadustavāsti |
strīpumbhidā na tu sutasya viviktadṛṣṭeḥ || 5 ||
[Analyze grammar]

kathamālakṣitaḥ pauraiḥ saṃprāptaḥ kurujāṅgalān |
unmattamūkajaḍavad vicaran gajasāhvaye || 6 ||
[Analyze grammar]

kathaṃ vā pāṇḍaveyasya rājarṣermuninā saha |
saṃvādaḥ samabhūt tāta yatraiṣā sātvatī śrutiḥ || 7 ||
[Analyze grammar]

sa godohanamātraṃ hi gṛheṣu gṛhamedhinām |
avekṣate mahābhāgaḥ tīrthīkurvan tadāśramam || 8 ||
[Analyze grammar]

abhimanyusutaṃ sūta prāhurbhāgavatottamam |
tasya janma mahāścaryaṃ karmāṇi ca gṛṇīhi naḥ || 9 ||
[Analyze grammar]

sa samrāṭ kasya vā hetoḥ pāṇḍūnāṃ mānavardhanaḥ |
prāyopaviṣṭo gaṅgāyāṃ anādṛtya adhirāṭ śriyam || 10 ||
[Analyze grammar]

namanti yatpādaniketamātmanaḥ |
śivāya hānīya dhanāni śatravaḥ |
kathaṃ sa vīraḥ śriyamaṅga dustyajāṃ |
yuvaiṣatot sraṣṭumaho sahāsubhiḥ || 11 ||
[Analyze grammar]

śivāya lokasya bhavāya bhūtaye |
ya uttamaślokaparāyaṇā janāḥ |
jīvanti nātmārthamasau parāśrayaṃ |
mumoca nirvidya kutaḥ kalevaram || 12 ||
[Analyze grammar]

tatsarvaṃ naḥ samācakṣva pṛṣṭo yadiha kiñcana |
manye tvāṃ viṣaye vācāṃ snātamanyatra chāndasāt || 13 ||
[Analyze grammar]

sūta uvāca |
dvāpare samanuprāpte tṛtīye yugaparyaye |
jātaḥ parāśarād yogī vāsavyāṃ kalayā hareḥ || 14 ||
[Analyze grammar]

sa kadācit sarasvatyā upaspṛśya jalaṃ śuciḥ |
viviktadeśa āsīna udite ravimaṇḍale || 15 ||
[Analyze grammar]

parāvarajñaḥ sa ṛṣiḥ kālenāvyaktaraṃhasā |
yugadharmavyatikaraṃ prāptaṃ bhuvi yuge yuge || 16 ||
[Analyze grammar]

bhautikānāṃ ca bhāvānāṃ śaktihrāsaṃ ca tatkṛtam |
aśraddadhānānniḥsattvān durmedhān hrasitāyuṣaḥ || 17 ||
[Analyze grammar]

durbhagāṃśca janān vīkṣya munirdivyena cakṣuṣā |
sarvavarṇāśramāṇāṃ yad dadhyau hitamamoghadṛk || 18 ||
[Analyze grammar]

cāturhotraṃ karma śuddhaṃ prajānāṃ vīkṣya vaidikam |
vyadadhād yajñasantatyai vedamekaṃ caturvidham || 19 ||
[Analyze grammar]

ṛgyajuḥsāmātharvākhyā vedāścatvāra uddhṛtāḥ |
itihāsapurāṇaṃ ca pañcamo veda ucyate || 20 ||
[Analyze grammar]

tatrargvedadharaḥ pailaḥ sāmago jaiminiḥ kaviḥ |
vaiśaṃpāyana evaiko niṣṇāto yajuṣāmuta || 21 ||
[Analyze grammar]

atharvāṅgirasāmāsīt sumanturdāruṇo muniḥ |
itihāsapurāṇānāṃ pitā me romaharṣaṇaḥ || 22 ||
[Analyze grammar]

ta eta ṛṣayo vedaṃ svaṃ svaṃ vyasyannanekadhā |
śiṣyaiḥ praśiṣyaiḥ tat śiṣyaiḥ vedāste śākhino'bhavan || 23 ||
[Analyze grammar]

ta eva vedā durmedhaiḥ dhāryante puruṣairyathā |
evaṃ cakāra bhagavān vyāsaḥ kṛpaṇavatsalaḥ || 24 ||
[Analyze grammar]

strīśūdradvijabaṃdhūnāṃ trayī na śrutigocarā |
karmaśreyasi mūḍhānāṃ śreya evaṃ bhavediha |
iti bhāratamākhyānaṃ kṛpayā muninā kṛtam || 25 ||
[Analyze grammar]

evaṃ pravṛttasya sadā bhūtānāṃ śreyasi dvijāḥ |
sarvātmakenāpi yadā nātuṣyat hṛdayaṃ tataḥ || 26 ||
[Analyze grammar]

nātiprasīdad hṛdayaḥ sarasvatyāstaṭe śucau |
vitarkayan viviktastha idaṃ provāca dharmavit || 27 ||
[Analyze grammar]

dhṛtavratena hi mayā chandāṃsi guravo'gnayaḥ |
mānitā nirvyalīkena gṛhītaṃ cānuśāsanam || 28 ||
[Analyze grammar]

bhāratavyapadeśena hyāmnāyārthaśca darśitaḥ |
dṛśyate yatra dharmādi strīśūdrādibhirapyuta || 29 ||
[Analyze grammar]

tathāpi bata me daihyo hyātmā caivātmanā vibhuḥ |
asaṃpampanna ivābhāti brahmavarcasya sattamaḥ || 30 ||
[Analyze grammar]

kiṃ vā bhāgavatā dharmā na prāyeṇa nirūpitāḥ |
priyāḥ paramahaṃsānāṃ ta eva hyacyutapriyāḥ || 31 ||
[Analyze grammar]

tasyaivaṃ khilamātmānaṃ manyamānasya khidyataḥ |
kṛṣṇasya nārado'bhyāgād āśramaṃ prāgudāhṛtam || 32 ||
[Analyze grammar]

tamabhijñāya sahasā pratyutthāyāgataṃ muniḥ |
pūjayāmāsa vidhivat nāradaṃ surapūjitam || 33 ||
[Analyze grammar]

iti śrīmadbhāgavate mahāpurāṇe pāramahaṃsyāṃ saṃhitāyāṃ |
prathamaskandhe naimiṣīyopākhyāne caturtho'dhyāyaḥ || 4 ||
[Analyze grammar]