Chapter 34

yudhyatāmeva teṣāṃ tu tadā vānararakṣasām |
ravirastaṃ gato rātriḥ pravṛttā prāṇahāriṇī || 1 ||
[Analyze grammar]

anyonyaṃ baddhavairāṇāṃ ghorāṇāṃ jayamicchatām |
saṃpravṛttaṃ niśāyuddhaṃ tadā vāraṇarakṣasām || 2 ||
[Analyze grammar]

rākṣaso'sīti harayo hariścāsīti rākṣasāḥ |
anyonyaṃ samare jaghnustasmiṃstamasi dāruṇe || 3 ||
[Analyze grammar]

jahi dāraya caitīti kathaṃ vidravasīti ca |
evaṃ sutumulaḥ śabdastasmiṃstamasi śuśruve || 4 ||
[Analyze grammar]

kālāḥ kāñcanasaṃnāhāstasmiṃstamasi rākṣasāḥ |
saṃprādṛśyanta śailendrā dīptauṣadhivanā iva || 5 ||
[Analyze grammar]

tasmiṃstamasi duṣpāre rākṣasāḥ krodhamūrchitāḥ |
paripeturmahāvegā bhakṣayantaḥ plavaṃgamān || 6 ||
[Analyze grammar]

te hayān kāñcanāpīḍandhvajāṃścāgniśikhopamān |
āplutya daśanaistīkṣṇairbhīmakopā vyadārayan || 7 ||
[Analyze grammar]

kuñjarān kuñjarārohānpatākādhvajino rathān |
cakarṣuśca dadaṃśuśca daśanaiḥ krodhamūrchitāḥ || 8 ||
[Analyze grammar]

lakṣmaṇaścāpi rāmaśca śarairāśīviṣomapaiḥ |
dṛśyādṛśyāni rakṣāṃsi pravarāṇi nijaghnatuḥ || 9 ||
[Analyze grammar]

turaṃgakhuravidhvastaṃ rathanemisamuddhatam |
rurodha karṇanetrāṇiṇyudhyatāṃ dharaṇīrajaḥ || 10 ||
[Analyze grammar]

vartamāne tathā ghore saṃgrāme lomaharṣaṇe |
rudhirodā mahāvegā nadyastatra prasusruvuḥ || 11 ||
[Analyze grammar]

tato bherīmṛdaṅgānāṃ paṇavānāṃ ca nisvanaḥ |
śaṅkhaveṇusvanonmiśraḥ saṃbabhūvādbhutopamaḥ || 12 ||
[Analyze grammar]

hatānāṃ stanamānānāṃ rākṣasānāṃ ca nisvanaḥ |
śastrāṇāṃ vānarāṇāṃ ca saṃbabhūvātidāruṇaḥ || 13 ||
[Analyze grammar]

śastrapuṣpopahārā ca tatrāsīd yuddhamedinī |
durjñeyā durniveśā ca śoṇitāsravakardamā || 14 ||
[Analyze grammar]

sā babhūva niśā ghorā harirākṣasahāriṇī |
kālarātrīva bhūtānāṃ sarveṣāṃ duratikramā || 15 ||
[Analyze grammar]

tataste rākṣasāstatra tasmiṃstamasi dāruṇe |
rāmamevābhyadhāvanta saṃhṛṣṭā śaravṛṣṭibhiḥ || 16 ||
[Analyze grammar]

teṣāmāpatatāṃ śabdaḥ kruddhānāmabhigarjatām |
udvarta iva saptānāṃ samudrāṇāmabhūt svanaḥ || 17 ||
[Analyze grammar]

teṣāṃ rāmaḥ śaraiḥ ṣaḍbhiḥ ṣaḍjaghāna niśācarān |
nimeṣāntaramātreṇa śitairagniśikhopamaiḥ || 18 ||
[Analyze grammar]

yajñaśatruśca durdharṣo mahāpārśvamahodarau |
vajradaṃṣṭro mahākāyastau cobhau śukasāraṇau || 19 ||
[Analyze grammar]

te tu rāmeṇa bāṇaughaḥ sarvamarmasu tāḍitāḥ |
yuddhādapasṛtāstatra sāvaśeṣāyuṣo'bhavan || 20 ||
[Analyze grammar]

tataḥ kāñcanacitrāṅgaiḥ śarairagniśikhopamaiḥ |
diśaścakāra vimalāḥ pradiśaśca mahābalaḥ || 21 ||
[Analyze grammar]

ye tvanye rākṣasā vīrā rāmasyābhimukhe sthitāḥ |
te'pi naṣṭāḥ samāsādya pataṃgā iva pāvakam || 22 ||
[Analyze grammar]

suvarṇapuṅkhairviśikhaiḥ saṃpatadbhiḥ sahasraśaḥ |
babhūva rajanī citrā khadyotairiva śāradī || 23 ||
[Analyze grammar]

rākṣasānāṃ ca ninadairharīṇāṃ cāpi garjitaiḥ |
sā babhūva niśā ghorā bhūyo ghoratarā tadā || 24 ||
[Analyze grammar]

tena śabdena mahatā pravṛddhena samantataḥ |
trikūṭaḥ kandarākīrṇaḥ pravyāharadivācalaḥ || 25 ||
[Analyze grammar]

golāṅgūlā mahākāyāstamasā tulyavarcasaḥ |
saṃpariṣvajya bāhubhyāṃ bhakṣayan rajanīcarān || 26 ||
[Analyze grammar]

aṅgadastu raṇe śatruṃ nihantuṃ samupasthitaḥ |
rāvaṇernijaghānāśu sārathiṃ ca hayānapi || 27 ||
[Analyze grammar]

indrajittu rathaṃ tyaktvā hatāśvo hatasārathiḥ |
aṅgadena mahāmāyastatraivāntaradhīyata || 28 ||
[Analyze grammar]

so'ntardhāna gataḥ pāpo rāvaṇī raṇakarkaśaḥ |
brahmadattavaro vīro rāvaṇiḥ krodhamūrchitaḥ |
adṛśyo niśitānbāṇānmumocāśanivarcasaḥ || 29 ||
[Analyze grammar]

sa rāmaṃ lakṣmaṇaṃ caiva ghorairnāgamayaiḥ śaraiḥ |
bibheda samare kruddhaḥ sarvagātreṣu rākṣasaḥ || 30 ||
[Analyze grammar]