Chapter 109

tāṃ rātrimuṣitaṃ rāmaṃ sukhotthitamariṃdamam |
abravīt prāñjalirvākyaṃ jayaṃ pṛṣṭvā vibhīṣaṇaḥ || 1 ||
[Analyze grammar]

snānāni cāṅgarāgāṇi vastrāṇyābharaṇāni ca |
candanāni ca divyāni mālyāni vividhāni ca || 2 ||
[Analyze grammar]

alaṃkāravidaścemā nāryaḥ padmanibhekṣaṇāḥ |
upasthitāstvāṃ vidhivat snāpayiṣyanti rāghava || 3 ||
[Analyze grammar]

evamuktastu kākutsthaḥ pratyuvāca vibhīṣaṇam |
harīn sugrīvamukhyāṃstvaṃ snānenopanimantraya || 4 ||
[Analyze grammar]

sa tu tāmyati dharmātmā mamahetoḥ sukhocitaḥ |
sukumāro mahābāhuḥ kumāraḥ satyasaṃśravaḥ || 5 ||
[Analyze grammar]

taṃ vinā kaikeyīputraṃ bharataṃ dharmacāriṇam |
na me snānaṃ bahumataṃ vastrāṇyābharaṇāni ca || 6 ||
[Analyze grammar]

ita eva pathā kṣipraṃ pratigacchāma tāṃ purīm |
ayodhyāmāyato hyeṣa panthāḥ paramadurgamaḥ || 7 ||
[Analyze grammar]

evamuktastu kākutsthaṃ pratyuvāca vibhīṣaṇaḥ |
ahnā tvāṃ prāpayiṣyāmi tāṃ purīṃ pārthivātmaja || 8 ||
[Analyze grammar]

puṣpakaṃ nāma bhadraṃ te vimānaṃ sūryasaṃnibham |
mama bhrātuḥ kuberasya rāvaṇenāhṛtaṃ balāt || 9 ||
[Analyze grammar]

tadidaṃ meghasaṃkāśaṃ vimānamiha tiṣṭhati |
tena yāsyasi yānena tvamayodhyāṃ gajajvaraḥ || 10 ||
[Analyze grammar]

ahaṃ te yadyanugrāhyo yadi smarasi me guṇān |
vasa tāvadiha prājña yadyasti mayi sauhṛdam || 11 ||
[Analyze grammar]

lakṣmaṇena saha bhrātrā vaidehyā cāpi bhāryayā |
arcitaḥ sarvakāmaistvaṃ tato rāma gamiṣyasi || 12 ||
[Analyze grammar]

prītiyuktastu me rāma sasainyaḥ sasuhṛdgaṇaḥ |
satkriyāṃ vihitāṃ tāvadgṛhāṇa tvaṃ mayodyatām || 13 ||
[Analyze grammar]

praṇayādbahumānācca sauhṛdena ca rāghava |
prasādayāmi preṣyo'haṃ na khalvājñāpayāmi te || 14 ||
[Analyze grammar]

evamuktastato rāmaḥ pratyuvāca vibhīṣaṇam |
rakṣasāṃ vānarāṇāṃ ca sarveṣāṃ copaśṛṇvatām || 15 ||
[Analyze grammar]

pūjito'haṃ tvayā vīra sācivyena paraṃtapa |
sarvātmanā ca ceṣṭibhiḥ sauhṛdenottamena ca || 16 ||
[Analyze grammar]

na khalvetanna kuryāṃ te vacanaṃ rākṣaseśvara |
taṃ tu me bhrātaraṃ draṣṭuṃ bharataṃ tvarate manaḥ || 17 ||
[Analyze grammar]

māṃ nivartayituṃ yo'sau citrakūṭamupāgataḥ |
śirasā yācato yasya vacanaṃ na kṛtaṃ mayā || 18 ||
[Analyze grammar]

kausalyāṃ ca sumitrāṃ ca kaikeyīṃ ca yaśasvinīm |
gurūṃśca suhṛdaścaiva paurāṃśca tanayaiḥ saha || 19 ||
[Analyze grammar]

upasthāpaya me kṣipraṃ vimānaṃ rākṣaseśvara |
kṛtakāryasya me vāsaḥ kathaṃ cidiha saṃmataḥ || 20 ||
[Analyze grammar]

anujānīhi māṃ saumya pūjito'smi vibhīṣaṇa |
manyurna khalu kartavyastvaritastvānumānaye || 21 ||
[Analyze grammar]

tataḥ kāñcanacitrāṅgaṃ vaidūryamaṇivedikam |
kūṭāgāraiḥ parikṣiptaṃ sarvato rajataprabham || 22 ||
[Analyze grammar]

pāṇḍurābhiḥ patākābhirdhvajaiśca samalaṃkṛtam |
śobhitaṃ kāñcanairharmyairhemapadmavibhūṣitam || 23 ||
[Analyze grammar]

prakīrṇaṃ kiṅkiṇījālairmuktāmaṇigavākṣitam |
ghaṇṭājālaiḥ parikṣiptaṃ sarvato madhurasvanam || 24 ||
[Analyze grammar]

tanmeruśikharākāraṃ nirmitaṃ viśvakarmaṇā |
bahubhirbhūṣitaṃ harmyairmuktārajatasaṃnibhau || 25 ||
[Analyze grammar]

talaiḥ sphaṭikacitrāṅgairvaidūryaiśca varāsanaiḥ |
mahārhāstaraṇopetairupapannaṃ mahādhanaiḥ || 26 ||
[Analyze grammar]

upasthitamanādhṛṣyaṃ tadvimānaṃ manojavam |
nivedayitvā rāmāya tasthau tatra vibhīṣaṇaḥ || 27 ||
[Analyze grammar]