Chapter 3

[English text for this chapter is available]

sūta uvāca |
jagṛhe pauruṣaṃ rūpaṃ bhagavān mahadādibhiḥ |
saṃbhūtaṃ ṣoḍaśakalaṃ ādau lokasisṛkṣayā || 1 ||
[Analyze grammar]

yasyāmbhasi śayānasya yoganidrāṃ vitanvataḥ |
nābhihradāmbujādāsīd brahmā viśvasṛjāṃ patiḥ || 2 ||
[Analyze grammar]

yasyāvayavasaṃsthānaiḥ kalpito lokavistaraḥ |
tad vai bhagavato rūpaṃ viśuddhaṃ sattvamūrjitam || 3 ||
[Analyze grammar]

paśyantyadorūpamadabhracakṣuṣā |
sahasrapādorubhujānanād‍bhutam |
sahasramūrdhaśravaṇākṣināsikaṃ |
sahasramaulyambarakuṇḍalollasat || 4 ||
[Analyze grammar]

etannānāvatārāṇāṃ nidhānaṃ bījamavyayam |
yasyāṃśāṃśena sṛjyante devatiryaṅnarādayaḥ || 5 ||
[Analyze grammar]

sa eva prathamaṃ devaḥ kaumāraṃ sargamāśritaḥ |
cacāra duścaraṃ brahmā brahmacaryamakhaṇḍitam || 6 ||
[Analyze grammar]

dvitīyaṃ tu bhavāyāsya rasātalagatāṃ mahīm |
uddhariṣyan upādatta yajñeśaḥ saukaraṃ vapuḥ || 7 ||
[Analyze grammar]

tṛtīyaṃ ṛṣisargaṃ vai devarṣitvamupetya saḥ |
tantraṃ sātvatamācaṣṭa naiṣkarmyaṃ karmaṇāṃ yataḥ || 8 ||
[Analyze grammar]

turye dharmakalāsarge naranārāyaṇau ṛṣī |
bhūtvātmopaśamopetaṃ akarod duścaraṃ tapaḥ || 9 ||
[Analyze grammar]

pañcamaḥ kapilo nāma siddheśaḥ kālaviplutam |
provācāsuraye sāṃkhyaṃ tattvagrāmavinirṇayam || 10 ||
[Analyze grammar]

ṣaṣṭhe atrerapatyatvaṃ vṛtaḥ prāpto'nasūyayā |
ānvīkṣikīmalarkāya prahlādādibhya ūcivān || 11 ||
[Analyze grammar]

tataḥ saptama ākūtyāṃ ruceryajño'bhyajāyata |
sa yāmādyaiḥ suragaṇaiḥ apāt svāyaṃbhuvāntaram || 12 ||
[Analyze grammar]

aṣṭame merudevyāṃ tu nābherjāta urukramaḥ |
darśayanvartma dhīrāṇāṃ sarvāśrama namaskṛtam || 13 ||
[Analyze grammar]

ṛṣibhiryācito bheje navamaṃ pārthivaṃ vapuḥ |
dugdhemāmoṣadhīrviprāḥ tenāyaṃ sa uśattamaḥ || 14 ||
[Analyze grammar]

rūpaṃ sa jagṛhe mātsyaṃ cākṣuṣodadhisaṃplave |
nāvyāropya mahīmayyāṃ apād vaivasvataṃ manum || 15 ||
[Analyze grammar]

surāsurāṇāṃ udadhiṃ mathnatāṃ mandarācalam |
dadhre kamaṭharūpeṇa pṛṣṭha ekādaśe vibhuḥ || 16 ||
[Analyze grammar]

dhānvantaraṃ dvādaśamaṃ trayodaśamameva ca |
apāyayatsurānanyān mohinyā mohayanstriyā || 17 ||
[Analyze grammar]

caturdaśaṃ nārasiṃhaṃ bibhrad daityendramūrjitam |
1 dadāra karajairūrau erakāṃ kaṭakṛt yathā || 18 ||
[Analyze grammar]

pañcadaśaṃ vāmanakaṃ kṛtvāgādadhvaraṃ baleḥ |
padatrayaṃ yācamānaḥ pratyāditsustriviṣṭapam || 19 ||
[Analyze grammar]

avatāre ṣoḍaśame paśyan brahmadruho nṛpān |
triḥsaptakṛtvaḥ kupito niḥkṣatrāṃ akaronmahīm || 20 ||
[Analyze grammar]

tataḥ saptadaśe jātaḥ satyavatyāṃ parāśarāt |
cakre vedataroḥ śākhā dṛṣṭvā puṃso'lpamedhasaḥ || 21 ||
[Analyze grammar]

naradevatvamāpannaḥ surakāryacikīrṣayā |
samudranigrahādīni cakre vīryāṇyataḥ param || 22 ||
[Analyze grammar]

ekonaviṃśe viṃśatime vṛṣṇiṣu prāpya janmanī |
rāmakṛṣṇāviti bhuvo bhagavān aharadbharam || 23 ||
[Analyze grammar]

tataḥ kalau saṃpravṛtte sammohāya suradviṣām |
buddho nāmnāṃ janasutaḥ kīkaṭeṣu bhaviṣyati || 24 ||
[Analyze grammar]

athāsau yugasaṃdhyāyāṃ dasyuprāyeṣu rājasu |
janitā viṣṇuyaśaso nāmnā kalkirjagatpatiḥ || 25 ||
[Analyze grammar]

avatārā hyasaṅkhyeyā hareḥ sattvanidherdvijāḥ |
yathāvidāsinaḥkulyāḥ sarasaḥ syuḥ sahasraśaḥ || 26 ||
[Analyze grammar]

ṛṣayo manavo devā manuputrā mahaujasaḥ |
kalāḥ sarve harereva saprajāpatayaḥ tathā || 27 ||
[Analyze grammar]

ete cāṃśakalāḥpuṃsaḥkṛṣṇastu bhagavānsvayam |
indrārivyākulaṃ lokaṃ mṛḍayanti yuge yuge || 28 ||
[Analyze grammar]

janma guhyaṃ bhagavato ya etatprayato naraḥ |
sāyaṃprātargṛṇanbhaktyā duḥkhagrāmād vimucyate || 29 ||
[Analyze grammar]

etad rūpaṃ bhagavato hyarūpasya cidātmanaḥ |
māyāguṇairviracitaṃ mahadādibhirātmani || 30 ||
[Analyze grammar]

yathā nabhasi meghaugho reṇurvā pārthivo'nile |
evaṃ draṣṭari dṛśyatvaṃ āropitaṃ abuddhibhiḥ || 31 ||
[Analyze grammar]

ataḥ paraṃ yadavyaktaṃ avyūḍhaguṇabṛṃhitam |
adṛṣṭāśrutavastutvāt sa jīvo yat punarbhavaḥ || 32 ||
[Analyze grammar]

yatreme sadasad rūpe pratiṣiddhe svasaṃvidā |
avidyayā'tmani kṛte iti tadbrahmadarśanam || 33 ||
[Analyze grammar]

yadyeṣoparatā devī māyā vaiśāradī matiḥ |
saṃpanna eveti viduḥ mahimni sve mahīyate || 34 ||
[Analyze grammar]

evaṃ janmāni karmāṇi hyakarturajanasya ca |
varṇayanti sma kavayo vedaguhyāni hṛtpateḥ || 35 ||
[Analyze grammar]

sa vā idaṃ viśvamamoghalīlaḥ |
sṛjatyavatyatti na sajjate'smin |
bhūteṣu cāntarhita ātmataṃtraḥ |
ṣāḍvargikaṃ jighrati ṣaḍguṇeśaḥ || 36 ||
[Analyze grammar]

na cāsya kaścinnipuṇena dhātuḥ |
avaiti jantuḥ kumanīṣa ūtīḥ |
nāmāni rūpāṇi manovacobhiḥ |
santanvato naṭacaryāmivājñaḥ || 37 ||
[Analyze grammar]

sa veda dhātuḥ padavīṃ parasya |
durantavīryasya rathāṅgapāṇeḥ |
yo'māyaya ाsantatayānuvṛttyā |
bhajeta tatpādasarojagandham || 38 ||
[Analyze grammar]

atheha dhanyā bhagavanta itthaṃ |
yadvāsudeve'khilalokanāthe |
kurvanti sarvātmakamātmabhāvaṃ |
na yatra bhūyaḥ parivartaugraḥ || 39 ||
[Analyze grammar]

idaṃ bhāgavataṃ nāma purāṇaṃ brahmasammitam |
uttamaślokacaritaṃ cakāra bhagavān ṛṣiḥ || 40 ||
[Analyze grammar]

niḥśreyasāya lokasya dhanyaṃ svastyayanaṃ mahat |
tadidaṃ grāhayāmāsa sutaṃ ātmavatāṃ varam || 41 ||
[Analyze grammar]

sarvavedetihāsānāṃ sāraṃ sāraṃ samuddhṛtam |
sa tu saṃśrāvayāmāsa mahārājaṃ parīkṣitam || 42 ||
[Analyze grammar]

prāyopaviṣṭaṃ gaṅgāyāṃ parītaṃ paramarṣibhiḥ |
kṛṣṇe svadhāmopagate dharmajñānādibhiḥ saha || 43 ||
[Analyze grammar]

kalau naṣṭadṛśāmeṣa purāṇārko'dhunoditaḥ |
tatra kīrtayato viprā viprarṣerbhūritejasaḥ || 44 ||
[Analyze grammar]

ahaṃ cādhyagamaṃ tatra niviṣṭastad anugrahāt |
so'haṃ vaḥ śrāvayiṣyāmi yathādhītaṃ yathāmati || 45 ||
[Analyze grammar]

iti śrīmadbhāgavate mahāpurāṇe pāramahaṃsyāṃ saṃhitāyāṃ prathamaskandhe naimiṣīyopākhyāne tṛtīyo'dhyāyaḥ || 3 ||
[Analyze grammar]