Chapter 23

sā sītā tacchiro dṛṣṭvā tacca kārmukamuttamam |
sugrīvapratisaṃsargamākhyātaṃ ca hanūmatā || 1 ||
[Analyze grammar]

nayane mukhavarṇaṃ ca bhartustat sadṛśaṃ mukham |
keśān keśāntadeśaṃ ca taṃ ca cūḍāmaṇiṃ śubham || 2 ||
[Analyze grammar]

etaiḥ sarvairabhijñānairabhijñāya suduḥkhitā |
vijagarhe'tha kaikeyīṃ krośantī kurarī yathā || 3 ||
[Analyze grammar]

sakāmā bhava kaikeyi hato'yaṃ kulanandanaḥ |
kulamutsāditaṃ sarvaṃ tvayā kalahaśīlayā || 4 ||
[Analyze grammar]

āryeṇa kiṃ nu kaikeyyāḥ kṛtaṃ rāmeṇa vipriyam |
yadgṛhāccīravasanastayā prasthāpito vanam || 5 ||
[Analyze grammar]

evamuktvā tu vaidehī vepamānā tapasvinī |
jagāma jagatīṃ bālā chinnā tu kadalī yathā || 6 ||
[Analyze grammar]

sā muhūrtāt samāśvasya pratilabhya ca cetanām |
tacchiraḥ samupāghrāya vilalāpāyatekṣaṇā || 7 ||
[Analyze grammar]

hā hatāsmi mahābāho vīravratamanuvratā |
imāṃ te paścimāvasthāṃ gatāsmi vidhavā kṛtā || 8 ||
[Analyze grammar]

prathamaṃ maraṇaṃ nāryā bharturvaiguṇyamucyate |
suvṛttaḥ sādhuvṛttāyāḥ saṃvṛttastvaṃ mamāgrataḥ || 9 ||
[Analyze grammar]

duḥkhādduḥkhaṃ prapannāyā magnāyāḥ śokasāgare |
yo hi māmudyatastrātuṃ so'pi tvaṃ vinipātitaḥ || 10 ||
[Analyze grammar]

sā śvaśrūrmama kausalyā tvayā putreṇa rāghava |
vatseneva yathā dhenurvivatsā vatsalā kṛtā || 11 ||
[Analyze grammar]

ādiṣṭaṃ dīrghamāyuste yairacintyaparākrama |
anṛtaṃ vacanaṃ teṣāmalpāyurasi rāghava || 12 ||
[Analyze grammar]

atha vā naśyati prajñā prājñasyāpi satastava |
pacatyenaṃ tathā kālo bhūtānāṃ prabhavo hyayam || 13 ||
[Analyze grammar]

adṛṣṭaṃ mṛtyumāpannaḥ kasmāttvaṃ nayaśāstravit |
vyasanānāmupāyajñaḥ kuśalo hyasi varjane || 14 ||
[Analyze grammar]

tathā tvaṃ saṃpariṣvajya raudrayātinṛśaṃsayā |
kālarātryā mayācchidya hṛtaḥ kamalalocanaḥ || 15 ||
[Analyze grammar]

upaśeṣe mahābāho māṃ vihāya tapasvinīm |
priyāmiva śubhāṃ nārīṃ pṛthivīṃ puruṣarṣabha || 16 ||
[Analyze grammar]

arcitaṃ satataṃ yatnādgandhamālyairmayā tava |
idaṃ te matpriyaṃ vīra dhanuḥ kāñcanabhūṣitam || 17 ||
[Analyze grammar]

pitrā daśarathena tvaṃ śvaśureṇa mamānagha |
pūrvaiśca pitṛbhiḥ sārdhaṃ nūnaṃ svarge samāgataḥ || 18 ||
[Analyze grammar]

divi nakṣatrabhūtastvaṃ mahat karma kṛtaṃ priyam |
puṇyaṃ rājarṣivaṃśaṃ tvamātmanaḥ samupekṣase || 19 ||
[Analyze grammar]

kiṃ mānna prekṣase rājan kiṃ māṃ na pratibhāṣase |
bālāṃ bālena saṃprāptāṃ bhāryāṃ māṃ sahacāriṇīm || 20 ||
[Analyze grammar]

saṃśrutaṃ gṛhṇatā pāṇiṃ cariṣyāmīti yattvayā |
smara tanmama kākutstha naya māmapi duḥkhitām || 21 ||
[Analyze grammar]

kasmānmāmapahāya tvaṃ gato gatimatāṃ vara |
asmāl lokādamuṃ lokaṃ tyaktvā māmiha duḥkhitām || 22 ||
[Analyze grammar]

kalyāṇairucitaṃ yattat pariṣvaktaṃ mayaiva tu |
kravyādaistaccharīraṃ te nūnaṃ viparikṛṣyate || 23 ||
[Analyze grammar]

agniṣṭomādibhiryajñairiṣṭavānāptadakṣiṇaiḥ |
agnihotreṇa saṃskāraṃ kena tvaṃ tu na lapsyase || 24 ||
[Analyze grammar]

pravrajyāmupapannānāṃ trayāṇāmekamāgatam |
pariprakṣyati kausalyā lakṣmaṇaṃ śokalālasā || 25 ||
[Analyze grammar]

sa tasyāḥ paripṛcchantyā vadhaṃ mitrabalasya te |
tava cākhyāsyate nūnaṃ niśāyāṃ rākṣasairvadham || 26 ||
[Analyze grammar]

sā tvāṃ suptaṃ hataṃ śrutvā māṃ ca rakṣogṛhaṃ gatām |
hṛdayena vidīrṇena na bhaviṣyati rāghava || 27 ||
[Analyze grammar]

sādhu pātaya māṃ kṣipraṃ rāmasyopari rāvaṇaḥ |
samānaya patiṃ patnyā kuru kalyāṇamuttamam || 28 ||
[Analyze grammar]

śirasā me śiraścāsya kāyaṃ kāyena yojaya |
rāvaṇānugamiṣyāmi gatiṃ bharturmahātmanaḥ |
muhūrtamapi necchāmi jīvituṃ pāpajīvinā || 29 ||
[Analyze grammar]

śrutaṃ mayā vedavidāṃ brāhmaṇānāṃ piturgṛhe |
yāsāṃ strīṇāṃ priyo bhartā tāsāṃ lokā mahodayāḥ || 30 ||
[Analyze grammar]

kṣamā yasmindamastyāgaḥ satyaṃ dharmaḥ kṛtajñatā |
ahiṃsā caiva bhūtānāṃ tamṛte kā gatirmama || 31 ||
[Analyze grammar]

iti sā duḥkhasaṃtaptā vilalāpāyatekṣaṇā |
bhartuḥ śiro dhanustatra samīkṣya janakātmajā || 32 ||
[Analyze grammar]

evaṃ lālapyamānāyāṃ sītāyāṃ tatra rākṣasaḥ |
abhicakrāma bhartāramanīkasthaḥ kṛtāñjaliḥ || 33 ||
[Analyze grammar]

vijayasvāryaputreti so'bhivādya prasādya ca |
nyavedayadanuprāptaṃ prahastaṃ vāhinīpatim || 34 ||
[Analyze grammar]

amātyaiḥ sahitaḥ sarvaiḥ prahastaḥ samupasthitaḥ |
kiṃ cidātyayikaṃ kāryaṃ teṣāṃ tvaṃ darśanaṃ kuru || 35 ||
[Analyze grammar]

etacchrutvā daśagrīvo rākṣasaprativeditam |
aśokavanikāṃ tyaktvā mantriṇāṃ darśanaṃ yayau || 36 ||
[Analyze grammar]

sa tu sarvaṃ samarthyaiva mantribhiḥ kṛtyamātmanaḥ |
sabhāṃ praviśya vidadhe viditvā rāmavikramam || 37 ||
[Analyze grammar]

antardhānaṃ tu tacchīrṣaṃ tacca kārmukamuttamam |
jagāma rāvaṇasyaiva niryāṇasamanantaram || 38 ||
[Analyze grammar]

rākṣasendrastu taiḥ sārdhaṃ mantribhirbhīmavikramaiḥ |
samarthayāmāsa tadā rāmakāryaviniścayam || 39 ||
[Analyze grammar]

avidūrasthitān sarvānbalādhyakṣān hitaiṣiṇaḥ |
abravīt kālasadṛśo rāvaṇo rākṣasādhipaḥ || 40 ||
[Analyze grammar]

śīghraṃ bherīninādena sphuṭakoṇāhatena me |
samānayadhvaṃ sainyāni vaktavyaṃ ca na kāraṇam || 41 ||
[Analyze grammar]

tatastatheti pratigṛhya tadvaco balādhipāste mahadātmano balam |
samānayaṃścaiva samāgataṃ ca te nyavedayanbhartari yuddhakāṅkṣiṇi || 42 ||
[Analyze grammar]