Chapter 76

lakṣmaṇasya tu tadvākyaṃ śrutvā śatrunibarhaṇaḥ |
vṛtraghātamaśeṣeṇa kathayetyāha lakṣmaṇam || 1 ||
[Analyze grammar]

rāghaveṇaivamuktastu sumitrānandavardhanaḥ |
bhūya eva kathāṃ divyāṃ kathayāmāsa lakṣmaṇaḥ || 2 ||
[Analyze grammar]

sahasrākṣavacaḥ śrutvā sarveṣāṃ ca divaukasām |
viṣṇurdevānuvācedaṃ sarvānindrapurogamān || 3 ||
[Analyze grammar]

pūrvaṃ sauhṛdabaddho'smi vṛtrasya sumahātmanaḥ |
tena yuṣmat priyārthaṃ vai nāhaṃ hanmi mahāsuram || 4 ||
[Analyze grammar]

avaśyaṃ karaṇīyaṃ ca bhavatāṃ sukhamuttamam |
tasmādupāyamākhyāsye yena vṛtraṃ haniṣyatha || 5 ||
[Analyze grammar]

tridhā bhūtaṃ kariṣye'hamātmānaṃ surasattamāḥ |
tena vṛtraṃ sahasrākṣo haniṣyati na saṃśayaḥ || 6 ||
[Analyze grammar]

eko'ṃśo vāsavaṃ yātu dvitīyo vajrameva tu |
tṛtīyo bhūtalaṃ śakrastato vṛtraṃ haniṣyati || 7 ||
[Analyze grammar]

tathā bruvati deveśe devā vākyamathābruvan |
evametanna saṃdeho yathā vadasi daityahan || 8 ||
[Analyze grammar]

bhadraṃ te'stu gamiṣyāmo vṛtrāsuravadhaiṣiṇaḥ |
bhajasva paramodāravāsavaṃ svena tejasā || 9 ||
[Analyze grammar]

tataḥ sarve mahātmānaḥ sahasrākṣapurogamāḥ |
tadaraṇyamupākrāmanyatra vṛtro mahāsuraḥ || 10 ||
[Analyze grammar]

te'paśyaṃstejasā bhūtaṃ tapantamasurottamam |
pibantamiva lokāṃstrīnnirdahantamivāmbaram || 11 ||
[Analyze grammar]

dṛṣṭvaiva cāsuraśreṣṭhaṃ devāstrāsamupāgaman |
kathamenaṃ vadhiṣyāmaḥ kathaṃ na syāt parājayaḥ || 12 ||
[Analyze grammar]

teṣāṃ cintayatāṃ tatra sahasrākṣaḥ puraṃdaraḥ |
vajraṃ pragṛhya bāhubhyāṃ prahiṇodvṛtramūrdhani || 13 ||
[Analyze grammar]

kālāgnineva ghoreṇa dīpteneva mahārciṣā |
prataptaṃ vṛtraśirasi jagattrāsamupāgamat || 14 ||
[Analyze grammar]

asaṃbhāvyaṃ vadhaṃ tasya vṛtrasya vibudhādhipaḥ |
cintayāno jagāmāśu lokasyāntaṃ mahāyaśāḥ || 15 ||
[Analyze grammar]

tamindraṃ brahmahatyāśu gacchantamanugacchati |
apataccāsya gātreṣu tamindraṃ duḥkhamāviśat || 16 ||
[Analyze grammar]

hatārayaḥ pranaṣṭendrā devāḥ sāgnipurogamāḥ |
viṣṇuṃ tribhuvaṇaśreṣṭhaṃ muhurmuhurapūjayan || 17 ||
[Analyze grammar]

tvaṃ gatiḥ paramā deva pūrvajo jagataḥ prabhuḥ |
rathārthaṃ sarvabhūtānāṃ viṣṇutvamupajagmivān || 18 ||
[Analyze grammar]

hataścāyaṃ tvayā vṛtro brahmahatyā ca vāsavam |
bādhate suraśārdūla mokṣaṃ tasya vinirdiśa || 19 ||
[Analyze grammar]

teṣāṃ tadvacanaṃ śrutvā devānāṃ viṣṇurabravīt |
māmeva yajatāṃ śakraḥ pāvayiṣyāmi vajriṇam || 20 ||
[Analyze grammar]

puṇyena hayamedhena māmiṣṭvā pākaśāsanaḥ |
punareṣyati devānāmindratvamakutobhayaḥ || 21 ||
[Analyze grammar]

evaṃ saṃdiśya devānāṃ tāṃ vāṇīmamṛtopamā |
jagāma viṣṇurdeveśaḥ stūyamānastriviṣṭapam || 22 ||
[Analyze grammar]