Chapter 43

dhūmrākṣaṃ nihataṃ śrutvā rāvaṇo rākṣaseśvaraḥ |
balādhyakṣamuvācedaṃ kṛtāñjalimupasthitam || 1 ||
[Analyze grammar]

śīghraṃ niryāntu durdharṣā rākṣasā bhīmavikramāḥ |
akampanaṃ puraskṛtya sarvaśastraprakovidam || 2 ||
[Analyze grammar]

tato nānāpraharaṇā bhīmākṣā bhīmadarśanāḥ |
niṣpetū rākṣasā mukhyā balādhyakṣapracoditāḥ || 3 ||
[Analyze grammar]

rathamāsthāya vipulaṃ taptakāñcanakuṇḍalaḥ |
rākasaiḥ saṃvṛto ghoraistadā niryātyakampanaḥ || 4 ||
[Analyze grammar]

na hi kampayituṃ śakyaḥ surairapi mahāmṛdhe |
akampanastatasteṣāmāditya iva tejasā || 5 ||
[Analyze grammar]

tasya nidhāvamānasya saṃrabdhasya yuyutsayā |
akasmāddainyamāgacchaddhayānāṃ rathavāhinām || 6 ||
[Analyze grammar]

vyasphurannayanaṃ cāsya savyaṃ yuddhābhinandinaḥ |
vivarṇo mukhavarṇaśca gadgadaścābhavat svaraḥ || 7 ||
[Analyze grammar]

abhavat sudine cāpi durdine rūkṣamārutam |
ūcuḥ khagā mṛgāḥ sarve vācaḥ krūrā bhayāvahāḥ || 8 ||
[Analyze grammar]

sa siṃhopacitaskandhaḥ śārdūlasamavikramaḥ |
tānutpātānacintyaiva nirjagāma raṇājiram || 9 ||
[Analyze grammar]

tadā nirgacchatastasya rakṣasaḥ saha rākṣasaiḥ |
babhūva sumahānnādaḥ kṣobhayanniva sāgaram || 10 ||
[Analyze grammar]

tena śabdena vitrastā vānarāṇāṃ mahācamūḥ |
drumaśailapraharaṇā yoddhuṃ samavatiṣṭhata || 11 ||
[Analyze grammar]

teṣāṃ yuddhaṃ mahāraudraṃ saṃjajñe kapirakṣasām |
rāmarāvaṇayorarthe samabhityaktajīvinām || 12 ||
[Analyze grammar]

sarve hyatibalāḥ śūrāḥ sarve parvatasaṃnibhāḥ |
harayo rākṣasāścaiva parasparajighaṃsavaḥ || 13 ||
[Analyze grammar]

teṣāṃ vinardātāṃ śabdaḥ saṃyuge'titarasvinām |
śuśruve sumahān krodhādanyonyamabhigarjatām || 14 ||
[Analyze grammar]

rajaścāruṇavarṇābhaṃ subhīmamabhavadbhṛśam |
uddhūtaṃ harirakṣobhiḥ saṃrurodha diśo daśa || 15 ||
[Analyze grammar]

anyonyaṃ rajasā tena kauśeyoddhūtapāṇḍunā |
saṃvṛtāni ca bhūtāni dadṛśurna raṇājire || 16 ||
[Analyze grammar]

na dhvajo na patākāvā varma vā turago'pi vā |
āyudhaṃ syandanaṃ vāpi dadṛśe tena reṇunā || 17 ||
[Analyze grammar]

śabdaśca sumahāṃsteṣāṃ nardatāmabhidhāvatām |
śrūyate tumule yuddhe na rūpāṇi cakāśire || 18 ||
[Analyze grammar]

harīneva susaṃkruddhā harayo jaghnurāhave |
rākṣasāścāpi rakṣāṃsi nijaghnustimire tadā || 19 ||
[Analyze grammar]

parāṃścaiva vinighnantaḥ svāṃśca vānararākṣasāḥ |
rudhirārdraṃ tadā cakrurmahīṃ paṅkānulepanām || 20 ||
[Analyze grammar]

tatastu rudhiraugheṇa siktaṃ vyapagataṃ rajaḥ |
śarīraśavasaṃkīrṇā babhūva ca vasuṃdharā || 21 ||
[Analyze grammar]

drumaśaktiśilāprāsairgadāparighatomaraiḥ |
harayo rākṣasāstūrṇaṃ jaghnuranyonyamojasā || 22 ||
[Analyze grammar]

bāhubhiḥ parighākārairyudhyantaḥ parvatopamāḥ |
harayo bhīmakarmāṇo rākṣasāñjaghnurāhave || 23 ||
[Analyze grammar]

rākṣasāścāpi saṃkruddhāḥ prāsatomarapāṇayaḥ |
kapīnnijaghnire tatra śastraiḥ paramadāruṇaiḥ || 24 ||
[Analyze grammar]

harayastvapi rakṣāṃsi mahādrumamahāśmabhiḥ |
vidārayantyabhikramya śastrāṇyācchidya vīryataḥ || 25 ||
[Analyze grammar]

etasminnantare vīrā harayaḥ kumudo nalaḥ |
maindaśca paramakruddhaścakrurvegamanuttamam || 26 ||
[Analyze grammar]

te tu vṛkṣairmahāvegā rākṣasānāṃ camūmukhe |
kadanaṃ sumaha cakrurlīlayā hariyūthapāḥ || 27 ||
[Analyze grammar]