Chapter 20

tato vitrāsayanmartyānpṛthivyāṃ rākṣasādhipaḥ |
āsasāda ghane tasminnāradaṃ munisattamam || 1 ||
[Analyze grammar]

nāradastu mahātejā devarṣiramitaprabhaḥ |
abravīnmeghapṛṣṭhastho rāvaṇaṃ puṣpake sthitam || 2 ||
[Analyze grammar]

rākṣasādhipate saumya tiṣṭha viśravasaḥ suta |
prīto'smyabhijanopeta vikramairūrjitaistava || 3 ||
[Analyze grammar]

viṣṇunā daityaghātaiśca tārkṣyasyoragadharṣaṇaiḥ |
tvayā samaramardaiśca bhṛśaṃ hi paritoṣitaḥ || 4 ||
[Analyze grammar]

kiṃ cidvakṣyāmi tāvatte śrotavyaṃ śroṣyase yadi |
śrutvā cānantaraṃ kāryaṃ tvayā rākṣasapuṃgava || 5 ||
[Analyze grammar]

kimayaṃ vadhyate lokastvayāvadhyena daivataiḥ |
hata eva hyayaṃ loko yadā mṛtyuvaśaṃ gataḥ || 6 ||
[Analyze grammar]

paśya tāvanmahābāho rākṣaseśvaramānuṣam |
lokamenaṃ vicitrārthaṃ yasya na jñāyate gatiḥ || 7 ||
[Analyze grammar]

kva cidvāditranṛttāni sevyante muditairjanaiḥ |
rudyate cāparairārtairdhārāśrunayanānanaiḥ || 8 ||
[Analyze grammar]

mātā pitṛsutasnehairbhāryā bandhumanoramaiḥ |
mohenāyaṃ jano dhvastaḥ kleśaṃ svaṃ nāvabudhyate || 9 ||
[Analyze grammar]

tat kimevaṃ parikliśya lokaṃ mohanirākṛtam |
jita eva tvayā saumya martyaloko na saṃśayaḥ || 10 ||
[Analyze grammar]

evamuktastu laṅkeśo dīpyamāna ivaujasā |
abravīnnāradaṃ tatra saṃprahasyābhivādya ca || 11 ||
[Analyze grammar]

maharṣe devagandharvavihāra samarapriya |
ahaṃ khalūdyato gantuṃ vijayārthī rasātalam || 12 ||
[Analyze grammar]

tato lokatrayaṃ jitvā sthāpya nāgān surān vaśe |
samudramamṛtārthaṃ vai mathiṣyāmi rasālayam || 13 ||
[Analyze grammar]

athābravīddaśagrīvaṃ nārado bhagavānṛṣiḥ |
kva khalvidānīṃ mārgeṇa tvayānena gamiṣyate || 14 ||
[Analyze grammar]

ayaṃ khalu sudurgamyaḥ pitṛrājñaḥ puraṃ prati |
mārgo gacchati durdharṣo yamasyāmitrakarśana || 15 ||
[Analyze grammar]

sa tu śāradameghābhaṃ muktvā hāsaṃ daśānanaḥ |
uvāca kṛtamityeva vacanaṃ cedamabravīt || 16 ||
[Analyze grammar]

tasmādeṣa mahābrahman vaivasvatavadhodyataḥ |
gacchāmi dakṣiṇāmāśāṃ yatra sūryātmajo nṛpaḥ || 17 ||
[Analyze grammar]

mayā hi bhagavan krodhāt pratijñātaṃ raṇārthinā |
avajeṣyāmi caturo lokapālāniti prabho || 18 ||
[Analyze grammar]

tenaiṣa prasthito'haṃ vai pitṛrājapuraṃ prati |
prāṇisaṃkleśakartāraṃ yojayiṣyāmi mṛtyunā || 19 ||
[Analyze grammar]

evamuktvā daśagrīvo muniṃ tamabhivādya ca |
prayayau dakṣiṇāmāśāṃ prahṛṣṭaiḥ saha mantribhiḥ || 20 ||
[Analyze grammar]

nāradastu mahātejā muhūrtaṃ dhyānamāsthitaḥ |
cintayāmāsa viprendro vidhūma iva pāvakaḥ || 21 ||
[Analyze grammar]

yena lokāstrayaḥ sendrāḥ kliśyante sacarācarāḥ |
kṣīṇe cāyuṣi dharme ca sa kālo hiṃsyate katham || 22 ||
[Analyze grammar]

yasya nityaṃ trayo lokā vidravanti bhayārditāḥ |
taṃ kathaṃ rākṣasendro'sau svayamevābhigacchati || 23 ||
[Analyze grammar]

yo vidhātā ca dhātā ca sukṛte duṣkṛte yathā |
trailokyaṃ vijitaṃ yena taṃ kathaṃ nu vijeṣyati || 24 ||
[Analyze grammar]

aparaṃ kiṃ nu kṛtvaivaṃ vidhānaṃ saṃvidhāsyati |
kautūhalasamutpanno yāsyāmi yamasādanam || 25 ||
[Analyze grammar]