Chapter 24

sītāṃ tu mohitāṃ dṛṣṭvā saramā nāma rākṣasī |
āsasādāśu vaidehīṃ priyāṃ praṇayinī sakhī || 1 ||
[Analyze grammar]

sā hi tatra kṛtā mitraṃ sītayā rakṣyamāṇayā |
rakṣantī rāvaṇādiṣṭā sānukrośā dṛḍhavratā || 2 ||
[Analyze grammar]

sā dadarśa sakhīṃ sītāṃ saramā naṣṭacetanām |
upāvṛtyotthitāṃ dhvastāṃ vaḍavāmiva pāṃsuṣu || 3 ||
[Analyze grammar]

tāṃ samāśvāsayāmāsa sakhī snehena suvratā |
uktā yad rāvaṇena tvaṃ pratyuktaṃ ca svayaṃ tvayā || 4 ||
[Analyze grammar]

sakhīsnehena tadbhīru mayā sarvaṃ pratiśrutam |
līnayā ganahe śūhye bhayamutsṛjya rāvaṇāt |
tava hetorviśālākṣi na hi me jīvitaṃ priyam || 5 ||
[Analyze grammar]

sa saṃbhrāntaśca niṣkrānto yat kṛte rākṣasādhipaḥ |
tacca me viditaṃ sarvamabhiniṣkramya maithili || 6 ||
[Analyze grammar]

na śakyaṃ sauptikaṃ kartuṃ rāmasya viditātmanaḥ |
vadhaśca puruṣavyāghre tasminnevopapadyate || 7 ||
[Analyze grammar]

na caiva vānarā hantuṃ śakyāḥ pādapayodhinaḥ |
surā devarṣabheṇeva rāmeṇa hi surakṣitāḥ || 8 ||
[Analyze grammar]

dīrghavṛttabhujaḥ śrīmānmahoraskaḥ pratāpavān |
dhanvī saṃhananopeto dharmātmā bhuvi viśrutaḥ || 9 ||
[Analyze grammar]

vikrānto rakṣitā nityamātmanaśca parasya ca |
lakṣmaṇena saha bhrātrā kuśalī nayaśāstravit || 10 ||
[Analyze grammar]

hantā parabalaughānāmacintyabalapauruṣaḥ |
na hato rāghavaḥ śrīmān sīte śatrunibarhaṇaḥ || 11 ||
[Analyze grammar]

ayuktabuddhikṛtyena sarvabhūtavirodhinā |
iyaṃ prayuktā raudreṇa māyā māyāvidā tvayi || 12 ||
[Analyze grammar]

śokaste vigataḥ sarvaḥ kalyāṇaṃ tvāmupasthitam |
dhruvaṃ tvāṃ bhajate lakṣmīḥ priyaṃ prītikaraṃ śṛṇu || 13 ||
[Analyze grammar]

uttīrya sāgaraṃ rāmaḥ saha vānarasenayā |
saṃniviṣṭaḥ samudrasya tīramāsādya dakṣiṇam || 14 ||
[Analyze grammar]

dṛṣṭo me paripūrṇārthaḥ kākutsthaḥ sahalakṣmaṇaḥ |
sahitaiḥ sāgarāntasthairbalaistiṣṭhati rakṣitaḥ || 15 ||
[Analyze grammar]

anena preṣitā ye ca rākṣasā laghuvikramaḥ |
rāghavastīrṇa ityevaṃ pravṛttistairihāhṛtā || 16 ||
[Analyze grammar]

sa tāṃ śrutvā viśālākṣi pravṛttiṃ rākṣasādhipaḥ |
eṣa mantrayate sarvaiḥ sacivaiḥ saha rāvaṇaḥ || 17 ||
[Analyze grammar]

iti bruvāṇā saramā rākṣasī sītayā saha |
sarvodyogena sainyānāṃ śabdaṃ śuśrāva bhairavam || 18 ||
[Analyze grammar]

daṇḍanirghātavādinyāḥ śrutvā bheryā mahāsvanam |
uvāca saramā sītāmidaṃ madhurabhāṣiṇī || 19 ||
[Analyze grammar]

saṃnāhajananī hyeṣā bhairavā bhīru bherikā |
bherīnādaṃ ca gambhīraṃ śṛṇu toyadanisvanam || 20 ||
[Analyze grammar]

kalpyante mattamātaṃgā yujyante rathavājinaḥ |
tatra tatra ca saṃnaddhāḥ saṃpatanti padātayaḥ || 21 ||
[Analyze grammar]

āpūryante rājamārgāḥ sainyairadbhutadarśanaiḥ |
vegavadbhirnadadbhiśca toyaughairiva sāgaraḥ || 22 ||
[Analyze grammar]

śāstrāṇāṃ ca prasannānāṃ carmaṇāṃ varmaṇāṃ tathā |
rathavājigajānāṃ ca bhūṣitānāṃ ca rakṣasām || 23 ||
[Analyze grammar]

prabhāṃ visṛjatāṃ paśya nānāvarṇāṃ samutthitām |
vanaṃ nirdahato dharme yathārūpaṃ vibhāvasoḥ || 24 ||
[Analyze grammar]

ghaṇṭānāṃ śṛṇu nirghoṣaṃ rathānāṃ śṛṇu nisvanam |
hayānāṃ heṣamāṇānāṃ śṛṇu tūryadhvaniṃ yathā || 25 ||
[Analyze grammar]

udyatāyudhahastānāṃ rākṣasendrānuyāyinām |
saṃbhramo rakṣasāmeṣa tumulo lomaharṣaṇaḥ || 26 ||
[Analyze grammar]

śrīstvāṃ bhajati śokaghnī rakṣasāṃ bhayamāgatam |
rāmāt kamalapatrākṣi daityānāmiva vāsavāt || 27 ||
[Analyze grammar]

avajitya jitakrodhastamacintyaparākramaḥ |
rāvaṇaṃ samare hatvā bhartā tvādhigamiṣyati || 28 ||
[Analyze grammar]

vikramiṣyati rakṣaḥsu bhartā te sahalakṣmaṇaḥ |
yathā śatruṣu śatrughno viṣṇunā saha vāsavaḥ || 29 ||
[Analyze grammar]

āgatasya hi rāmasya kṣipramaṅkagatāṃ satīm |
ahaṃ drakṣyāmi siddhārthāṃ tvāṃ śatrau vinipātite || 30 ||
[Analyze grammar]

aśrūṇyānandajāni tvaṃ vartayiṣyasi śobhane |
samāgamya pariṣvaktā tasyorasi mahorasaḥ || 31 ||
[Analyze grammar]

acirānmokṣyate sīte devi te jaghanaṃ gatām |
dhṛtāmetāṃ bahūnmāsān veṇīṃ rāmo mahābalaḥ || 32 ||
[Analyze grammar]

tasya dṛṣṭvā mukhaṃ devi pūrṇacandramivoditam |
mokṣyase śokajaṃ vāri nirmokamiva pannagī || 33 ||
[Analyze grammar]

rāvaṇaṃ samare hatvā nacirādeva maithili |
tvayā samagraṃ priyayā sukhārho lapsyate sukham || 34 ||
[Analyze grammar]

samāgatā tvaṃ rāmeṇa modiṣyasi mahātmanā |
suvarṣeṇa samāyuktā yathā sasyena medinī || 35 ||
[Analyze grammar]

girivaramabhito'nuvartamāno haya iva maṇḍalamāśu yaḥ karoti |
tamiha śaraṇamabhyupehi devi divasakaraṃ prabhavo hyayaṃ prajānām || 36 ||
[Analyze grammar]