Chapter 34

tathā bruvāṇaṃ saumitriṃ pradīptamiva tejasā |
abravīl lakṣmaṇaṃ tārā tārādhipanibhānanā || 1 ||
[Analyze grammar]

naivaṃ lakṣmaṇa vaktavyo nāyaṃ paruṣamarhati |
harīṇāmīśvaraḥ śrotuṃ tava vaktrādviśeṣataḥ || 2 ||
[Analyze grammar]

naivākṛtajñaḥ sugrīvo na śaṭho nāpi dāruṇaḥ |
naivānṛtakatho vīra na jihmaśca kapīśvaraḥ || 3 ||
[Analyze grammar]

upakāraṃ kṛtaṃ vīro nāpyayaṃ vismṛtaḥ kapiḥ |
rāmeṇa vīra sugrīvo yadanyairduṣkaraṃ raṇe || 4 ||
[Analyze grammar]

rāmaprasādāt kīrtiṃ ca kapirājyaṃ ca śāśvatam |
prāptavāniha sugrīvo rumāṃ māṃ ca paraṃtapa || 5 ||
[Analyze grammar]

suduḥkhaṃ śāyitaḥ pūrvaṃ prāpyedaṃ sukhamuttamam |
prāptakālaṃ na jānīte viśvāmitro yathā muniḥ || 6 ||
[Analyze grammar]

ghṛtācyāṃ kila saṃsakto daśavarṣāṇi lakṣmaṇa |
aho'manyata dharmātmā viśvāmitro mahāmuniḥ || 7 ||
[Analyze grammar]

sa hi prāptaṃ na jānīte kālaṃ kālavidāṃ varaḥ |
viśvāmitro mahātejāḥ kiṃ punaryaḥ pṛthagjanaḥ || 8 ||
[Analyze grammar]

dehadharmaṃ gatasyāsya pariśrāntasya lakṣmaṇa |
avitṛptasya kāmeṣu rāmaḥ kṣantumihārhati || 9 ||
[Analyze grammar]

na ca roṣavaśaṃ tāta gantumarhasi lakṣmaṇa |
niścayārthamavijñāya sahasā prākṛto yathā || 10 ||
[Analyze grammar]

sattvayuktā hi puruṣāstvadvidhāḥ puruṣarṣabha |
avimṛśya na roṣasya sahasā yānti vaśyatām || 11 ||
[Analyze grammar]

prasādaye tvāṃ dharmajña sugrīvārthe samāhitā |
mahān roṣasamutpannaḥ saṃrambhastyajyatāmayam || 12 ||
[Analyze grammar]

rumāṃ māṃ kapirājyaṃ ca dhanadhānyavasūni ca |
rāmapriyārthaṃ sugrīvastyajediti matirmama || 13 ||
[Analyze grammar]

samāneṣvyati sugrīvaḥ sītayā saha rāghavam |
śaśāṅkamiva rohiṣyā nihatvā rāvaṇaṃ raṇe || 14 ||
[Analyze grammar]

śatakoṭisahasrāṇi laṅkāyāṃ kila rakṣasām |
ayutāni ca ṣaṭtriṃśat sahasrāṇi śatāni ca || 15 ||
[Analyze grammar]

ahatvā tāṃśca durdharṣān rākṣasān kāmarūpiṇaḥ |
na śakyo rāvaṇo hantuṃ yena sā maithilī hṛtā || 16 ||
[Analyze grammar]

te na śakyā raṇe hantumasahāyena lakṣmaṇa |
rāvaṇaḥ krūrakarmā ca sugrīveṇa viśeṣataḥ || 17 ||
[Analyze grammar]

evamākhyātavān vālī sa hyabhijño harīśvaraḥ |
āgamastu na me vyaktaḥ śravāttasya bravīmyaham || 18 ||
[Analyze grammar]

tvatsahāyanimittaṃ vai preṣitā haripuṃgavāḥ |
ānetuṃ vānarānyuddhe subahūn hariyūthapān || 19 ||
[Analyze grammar]

tāṃśca pratīkṣamāṇo'yaṃ vikrāntān sumahābalān |
rāghavasyārthasiddhyarthaṃ na niryāti harīśvaraḥ || 20 ||
[Analyze grammar]

kṛtā tu saṃsthā saumitre sugrīveṇa yathāpurā |
adya tairvānarair sarvairāgantavyaṃ mahābalaiḥ || 21 ||
[Analyze grammar]

ṛkṣakoṭisahasrāṇi golāṅgūlaśatāni ca |
adya tvāmupayāsyanti jahi kopamariṃdama |
koṭyo'nekāstu kākutstha kapīnāṃ dīptatejasām || 22 ||
[Analyze grammar]

tava hi mukhamidaṃ nirīkṣya kopāt kṣatajanibhe nayane nirīkṣamāṇāḥ |
harivaravanitā na yānti śāntiṃ prathamabhayasya hi śaṅkitāḥ sma sarvāḥ || 23 ||
[Analyze grammar]