Chapter 25

atha tāṃ jātasaṃtāpāṃ tena vākyena mohitām |
saramā hlādayāmāsa pṛtivīṃ dyaurivāmbhasā || 1 ||
[Analyze grammar]

tatastasyā hitaṃ sakhyāścikīrṣantī sakhī vacaḥ |
uvāca kāle kālajñā smitapūrvābhibhāṣiṇī || 2 ||
[Analyze grammar]

utsaheyamahaṃ gatvā tvadvākyamasitekṣaṇe |
nivedya kuśalaṃ rāme praticchannā nivartitum || 3 ||
[Analyze grammar]

na hi me kramamāṇāyā nirālambe vihāyasi |
samartho gatimanvetuṃ pavano garuḍo'pi vā || 4 ||
[Analyze grammar]

evaṃ bruvāṇāṃ tāṃ sītā saramāṃ punarabravīt |
madhuraṃ ślakṣṇayā vācā pūrvaśokābhipannayā || 5 ||
[Analyze grammar]

samarthā gaganaṃ gantumapi vā tvaṃ rasātalam |
avagacchāmyakartavyaṃ kartavyaṃ te madantare || 6 ||
[Analyze grammar]

matpriyaṃ yadi kartavyaṃ yadi buddhiḥ sthirā tava |
jñātumicchāmi taṃ gatvā kiṃ karotīti rāvaṇaḥ || 7 ||
[Analyze grammar]

sa hi māyābalaḥ krūro rāvaṇaḥ śatrurāvaṇaḥ |
māṃ mohayati duṣṭātmā pītamātreva vāruṇī || 8 ||
[Analyze grammar]

tarjāpayati māṃ nityaṃ bhartsāpayati cāsakṛt |
rākṣasībhiḥ sughorābhiryā māṃ rakṣanti nityaśaḥ || 9 ||
[Analyze grammar]

udvignā śaṅkitā cāsmi na ca svasthaṃ mano mama |
tadbhayāccāhamudvignā aśokavanikāṃ gatāḥ || 10 ||
[Analyze grammar]

yadi nāma kathā tasya niścitaṃ vāpi yadbhavet |
nivedayethāḥ sarvaṃ tat paro me syādanugrahaḥ || 11 ||
[Analyze grammar]

sā tvevaṃ bruvatīṃ sītāṃ saramā valgubhāṣiṇī |
uvāca vacanaṃ tasyāḥ spṛśantī bāṣpaviklavam || 12 ||
[Analyze grammar]

eṣa te yadyabhiprāyastasmādgacchāmi jānaki |
gṛhya śatrorabhiprāyamupāvṛttāṃ ca paśya mām || 13 ||
[Analyze grammar]

evamuktvā tato gatvā samīpaṃ tasya rakṣasaḥ |
śuśrāva kathitaṃ tasya rāvaṇasya samantriṇaḥ || 14 ||
[Analyze grammar]

sā śrutvā niścayaṃ tasya niścayajñā durātmanaḥ |
punarevāgamat kṣipramaśokavanikāṃ tadā || 15 ||
[Analyze grammar]

sā praviṣṭā punastatra dadarśa janakātmajām |
pratīkṣamāṇāṃ svāmeva bhraṣṭapadmāmiva śriyam || 16 ||
[Analyze grammar]

tāṃ tu sītā punaḥ prāptāṃ saramāṃ valgubhāṣiṇīm |
pariṣvajya ca susnigdhaṃ dadau ca svayamāsanam || 17 ||
[Analyze grammar]

ihāsīnā sukhaṃ sarvamākhyāhi mama tattvataḥ |
krūrasya niścayaṃ tasya rāvaṇasya durātmanaḥ || 18 ||
[Analyze grammar]

evamuktā tu saramā sītayā vepamānayā |
kathitaṃ sarvamācaṣṭa rāvaṇasya samantriṇaḥ || 19 ||
[Analyze grammar]

jananyā rākṣasendro vai tvanmokṣārthaṃ bṛhadvacaḥ |
aviddhena ca vaidehi mantrivṛddhena bodhitaḥ || 20 ||
[Analyze grammar]

dīyatāmabhisatkṛtya manujendrāya maithilī |
nidarśanaṃ te paryāptaṃ janasthāne yadadbhutam || 21 ||
[Analyze grammar]

laṅghanaṃ ca samudrasya darśanaṃ ca hanūmataḥ |
vadhaṃ ca rakṣasāṃ yuddhe kaḥ kuryānmānuṣo bhuvi || 22 ||
[Analyze grammar]

evaṃ sa mantrivṛddhaiśca mātrā ca bahu bhāṣitaḥ |
na tvāmutsahate moktumartahmarthaparo yathā || 23 ||
[Analyze grammar]

notsahatyamṛto moktuṃ yuddhe tvāmiti maithili |
sāmātyasya nṛśaṃsasya niścayo hyeṣa vartate || 24 ||
[Analyze grammar]

tadeṣā susthirā buddhirmṛtyulobhādupasthitā |
bhayānna śaktastvāṃ moktumanirastastu saṃyuge |
rākṣasānāṃ ca sarveṣāmātmanaśca vadhena hi || 25 ||
[Analyze grammar]

nihatya rāvaṇaṃ saṃkhye sarvathā niśitaiḥ śaraiḥ |
pratineṣyati rāmastvāmayodhyāmasitekṣaṇe || 26 ||
[Analyze grammar]

etasminnantare śabdo bherīśaṅkhasamākulaḥ |
śruto vai sarvasainyānāṃ kampayandharaṇītalam || 27 ||
[Analyze grammar]

śrutvā tu taṃ vānarasainyaśabdaṃ laṅkāgatā rākṣasarājabhṛtyāḥ |
naṣṭaujaso dainyaparītaceṣṭāḥ śreyo na paśyanti nṛpasya doṣaiḥ || 28 ||
[Analyze grammar]