Chapter 23

tataḥ samupajighrantī kapirājasya tanmukham |
patiṃ lokāccyutaṃ tārā mṛtaṃ vacanamabravīt || 1 ||
[Analyze grammar]

śeṣe tvaṃ viṣame duḥkhamakṛtvā vacanaṃ mama |
upalopacite vīra suduḥkhe vasudhātale || 2 ||
[Analyze grammar]

mattaḥ priyatarā nūnaṃ vānarendra mahī tava |
śeṣe hi tāṃ pariṣvajya māṃ ca na pratibhāṣase || 3 ||
[Analyze grammar]

sugrīva eva vikrānto vīra sāhasika priya |
ṛkṣavānaramukhyāstvāṃ balinaṃ paryupāsate || 4 ||
[Analyze grammar]

eṣāṃ vilapitaṃ kṛcchramaṅgadasya ca śocataḥ |
mama cemāṃ giraṃ śrutvā kiṃ tvaṃ na pratibudhyase || 5 ||
[Analyze grammar]

idaṃ tacchūraśayanaṃ yatra śeṣe hato yudhi |
śāyitā nihatā yatra tvayaiva ripavaḥ purā || 6 ||
[Analyze grammar]

viśuddhasattvābhijana priyayuddha mama priya |
māmanāthāṃ vihāyaikāṃ gatastvamasi mānada || 7 ||
[Analyze grammar]

śūrāya na pradātavyā kanyā khalu vipaścitā |
śūrabhāryāṃ hatāṃ paśya sadyo māṃ vidhavāṃ kṛtām || 8 ||
[Analyze grammar]

avabhagnaśca me māno bhagnā me śāśvatī gatiḥ |
agādhe ca nimagnāsmi vipule śokasāgare || 9 ||
[Analyze grammar]

aśmasāramayaṃ nūnamidaṃ me hṛdayaṃ dṛḍham |
bhartāraṃ nihataṃ dṛṣṭvā yannādya śatadhā gatam || 10 ||
[Analyze grammar]

suhṛccaiva hi bhartā ca prakṛtyā ca mama priyaḥ |
āhave ca parākrāntaḥ śūraḥ pañcatvamāgataḥ || 11 ||
[Analyze grammar]

patihīnā tu yā nārī kāmaṃ bhavatu putriṇī |
dhanadhānyaiḥ supūrṇāpi vidhavetyucyate budhaiḥ || 12 ||
[Analyze grammar]

svagātraprabhave vīra śeṣe rudhiramaṇḍale |
kṛmirāgaparistome tvamevaṃ śayane yathā || 13 ||
[Analyze grammar]

reṇuśoṇitasaṃvītaṃ gātraṃ tava samantataḥ |
parirabdhuṃ na śaknomi bhujābhyāṃ plavagarṣabha || 14 ||
[Analyze grammar]

kṛtakṛtyo'dya sugrīvo vaire'sminnatidāruṇe |
yasya rāmavimuktena hṛtamekeṣuṇā bhayam || 15 ||
[Analyze grammar]

śareṇa hṛdi lagnena gātrasaṃsparśane tava |
vāryāmi tvāṃ nirīkṣantī tvayi pañcatvamāgate || 16 ||
[Analyze grammar]

udbabarha śaraṃ nīlastasya gātragataṃ tadā |
girigahvarasaṃlīnaṃ dīptamāśīviṣaṃ yathā || 17 ||
[Analyze grammar]

tasya niṣkṛṣyamāṇasya bāṇasya ca babhau dyutiḥ |
astamastakasaṃruddho raśmirdinakarādiva || 18 ||
[Analyze grammar]

petuḥ kṣatajadhārāstu vraṇebhyastasya sarvaśaḥ |
tāmragairikasaṃpṛktā dhārā iva dharādharāt || 19 ||
[Analyze grammar]

avakīrṇaṃ vimārjantī bhartāraṃ raṇareṇunā |
asrairnayanajaiḥ śūraṃ siṣecāstrasamāhatam || 20 ||
[Analyze grammar]

rudhirokṣitasarvāṅgaṃ dṛṣṭvā vinihataṃ patim |
uvāca tārā piṅgākṣaṃ putramaṅgadamaṅganā || 21 ||
[Analyze grammar]

avasthāṃ paścimāṃ paśya pituḥ putra sudāruṇām |
saṃprasaktasya vairasya gato'ntaḥ pāpakarmaṇā || 22 ||
[Analyze grammar]

bālasūryodayatanuṃ prayāntaṃ yamasādanam |
abhivādaya rājānaṃ pitaraṃ putra mānadam || 23 ||
[Analyze grammar]

evamuktaḥ samutthāya jagrāha caraṇau pituḥ |
bhujābhyāṃ pīnavṛtābhyāmaṅgado'hamiti bruvan || 24 ||
[Analyze grammar]

abhivādayamānaṃ tvāmaṅgadaṃ tvaṃ yathāpurā |
dīrghāyurbhava putreti kimarthaṃ nābhibhāṣase || 25 ||
[Analyze grammar]

ahaṃ putrasahāyā tvāmupāse gatacetanam |
siṃhena nihataṃ sadyo gauḥ savatseva govṛṣam || 26 ||
[Analyze grammar]

iṣṭvā saṃgrāmayajñena nānāpraharaṇāmbhasā |
asminnavabhṛthe snātaḥ kathaṃ patnyā mayā vinā || 27 ||
[Analyze grammar]

yā dattā devarājena tava tuṣṭena saṃyuge |
śātakumbhamayīṃ mālāṃ tāṃ te paśyāmi neha kim || 28 ||
[Analyze grammar]

rājaśrīrna jahāti tvāṃ gatāsumapi mānada |
sūryasyāvartamānasya śailarājamiva prabhā || 29 ||
[Analyze grammar]

na me vacaḥ pathyamidaṃ tvayā kṛtaṃ na cāsmi śaktā hi nivāraṇe tava |
hatā saputrāsmi hatena saṃyuge saha tvayā śrīrvijahāti māmiha || 30 ||
[Analyze grammar]