Chapter 41

sa visṛjya tato rāmaḥ puṣpakaṃ hemabhūṣitam |
praviveśa mahābāhuraśokavanikāṃ tadā || 1 ||
[Analyze grammar]

candanāgarucūtaiśca tuṅgakāleyakairapi |
devadāruvanaiścāpi samantādupaśobhitām || 2 ||
[Analyze grammar]

priyaṅgubhiḥ kadambaiśca tathā kurabakairapi |
jambūbhiḥ pāṭalībhiśca kovidāraiśca saṃvṛtām || 3 ||
[Analyze grammar]

sarvadā kusumai ramyaiḥ phalavadbhirmanoramaiḥ |
cārupallavapuṣpāḍhyairmattabhramarasaṃkulaiḥ || 4 ||
[Analyze grammar]

kokilairbhṛṅgarājaiśca nānāvarṇaiśca pakṣibhiḥ |
śobhitāṃ śataśaścitraiścūtavṛkṣāvataṃsakaiḥ || 5 ||
[Analyze grammar]

śātakumbhanibhāḥ ke cit ke cidagniśikhopamāḥ |
nīlāñjananibhāścānye bhānti tatra sma pādapāḥ || 6 ||
[Analyze grammar]

dīrghikā vividhākārāḥ pūrṇāḥ paramavāriṇā |
mahārhamaṇisopānasphaṭikāntarakuṭṭimāḥ || 7 ||
[Analyze grammar]

phullapadmotpalavanāścakravākopaśobhitāḥ |
prākārairvividhākāraiḥ śobhitāśca śilātalaiḥ || 8 ||
[Analyze grammar]

tatra tatra vanoddeśe vaidūryamaṇisaṃnibhaiḥ |
śādvalaiḥ paramopetāḥ puṣpitadrumasaṃyutāḥ || 9 ||
[Analyze grammar]

nandanaṃ hi yathendrasya brāhmaṃ caitrarathaṃ yathā |
tathārūpaṃ hi rāmasya kānanaṃ tanniveśitam || 10 ||
[Analyze grammar]

bahvāsanagṛhopetāṃ latāgṛhasamāvṛtām |
aśokavanikāṃ sphītāṃ praviśya raghunandanaḥ || 11 ||
[Analyze grammar]

āsane tu śubhākāre puṣpastabakabhūṣite |
kuthāstaraṇasaṃvīte rāmaḥ saṃniṣasāda ha || 12 ||
[Analyze grammar]

sītāṃ saṃgṛhya bāhubhyāṃ madhumaireyamuttamam |
pāyayāmāsa kākutsthaḥ śacīmindro yathāmṛtam || 13 ||
[Analyze grammar]

māṃsāni ca vicitrāṇi phalāni vividhāni ca |
rāmasyābhyavahārārthaṃ kiṃkarāstūrṇamāharan || 14 ||
[Analyze grammar]

upanṛtyanti rājānaṃ nṛtyagītaviśāradāḥ |
bālāśca rūpavatyaśca striyaḥ pānavaśaṃ gatāḥ || 15 ||
[Analyze grammar]

evaṃ rāmo mudā yuktaḥ sītāṃ surucirānanām |
ramayāmāsa vaidehīmahanyahani devavat || 16 ||
[Analyze grammar]

tathā tu ramamāṇasya tasyaivaṃ śiśiraḥ śubhaḥ |
atyakrāmannarendrasya rāghavasya mahātmanaḥ || 17 ||
[Analyze grammar]

pūrvāhṇe paurakṛtyāni kṛtvā dharmeṇa dharmavit |
śeṣaṃ divasabhāgārdhamantaḥpuragato'bhavat || 18 ||
[Analyze grammar]

sītā ca devakāryāṇi kṛtvā paurvāhṇikāni tu |
śvaśrūṇāmaviśeṣeṇa sarvāsāṃ prāñjaliḥ sthitā || 19 ||
[Analyze grammar]

tato rāmamupāgacchadvicitrabahubhūṣaṇā |
triviṣṭape sahasrākṣamupaviṣṭaṃ yathā śacī || 20 ||
[Analyze grammar]

dṛṣṭvā tu rāghavaḥ patnīṃ kalyāṇena samanvitām |
praharṣamatulaṃ lebhe sādhu sādhviti cābravīt || 21 ||
[Analyze grammar]

apatyalābho vaidehi mamāyaṃ samupasthitaḥ |
kimicchasi hi tadbrūhi kaḥ kāmaḥ kriyatāṃ tava || 22 ||
[Analyze grammar]

prahasantī tu vaidehī rāmaṃ vākyamathābravīt |
tapovanāni puṇyāni draṣṭumicchāmi rāghava || 23 ||
[Analyze grammar]

gaṅgātīre niviṣṭāni ṛṣīṇāṃ puṇyakarmaṇām |
phalamūlāśināṃ vīra pādamūleṣu vartitum || 24 ||
[Analyze grammar]

eṣa me paramaḥ kāmo yanmūlaphalabhojiṣu |
apyekarātraṃ kākutstha vaseyaṃ puṇyaśāliṣu || 25 ||
[Analyze grammar]

tatheti ca pratijñātaṃ rāmeṇākliṣṭakarmaṇā |
visrabdhā bhava vaidehi śvo gamiṣyasyasaṃśayam || 26 ||
[Analyze grammar]

evamuktvā tu kākutstho maithilīṃ janakātmajām |
madhyakakṣāntaraṃ rāmo nirjagāma suhṛdvṛtaḥ || 27 ||
[Analyze grammar]