Chapter 99

tāsāṃ vilapamānānāṃ tathā rākṣasayoṣitām |
jyeṣṭhā patnī priyā dīnā bhartāraṃ samudaikṣata || 1 ||
[Analyze grammar]

daśagrīvaṃ hataṃ dṛṣṭvā rāmeṇācintyakarmaṇā |
patiṃ mandodarī tatra kṛpaṇā paryadevayat || 2 ||
[Analyze grammar]

nanu nāma mahābāho tava vaiśravaṇānuja |
kruddhasya pramukhe sthātuṃ trasyatyapi puraṃdaraḥ || 3 ||
[Analyze grammar]

ṛṣayaśca mahīdevā gandharvāśca yaśasvinaḥ |
nanu nāma tavodvegāccāraṇāśca diśo gatāḥ || 4 ||
[Analyze grammar]

sa tvaṃ mānuṣamātreṇa rāmeṇa yudhi nirjitaḥ |
na vyapatrapase rājan kimidaṃ rākṣasarṣabha || 5 ||
[Analyze grammar]

kathaṃ trailokyamākramya śriyā vīryeṇa cānvitam |
aviṣahyaṃ jaghāna tvāṃ mānuṣo vanagocaraḥ || 6 ||
[Analyze grammar]

mānuṣāṇāmaviṣaye carataḥ kāmarūpiṇaḥ |
vināśastava rāmeṇa saṃyuge nopapadyate || 7 ||
[Analyze grammar]

na caitat karma rāmasya śraddadhāmi camūmukhe |
sarvataḥ samupetasya tava tenābhimarśanam || 8 ||
[Analyze grammar]

indriyāṇi purā jitvā jitaṃ tribhuvaṇaṃ tvayā |
smaradbhiriva tadvairamindriyaireva nirjitaḥ || 9 ||
[Analyze grammar]

atha vā rāmarūpeṇa vāsavaḥ svayamāgataḥ |
māyāṃ tava vināśāya vidhāyāpratitarkitām || 10 ||
[Analyze grammar]

yadaiva hi janasthāne rākṣasairbahubhirvṛtaḥ |
kharastava hato bhrātā tadaivāsau na mānuṣaḥ || 11 ||
[Analyze grammar]

yadaiva nagarīṃ laṅkāṃ duṣpraveṣāṃ surairapi |
praviṣṭo hanumān vīryāttadaiva vyathitā vayam || 12 ||
[Analyze grammar]

kriyatāmavirodhaśca rāghaveṇeti yanmayā |
ucyamāno na gṛhṇāsi tasyeyaṃ vyuṣṭirāgatā || 13 ||
[Analyze grammar]

akasmāccābhikāmo'si sītāṃ rākṣasapuṃgava |
aiśvaryasya vināśāya dehasya svajanasya ca || 14 ||
[Analyze grammar]

arundhatyā viśiṣṭāṃ tāṃ rohiṇyāścāpi durmate |
sītāṃ dharṣayatā mānyāṃ tvayā hyasadṛśaṃ kṛtam || 15 ||
[Analyze grammar]

na kulena na rūpeṇa na dākṣiṇyena maithilī |
mayādhikā vā tulyā vā tvaṃ tu mohānna budhyase || 16 ||
[Analyze grammar]

sarvathā sarvabhūtānāṃ nāsti mṛtyuralakṣaṇaḥ |
tava tāvadayaṃ mṛtyurmaithilīkṛtalakṣaṇaḥ || 17 ||
[Analyze grammar]

maithilī saha rāmeṇa viśokā vihariṣyati |
alpapuṇyā tvahaṃ ghore patitā śokasāgare || 18 ||
[Analyze grammar]

kailāse mandare merau tathā caitrarathe vane |
devodyāneṣu sarveṣu vihṛtya sahitā tvayā || 19 ||
[Analyze grammar]

vimānenānurūpeṇa yā yāmyatulayā śriyā |
paśyantī vividhāndeśāṃstāṃstāṃścitrasragambarā |
bhraṃśitā kāmabhogebhyaḥ sāsmi vīravadhāttava || 20 ||
[Analyze grammar]

satyavāk sa mahābhāgo devaro me yadabravīt |
ayaṃ rākṣasamukhyānāṃ vināśaḥ paryupasthitaḥ || 21 ||
[Analyze grammar]

kāmakrodhasamutthena vyasanena prasaṅginā |
tvayā kṛtamidaṃ sarvamanāthaṃ rakṣasāṃ kulam || 22 ||
[Analyze grammar]

na hi tvaṃ śocitavyo me prakhyātabalapauruṣaḥ |
strīsvabhāvāttu me buddhiḥ kāruṇye parivartate || 23 ||
[Analyze grammar]

sukṛtaṃ duṣkṛtaṃ ca tvaṃ gṛhītvā svāṃ gatiṃ gataḥ |
ātmānamanuśocāmi tvadviyogena duḥkhitām || 24 ||
[Analyze grammar]

nīlajīmūtasaṃkāśaḥ pītāmbaraśubhāṅgadaḥ |
sarvagātrāṇi vikṣipya kiṃ śeṣe rudhirāplutaḥ |
prasupta iva śokārtāṃ kiṃ māṃ na pratibhāṣase || 25 ||
[Analyze grammar]

mahāvīryasya dakṣasya saṃyugeṣvapalāyinaḥ |
yātudhānasya dauhitrīṃ kiṃ tvaṃ māṃ nābhyudīkṣase || 26 ||
[Analyze grammar]

yena sūdayase śatrūn samare sūryavarcasā |
vajro vajradharasyeva so'yaṃ te satatārcitaḥ || 27 ||
[Analyze grammar]

raṇe śatrupraharaṇo hemajālapariṣkṛtaḥ |
parigho vyavakīrṇaste bāṇaiśchinnaḥ sahasradhā || 28 ||
[Analyze grammar]

dhigastu hṛdayaṃ yasyā mamedaṃ na sahasradhā |
tvayi pañcatvamāpanne phalate śokapīḍitam || 29 ||
[Analyze grammar]

etasminnantare rāmo vibhīṣaṇamuvāca ha |
saṃskāraḥ kriyatāṃ bhrātuḥ striyaścaitā nivartaya || 30 ||
[Analyze grammar]

taṃ praśritastato rāmaṃ śrutavākyo vibhīṣaṇaḥ |
vimṛśya buddhyā dharmajño dharmārthasahitaṃ vacaḥ |
rāmasyaivānuvṛttyarthamuttaraṃ pratyabhāṣata || 31 ||
[Analyze grammar]

tyaktadharmavrataṃ krūraṃ nṛśaṃsamanṛtaṃ tathā |
nāhamarho'smi saṃskartuṃ paradārābhimarśakam || 32 ||
[Analyze grammar]

bhrātṛrūpo hi me śatrureṣa sarvāhite rataḥ |
rāvaṇo nārhate pūjāṃ pūjyo'pi gurugauravāt || 33 ||
[Analyze grammar]

nṛśaṃsa iti māṃ rāma vakṣyanti manujā bhuvi |
śrutvā tasya guṇān sarve vakṣyanti sukṛtaṃ punaḥ || 34 ||
[Analyze grammar]

tacchrutvā paramaprīto rāmo dharmabhṛtāṃ varaḥ |
vibhīṣaṇamuvācedaṃ vākyajño vākyakovidam || 35 ||
[Analyze grammar]

tavāpi me priyaṃ kāryaṃ tvatprabhavācca me jitam |
avaśyaṃ tu kṣamaṃ vācyo mayā tvaṃ rākṣaseśvara || 36 ||
[Analyze grammar]

adharmānṛtasaṃyuktaḥ kāmameṣa niśācaraḥ |
tejasvī balavāñ śūraḥ saṃgrāmeṣu ca nityaśaḥ || 37 ||
[Analyze grammar]

śatakratumukhairdevaiḥ śrūyate na parājitaḥ |
mahātmā balasaṃpanno rāvaṇo lokarāvaṇaḥ || 38 ||
[Analyze grammar]

maraṇāntāni vairāṇi nirvṛttaṃ naḥ prayojanam |
kriyatāmasya saṃskāro mamāpyeṣa yathā tava || 39 ||
[Analyze grammar]

tvatsakāśānmahābāho saṃskāraṃ vidhipūrvakam |
kṣipramarhati dharmajña tvaṃ yaśobhāgbhaviṣyasi || 40 ||
[Analyze grammar]

rāghavasya vacaḥ śrutvā tvaramāṇo vibhīṣaṇaḥ |
saṃskāreṇānurūpeṇa yojayāmāsa rāvaṇam || 41 ||
[Analyze grammar]

sa dadau pāvakaṃ tasya vidhiyuktaṃ vibhīṣaṇaḥ |
tāḥ striyo'nunayāmāsa sāntvamuktvā punaḥ punaḥ || 42 ||
[Analyze grammar]

praviṣṭāsu ca sarvāsu rākṣasīṣu vibhīṣaṇaḥ |
rāmapārśvamupāgamya tadātiṣṭhadvinītavat || 43 ||
[Analyze grammar]

rāmo'pi saha sainyena sasugrīvaḥ salakṣmaṇaḥ |
harṣaṃ lebhe ripuṃ hatvā yathā vṛtraṃ śatakratuḥ || 44 ||
[Analyze grammar]